Xana Wa Yi Tlangela Hakunene Mikateko Ya Yehovha?

KENICHI, wanuna wa malembe ya le xikarhi, u ye ekhemisi leswaku a ya kuma murhi wa mukhuhlwana. Loko a nwe murhi wolowo, miri wa yena wu nyenye murhi wolowo ivi a huma swirhumbana leswi nwayisaka ni swilondza leswi nga na mati emirini wa yena hinkwawo. A swi hlamarisi leswi Kenichi a sunguleke ku kanakana mayelana ni leswaku mukhemisi a nga va a nyikele nyingiso lowu eneleke eka swilaveko swa yena.

Van’wana va nga ha ehleketa hi Yehovha Xikwembu hi ndlela leyi Kenichi a languteke mukhemisi yoloye ha yona. Va kanakana leswaku Xikwembu xa matimba hinkwawo, Yehovha, xa hi khathalela hakunene hina vanhu. Hambileswi va swi xiyaka leswaku Xikwembu xi lulamile, a va kholwi leswaku xi khathalela munhu un’wana ni un’wana. Leswi swi tano ngopfu-ngopfu loko swilo swi nga va fambeli kahle kumbe loko ku namarhela ka vona eka misinya ya milawu ya Bibele ku landzeriwa hi swiphiqo swo tika. Hikwalaho ka ku pfumala ku twisisa, va languta swiphiqo swa vona tanihi swirhumbana leswi nwayisaka ni swilondza leswi Kenichi a veke na swona a nga swi langutelanga, onge xo va xihoxo xa Xikwembu hi ndlela yo karhi.—Swivuriso 19:3.

Yehovha a nga fanelanga a fanisiwa ni vanhu lava nga hetisekangiki. Vutivi ni vuswikoti bya vanhu byi pimiwile. Va tsandzeka ku twisisa hilaha ku teleke swilaveko swa van’wana swa xiviri, hilaha mukhemisi wa Kenichi a endleke hakona. Ku hambana ni sweswo, ku hava lexi mahlo ya Yehovha ma nga xi voniki. Hakanyingi Yehovha wa hi pfuna hina hi nga swi xiyi kumbe ku swi twisisa hikuva hi ni mboyamelo wo languta leswi hi nga riki na swona ni ku honisa mikateko yo tala leyi hi nga na yona. Ematshan’weni yo hatlisela ku vona Yehovha nandzu hikwalaho ka xiphiqo xihi na xihi lexi hi langutanaka na xona, hi fanele hi ringeta ku xiya mikateko leyi humaka eka Yehovha leyi hi tiphinaka ha yona.

Hi ku ya hi Webster’s Ninth New Collegiate Dictionary, “nkateko” wu nga hlamuseriwa tanihi “nchumu lowu hoxaka xandla entsakweni kumbe eku hlayisekeni.” Xana wa swi twisisa leswaku leswi swi tano ngopfu-ngopfu hi mikateko leyi humaka eka Yehovha?

Muwundli La Nga Ringanisiwiki Na Munhu

Loko wansati a vula leswaku nuna wa yena i muwundli lonene, hi ntolovelo u vula leswaku u khathalela swilaveko swa ndyangu wa yena hilaha ku eneleke, a wu kumela swakudya, ndhawu yo tshama eka yona ni swiambalo leswi eneleke leswaku ndyangu wu ta tsaka ni ku hlayiseka. Xana Yehovha i Muwundli la nga ni vuswikoti ku fikela kwihi? Xiyisisa pulanete ya hina ya Misava, ku nga kaya ra munhu. Yi le mpfhukeni wa 150 000 000 wa tikhilomitara ku suka edyambyini, ku nga mpfhuka lowu faneleke wa mahiselo lama ringaneke lama endlaka leswaku swi koteka ku hanya emisaveni. Ku voyama ka xirhendzevutana xa hina ka 23,5 wa tidigri ku endliwe hilaha ku hetisekeke, ku vanga ku hambana-hambana ka tinguva leti endlaka leswaku ku va ni ntshovelo lowukulu. Hikwalaho ka sweswo, misava yi wundla vanhu vo tlula ntlhanu wa magidi ya timiliyoni. Yehovha i Muwundli la hlamarisaka hakunene!

Ku tlula kwalaho, Bibele ya hi tiyisekisa leswaku Yehovha u hi tsakela swinene hina vanhu swin’we ni vuhlayiseki bya hina. Anakanya hi leswi, Yehovha u tiva yin’wana ni yin’wana ya tinyeleti ta ntsandza-vahlayi hi vito ra yona, naswona ku hava na xindzingiri na xin’we lexi welaka laha emisaveni a nga swi tivi. (Esaya 40:26; Matewu 10:29-31) Wa nga vona ndlela leyi a khathalelaka vanhu lava n’wi rhandzaka ha yona naswona va xaviweke hi ngati ya risima ya N’wana wa yena la rhandzekaka, Yesu Kreste! (Mintirho 20:28) Wanuna wo tlhariha u vule hi ndlela leyinene a ku: “Mikateko ya Yehova yi fuwisa munhu, a nga ṅwi engeteli mikaralo.”—Swivuriso 10:22.

Mikateko Leyi Hi Fuwisaka

Hi ni nchumu wa nkoka swinene lowu hi faneleke hi wu tlangela swinene. I yini nchumu wa kona? Bibele yi wu boxa yi ku: “Nawu lo’wu humeke noṅwini wa wena e ka mina wu tlula khume ra madzana ya mitiro ya nsuku ni silver.” (Pisalema 119:72; Swivuriso 8:10) Hambileswi nsuku wu nga wa risima swinene, nawu wa Yehovha wu fanele wu naveriwa ngopfu. Ku tiva nawu wa yena hilaha ku kongomeke kun’we ni vutlhari ni ku twisisa loku Yehovha a ku nyikaka lava lavaka ntiyiso hi mbilu hinkwayo i swilo leswi faneleke ku tekiwa swi ri swa risima. Swi hi hlomisela leswaku hi tisirheleta, hi langutana ni swiyimo leswi tikaka, hi langutana ni swiphiqo hi ndlela leyi humelelaka naswona hi eneriseka ni ku tsaka.

Leswi i ntiyiso hambi ku ri hi vana lavatsongo ngopfu. Xiya ndlela leyi xinhwanyetana xo karhi xi tlhantlheke swiphiqo swa xona hi ku landzelela nawu wa Yehovha ha yona. Xinhwanyetana lexi, lexi vuriwaka Akemi, xi tshama ekusuhi ni le Tokyo. Tata wa xona ni mana wa xona va tirhise misinya ya milawu ya Bibele eku xi leteleni naswona hi ku vulavula na hi xikombiso lexinene va pfune n’wana wa vona ku va ni rirhandzu eka Yehovha ni muakelani. Hi ku vona ka ha ri emahlweni swiphiqo leswi a nga ha hlanganaka na swona exikolweni, va ringete ku n’wi lunghekisela xiyimo hilaha va nga kotaka hakona. Hambiswiritano, loko Akemi a nghene xikolo xa le hansi, van’wana lava a va nghena na yena etlilasini yin’we va n’wi vone a “hambanile” hikuva a khongela a nga si dya naswona hikwalaho ka ripfalo rakwe a a papalata mintirho yo karhi leyi a yi nga fambisani ni Matsalwa. Endzhakunyana u hambe a karhatiwa hi ntlawa wa vana lava a va n’wi sivelela loko xikolo xi humile ivi va n’wi makala exikandzeni, va soholota mavoko ya yena va tlhela va n’wi hlekula.

Akemi lontsongo a nga rihiselanga, naswona a nga va chavanga vaxanisi va yena. Ematshan’weni ya sweswo, u ringete ku tirhisa leswi a swi dyondzeke. Hikwalaho ka ku tikhoma ka yena lokunene ni xivindzi xa yena, u xiximiwe hi vadyondzi-kulobye vo tala. Va yise mhaka leyi eka mudyondzisi, naswona ku sukela siku rolero, Akemi a nga ha khomiwanga hi ndlela yo biha exikolweni.

I yini lexi pfuneke Akemi ku langutana kahle ni xiyimo lexi xo nonon’hwa? I vutivi lebyi kongomeke, ku twisisa ni vutlhari lebyi humaka eka Yehovha lebyi vatswari va yena va byi ngheniseke eka yena. A a tolovelane swinene ni ku tiyisela ka Yesu, naswona ku n’wi susumetele ku tekelela xikombiso xa yena. Bibele yi n’wi pfune ku twisisa leswaku vanhu van’wana va endla swilo leswi hoxeke hikwalaho ko pfumala vutivi, naswona swi n’wi khutaze ku venga leswo biha leswi a swi endliwa hi ntlawa wolowo wa vana kambe ku nga ri ku venga vanhu va kona.—Luka 23:34; Varhoma 12:9, 17-21.

Kavula, ku hava vatswari lava nga lavaka ku vona n’wana wa vona a hlekuriwa ni ku khomiwa hi ndlela yo biha. Hambiswiritano, ehleketa hi ndlela leyi vatswari va Akemi va tsakeke ha yona loko va twa vuxokoxoko bya hinkwaswo leswi humeleleke. Vana vo tano i nkateko lowu humaka eka Yehovha hakunene.—Pisalema 127:3; 1 Petro 1:6, 7.

Ku Rindzela Yehovha Hi Ku Lehisa Mbilu

Kambe, emahlweni ka ku va u kuma mikateko ya Yehovha, minkarhi yin’wana u fanele u rindzela yena. Yehovha u tiva xiyimo xa wena naswona u enerisa xilaveko xin’wana ni xin’wana xa hina hi nkarhi lowu faneleke. (Pisalema 145:16; Eklesiasta 3:1; Yakobo 1:17) U nga ha va u rhandza mbhandzu wo karhi, kambe xana u ta ehleketa yini hi muendzeriwa loyi a ku nyikaka mbhandzu wu nga si wupfa? Hambi i apula, lamula kumbe xin’wana, u ta tsakela ku xi dya xi vupfile, xi ri na mati xi tlhela xi tsokombela. Hilaha ku fanaka, Yehovha u ku nyika leswi u swi pfumalaka hi nkarhi lowu faneleke—hayi nkarhi wu nga si fika kumbe se wu hundzile.

Tsundzuka ntokoto wa Yosefa. Hambi leswi a nga dyohanga nchumu, u tikume a ri ekhotsweni ra munyama ra le Egipta. Mukhotsiwa-kulobye, ku nga mucheri wa vhinyo wa Faro, a tshemba leswaku a a ta ntshunxiwa ivi a tshembisa ku yisa nyingiso wa Faro emhakeni ya Yosefa. Kambe endzhaku ka loko a ntshunxiwile u rivale Yosefa. A swi vonaka onge Yosefa u rivariwile. Hambiswiritano, endzhaku ka malembe mambirhi, u ntshunxiwile ekhotsweni naswona eku heteleleni u endliwe mufumi wa vumbirhi le Egipta. Ematshan’weni yo va ni ximbilwa-mbilwana, Yosefa u rindzele Yehovha. Hikwalaho ka leswi u katekisiwile hi ndlela leyi vuleke ku ponisiwa ka vutomi bya Vaisrayele ni bya Vaegipta.—Genesa 39:1–41:57.

Masashi a ri nkulu evandlheni ra le n’walungwini wa Japani. A nga ri ekhotsweni ra munyama, kambe u boheke ku rindzela Yehovha. Ha yini? Ku sukela loko ku sungule Xikolo xa Ndzetelo wa Vutirheli eJapani, ku nga xikolo xo letela vatirheli lava nga Vakreste lava fanelekaka, a a tiyimisele ku ya eka xona hi mbilu hinkwayo. U khongele hi vuenti hi lunghelo leri. Munghana wa yena loyi a phayona na yena u vitaniwile, kambe ku nga khathariseki ku navela ka yena hi mbilu hinkwayo, Masashi a nga vitaniwanga. U hele matimba swinene.

Hambiswiritano, u teke magoza yo langutana ni mintlhaveko ya yena. U dyondze Bibele ni tibuku leti kandziyisiweke hi Sosayiti ya Watch Tower, leti vulavulaka hi timhaka to tanihi ku titsongahata ni ku lawula mintlhaveko ya munhu. U lulamise mianakanyo ya yena ivi xisweswo a eneriseka swinene exiavelweni xa yena. U te loko a nga rindzelanga nchumu, hi loko a kuma xirhambo xo ya exikolweni xexo.

Hi ku va a hlakulele timfanelo to tanihi ku lehisa mbilu ni ku titsongahata, u vuyeriwile swinene exikolweni. Endzhakunyana, Masashi u nyikiwe lunghelo ro tirhela vamakwavo tanihi mulanguteri la famba-fambaka. Ina, Yehovha a swi tiva leswi Masashi a swi pfumala ivi a n’wi nyika hi nkarhi lowu swi nga ta n’wi vuyerisa swinene ha wona.

Lava Mikateko Ya Yena

Hikwalaho, Yehovha a nga fani ni mukhemisi luya. Hambileswi hi nga tsandzekaka ku twisisa nkhathalelo wa Yehovha ni musa wa yena, mikateko ya yena yi ta hi swivumbeko swo hambana-hambana—hi minkarhi ni hi tindlela leti hi vuyerisaka swinene. Kutani yana emahlweni u lava mikateko ya yena. Tsundzuka leswaku ana se u ni swivangelo swo tala swo nkhensa. U katekisiwe hi malunghiselelo ya nkoka yo ya emahlweni a hanya emisaveni. U nyikiwe vutivi bya Yehovha ni bya tindlela ta yena leti hetisekeke. U nyikiwe vutlhari. Naswona u kume ku twisisa. Hinkwaswo leswi swi hoxa xandla eka vuhlayiseki ni ntsako wa wena.

Leswaku u kuma nkateko wa Yehovha hi xitalo, yana emahlweni u dyondza Bibele nkarhi na nkarhi. Kombela Yehovha a ku pfuna ku twisisa ni ku tirhisa tidyondzo leti fanaka ni ndzalama leti nga eRitweni ra yena leri huhuteriweke. Ti ta ku fuwisa swinene, lerova a wu nge pfumali nchumu. Ina, u ta tsaka ni ku eneriseka sweswi, kutani u kuma vutomi lebyi teleke emisaveni leyintshwa leyi nga ta ta.—Yohane 10:10; 1 Timotiya 4:8, 9.

[Xifaniso lexi nga eka tluka 23]

Mikateko ya Yehovha i ya risima swinene ku tlula nsuku