Ripfumelo Ri Hi Susumetela Ku Lehisa Mbilu Ni Ku Khongela

“Lehisani mbilu; tiyisani timbilu ta n’wina, hikuva vukona bya Hosi byi tshinele.”—YAKOBO 5:8, NW.

1. Ha yini hi fanele hi anakanyisisa hi Yakobo 5:7, 8?

“VUKONA” bya Yesu Kreste lebyi ku nga khale byi languteriwile se i mhaka ya xiviri. (Matewu 24:3-14) Ku tlula rini na rini, hinkwavo lava vulaka leswaku va ni ripfumelo eka Xikwembu ni le ka Kreste va ni xivangelo xo anakanyisisa hi marito ya mudyondzisiwa Yakobo lama nge: “Lehisani mbilu, vamakwerhu, ku fikela enkarhini wa vukona bya Hosi. Maswivo! Murimi u tshama a rindza mbhandzu wa misava lowu nga wa nkoka, a wu lehisela mbilu ku fika laha a kumaka mpfula leyo sungula ni mpfula leya le ndzhaku. Na n’wina lehisani mbilu; tiyisani timbilu ta n’wina, hikuva vukona bya Hosi byi tshinele.”—Yakobo 5:7, 8, NW.

2. Hi swihi swiphiqo swin’wana leswi a swi langutane ni lava Yakobo a a tsalela vona?

² Lava Yakobo a a tsalela vona papila rakwe leri huhuteriweke a va fanele va lehisa mbilu ni ku tlhantlha swiphiqo swo hambana-hambana. Vo tala a va endla swilo hi ndlela leyi hambaneke ni leswi languteriweke eka lava vulaka leswaku va ni ripfumelo eka Xikwembu. Hi xikombiso, a ku fanele ku endliwa swo karhi malunghana ni ku navela loku a ku sungule ku mila etimbilwini ta van’wana. A ku laveka leswaku ku kondleteriwa ku rhula exikarhi ka Vakreste volavo vo sungula. Nakambe a va lava ndzayo leswaku va lehisa mbilu ni ku khongela. Loko hi ri karhi hi kambisisa leswi Yakobo a va byeleke swona, a hi voneni ndlela leyi hi nga ma tirhisaka ha yona marito yakwe evuton’wini bya hina.

Ku Navela Loko Biha Ka Onha

3. I yini leswi a swi vanga madzolonga evandlheni, naswona hi nga dyondza yini eka leswi?

³ Ku rhula a ku nga ri kona exikarhi ka van’wana lava a va tivula Vakreste, naswona xiyimo lexi a xi vangiwa hi ku navela loko biha. (Yakobo 4:1-3) Timholovo a ti vanga ku avana, naswona van’wana a va avanyisa vamakwavo hi ndlela yo pfumala rirhandzu. Leswi a swi endliwa hikwalaho ka leswi ku navela ku tiphina hi swilo swa nyama a ku hambeta ku lwisana eswirhweni swa miri ya vona. Na hina swi nga ha lava leswaku hi khongelela mpfuno wo lwisana ni ku navela ka nyama ko lava ndhuma, matimba ni rifuwo leswaku hi nga tshuki hi endla nchumu lowu nga ta kavanyeta ku rhula ka vandlha. (Varhoma 7:21-25; 1 Petro 2:11) Exikarhi ka Vakreste van’wana va lembe-xidzana ro sungula, makwanga a ma tinyike matimba ku fikela laha va vaka ni moya wa rivengo, wo dlaya. Tanihi leswi Xikwembu a xi nga ku hetisisi ku navela ka vona loko biha, a va hamba va tikarhatela ku fikelela tipakani ta vona. Loko hi ri ni ku navela ko biha loku fanaka, hi nga ha kombela kambe hi nga nyikiwi, tanihi leswi Xikwembu xa hina lexo kwetsima xi nga swi hlamuriki swikhongelo swo tano.—Swirilo 3:44; 3 Yohane 9, 10.

4. Ha yini Yakobo a vula van’wana “vaoswi,” naswona marito ya yena ma fanele ma hi khumba njhani?

⁴ A ku ri ni moya wa misava, mavondzo ni ku tinyungubyisa exikarhi ka Vakreste van’wana vo sungula. (Yakobo 4:4-6) Yakobo u vitana van’wana ‘vaoswi’ hileswi a va ri ni xinghana ni misava, xisweswo va va ni nandzu wa vuoswi hi tlhelo ra moya. (Ezekiyele 16:15-19, 25-45) Entiyisweni, a hi lavi ku va ni malangutelo, mavulavulelo ni swiendlo leswi fanaka ni swa misava, hikuva sweswo swi nga hi endla valala va Xikwembu. Rito ra xona ri hi kombisa leswaku ‘moya wa mavondzo’ wu fambisana ni mboyamelo wo biha kumbe “moya,” lowu kumekaka eka vanhu lava nga ni xidyoho. (Genesa 8:21; Tinhlayo 16:1-3; Pisalema 106:16, 17; Eklesiasta 4:4) Kutani loko hi xiya leswaku hi fanele hi lwisana ni mavondzo, vutikukumuxi kumbe mboyamelo wun’wana lowo biha, a hi laveni mpfuno wa Xikwembu wa moya lowo kwetsima. Matimba wolawo, lama nyikeriwaka hikwalaho ka tintswalo ta Xikwembu leti nga faneriwiki, i makulu ku tlula ‘mboyamelo wa mavondzo.’ Naswona hambileswi Yehovha a lwisanaka ni lava tikukumuxaka, u ta hi nyika tintswalo leti nga faneriwiki loko hi lwisana ni mimboyamelo ya vudyoho.

5. Leswaku hi kuma tintswalo ta Xikwembu leti nga faneriwiki, hi swihi swilaveko leswi hi faneleke hi swi fikelela?

⁵ Xana hi nga ti kumisa ku yini tintswalo ta Xikwembu leti nga faneriwiki? (Yakobo 4:7-10) Leswaku hi kuma tintswalo leti nga faneriwiki eka Yehovha, hi fanele hi n’wi yingisa, hi amukela malunghiselelo ya yena, naswona hi endla hinkwaswo leswi a swi rhandzaka. (Varhoma 8:28) Nakambe hi fanele hi ‘alela,’ kumbe hi ‘yima hi tiyile hi lwisana’ na Diyavulosi. U ta ‘hi siya a tsutsuma’ loko hi yima hi tiyile tanihi vaseketeri va vuhosi bya Yehovha bya vuako hinkwabyo. Hi ni mpfuno lowu humaka eka Yesu, loyi a sivelaka swilo swa misava leswaku ku nga vi na nchumu lexi nga hi vaviselaka makumu. Naswona u nga tshuki u rivala leswi: Hi xikhongelo, ku yingisa ni ripfumelo, hi tshinela ekusuhi ni Xikwembu, naswona xi va ekusuhi na hina.—2 Tikronika 15:2.

6. Hikwalaho ka yini Yakobo a vula Vakreste van’wana “vadyohi”?

⁶ Hikwalaho ka yini Yakobo a tirhisa rito leri nge “vadyohi” eka van’wana lava tivulaka leswaku va ni ripfumelo eka Xikwembu? Hikuva a va ri ni nandzu wa “tinyimpi” swin’we ni rivengo leri dlayaka—ku nga malangutelo lama nga amukelekiki eka Vakreste. (Tito 3:3) “Mandla” ya vona lawa a ma tele swiendlo leswo biha, a ma lava ku basisiwa. Nakambe a va fanele va basisa “timbilu” ta vona ku nga laha minsusumeto yi humaka kona. (Matewu 15:18, 19) Lava “va miehleketo mimbirhi” a va avane hi le xikarhi, va va ni xinghana ni Xikwembu va tlhela va va ni xinghana ni misava. Leswi hi lemukisiwaka hi xikombiso xa vona, a hi hambeteni hi hiseka leswaku swilo swo tano swi nga tshuki swi onha ripfumelo ra hina.—Varhoma 7:18-20.

7. Ha yini Yakobo a byela van’wana leswaku va “ba nkosi ni ku rila”?

⁷ Yakobo u byela vahlayi va yena leswaku ‘va vaviseka ni ku ba nkosi ni ku rila.’ Loko va kombisa ku karhateka loku nga ni vukwembu, swi ta va swi kombisa ku hundzuka. (2 Vakorinto 7:10, 11) Namuntlha, van’wana lava vulaka leswaku va ni ripfumelo va endla xinghana ni misava. Loko un’wana ni un’wana wa hina a landzela ndlela yo tano, xana a nga fanelanga a ba nkosi hikwalaho ka xiyimo xa yena xa moya lexi tsaneke, kutani a teka magoza lama faneleke a lulamisa timhaka? Ku endla mindzulamiso leyi lavekaka kutani hi kuma ndzivalelo wa Xikwembu swi ta hi tisela ntsako lowukulu hikwalaho ka ripfalo leri tengeke ni ntshembo lowu tsakisaka wo kuma vutomi lebyi nga heriki.—Pisalema 51:10-17; 1 Yohane 2:15-17.

Mi Nga Avanyisani

8, 9. Ha yini hi nga fanelanga hi sandzana kumbe ku avanyisana?

⁸ Ku sandza mupfumeri-kulobye i xidyoho. (Yakobo 4:11, 12) Kambe van’wana va xopaxopa Vakreste-kulobye, kumbexana hikwalaho ko tivona va lulamile kumbe hikwalaho ko lava ku titlakusa hi ku tsongahata van’wana. (Pisalema 50:20; Swivuriso 3:29) Rito ra Xigriki leri hundzuluxeriweke ri va ‘ku sandza’ ri vula vulala naswona ri kombisa ku endla xihehlo lexi hundzeletiweke kumbe xa vunwa. Leswi swi yisa eku avanyiseni ka makwavo hi ndlela yo biha. Xana leswi swi fana njhani ni ‘ku sandza nawu wa Xikwembu ni ku wu avanyisa’? Vatsari ni Vafarisi a va ‘vekela nawu wa Xikwembu etlhelo hi ndlela ya vutlhari’ kutani va avanyisa hi ku ya hi mimpimanyeto ya vona vini. (Marka 7:1-13) Hilaha ku fanaka, loko hi sola makwerhu wo karhi loyi Yehovha a nga n’wi soriki, xana a hi ‘avanyisi nawu wa Xikwembu’ kutani hi dyoha hi ku kombisa leswaku a wu helelanga? Naswona loko hi sola makwerhu hi ndlela yo homboloka, hi ta va hi nga hetisisi nawu wa rirhandzu.—Varhoma 13:8-10.

⁹ A hi tsundzukeni leswi: “Munyiki wa Nawu ni Muavanyisi i un’we ntsena”—Yehovha. ‘Nawu wa yena wu hetisekile,’ a hi kayiveli nchumu. (Pisalema 19:7; Esaya 33:22) I Xikwembu ntsena lexi nga ni mfanelo yo veka mimpimanyeto ni milawu yo ponisa. (Luka 12:5) Kutani Yakobo wa vutisa: “Wo va mani wena, leswi u avanyisaka munhu-kuloni xana?” A hi mfanelo ya hina ku avanyisa ni ku sola van’wana. (Matewu 7:1-5; Varhoma 14:4, 10) Ku anakanyisisa hi vuhosi bya Xikwembu ni ku pfumala ka xona ku ya hi nghohe kun’we ni vudyoho bya hina swi fanele swi hi pfuna leswaku hi tshika ku avanyisa van’wana hi ri karhi hi tiendla lavo lulama.

Papalata Ku Titshemba Ka Vutikukumuxi

10. Ha yini hi fanele hi anakanya hi Yehovha etimhakeni ta hina ta siku na siku?

¹⁰ Nkarhi hinkwawo hi fanele hi anakanya hi Yehovha ni nawu wakwe. (Yakobo 4:13-17) Hi ku langutela Xikwembu ehansi, lava titshembaka va ri: ‘Namuntlha kumbe mundzuku hi ta ya emutini wo karhi, hi heta lembe kona, hi endla bindzu, hi pindzula.’ Loko hi ‘tihlengeletela rifuwo kambe ku nga ri ku fuwela Xikwembu,’ vutomi bya hina byi nga hela mundzuku kutani hi nga ha vi na wona nkarhi wo tirhela Yehovha. (Luka 12:16-21) Hilaha Yakobo a vulaka hakona, hi fana ni hunguva ya nimixo “leyi humelelaka nkarhinyana, kutani yi hangalaka.” (1 Tikronika 29:15) Hi nga va ni ntshembo wo kuma ntsako lowu khomelelaka ni vutomi lebyi nga heriki ntsena loko hi kombisa ripfumelo eka Yehovha.

11. Xana ku vula leswaku, “Loko [Yehovha a] swi rhandza” swi vula yini?

¹¹ Ematshan’weni yo honisa Xikwembu hi ku tikukumuxa, hi fanele hi va ni langutelo leri: “Loko [Yehovha a] swi rhandza, hi ta pfuka hi ya endla leswo karhi kumbe leswo karhi.” Ku vula hi ku, “Loko [Yehovha a] swi rhandza” swi kombisa leswaku hi ringeta ku endla swilo hi ndlela leyi fambisanaka ni ku rhandza ka yena. Hi nga boheka ku endla bindzu leswaku hi wundla mindyangu ya hina, hi famba-famba hikwalaho ka ntirho wa Mfumo ni swin’wana. Kambe hi nga tshuki hi tikurisa. “Ku tidzunisa hinkwako loko tano ku bihile” hikuva ku endla leswaku munhu a nga tshembi Xikwembu.—Pisalema 37:5; Swivuriso 21:4; Yeremiya 9:23, 24.

12. Xana marito ya Yakobo 4:17 ma vula yini?

¹² Loko handle ko kanakana a gimeta marito yakwe malunghana ni ku titshemba kun’we ni ku tikurisa, Yakobo u ri: “Munhu loyi a tivaka leswo lulama leswi a fanelaka ku swi endla, kambe a nga swi endli, i mudyohi.” Hi ku titsongahata Mukreste un’wana ni un’wana u fanele a pfumela leswaku u titshega hi Xikwembu. Loko a nga endli tano, “i mudyohi.” Ina, nsinya lowu wa nawu wu tirha eka un’wana ni un’wana loyi a tsandzekaka ku endla leswi ku va ni ripfumelo eka Xikwembu swi lavaka swona eka yena.—Luka 12:47, 48.

Xitsundzuxo Eka Lava Fuweke

13. Yakobo u ri yini hi lava tirhisaka rifuwo ra vona hi ndlela yo biha?

¹³ Hikwalaho ka leswi Vakreste van’wana vo sungula a va sungule ku rhandza swilo leswi vonakaka kumbe ku navela lava fuweke, Yakobo u vule marito ya matimba malunghana ni lava fuweke. (Yakobo 5:1-6) Vanhu va misava lava a va tirhisa rifuwo ra vona hi ndlela leyi hoxeke a va ta ‘rila, va kolola hikwalaho ka mahlomulo lawa a ma ta va wela’ loko Xikwembu xi va hakela hi ku ya hi swiendlo swa vona. Emasikwini wolawo, rifuwo ra vanhu vo tala a ri katsa ngopfu swilo swo tanihi tinguvu, swa le masin’wini ni vhinyo. (Yuwele 2:19; Matewu 11:8) Swin’wana swa swilo leswi a swi bola kumbe swi “dyiw[a] hi tinsumbha,” kambe Yakobo u kandziyisa vuhava bya rifuwo, ku nga ri ku onhaka ka rona. Hambileswi nsuku ni silivhere swi nga kurhiki, loko ho swi veketela, swi nga hundzuka leswi nga pfuniki nchumu ku fana ni swilo leswi kurheke. ‘Nkurhe’ wu kombisa leswaku rifuwo ra swilo leswi vonakaka a ri nga tirhisiwi hi ndlela leyinene. Hikokwalaho, hinkwerhu hi fanele hi tsundzuka leswaku ‘nchumu lowu fanaka ni ndzilo’ hi wona lowu lava tshembaka swilo swa vona leswi vonakaka va ‘tihlayiselaka wona emasikwini ya makumu’ loko va ta weriwa hi vukari bya Xikwembu. Tanihi leswi hi hanyaka “enkarini wa makumu,” marito wolawo ma ni nhlamuselo leyi hlawulekeke eka hina.—Daniyele 12:4; Varhoma 2:5.

14. Van’wankumi va tala ku endlisa ku yini, naswona hina hi fanele hi endla yini ha swona?

¹⁴ Lava fuweke hakanyingi va kanganyisa vatshoveri va vona, lava miholo ya vona leyi va tsoniweke yona yi ‘huwelelaka’ leswaku va rihiseleriwa. (Ringanisa Genesa 4:9, 10.) Van’wankumi va misava va “hanyile emafurheni.” Hi ku rhandza ngopfu ku titsakisa hi swa nyama, va ve ni timbilu leti noneke, leti sihalalaka naswona va ta va va ha endla tano hi “siku” leri vekeriweke ku va dlaya. Va ‘avanyisa ni ku dlaya munhu lowo lulama.’ Yakobo wa vutisa: ‘Xana munhu la fuweke a nga lwisani na n’wina ke?’ Kambe vuhundzuluxeri byin’wana byi swi veka hi ndlela leyi, “munhu lowo lulama; a nga lwisani na n’wina.” Hambiswiritano, a hi fanelanga hi rhandza lava fuweke ntsena. Hi fanele hi rhangisa swilaveko swa moya evuton’wini.—Matewu 6:25-33.

Ripfumelo Ri Hi Pfuna Ku Lehisa Mbilu

15, 16. Ha yini ku lehisa mbilu swi ri swa nkoka swonghasi?

¹⁵ Loko a vulavule hi van’wankumi va misava lava tshikilelaka, Yakobo u ya emahlweni a khutaza Vakreste lava tshikileriwaka leswaku va lehisa mbilu. (Yakobo 5:7, 8) Loko vapfumeri va tiyisela ku tikeriwa ka vona va ri karhi va lehisa mbilu, eka vukona bya Kreste va ta hakeriwa hikwalaho ka vutshembeki bya vona, loko ku avanyisiwa vatshikileri va vona. (Matewu 24:37-41) Vakreste volavo vo sungula a va fanele va fana ni murimi loyi hi ku lehisa mbilu a yimelaka mpfula yo rhanga ya xixikana, nkarhi lowu a nga kotaka ku byala ha wona, ni ku yimela mpfula ya le ndzhaku ya ximun’wana leyi nga ta endla leswaku ku va ni mihandzu. (Yuwele 2:23) Na hina hi fanele hi lehisa mbilu ni ku endla leswaku timbilu ta hina ti tiya, ngopfu-ngopfu leswi “vukona bya Hosi” Yesu Kreste byi fikeke!

¹⁶ Ha yini hi fanele hi lehisa mbilu? (Yakobo 5:9-12) Ku lehisa mbilu swi hi pfuna leswaku hi nga n’unun’uti kumbe ku ngurangura loko vapfumeri-kulorhi va hi khunguvanyisa. Loko hi “ngurangurisan[a]” hi moya wo biha, Muavanyisi Yesu Kreste u ta hi avanyisa. (Yohane 5:22) Leswi sweswi “vukona” bya yena byi sunguleke ni leswi a ‘yimeke etinyangweni,’ a hi kondleteleni ku rhula hi ku lehisela vamakwerhu mbilu, lava hlangavetanaka ni miringo yo tala ya ripfumelo. Ripfumelo ra hina ra tiyisiwa loko hi tsundzuka leswaku Xikwembu xi hakele Yobo hileswi a tiyiseleke miringo leyi a a langutane na yona. (Yobo 42:10-17) Loko hi kombisa ripfumelo ni ku lehisa mbilu, hi ta vona “hilaha Hosi yi taleke musa ni tintswalo hakona.”—Mikiya 7:18, 19.

17. Ha yini Yakobo a ku, “Mi nga hlambanyi”?

¹⁷ Loko hi nga swi koti ku lehisa mbilu, hi nga ha tirhisa ririmi hi ndlela yo biha loko hi ri ehansi ka ntshikilelo. Hi xikombiso, hi nga ha tsutsumela ku hlambanya. “Mi nga hlambanyi,” ku vula Yakobo loko a lemukisa ku tshika ku hlambanya hi swilo leswi nga vuriki nchumu. Ku tshamela ku tiyisekisa marito hi swihlambanyo swi vonaka ku ri vukanganyisi. Hikwalaho, hi fanele hi vulavula ntiyiso, ina wa hina a va ina, e-e wa hina a va e-e. (Matewu 5:33-37) Kavula, Yakobo a nga vuli swona leswaku ku hlambanya leswaku u ta vula ntiyiso ehubyeni swi hoxile.

Ripfumelo Ni Swikhongelo Swa Hina

18. Hi le ka swiyimo swihi laha hi faneleke hi ‘hambeta hi khongela’ ni ku “[yimbelela] tinsimu ta ku dzunisa”?

¹⁸ Xikhongelo xi fanele xi tirha swinene leswaku hi kota ku lawula mavulavulelo ya hina, hi lehisa mbilu ni ku tshama hi ri ni ripfumelo leri hanyaka eka Xikwembu. (Yakobo 5:13-20) Hi fanele hi ‘hambeta hi khongela,’ ngopfu-ngopfu loko hi langutane ni ndzingo. Loko hi tsakile a hi “[yimbeleleni] tinsimu ta ku dzunisa,” hilaha Yesu ni vaapostola vakwe va endleke hakona loko a simeka Xitsundzuxo xa rifu rakwe. (Marka 14:26, NW, nhlamuselo ya le hansi) Minkarhi yin’wana, hi nga va ni ku tlangela lokukulu eka Xikwembu lerova hi kala hi yimbelela swidzuniso hambi ku ri hi mbilu. (1 Vakorinto 14:15; Vaefesa 5:19) Naswona i ntsako lowukulu swonghasi ku dzunisa Yehovha hi tinsimu eminhlanganweni ya Vukreste!

19. Hi fanele hi endla yini loko hi vabya emoyeni, naswona ha yini hi fanele hi teka goza ro tano?

¹⁹ Loko hi vabya emoyeni hi nga ha titwa hi nga lavi ku yimbelela, kumbexana hikwalaho ka ku tikhoma loku hoxeke kumbe ku tsandzeka ku dya nkarhi na nkarhi etafuleni ra Yehovha. Loko hi ri exiyin’weni xexo, a hi vitaneni vakulu hi ku titsongahata leswaku va ta hi “khongelela.” (Swivuriso 15:29) Va ta tlhela va ‘hi tota mafurha hi vito ra Yehovha.’ Tanihi mafurha lama horisaka xilondza, marito ya vona lama chavelelaka ni ndzayo ya Matsalwa swi ta hi pfuna ku hunguta ntshikilelo, ku kanakana ni ku chava. ‘Xikhongelo xa ripfumelo xi ta hi hanyisa’ loko xi seketeriwa hi ripfumelo ra hina vini. Loko vakulu va kuma leswaku vuvabyi bya hina bya moya byi vangiwe hi xidyoho lexikulu, va ta veka xihoxo xa hina erivaleni hi musa kutani va ringeta ku hi pfuna. (Pisalema 141:5) Naswona loko hi hundzuka, hi nga va ni ripfumelo ra leswaku Xikwembu xi ta yingisa swikhongelo swa vona kutani xi hi rivalela.

20. Ha yini hi fanele hi phofulelana swidyoho ni ku khongelelana?

²⁰ ‘Ku phofulelana swidyoho’ swi fanele swi hi sivela ku ya emahlweni hi dyoha. Swi fanele swi hi susumetela ku twelana vusiwana, ku nga mfanelo leyi nga ta hi susumetela ku “khongelelana.” Hi nga va ni ripfumelo ra leswaku leswi swi ta pfuna hikuva xikhongelo xa “munhu wo lulama”—loyi a kombisaka ripfumelo ni loyi Xikwembu xi n’wi langutaka a lulamile—xi hetisisa swo tala eka Yehovha. (1 Petro 3:12) Muprofeta Eliya a a tsanile ku fana na hina, kambe swikhongelo swakwe swi hlamuriwile. U khongerile, naswona mpfula a yi nanga ku ringana malembe manharhu ni hafu. Loko a tlhele a khongela, mpfula yi nile.—1 Tihosi 17:1; 18:1, 42-45; Luka 4:25.

21. I yini leswi hi nga swi endlaka loko Mukreste-kulorhi a “huma entiyisweni”?

²¹ Ku vuriwa yini loko xirho xa vandlha xi “huma entiyisweni,” xi hambuka edyondzweni ni le ku tikhomeni lokunene? Hi nga swi kota ku n’wi tlherisa exidyohweni xa yena hi ku tirhisa ndzayo ya Bibele, xikhongelo ni hi mpfuno wun’wana. Loko hi humelela, u ta pfuniwa hi nkutsulo wa Kreste naswona u ta ponisiwa leswaku a nga fi emoyeni naswona a nga avanyiseriwi ndzoviso. Hi ku pfuna mudyohi, hi funengeta swidyoho leswo tala. Loko loyi a tshinyiweke a tshika ndlela yakwe leyi hoxeke, a hundzuka, kutani a kombela ku rivaleriwa, hi ta tsaka hileswi hi tikarhateleke ku funengeta swidyoho swa yena.—Pisalema 32:1, 2; Yuda 22, 23.

Nchumu Lowu Nga Wa Hina Hinkwerhu

22, 23. Xana marito ya Yakobo ma fanele ma hi khumba njhani?

²² Entiyisweni, papila ra Yakobo ri tamele nchumu lowu pfunaka eka hina hinkwerhu. Ri hi kombisa ndlela yo langutana ni miringo, ra hi laya leswaku hi nga yi hi nghohe, naswona ri hi khutaza leswaku hi endla mintirho leyinene. Yakobo u hi khutaza ku lawula ririmi, ku lwisana ni nkucetelo wa misava ni ku kondletela ku rhula. Nakambe marito yakwe ma fanele ma hi pfuna ku lehisa mbilu ni ku tinyiketela ku khongela.

²³ Kavula, papila ra Yakobo eku sunguleni a ri rhumeriwe eka Vakreste vo sungula lava totiweke. Kambe, hinkwerhu hi fanele hi pfumelela ndzayo ya rona leswaku yi hi pfuna ku namarhela ripfumelo ra hina. Marito ya Yakobo ma nga tiyisa ripfumelo leri hi susumetelaka ku teka goza leri tiyeke entirhweni wa Xikwembu. Naswona papila leri leri huhuteriweke hi Xikwembu ri aka ripfumelo leri khomelelaka leri hi susumetelaka ku va Timbhoni ta Yehovha leti lehisaka mbilu, leti tinyiketeleke eku khongeleni namuntlha, hi nkarhi wa “vukona bya Hosi” Yesu Kreste.

A Wu Ta Hlamurisa Ku Yini Xana?

◻ Ha yini Vakreste van’wana vo sungula a va fanele va cinca langutelo ni ku tikhoma ka vona?

◻ I xitsundzuxo xihi lexi Yakobo a xi nyikaka lava fuweke?

◻ Ha yini hi fanele hi lehisa mbilu?

◻ Ha yini hi fanele hi khongela nkarhi na nkarhi?

[Xifaniso lexi nga eka tluka 19]

Pictorial Archive (Near Eastern History) Est.

[Xifaniso lexi nga eka tluka 23]

Vakreste van’wana vo sungula a va fanele va tikarhatela swinene ku lehisela vapfumeri-kulobye timbilu

[Xifaniso lexi nga eka tluka 24]

Vakreste va fanele va lehisa mbilu, va kombisa rirhandzu, va tinyiketela eku khongeleni