Xana U Hanyela Swa Namuntlha Kumbe U Hanyela Vumundzuku Lebyi Nga Heriki?
“Hi ponisiwile hi ri ni ku langutela loku.”—VARHOMA 8:24.
1. Xana Vaepicurus a va dyondzisa yini, naswona filosofi yoleyo yi va khumbe njhani Vakreste van’wana?
MUAPOSTOLA PAWULO u tsalele Vakreste lava tshamaka eKorinto a ku: “Swi endlisa ku yini leswaku van’wana exikarhi ka n’wina va ku, ku hava ku pfuka ka vafi, xana?” (1 Vakorinto 15:12) Swi vonaka onge Vakreste va lembe-xidzana ro sungula a va ngheniwe hi filosofi leyi nga ni khombo ya ntlhari ya Mugriki leyi vuriwaka Epicurus. Xisweswo Pawulo u kokele nyingiso edyondzweni ya Epicurus a ku: “A hi dyeni hi nwa, hikuva mundzuku ha fa!” (1 Vakorinto 15:32) Hikwalaho ko monya mhaka ya leswaku ku nga va ni vutomi endzhaku ka rifu, valandzeri va mutivi loyi wa filosofi a va kholwa leswaku ku tiphina hi swilo swa nyama hi wona nchumu wu ri woxe kumbe nchumu lowukulu evuton’wini bya munhu. (Mintirho 17:18, 32) Filosofi ya Epicurus a yi khutaza vutianakanyi, ku monya ni ku tsongahata.
2. (a) Ha yini a swi ri ni khombo swinene ku ala mpfuko-wa-vafi? (b) Pawulo u ri tiyise njhani ripfumelo ra Vakreste va le Korinto?
2 Ku ariwa loku ka mpfuko-wa-vafi a ku khumba swilo swo tala. Pawulo u te: “Loko ku ri hava ku pfuka ka vafi, Kriste hi xiviri, na yena a nga pfuxiwanga. Kutani loko Kriste a nga pfuxiwanga eku feni, ku dyondzisa ka hina a ku vuli nchumu, . . . Loko eka Kriste, hi nga languteli swin’wana kambe ho langutela swa vutomi lebyi ntsena, hi vanhu lava nga ni khombo leri tlulaka ra vanhu hinkwavo.” (1 Vakorinto 15:13-19) Ina, handle ka ntshembo wa vumundzuku lebyi nga heriki, Vukreste a byi ta va byi nga “vuli nchumu.” A byi ta va byi ri hava xikongomelo. Kutani, a swi hlamarisi leswi hikwalaho ka nkucetelo lowu wa mianakanyo ya vuhedeni, vandlha ra le Korinto ri sunguleke ku va ni swiphiqo swo tala. (1 Vakorinto 1:11; 5:1; 6:1; 11:20-22) Hikokwalaho, Pawulo a a lava ku tiyisa ripfumelo ra vona eka mpfuko-wa-vafi. Loko a tshaha Matsalwa ni ku tirhisa swikombiso hi ndlela leyi pakanisaka, u swi kombise kahle leswaku mpfuko-wa-vafi a hi ntsheketo, kambe i ntiyiso lowu nga ta hetiseka hi xiviri. Hikwalaho ka mhaka leyi, u swi kotile ku khutaza vapfumeri-kulobye a ku: “Tiyani swinene mi nga tsekatsekeni; tiyiselani swinene, mi tirhela Hosi masiku hinkwawo, mi ri karhi mi swi tiva leswaku eHosini mintirho ya n’wina a yi nga weli ehansi.”—1 Vakorinto 15:20-58.
“Tshamani Mi Tilunghisile”
3, 4. (a) Hi ku ya hi Petro, hi rihi langutelo leri nga ni khombo leri nga ta khoma van’wana emasikwini ya makumu? (b) I yini leswi hi faneleke hi hambeta hi titsundzuxa swona?
3 Namuntlha, vo tala va ni langutelo leri hoxeke, ra ku hanyela swa namuntlha. (Vaefesa 2:2) Swi hi laha muapostola Petro a vhumbeke hakona. U vulavule hi “vasandzi lava fambisiwaka hi ku navela ka vona . . . va ku: ‘Swi helele kwihi, swa loyi ku nga tshembisiwa leswaku ú ta ta, xana? Hi mpfhuka vatatana va nga tietlelela, swilo hinkwaswo swa ha ya emahlweni hilaha a swi famba hakona, ku sukela loko misava yi tumbuluka.’” (2 Petro 3:3, 4) Loko vagandzeri va ntiyiso va hundzukela eka langutelo rero, va nga ha ‘tsana kutani va nga veki mihandzu.’ (2 Petro 1:8) Lexi tsakisaka, sweswo a swi tano hi vunyingi bya vanhu va Xikwembu namuntlha.
4 A swi hoxanga ku navela leswaku mafambiselo lama nga kona ya swilo ma fika emakumu. Tsundzuka ku navela loku vaapostola va Yesu hi voxe va ku kombiseke: “Hosi, xana hi wona nkarhi lowu u nga ta pfuxa mfumo wa lsraele ke?” Yesu u hlamule a ku: “A swi mi fanelanga ku tiva tinguva, hambi yi ri minkarhi leyi Tatana a nga tihlawulela yona hi vukulukumba bya yena.” (Mintirho 1:6, 7) Marito wolawo ma tamele rungula-nkulu leri a tshameke a ri vula eNtshaveni ya Mitlhwari loko a te: “A mi tivi siku leri Hosi ya n’wina yi nga ta ta ha rona. . . . N’wana-wa-Munhu ú ta ta enkarhini lowu mi nga wu ehleketiki.” (Matewu 24:42, 44) Hi fanele hi tshama hi ri karhi hi titsundzuxa ndzayo yoleyo! Van’wana va nga phasiwa hi mianakanyo ya leswaku, ‘Kumbexana ndzi fanele ndzi kokanyana moya, ndzi nga hiseki ngopfu.’ Vona xihoxo xo tano! Tsundzuka ta Yakobo na Yohane, “va-ka-dzindzatilo.”—Marka 3:17.
5, 6. Hi tihi tidyondzo leti hi nga ti kumaka eka swikombiso swa Yakobo na Yohane?
5 Ha swi tiva leswaku Yakobo a a ri muapostola la hisekaka swinene. (Luka 9:51-55) Loko vandlha ra Vukreste se ri simekiwile, u fanele a tirhe hi matimba. Kambe loko Yakobo a ha ri ntsongo, Heroda Agrippa wo Sungula u n’wi dlele. (Mintirho 12:1-3) Xana hi anakanya leswaku Yakobo, loko a ri karhi a fa swi nga languteriwanga, u tisorile leswi a a chivirika swinene, leswi a tshameke a tinyiketela swinene evutirhelini bya yena? Nikatsongo! Entiyisweni a a tsakile leswi a tirhiseke malembe ya yena yo koma lawa a ma hanyeke entirhweni wa Yehovha. Sweswi, ku hava la tivaka leswaku kumbexana hi nga tshuka hi fa swi nga rindzeriwanga. (Eklesiasta 9:11; ringanisa Luka 12:20, 21.) Kutani swi le rivaleni leswaku i vutlhari ku tshama hi ri karhi hi chivirika entirhweni wa Yehovha. Hi ndlela yoleyo hi ta tiendlela vito lerinene na yena ni ku tshama hi langutele vutomi lebyi nga heriki enkarhini lowu taka.—Eklesiasta 7:1.
6 Ku ni xikombiso lexinene xa muapostola Yohane, loyi a ri kona loko Yesu a khutaze swinene a ku, “Hitekani!” (Matewu 25:13; Marka 13:37; Luka 21:34-36) Yohane u swi tekele enhlokweni sweswo, a ri karhi a tirha hi ku hiseka ku ringana malembe-xikhume layo tala. Entiyisweni, swi tikomba a ri yena la hanyeke ku tlula vaapostola lavan’wana hinkwavo. Hi nkarhi lowu Yohane se a dyuhele swinene, kutani a languta makume ya malembe lama hundzeke lava a endleke ntirho wa vutshembeki ha wona, xana u swi langute ku ri xihoxo, xana a tlange hi vutomi byakwe kumbe a a nga byi tirhisanga kahle? A swi tano nikatsongo! A a ha langutele enkarhini lowu taka hi tinghitsi. Loko Yesu la pfuxiweke eku feni a te, “Hakunene, ndza ta sweswi-sweswi,” Yohane u hlamule hi ku hatlisa a ku, “Amen, tana Hosi Yesu!” (Nhlavutelo 22:20) Entiyisweni Yohane a a nga hanyeli swa namuntlha, a navela ku hanya vutomi bya ku tifelela ni lebyi rhuleke, lebyi ‘tolovelekeke.’ A a tiyimisele ku hambeta a tirha evuton’wini bya yena hinkwabyo naswona hi matimba hinkwawo, ku nga khathariseki leswaku Hosi yi ta fika rini. Ku vuriwa yini hi hina?
Swisekelo Swa Ku Pfumela eVuton’wini Lebyi Nga Heriki
7. (a) Xana ntshembo wa vutomi lebyi nga heriki ‘wu nyikeriwe njhani eminkarhini ya khale’? (b) Xana Yesu u kombise njhani leswaku ntshembo wa vutomi lebyi nga heriki wu kona?
7 Tiyiseka leswaku ntshembo wa vutomi lebyi nga heriki a hi norho lowu endliweke hi vanhu kumbe mijamujamu. Hilaha Tito 1:2 yi vulaka hakona, ku tinyiketela ka hina eka Xikwembu ku sekeriwe eka ‘ntshembo wa vutomi lebyi nga heriki, lebyi Xikwembu lexi nga hembiki xi hi tshembiseke byona hi mpfhuka ku tumbuluka misava.’ A ku ri xikongomelo xa Xikwembu xo sungula leswaku vanhu hinkwavo lava yingisaka va hanya hilaha ku nga heriki. (Genesa 1:28) Ku hava lexi nga sivelaka xikongomelo lexi, hambi ku ri vuxandzuki bya Adamu na Evha. Hilaha swi tsariweke hakona eka Genesa 3:15, hi ku hatlisa Xikwembu xi tshembise ku tisa ‘mbewu’ leyi nga ta herisa ku karhateka hinkwako loku weleke vanhu. Loko ‘mbewu’ kumbe Mesiya, Yesu a fika, u endle leswaku ntshembo wa vutomi lebyi nga heriki wu va yin’wana ya tidyondzo ta yena ta xisekelo. (Yohane 3:16; 6:47, 51; 10:28; 17:3) Hi ku nyikela vutomi bya yena lebyi hetisekeke tanihi nkutsulo, Kreste u kume mfanelo ya le nawini yo nyika vanhu vutomi lebyi nga heriki. (Matewu 20:28) Van’wana va vadyondzisiwa va yena, lava endlaka 144 000 loko va helerile, va ta hanya ematilweni hilaha ku nga heriki. (Nhlavutelo 14:1-4) Xisweswo vanhu lava tshameke va va vanhu lava faka va ta “funengela leswi nga fiki”!—1 Vakorinto 15:53.
8. (a) Xana “leswi nga fiki” i yini, naswona ha yini Yehovha a swi nyika lava 144 000? (b) Hi wihi ntshembo lowu Yesu a wu vekeleke “tinyimpfu tin’wana”?
8 “Leswi nga fiki” a swi vuli ku ka u nga fi ntsena. Swi katsa “matimba ya vutomi lebyi nga onhakiki.” (Vaheveru 7:16; ringanisa Nhlavutelo 20:6.) Kutani, i yini leswi Xikwembu xi swi hetisisaka hi ku nyika nyiko yoleyo leyi xiyekaka? Tsundzuka ntlhontlho wa Sathana wa leswaku ku hava xivumbiwa xa Xikwembu lexi nga swi kotaka ku tshembeka. (Yobo 1:9-11; 2:4, 5) Hi ku nyika lava 144000 vutomi lebyi nga riki na ku fa, Xikwembu xi kombisa ku wu tshemba swinene ntlawa lowu lowu hlamuleke ntlhontlho wa Sathana hi ndlela leyi xiyekaka swinene. Kambe, ku vuriwa yini hi vanhu lavan’wana hinkwavo? Yesu u byele swirho swo sungula swa “ntlhambinyana” lowu wa vadya-ndzhaka va Mfumo leswaku “[sw]i ta tshama eswiluvelweni, [sw]i avanyisa tinyimba ta Israele leta 12.” (Luka 12:32; 22:30) Leswi swi kombisa leswaku van’wana va ta kuma vutomi lebyi nga heriki emisaveni tanihi vafumiwa va Mfumo wa xona. Hambileswi “tinyimpfu tin’wana” ti nga nyikiwangiki leswi nga fiki, ti kuma “[vutomi] lebyi nga heriki.” (Yohane 10:16; Matewu 25:46) Xisweswo vutomi lebyi nga heriki i ntshembo wa Vakreste hinkwavo. A hi ntsheketo, kambe i nchumu lowu tiyeke lowu tshembisiweke hi “Xikwembu lexi nga riki na ku hemba” lexi byi hakeleleke hi ngati ya Yesu, ya risima.—Tito 1:2.
Xana Swi Ta Teka Nkarhi Wo Leha Ku Hetiseka?
9, 10. Hi swihi swikombiso leswi nga erivaleni swa leswaku hi le kusuhi ni makumu?
9 Muapostola Pawulo u vhumbe leswaku “minkarhi yo nonon’hwa” a yi ta kombisa leswaku hi fike “emasikwini ya makumu” hakunene. Tanihi leswi vandla ra vanhu lava hi rhendzeleke ri yaka ri pfumala rirhandzu, ri va ni makwanga, ri rhandza ku titsakisa ni ku nga xi xiximi Xikwembu, xana a hi swi xiyi leswaku siku ra Yehovha ra ku avanyisa mafambiselo lawa yo biha ya swilo ri tshinela hi ku hatlisa? Tanihi leswi madzolonga ni rivengo swi yaka swi andza, xana a hi ku voni ku hetiseka ka marito ya Pawulo eka swilo leswi hi rhendzeleke, loko a ya emahlweni a ku: “Vanhu lavo biha ni vakanganyisi va ta ya emahlweni va nyanya ku biha”? (2 Timotiya 3:1-5, 13) Hi ntshembo lowukulu, van’wana va nga ha vulavula hi ‘Ku rhula ni nsirhelelo,’ kambe mintshembo yoleyo hinkwayo ya ku rhula yi ta helela empfhukeni, hikuva “hi wona nkarhi lowu ku onhaka ku nga ta va wela henhla hi xitshuketa, tanihi ku lumiwa ka wansati la nga kusuhi ni ku kuma n’wana; va nga ka va nga poni.” A hi tshikiwanga emunyameni malunghana ni leswi minkarhi leyi hi nga eka yona yi vulaka swona. Hikwalaho, “a hi hitekeni, hi tikhoma.”—1 Vatesalonika 5:1-6.
10 Ku tlula kwalaho, Bibele yi kombisa leswaku masiku ya makumu ‘i nkarhi lowu komeke.’ (Nhlavutelo 12:12; ringanisa 17:10.) Xiyenge lexikulu xa ‘nkarhi [wolowo] lowu komeke’ xi herile. Hi xikombiso, vuprofeta bya Daniyele byi wu hlamusela hi ku pakanisa nkwetlembetano lowu nga exikarhi ka “hosi ya le ṅwalungwini” ni “hosi ya le ḍongeni” loku hambeteke ku ta fika eka lembe-xidzana leri. (Daniyele 11:5, 6) Leswi nga sala ku hetiseka i nhlaselo wa “hosi ya le ṅwalungwini,” lowu boxiwaka eka Daniyele 11:44, 45.—Vona Xihondzo xo Rindza xa July 1, 1987, November 1, 1993, leswaku u kuma nhlamuselo ya vuprofeta lebyi.
11. (a) Xana Matewu 24:14 yi hetiseke ku fikela kwihi? (b) Xana marito ya Yesu lama rhekhodiweke eka Matewu 10:23 ma kombisa yini?
11 Nakambe Yesu u vhumbe leswaku “Evhangeli leyi ya Mfumo yi ta twarisiwa emisaveni hinkwayo, leswaku yi va vumbhoni eka vanhu va matiko hinkwawo; kutani hi kona makumu ma nga ta fika.” (Matewu 24:14) Namuntlha, Timbhoni ta Yehovha ti endla ntirho wa tona ematikweni ya 233, eswihlaleni ni le tindhawini tin’wana. I ntiyiso leswaku ta ha ri kona tindhawu leti nga si fikeleriwaka, naswona kumbexana hi nkarhi wa Yehovha lowu faneleke, nyangwa wo ti fikelela wu ta pfuleka. (1 Vakorinto 16:9) Nakambe, marito ya Yesu lama rhekhodiweke eka Matewu 10:23 ma tiyisa nhlana: “N’wana-wa-Munhu ú ta humelela, mi nga si hlanganisa miti hinkwayo ya Israele.” Loko mahungu lamanene ma twarisiwile emisaveni hinkwayo hi ku helela, a hi nge swi fikeleli hinkwaswo swiyenge swa misava hi hexe hi rungula ra Mfumo emahlweni ko va Yesu “[a] humelela” tanihi Muavanyisi.
12. (a) Xana i ku ‘fungha’ kwihi loku ku vulavuriwaka ha kona eka Nhlavutelo 7:3? (b) Xana ku hunguteka ka nhlayo ya vatotiwa emisaveni ku kombisa yini?
12 Xiya tsalwa ra Nhlavutelo 7:1, 3 leri vulaka leswaku “timheho ta mune” ta ndzoviso ti siveriwile “ku kondza loko hi ta fungha malandza ya Xikwembu xa hina hi mfungho emimombyeni ya vona.” Loku a hi ku fungha loko rhanga, loku endlekaka loko lava 144 000 va amukela xirhambo xo ya etilweni. (Vaefesa 1:13) I ku funghiwa ko hetelela, laha se va kombisiwe hi ndlela leyi nga hundzukiki, leswaku i “malandza ya Xikwembu xa hina” lama ringiweke ni ku kumeka ma tshembekile. Nhlayo ya vana va Xikwembu va xiviri lava totiweke lava ha hanyaka yi hunguteke swinene. Ku tlula kwalaho, Bibele yi swi veka erivaleni leswaku ku “hikwalaho ka vahlawuriwa” leswi ku sungula ka nhlomulo lowukulu ku nga ta ‘hungutiwa.’ (Matewu 24:21, 22) Vunyingi bya lava tivulaka vatotiwa va dyuhele swinene. Nakambe, xana leswi a swi kombisi swona leswaku makumu ma tshinele?
Mulanguteri La Tshembekeke
13, 14. Hi byihi vutihlamuleri bya ntlawa wa mulanguteri?
13 Hi nkarhi lowu fanaka, hi endla kahle loko hi landzela nkongomiso wa “nandza la tshembekaka.” (Matewu 24:45) Ku tlula dzana ra malembe, “nandza” wa manguva lawa a a ri karhi a tirha hi vutshembeki tanihi “mulanguteri.” (Ezekiyele 3:17-21) Xihondzo xo Rindza xa May 1, 1984, xi te: “Mulanguteri loyi u valanga leswi swiendlakalo swi humelerisaka swona eku hetisekeni ka vuprofeta bya Bibele, a huwelela xitsundzuxo xa ‘nhlomulo lowukulu lowu nga si tshamaka wu va kona hi mpfhuka misava yi tumbuluka’ lowu tshinelaka ni ku huwelela ‘mahungu lamanene ya ku rhula.’”—Matewu 24:21; Esaya 52:7.
14 Tsundzuka: I ntirho wa mulanguteri ku vika “leši a ši v̌onaka!” (Esaya 21:6-8) Eminkarhini ya Bibele mulanguteri a a fanele a ba hungwe ro tsundzuxa niloko khombo leri nga tshukaka ri va kona ra ha ri kule swinene naswona ri nga vonaki. (2 Tihosi 9:17, 18) Swi le rivaleni leswaku timhalamhala to lemukisa leti nga riki ta ntiyiso a ti biwa eminkarhini yoleyo. Kambe mulanguteri lonene a a nga ta tshika ku vulavula hi ku chava ku khomisiwa tingana. Loko yindlu ya wena yo va yi ri eku tshweni, xana a wu ta titwisa ku yini loko vatimi va ndzilo vo ka va nga humeleli hikwalaho ka leswi va anakanyaka leswaku kumbexana xilemukiso xexo i xa vunwa? E-e, hi langutele leswaku vavanuna volavo va angula hi ku copeta ka tihlo eka xikombiso xin’wana ni xin’wana lexi vikaka khombo! Hi ndlela leyi fanaka, ntlawa wa mulanguteri a wu vulavula loko swiyimo swi lava leswaku wu endla tano.
15, 16. (a) Hikwalaho ka yini ku endliwa mindzulamiso eka matwisiselo ya hina ya vuprofeta? (b) I yini leswi hi nga swi dyondzaka eka malandza ya Xikwembu yo tshembeka lawa a ma ri ni matwisiselo lama hoxeke eka vuprofeta byin’wana?
15 Kambe loko swiendlakalo swi ri karhi swi ya emahlweni, hi ya hi twisisa vuprofeta hi ndlela yo antswa swinene. Matimu ma komba leswaku a swi talanga leswaku vuprofeta bya Xikwembu byi twisisiwa kahle loko byi nga si kala byi hetiseka. Xikwembu xi byele Abram hi ku kongoma leswaku a wu ta va nkarhi wo tanihi kwihi lowu mbewu ya yena a yi ta “luv̌ela e tikweni le’ri nga [riki] ra v̌ona,” ku nga malembe ya 400. (Genesa 15:13) Hambiswiritano, Muxe u tinyiketele leswaku a va mukutsuri a ha ri ntsongo.—Mintirho 7:23-30.
16 Nakambe xiya vuprofeta bya Mesiya. Hi ku languta leswi hundzeke, swi lo tlangandla erivaleni leswaku rifu ra Mesiya ni ku pfuxiwa ka yena eku feni a swi vhumbiwile. (Esaya 53:8-10) Kambe, vadyondzisiwa va Yesu hi voxe a va tsandzeka ku twisisa mhaka leyi. (Matewu 16:21-23) A va nga swi lemuki leswaku Daniyele 7:13, 14 a yi ta hetiseka eka pa·rou·siʹa, ya Kreste ya le nkarhini lowu taka, kumbe ‘vukona.’ (Matewu 24:3) Kutani ku hlayela ka vona a ku ri endzhaku hi nkarhi wa kwalomu ka malembe ya 2000, loko va vutisa Yesu va ku: “Hosi, xana hi wona nkarhi lowu u nga ta pfuxa mfumo wa lsraele ke?” (Mintirho 1:6) Hambi ku ri endzhaku ka loko vandlha ra Vukreste ri simekiwile hi ku helela, mianakanyo leyi hoxeke ni ku langutela loku hoxeke ku hambete ku va kona. (2 Vatesalonika 2:1, 2) Hambileswi van’wana nkarhi na nkarhi a va va ni langutelo leri hoxeke, handle ko kanakana Yehovha u katekise ntirho wa vapfumeri volavo va lembe-xidzana ro sungula!
17. Xana hi fanele hi yi languta njhani mindzulamiso leyi endliwaka malunghana ni matwisiselo ya hina ya Matsalwa?
17 Hilaha ku fanaka ntlawa wa mulanguteri wa namuntlha wu boheka ku lulamisa langutelo ra wona nkarhi na nkarhi. Kambe, u kona loyi a nga kanakanaka leswaku Yehovha u katekise “nandza lowo tshembeka”? Handle ka sweswo, xana mindzulamiso leyi endliweke a hi leyi nga nyawuriki? Matwisiselo ya hina ya xisekelo ya Bibele a ma hundzukanga. Ntshembo wa hina wa leswaku hi hanya emasikwini ya makumu wu tiye ku tlula rini na rini!
Ku Hanyela Vumundzuku Lebyi Nga Heriki
18. Ha yini hi fanele hi papalata ku hanyela swa namuntlha ntsena?
18 Misava yi nga ha ku, ‘A hi dyeni hi tlhela hi nwa, hikuva mundzuku hi ta fa,’ kambe leri a ri fanelanga ri va langutelo ra hina. Hikwalaho ka yini u tikarhatela mintsako ya hava leyi u nga ha yi kumaka evuton’wini bya sweswi, ematshan’wini yo tirhela vumundzuku lebyi nga heriki? Ntshembo wolowo, hambi i wa vutomi lebyi nga riki na ku fa etilweni kumbe vutomi lebyi nga heriki emisaveni, a hi norho, a hi ntsheketo. I ntiyiso lowu Xikwembu “lexi nga riki na ku hemba” xi wu tshembiseke. (Tito 1:2) Ku ni vumbhoni lebyikulu bya leswaku ku hetiseka ka ntshembo wa hina ku le kusuhi swinene! “Nkarhi a wa ha ri kona.”—1 Vakorinto 7:29.
19, 20. (a) Yehovha u yi languta njhani mintirho ya ku tirhandzela leyi hi yi endleke hikwalaho ka Mfumo? (b) Ha yini hi fanele hi anakanya hi swilo leswi nga heriki?
19 I ntiyiso, mafambiselo lawa ma teke nkarhi wo leha ku tlula hi laha vo tala a va anakanya leswaku swi ta va hakona. Vanhu va nga ri vangani va nga ha vona onge loko a va swi tivile ka ha ri emahlweni, a va ta va va nga tikarhatanga hi ndlela leyi. Kambe munhu a nga fanelanga a tisola leswi a endleke tano. Phela, ku endla swilo swo karhi hi ku tirhandzela i xiphemu lexikulu xa ku va Mukreste. Vakreste ‘va titshika.’ (Matewu 16:24) A hi fanelanga hi vona onge matshalatshala ya hina yo tsakisa Xikwembu i ya hava. Yesu u tshembisile a ku: “Un’wana ni un’wana la tshikeke muti wa yena, kumbe makwavo wa xinuna kumbe wa xisati, kumbe mana wa yena, kumbe tata wa yena, kumbe vana, kumbe masimu, hikwalaho ka mina ni hikwalaho ka Evhangeli, ú ta nyikiwa swilo leswi ka dzana eminkarhini ya sweswi . . . kutani eminkarhini leyi taka, ú ta nyikiwa vutomi lebyi nga heriki.” (Marka 10:29, 30) Enkarhini lowu nga vaka gidi ra malembe ku sukela sweswi, xana ntirho wa wena, yindlu ya wena, mali ya wena leyi nga ebangini, xana swi ta va swi ri ni ntikelo wo tanihi kwihi? Phela, swilo leswi u nga swi endlela Yehovha hi ku tirhandzela swi ta tama swa ha ri swa nkoka hambi eka malembe ya timiliyoni lama taka ku sukela sweswi—ni le ka malembe ya gidi ra timiliyoni ku sukela sweswi! “Hikuva Xikwembu a xi na mona, xi nga ka xi nga rivali ntirho wa n’wina.”—Vaheveru 6:10.
20 Hikokwalaho, a hi tshameni hi langutele swilo leswi nga heriki, hi veka mahlo ya hina, “ku nga ri eka leswi voniwaka, kambe eka leswi nga voniwiki; hikuva leswi voniwaka i swa nkarhinyana ntsena, kasi leswi nga voniwiki i swa minkarhi hinkwayo.” (2 Vakorinto 4:18) Muprofeta Habakuku u tsarile: “Hlav̌utelo leyo ya ha ṭhamele nkari wa kona, kambe yi ta hatlisa e ku heteleleni, yi nga ka yi nga šisi. Hambi yi nga hlwela, u yi langutela, hikuv̌a yi ta endlakala ŝinene, yi nga ka yi nga hlweri.” (Habakuku 2:3) Xana ‘ku hambeta ka hina hi langutela’ makumu swi yi khumba njhani ndlela leyi hi byarhaka ha yona vutihlamuleri bya hina bya munhu hi xiyexe ni vutihlamuleri bya hina bya ndyangu? Xihloko xa hina lexi landzelaka xi ta vulavula hi timhaka leti.
Tinhla Ta Mpfuxeto
◻ Xana vanhu va nga ri vangani namuntlha va khumbeke njhani hi leswi makumu ya mafambiselo lawa ya swilo ma vonakaka ma hlwela?
◻ Hi xihi xisekelo xa ntshembo wa hina wa vutomi lebyi nga heriki?
◻ Hi fanele hi swi languta njhani, leswi hi ku tirhandzela, hi swi endleke ku seketela swilaveko swa Mfumo?
[Xifaniso lexi nga eka tluka 15]
Ntirho wa ku chumayela emisaveni hinkwayo wu fanele wu hetiwa makumu ma nga si fika