Vakreste Ni Misava Ya Vanhu
“Tirhisanani ni va le handle hi ku tlhariha.”—VAKOLOSA 4:5.
1. Xana Yesu u vule yini malunghana ni valandzeri vakwe ni misava?
EXIKHONGELWENI xakwe lexi yaka eka Tata wakwe la nge tilweni, Yesu u vule leswi malunghana ni valandzeri vakwe: “Misava yi va vengile, hikuva a hi va misava, tanihi leswi na mina ndzi nga riki wa misava.” Kutani u engeterile a ku: “A ndzi kombeli leswaku u va susa emisaveni, kambe hi leswaku u va lwela eka Lowo biha.” (Yohane 17:14, 15) Vakreste a va nga ta tihambanisa ni misava hi xiviri—hi xikombiso, hi ku ya tshama va ri voxe endhawini ya tinghwendza. Ematshan’weni ya sweswo, Kreste u “va rhumile emisaveni” leswaku va ta va timbhoni takwe “ku ya fika emakun’wini ya misava.” (Yohane 17:18; Mintirho 1:8) Hambiswiritano, u kombele Xikwembu leswaku xi va langutela hikuva Sathana, “mufumi wa misava leyi,” a a ta hlohlotela leswaku va vengiwa hikwalaho ka vito ra Kreste.—Yohane 12:31; Matewu 24:9.
2. (a) Xana Bibele yi ri tirhisa njhani rito leri nge “misava”? (b) Xana Yehovha u ni langutelo rihi lerinene malunghana ni misava?
2 EBibeleni rito leri nge “misava” (Xigriki, koʹsmos) hakanyingi ri kombisa vandla ra vanhu lava nga lulamangiki, lava nga le “hansi ka matimba ya Lowo biha.” (1 Yohane 5:19) Tanihi leswi Vakreste va fambisanaka ni mimpimanyeto ya Yehovha ni ku tlhela va yingisa xileriso xo chumayela mahungu lamanene ya Mfumo wa Xikwembu emisaveni, minkarhi yin’wana swa va nonon’hwela ku tirhisana ni misava. (2 Timotiya 3:12; 1 Yohane 3:1, 13) Hambiswiritano, rito leri nge koʹsmos ri tlhela ri tirhisiwa eMatsalweni ku hlamusela ndyangu wa vanhu hi ku angarhela. Loko a vulavula hi misava emhakeni leyi, Yesu u te: “Xikwembu xi rhandzile misava swonghasi, xi ko xi nyika N’wana wa xona la nga un’we, leswaku un’wana ni un’wana la pfumelaka ka yena, a nga lovi, kambe a va ni vutomi lebyi nga heriki. Xikwembu a xi rhumanga N’wana wa xona emisaveni ku ta avanyisa misava, kambe a ku ri ku endlela leswaku misava yi ta ponisiwa ha yena.” (Yohane 3:16, 17; 2 Vakorinto 5:19; 1 Yohane 4:14) Hikwalaho, hambileswi a vengaka swilo swa fambiselo ra Sathana lero homboloka, Yehovha u kombise rirhandzu rakwe eka vanhu hi ku rhumela N’wana wakwe emisaveni leswaku a ta ponisa hinkwavo lava nga ta “ta eku hundzukeni.” (2 Petro 3:9; Swivuriso 6:16-19) Langutelo ra Yehovha lerinene malunghana ni misava ri fanele ri kongomisa vagandzeri va yena.
Xikombiso Xa Yesu
3, 4. (a) Hi rihi langutelo leri Yesu a a ri na rona malunghana ni vuhosi? (b) Xana Yesu u yi langute njhani misava ya vanhu?
3 Emahlweninyana ka rifu rakwe, Yesu u byele Pontiyo Pilato a ku: “Mfumo wa mina a hi wa misava leyi.” (Yohane 18:36) Hi ku pfumelelana ni marito lawa, eku sunguleni Yesu u arile loko Sathana a n’wi nyika vulawuri ehenhla ka mimfumo ya misava, naswona u arile loko Vayuda va lava ku n’wi veka hosi. (Luka 4:5-8; Yohane 6:14, 15) Kambe, Yesu u kombise rirhandzu lerikulu eka misava ya vanhu. Xikombiso xa mhaka leyi xi vikiwe hi muapostola Matewu: “Loko a vona mintshungu ya vanhu, a va twela vusiwana, hikuva a va karhele, va tshamile ehansi, va fana ni tinyimpfu leti nga riki na murisi.” Hikwalaho ka rirhandzu, u chumayele vanhu emitini ni le swimitanini swa vona. U va dyondzisile ni ku horisa mavabyi ya vona. (Matewu 9:36) Nakambe a a karhatekela swilaveko swa nyama swa lava teke ku ta dyondzisiwa hi yena. Ha hlaya: “Yesu a vitana vadyondzisiwa va yena, a ku ka vona: ‘Ndzi twela ntshungu lowu evusiwana, hikuva va xwile masiku manharhu na mina, kutani a va ha ri na swakudya; a ndzi lavi ku va tlherisela emakaya va ri ni ndlala, hikuva va nga wa endleleni.’” (Matewu 15:32) Mawaku nkhathalelo wo tano wa rirhandzu!
4 Vayuda a va ri ni rivengo lerikulu eka Vasamariya, kambe Yesu u vulavule nkarhi wo leha ni wansati wa Musamariya a tlhela a heta masiku mambirhi a nyikela vumbhoni lebyi heleleke emutini wa Samariya. (Yohane 4:5-42) Hambileswi Xikwembu xi n’wi rhumeke eka “Vaisraele, lava lahlekeke kukota tinyimpfu,” minkarhi yin’wana Yesu a a angula kahle loko vanhu lava nga riki Vayuda va kombisa ripfumelo. (Matewu 8:5-13; 15:21-28) Ina, Yesu u swi kombisile leswaku swa koteka ‘ku nga vi xiphemu xa misava’ kambe hi nkarhi lowu fanaka u kombisa rirhandzu eka misava ya vanhu, ku nga vanhu hi voxe. Xana na hina hi kombisa ntwela-vusiwana lowu fanaka eka vanhu, laha hi tshamaka na vona, laha hi tirhaka kona kumbe laha hi xavaka kona? Xana ha khumbeka hi vuhlayiseki bya vona—ku nga ri swilaveko swa moya ntsena kambe ni swilaveko swin’wana loko hi ri ni matimba yo va pfuna? Yesu u swi endlile, naswona hi ku endla tano, u pfule ndlela yo dyondzisa vanhu malunghana ni Mfumo. I ntiyiso, a hi nge ma endli masingita hilaha Yesu a endleke hakona. Kambe xiendlo xa tintswalo hakanyingi xa ma endla, hi ndlela yo fanekisela, xi herisa xihlawuhlawu.
Langutelo Ra Pawulo Hi Vanhu “Va Le Handle”
5, 6. Xana muapostola Pawulo u tirhisane njhani ni Vayuda lava a va ri “va le handle”?
5 Emapapileni yo tala ya yena, muapostola Pawulo u vulavule hi vanhu “va le handle,” ku nga vanhu lava nga riki Vakreste, hambi i Vayuda kumbe Vamatiko. (1 Vakorinto 5:12; 1 Vatesalonika 4:12; 1 Timotiya 3:7) Xana u tirhisane njhani ni vanhu lavo tano? U ‘tiendlile hinkwaswo eka vanhu va mixaka hinkwayo, leswaku hi tindlela hinkwato a ta kota ku ponisa van’wana.’ (1 Vakorinto 9:20-22) Loko a fika emutini, mukhuva wa yena a ku ri ku sungula hi ku ya eka Vayuda lava tshamaka kwalaho. Xana a va tshinelerisa ku yini? Hi vuxiya-xiya ni hi vutlhari a a nyikela switiyisekiso leswi khorwisaka swa Bibele swa leswaku Mesiya u tile, u fe rifu ra gandzelo, ni leswaku u pfuxiwile eku feni.—Mintirho 13:5, 14-16, 43; 17:1-3, 10.
6 Hi ndlela leyi Pawulo u tirhise vutivi lebyi Vayuda a a va ri na byona malunghana ni Nawu ni vaprofeta, leswaku a ta kota ku va dyondzisa hi ta Mesiya ni Mfumo wa Xikwembu. Naswona u swi kotile ku endla leswaku van’wana va khorwiseka. (Mintirho 14:1; 17:4) Ku nga khathariseki nkaneto wa varhangeri va Vayuda, Pawulo u kombise Vayuda-kulobye rirhandzu loko a tsale a ku: “Vamakwerhu, ku navela ka mbilu ya mina ni xikhongelo lexi ndzi va khongelelaka ha xona [Vayuda] eka Xikwembu, hileswaku va ponisiwa. Ndzi nga va mbhoni ya vona leswaku va hisekela Xikwembu, kambe va hiseka va nga ri na vutivi.”—Varhoma 10:1, 2.
Ku Pfuna Vapfumeri Lava Nga Riki Vayuda
7. Xana vaproselita vo tala va angule njhani eka mahungu lamanene lawa Pawulo a ma chumayeleke?
7 Vaproselita a va ri vanhu lava nga riki Vayuda lava yimbisiweke hi ku ya hi Xiyuda. Entiyisweni a ku ri ni Vayuda lava nga vaproselita lava tshamaka eRhoma, Siriya Antiyoka, Etiyopiya ni le Antiyoka wa Pisidiya—entiyisweni a va kumeka eTindhawini hinkwato leti Vayuda va hangalakeleke eka tona. (Mintirho 2:8-10; 6:5; 8:27; 13:14, 43; ringanisa Matewu 23:15.) Ku hambana ni vafumi vo tala va Vayuda, vaproselita a va nga tikukumuxi, naswona a va nga tinyungubyisi hikwalaho ka leswi va nga vatukulu va Abrahama. (Matewu 3:9; Yohane 8:33) Ematshan’weni ya sweswo, va fularhele swikwembu swa vahedeni kutani hi ku titsongahata va tlhelela eka Yehovha, va kuma vutivi malunghana na yena ni milawu ya yena. Naswona va amukele ntshembo wa Vayuda wa ku ta ka Mesiya. Leswi ana se a va kombise ku tiyimisela ku lavisisa ntiyiso, vo tala va vona a va lunghekele ku endla mindzulamiso leyi engetelekeke ni ku amukela rungula ra muapostola Pawulo. (Mintirho 13:42, 43) Loko muproselita loyi eku sunguleni a a gandzela swikwembu swa vuhedeni, a a hundzulukele eka Vukreste, u nyikiwe lunghelo ro hlawuleka ra ku nyikela vumbhoni eka Vamatiko van’wana lava ha gandzelaka swikwembu swoleswo.
8, 9. (a) Handle ka vaproselita, hi wihi ntlawa wun’wana wa Vamatiko lowu tsakisiweke hi vukhongeri bya Xiyuda? (b) Xana vanhu vo tala lava chavaka Xikwembu lava nga yimbangiki va angule njhani eka mahungu lamanene?
8 Handle ka vaproselita lava yimbisiweke, van’wana lava nga riki Vayuda na vona va tsakisiwe hi vukhongeri bya Xiyuda. Munhu wo sungula eka vona la veke Mukreste i Korneliyo, loyi hambileswi a a nga ri muproselita, ‘a veke munhu la tinyiketeleke, la chavaka Xikwembu.’ (Mintirho 10:2) Loko a hlamusela buku ya Mintirho, Profesa F. F. Bruce u tsarile: “Vamatiko vo tano hi ntolovelo va vuriwa ‘lava chavaka Xikwembu’; hambileswi rito leri ri nga riki xithopo xa le nawini, i rito leri faneleke ku tirhisiwa. Vamatiko vo tala emasikwini wolawo, hambileswi a va nga tiyimiselanga ku hundzulukela eka Xiyuda hilaha ku heleleke (xilaveko xa ku yimbisiwa hi xona a xi ri xikhunguvanyiso ngopfu-ngopfu eka vavanuna), a va tsakisiwa hi ku gandzela Xikwembu xin’we esinagogeni ra Vayuda ni mimpimanyeto leyinene ya vutomi bya Vayuda. Van’wana va vona va ve kona esinagogeni naswona va sungule ku tolovelana ni swikhongelo ni tidyondzo ta matsalwa, leswi a va swi twa swi hlayiwa eka vuhundzuluxeri bya Xigriki.”
9 Muapostola Pawulo u langutane ni vanhu vo tala lava chavaka Xikwembu loko a ri karhi a chumayela emasinagogeni eAsia Minor ni le Greece. Le Antiyoka wa Pisidiya u vulavule ni lava hlengeletaneke esinagogeni hi marito lama nge “vavanuna va Israele, na n’wina lava chavaka Xikwembu.” (Mintirho 13:16, 26) Luka u tsala leswaku endzhaku ka loko Pawulo a chumayele Tisavata tinharhu esinagogeni eTesalonika, “van’wana exikarhi ka vona [Vayuda] va pfumela, [va hundzuka Vakreste] va namarhela Pawulo na Silasi, va ri ni nhlayo leyikulu ya Magriki lama chavaka Xikwembu, ni lavo tala exikarhi ka vavasati lavo chaviseka.” (Mintirho 17:4) Handle ko kanakana, Magriki man’wana a ma ri vanhu lava chavaka Xikwembu lava nga yimbangiki. Ku ni vumbhoni bya leswaku vo tala va Vamatiko volavo a va tivitana Vayuda.
Ku Chumayela Exikarhi Ka “Lava Nga Pfumeriki”
10. Xana Pawulo u chumayele njhani eka Vamatiko lava a va nga ri na vutivi bya Matsalwa, naswona ku ve ni vuyelo byihi?
10 EMatsalweni ya Vukreste ya Xigriki, xiga lexi nge “lava nga pfumeriki” xi nga ha vula vanhu lava nge handle ka vandlha ra Vukreste hi ku angarhela. Hakanyingi xi vula vahedeni. (Varhoma 15:31; 1 Vakorinto 14:22, 23; 2 Vakorinto 4:4; 6:14) Le Athena vanhu vo tala lava nga riki vapfumeri va dyondzisiwe hi filosofi ya Magriki naswona a va nga ma tivi Matsalwa nikatsongo. Xana leswi swi endle leswaku Pawulo a tshika ku nyikela vumbhoni eka vona? E-e. Hambiswiritano, u cince xingheniso xakwe. Hi vutshila u andlale tidyondzo ta Bibele handle ko tshaha Matsalwa ya Xiheveru hi ku kongoma, lawa Vaatena a va nga ma tivi. Hi vutlhari u kombise ku yelana exikarhi ka ntiyiso wa Bibele ni tidyondzo to karhi leti dyondzisiwaka hi swiphato swa khale swa Switoyika. Naswona u dyondzise leswaku ku ni Xikwembu xin’we xa ntiyiso xa vanhu hinkwavo, Xikwembu lexi nga ta avanyisa hi ku lulama hi ku tirhisa wanuna la feke a tlhela a pfuxiwa eku feni. Xisweswo hi vutlhari Pawulo u chumayele Vaatena hi ta Kreste. Ku ve ni vuyelo byihi? Hambileswi vunyingi byi n’wi vungunyeke kumbe ku n’wi kaneta, “vanhu van’wana va n’wi namarhela, va pfumela; exikarhi ka vona a ku ri na Diyonisiyo lowa Ariyopago, ni wansati loyi a va ku i Damarisi, na van’wana kambe.”—Mintirho 17:18, 21-34.
11. Xana Korinto a wu ri muti wa njhani, naswona vuyelo bya ntirho wa Pawulo wa ku chumayela byi ve byihi kwalaho?
11 EKorinto a ku ri ni Vayuda va nga ri vangani, kutani Pawulo u sungule vutirheli byakwe kwalaho hi ku chumayela esinagogeni. Kambe loko Vayuda va sungula ku kaneta, Pawulo u ye eka vanhu Vamatiko. (Mintirho 18:1-6) Naswona ehleketa hi muti wa kona! Korinto a wu ri muti lowu khomekeke ngopfu, wu tele hi tinxaka ta vanhu, muti wa mabindzu, lowu dumeke emfun’weni wa Magriki ni Varhoma hikwalaho ka ku tikhoma loko biha. Kunene, rito leri nge “Korinto” ri vula ku tikhoma hi ndlela yo biha. Kambe, a ku ri endzhaku ka loko Vayuda va ale ku chumayela ka Pawulo laha Kreste a humeleleke eka yena a ku: “U nga chavi; kambe vulavula . . . hikuva ndzi ni vanhu lavo tala emutini lowu.” (Mintirho 18:9, 10) Hilaha swi vuriweke hakona, Pawulo u simeke vandlha eKorinto, hambileswi van’wana va swirho swa rona eku sunguleni va hanyeke “Xikorinto.”—1 Vakorinto 6:9-11.
Ku Ringeta Ku Ponisa “Vanhu Va Mixaka Hinkwayo” Namuntlha
12, 13. (a) Xana nsimu ya hina namuntlha yi fana njhani ni ya le sikwini ra Pawulo? (b) Xana hi fanele hi kombisa langutelo rihi etindhawini leti vukhongeri bya Vujagana byi simekiweke khale eka tona, kumbe laha vo tala va heleriweke hi ntshembo eka tinhlengeletano ta vukhongeri?
12 Namuntlha, ku fana ni le ka lembe-xidzana ro sungula, “musa lowu nga faneriwiki wa Xikwembu . . . wu ponisa vanhu va mixaka hinkwayo.” (Tito 2:11, NW) Ndhawu leyi ku chumayeriwaka mahungu lamanene eka yona yi hlanganisa matiko-nkulu hinkwawo ni swihlala swo tala swa lwandle. Naswona ku fana ni le sikwini ra Pawulo, ku fikeleriwa “vanhu va mixaka hinkwayo.” Hi xikombiso, van’wana va hina hi chumayela ematikweni lawa tikereke ta Vujagana ti simekiweke eka wona malembe-xidzana yo tala. Ku fana ni Vayuda va lembe-xidzana ro sungula, swirho swa tona swi nga ha va swi namarhele ndhavuko wa vukhongeri bya swona swinene. Kambe, ha tsaka ku lava lava nga ni timbilu letinene ni ku aka ehenhla ka vutivi byihi na byihi bya Bibele lebyi va nga na byona. A hi va languteli ehansi hambi ku ri ku va delela hambiloko varhangeri va vona va vukhongeri minkarhi yin’wana va hi kaneta kumbe ku hi xanisa. Kambe, ha swi xiya leswaku van’wana exikarhi ka vona va nga ha va va xi “hisekela Xikwembu,” hambileswi va kayivelaka vutivi lebyi kongomeke. Ku fana na Yesu na Pawulo, hi kombisa rirhandzu ra xiviri eka vanhu, naswona hi ni ku navela lokukulu ka leswaku va ponisiwa.—Varhoma 10:2.
13 Loko hi ri karhi hi chumayela, vo tala va hina hi hlangana ni vanhu lava heleriweke hi ntshembo eka tinhlengeletano ta vukhongeri. Hambiswiritano, va nga ha va vanhu lava chavaka Xikwembu, lava pfumelaka eka Xikwembu hi mpimo wo karhi ni ku ringeta ku hanya vutomi lebyinene. Eka xitukulwana lexi lexi hombolokeke ni lexi yaka xi kombisa ku pfumala ku chava Xikwembu, xana a hi fanelanga hi tsaka loko hi hlangana ni vanhu lava kombisakanyana ripfumelo eka Xikwembu? Naswona xana a hi hisekeli ku va kongomisa eka muxaka wa vugandzeri lebyi nga riki na vukanganyisi ni vunwa?—Vafilipiya 2:15.
14, 15. Xana swi tise ku yini leswaku ku va ni nsimu leyikulu yo chumayela mahungu lamanene eka yona?
14 Exifanisweni xakwe xa nkukuto, Yesu u vhumbhe leswaku a ku ta va ni ndhawu leyikulu ya ntirho wo chumayela. (Matewu 13:47-49) Loko xi hlamusela xifaniso lexi, Xihondzo xo Rindza xa June 15, 1992, eka tluka 20 xi te: “Hi malembe xidzana yo tala, swirho swa Vujagana swi ve ni xiphemu lexikulu eku hundzuluxeleni, eku kopeni ni le ku hangalaseni ka Rito ra Xikwembu. Endzhakunyana, Tikereke ti vumbe kumbe ku seketela tisosayiti ta Bibele, leti hundzuluxeleke Bibele hi tindzimi ta le matikweni ya le kule. Nakambe tikereke ti rhumele varhumiwa ni vadyondzisi va swa mirhi lava tirheke ku endla Vakriste lava pfumelaka hi ku lava ku pfuniwa. Leswi swi hlengelete nhlayo leyikulu ya tinhlampfi leti nga fanelangiki, leti nga amukeriwiki hi Xikwembu. Kambe leswi, swi paluxele timiliyoni leti nga riki Vakriste ku tiva Bibele ni xivumbeko xa Vukriste hambileswi a xi ri lexo homboloka.”
15 Vanhu lava hundzuriweke hi Vujagana a va ri karhi va andza ngopfu-ngopfu eAmerika Dzonga, Afrika ni le swihlaleni swin’wana swa lwandle. Esikwini ra hina, vanhu vo tala lava titsongahataka va kumeka etindhawini leti, naswona hi nga hambeta hi endla swilo swo tala leswinene loko hi ri ni langutelo lerinene, ni ku rhandza vanhu vo tano lava titsongahataka, hilaha Pawulo a endleke hakona eka Vayuda lava hundzuriweke. Van’wana lava na vona va lavaka mpfuno wa hina i vanhu va timiliyoni lava hi nga va vulaka “vaseketeri” va Timbhoni ta Yehovha. Minkarhi hinkwayo va tsaka loko hi va endzela. Van’wana va dyondze Bibele na hina naswona va ve kona eminhlanganweni ya hina, ngopfu-ngopfu eXitsundzuxweni xa lembe na lembe xa rifu ra Kreste. Xana vanhu vo tano a va kombisi swona leswaku ku ni nsimu leyikulu ya ku chumayela mahungu lamanene ya Mfumo?
16, 17. (a) Xana hi tshinelela vanhu va muxaka muni hi mahungu lamanene? (b) Xana hi n’wi tekelela njhani Pawulo loko hi chumayela mixaka yo hambana-hambana ya vanhu?
16 Ku tlula kwalaho, xana hi fanele hi va languta njhani lava humaka eka mindhavuko leyi nga riki ya Vujagana—hambiloko hi hlangana na vona ematiko-xikaya ya ka vona kumbe loko va rhurhele ematikweni ya le Vupela-dyambu? Naswona ku vuriwa yini hi timiliyoni to tala ta lava fularheleke vukhongeri, lava hundzukeke vanhu lava nge, Xikwembu a xi tiviwi kumbe lava nga makholwa-hi-ku-vona? Ku tlula kwalaho, ku vuriwa yini hi lava yingiseke filosofi ya manguva lawa ya vukhongeri hi ku hiseka, leyi kandziyisiweke hi xitalo etibukwini leti kumekaka eswitolo swa tibuku? Xana vanhu vo tano va fanele va honisiwa, hi va languta tanihi lava nga hundzukiki? A hi fanelanga hi endla tano loko hi tekelela muapostola Pawulo.
17 Loko a ri karhi a chumayela eAtena, Pawulo a nga welanga entlhan’wini wa ku phikizana hi filosofi ni vayingiseri vakwe. Kambe, u ringete ku pfumelelana ni mianakanyo ya vanhu lava a vulavulaka na vona, a hlamusela mintiyiso ya Bibele hi ndlela leyi twalaka, leyi nga rivaleni. Hi ku fanana, a swi bohi leswaku hi va vatshila eka vukhongeri kumbe eka tifilosofi ta vanhu lava hi chumayelaka eka vona. Hambiswiritano, hi fanele hi cinca xingheniso xa hina leswaku ku nyikela ka hina vumbhoni ku ta va ni mihandzu, xisweswo, hi va “hinkwaswo eka vanhu lava hinkwavo.” (1 Vakorinto 9:22) Loko a tsalela Vakreste eKolosa, Pawulo u te: “Tirhisanani ni va le handle hi ku tlhariha, mi ri karhi mi londzovota nkarhi lowu mi nga na wona. Ku vulavula ka n’wina a ku ve lokunene, loku nandzihaka masiku hinkwawo, mi ta tiva hilaha mi fanelaka ku hlamula un’wana ni un’wana hakona.” (Xiitaliki i xerhu.)—Vakolosa 4:5, 6.
18. Hi byihi vutihlamuleri lebyi hi nga na byona, naswona i yini lexi hi nga fanelangiki hi xi rivala?
18 Ku fana na Yesu na muapostola Pawulo, a hi kombiseni rirhandzu eka vanhu va mixaka hinkwayo. Ngopfu-ngopfu, a hi tikarhateleni ku avela van’wana mahungu lamanene ya Mfumo. Hi hala tlhelo, hi nga tshuki hi rivala leswi Yesu a swi vuleke malunghana ni vadyondzisiwa vakwe loko a ku: “A hi va misava.” (Yohane 17:16) Leswaku leswi swi vula yini eka hina hi ta swi vona exihlokweni lexi landzelaka.
Mpfuxeto
◻ Hlamusela langutelo ra Yesu lerinene malunghana ni misava.
◻ Xana muapostola Pawulo u chumayele njhani eka Vayuda ni vaproselita?
◻ Xana Pawulo u va tshinelele njhani vanhu lava chavaka Xikwembu ni lava nga riki vapfumeri?
◻ Xana hi nga va ‘hinkwaswo eka vanhu va mixaka hinkwayo’ hi ndlela yihi, entirhweni wa hina wo chumayela?
[Swifaniso leswi nga eka tluka 10]
Hi ku endlela vaakelani swiendlo swa tintswalo, hakanyingi Vakreste va nga herisa xihlawuhlawu