Tinyimpfu Tin’wana Ni Ntwanano Lowuntshwa

“V̌amatiko . . . hikwav̌o la’v̌a nga ta hlawula sabata hi ku ka v̌a nga ri nyamisi, la’v̌a nga ta tiyisela e ntwananweni wa mina, nḍi ta v̌a fikisa e nṭhav̌eni ya mina le’yo kwetsima.”—ESAYA 56:6, 7.

1. (a) Hi ku ya hi xivono xa Yohane, i yini leswi endliwaka loko timheho ta vuavanyisi bya Yehovha ta ha khomiwile? (b) I ntshungu wihi lowu hlamarisaka lowu Yohane a wu voneke?

EXIVONWENI xa vumune xa buku ya Nhlavutelo, muapostola Yohane u vone timheho leti lovisaka ta vuavanyisi bya Yehovha ti khomiwile loko ka ha funghiwa swirho hinkwaswo swa “Israyele wa Xikwembu.” Lava hi vona va nga ta va vo sungula ku katekisiwa ha Yesu, xirho lexi tlakukeke xa mbewu ya Abrahama. (Vagalatiya 6:16; Genesa 22:18; Nhlavutelo 7:1-4) Eka xivono xexo, Yohane u vone “ntshungu lowukulu, lowu a ku nga ri na munhu la kotaka ku wu hlaya, wu huma eka matiko hinkwawo ni tinyimba hinkwato ni vanhu hinkwavo ni tindzimi hinkwato . . . , wu huwelela hi rito lerikulu . . . wu ku: ‘Ku ponisiwa hi ku kolota Xikwembu xa hina, lexi tshameke exiluvelweni, ni le ka Xinyimpfana.’” (Nhlavutelo 7:9, 10) Loko wu ku, “Ku ponisiwa hi ku kolota . . . Xinyimpfana,” ntshungu lowukulu wu kombisa leswaku na wona wu katekisiwa hi Mbewu ya Abrahama.

2. Ntshungu lowukulu wu humelele rini, naswona wu voniwa njhani?

² Ntshungu lowu lowukulu wu lemukiwe khale hi 1935, naswona nhlayo ya wona namuntlha yi tlula ntlhanu wa timiliyoni. Tanihi leswi swirho swa wona swi fungheriweke ku pona nhlomulo lowukulu, swi ta hlawuleriwa vutomi lebyi nga heriki loko Yesu a hlawula “tinyimpfu” eka “timbuti.” Vakreste va ntshungu lowukulu i swirho swa “tinyimpfu tin’wana” ta xifaniso xa Yesu xa matshanga ya tinyimpfu. Va ni ntshembo wo hanya hilaha ku nga heriki emisaveni ya paradeyisi.—Matewu 25:31-46; Yohane 10:16; Nhlavutelo 21:3, 4.

3. Vakreste lava totiweke ni tinyimpfu tin’wana va hambana njhani malunghana ni ntwanano lowuntshwa?

³ Lava va 144 000 va kuma nkateko wa ntwanano wa Abrahama hikwalaho ka ntwanano lowuntshwa. Tanihi vahlanganyeri eka ntwanano lowu, va va “ehansi ka musa lowu nga faneriwiki” ni le “[hansi] ka nawu wa Kreste.” (Varhoma 6:15; 1 Vakorinto 9:21) Kutani i swirho swa 144 000 ntsena swa Israyele wa Xikwembu leswi hi mfanelo swi dyeke swifanekiselo hi nkarhi wa Xitsundzuxo xa rifu ra Yesu, naswona Yesu u endle na swona ntsena ntwanano wa yena wa Mfumo. (Luka 22:19, 20, 29) Swirho swa ntshungu lowukulu a swi hlanganyeli eka ntwanano lowuntshwa. Hambiswiritano, swi tihlanganisa na Israyele wa Xikwembu, swi tshama na yena ‘etikweni’ ra yena. (Esaya 66:8) Kutani swa twala ku vula leswaku na vona va le hansi ka musa lowu nga faneriwiki wa Yehovha ni le hansi ka nawu wa Kreste. Hambileswi va nga riki vahlanganyeri eka ntwanano lowuntshwa, va pfuneka eka wona.

“V̌amatiko” Na “Israyele Wa Xikwembu”

4, 5. (a) Hi ku ya hi Esaya, i ntlawa wihi lowu a wu ta tirhela Yehovha? (b) Esaya 56:6, 7 yi hetiseka njhani eka ntshungu lowukulu?

⁴ Muprofeta Esaya u tsarile a ku: “V̌amatiko la’v̌a nga ta namarela Yehova e ku ṅwi tirela, ni ku ranḍa v̌ito ra Yehova, e ku v̌a malanḍa ya yena, hikwav̌o la’v̌a nga ta hlawula sabata hi ku ka v̌a nga ri nyamisi, la’v̌a nga ta tiyisela e ntwananweni wa mina, nḍi ta v̌a fikisa e nṭhav̌eni ya mina le’yo kwetsima, kutani nḍi v̌a ṭakisa e ndlwini leyi v̌a nḍi khongelaka ka yona; tiholokosta ta v̌ona, ni maganḍelo ya v̌ona ŝi ta amukeriwa altarini ya mina.” (Esaya 56:6, 7) Le Israyele, leswi a swi vula leswaku “v̌amatiko,” lava nga riki Vaisrayele, a va ta gandzela Yehovha—va rhandza vito ra yena, va yingisa vuxokoxoko bya ntwanano wa Nawu, va hlayisa Savata ni ku nyikela magandzelo etempeleni, ku nga ‘yindlu ya xikhongelo’ ya Xikwembu.—Matewu 21:13.

⁵ Esikwini ra hina, ‘vamatiko lava namarheleke Yehovha’ i ntshungu lowukulu. Vona va tirhela Yehovha swin’we na Israyele wa Xikwembu. (Zakariya 8:23) Va nyikela magandzelo lama amukelekaka ku fana ni ya Israyele wa Xikwembu. (Vaheveru 13:15, 16) Va gandzela etempeleni ya Xikwembu ya moya, ku nga ‘yindlu ya xona ya xikhongelo.’ (Ringanisa Nhlavutelo 7:15.) Xana va yi hlayisa Savata ya vhiki na vhiki? Vatotiwa ni tinyimpfu tin’wana a va lerisiwanga ku endla tano. (Vakolosa 2:16, 17) Hambiswiritano, Pawulo u byele Vakreste lava totiweke va Vaheveru a ku: “Ku sale ku wisa hi savata ka vanhu va Xikwembu. Hikuva munhu la ngheneke eku wiseni ka Xikwembu na yena u wisile emintirhweni yakwe, hilaha Xikwembu na xona xi wiseke emintirhweni ya xona.” (Vaheveru 4:9, 10) Vaheveru volavo va nghene eku ‘wiseni loku ka savata’ loko va tiveke ehansi ka “ku lulama ka Xikwembu,” va wisa ku ringeta ku tiyimelela hi mintirho ya Nawu. (Varhoma 10:3, 4) Vakreste va Matiko lava totiweke va wisa hilaha ku fanaka hi ku tiveka ehansi ka ku lulama ka Yehovha. Ntshungu lowukulu wu hlanganyela na vona eku wiseni koloko.

6. Tinyimpfu tin’wana namuntlha ti wu namarhela njhani ntwanano lowuntshwa?

⁶ Nakambe, tinyimpfu tin’wana ti namarhela ntwanano lowuntshwa hilaha vamatiko va khale a va wu namarhela hakona ntwanano wa Nawu. Hi ndlela yihi? Ku nga ri hi ku hlanganyela eka wona, kambe hi ku tiveka ehansi ka milawu leyi fambisanaka na wona ni hi ku pfuneka eka malunghiselelo ya wona. (Ringanisa Yeremiya 31:33, 34.) Ku fana ni vanakulobye va tona lava totiweke, tinyimpfu tin’wana ti tsariwe nawu wa Yehovha ‘etimbilwini ta tona.’ Ti yi rhandza swinene milawu ni misinya ya milawu ya Yehovha naswona ta yi yingisa. (Pisalema 37:31; 119:97) Ku fana ni Vakreste lava totiweke, ta n’wi tiva Yehovha. (Yohane 17:3) Ku vuriwa yini hi ku yimbisiwa? Malembe ya kwalomu ka 1500 emahlweni ko endliwa ka ntwanano lowuntshwa, Muxe u khutaze Vaisrayele a ku: “Yimbisani timbilu ta ṅwina.” (Deteronoma 10:16; Yeremiya 4:4) Hambileswi ku yimbisiwa ka nyama loku a ku boha ku heleke ni Nawu, vatotiwa ni tinyimpfu tin’wana va fanele va ‘yimbisa’ timbilu ta vona. (Vakolosa 2:11) Eku heteleleni, Yehovha u rivalela tinyimpfu tin’wana swidyoho swa tona exisekelweni xa “ngati ya ntwanano” ya Yesu leyi halatiweke. (Matewu 26:28; 1 Yohane 1:9; 2:2) Xikwembu a xi ti amukeli ti va vana va xona va moya, hilaha xi endlaka hakona hi lava 144 000. Kambe xi vula tinyimpfu tin’wana leswaku hi leti lulameke, hilaha Abrahama a vuriweke hakona la lulameke tanihi nakulobye wa Xikwembu.—Matewu 25:46; Varhoma 4:2, 3; Yakobo 2:23.

7. I ntshembo wihi lowu pfulekelaka tinyimpfu tin’wana namuntlha leti vuriwaka leti lulameke ku fana na Abrahama?

⁷ Eka lava 144 000, ku vuriwa lava lulameke swi va pfulela ndlela yo va ni ntshembo wo fuma na Yesu eMfun’weni wa le tilweni. (Varhoma 8:16, 17; Vagalatiya 2:16) Eka tinyimpfu tin’wana, ku vuriwa lava lulameke tanihi vanakulobye va Xikwembu swi va pfumelela leswaku va amukela ntshembo wo kuma vutomi lebyi nga heriki emisaveni ya paradeyisi—hi ku pona Armagedoni tanihi swirho swa ntshungu lowukulu kumbe hi ‘ku pfuxiwa ka lavo lulama.’ (Mintirho 24:15) I lunghelo lerikulu swonghasi ku va ni ntshembo wo tano ni ku va nakulobye wa Hosi ya vuako hinkwabyo, ku va ‘muendzi entsongeni wa yona’! (Pisalema 15:1, 2) Ina, vatotiwa na tinyimpfu tin’wana va katekisiwa hi ndlela leyi hlamarisaka ha Yesu, Mbewu ya Abrahama.

Siku Lerikulu Ra Ku Phahlelana Mariyeta

8. I yini lexi a xi fanekiseriwa hi magandzelo ya Siku ra ku Phahlelana Mariyeta ehansi ka Nawu?

⁸ Loko Pawulo a hlamusela ntwanano lowuntshwa, u tsundzuxe vahlayi va yena hi ta Siku ro Phahlelana Mariyeta ra lembe na lembe ehansi ka ntwanano wa Nawu. Hi siku rero, a ku nyikeriwa magandzelo yo hambana—rin’wana a ri ri ra nyimba ya vaprista ya Levhi, rin’wana ri va ra tinyimba ta 12 leti a ti nga ri ta vaprista. Leswi a swi hlamuseriwe khale tanihi leswi fanekiselaka gandzelo lerikulu ra Yesu leri a ri ta pfuna lava 144 000 lava nga ni ntshembo wo ya etilweni ni timiliyoni ta lava nga ni ntshembo wa ku hanya emisaveni.a Pawulo u kombise leswaku malunghana ni ku hetiseka ka rona, mimpfuno ya gandzelo ra Yesu yi kumiwa hikwalaho ka Siku lerikulu ra ku Phahlelana Mariyeta ehansi ka ntwanano lowuntshwa. Tanihi Muprista Lonkulu wa siku leri rikulu, Yesu u nyikele vutomi byakwe lebyi hetisekeke tanihi gandzelo ro phahlelana mariyeta leswaku a kumela vanhu “ku kutsuriwa loku nga heriki.”—Vaheveru 9:11-24.

9. Tanihi leswi Vakreste va Vaheveru lava totiweke a va ri eka ntwanano lowuntshwa, i yini lexi a va ta xi amukela?

⁹ Vakreste vo tala va Vaheveru va lembe-xidzana ro sungula a va ha “hisekela Nawu [wa Muxe].” (Mintirho 21:20) Kutani hilaha ku faneleke, Pawulo u va tsundzuxile a ku: “[Yesu i] muhlanganisi wa ntwanano lowuntshwa, leswaku, hikwalaho ka leswi rifu ri humeleleke leswaku va ntshunxiwa hi nkutsulo eka ku tlula nawu ehansi ka ntwanano wo sungula, lava vitaniweke va ta amukela xitshembiso xa ndzhaka leyi nga heriki.” (Vaheveru 9:15) Ntwanano lowuntshwa wu ntshunxe Vakreste va Vaheveru eka ntwanano wa khale, lowu a wu paluxa vudyoho bya vona. Hikwalaho ka ntwanano lowuntshwa, va amukele “xitshembiso xa ndzhaka leyi nga heriki [ya le tilweni].”

10. Vatotiwa ni tinyimpfu tin’wana va nkhensa Xikwembu hikwalaho ka yini?

¹⁰ “Un’wana ni un’wana” loyi a “kombisaka ripfumelo eka N’wana” u ta pfuneka eka gandzelo ra nkutsulo. (Yohane 3:16, 36) Pawulo u te: “Kreste . . . u nyikeriwe kan’we swi helela kwalaho leswaku a byarha swidyoho swa vo tala; naswona ra vumbirhi loko a humelela ku ta va ku nga ha ri hikwalaho ka xidyoho naswona u ta humelela eka lava n’wi languteleke hi mbilu hinkwayo leswaku va ponisiwa.” (Vaheveru 9:28) Namuntlha, lava va languteleke Yesu hi mbilu hinkwayo va katsa Vakreste lava totiweke va Israyele wa Xikwembu lava ha riki kona kun’we ni timiliyoni leti vumbaka ntshungu lowukulu, leti na tona ti nga ni ndzhaka leyi nga heriki. Mintlawa leyi yimbirhi yi nkhensa Xikwembu hikwalaho ka ntwanano lowuntshwa ni mikateko leyi nyikaka vutomi leyi fambisanaka na wona, ku katsa ni Siku lerikulu ra ku Phahlelana Mariyeta, kun’we ni vutirheli bya Muprista Lonkulu, Yesu eVukwetsimisisweni bya le tilweni.

Ku Khomeka eNtirhweni Wo Kwetsima

11. Vatotiwa na tinyimpfu tin’wana va endla yini hi ntsako, tanihi leswi mapfalo ya vona ma basisiweke hi gandzelo ra Yesu?

¹¹ Epapileni rakwe leri yaka eka Vaheveru, Pawulo u kandziyise ntikelo lowukulu wa gandzelo ra Yesu eka lunghiselelo ra ntwanano lowuntshwa loko ri ringanisiwa ni magandzelo ya vudyoho lawa a ma ri ehansi ka ntwanano wa khale. (Vaheveru 9:13-15) Gandzelo lerinene ra Yesu ri kota ku “basisa mapfalo ya hina emintirhweni leyi feke leswaku hi ta endlela Xikwembu lexi hanyaka ntirho wo kwetsima.” Eka Vakreste va Vaheveru, ‘mintirho leyi feke’ a yi katsa “ku tlula nawu ehansi ka ntwanano wo sungula.” Eka Vakreste namuntlha, yi katsa swidyoho leswi endliweke nkarhi lowu hundzeke leswi munhu a hundzukeke hakunene eka swona, leswi Xikwembu xi n’wi rivaleleke swona. (1 Vakorinto 6:9-11) Tanihi leswi mapfalo ya vona ma basisiweke, Vakreste lava totiweke va endlela “Xikwembu lexi hanyaka ntirho wo kwetsima.” Ni ntshungu lowukulu wu endla tano. Tanihi leswi va basiseke mapfalo ya vona hi “ngati ya Xinyimpfana,” va le tempeleni leyikulu ya moya ya Xikwembu, “va xi endlela ntirho wo kwetsima nhlikanhi ni vusiku.”—Nhlavutelo 7:14, 15.

12. Hi swi kombisa njhani leswaku hi ni “[xitiyisekiso] lexi heleleke xa ripfumelo”?

¹² Nakambe, Pawulo u te: “A hi tshineleni hi timbilu ta ntiyiso exitiyisekisweni lexi heleleke xa ripfumelo, timbilu ta hina ti ri leti xuviweke ti suka ripfalo ro homboloka ni mimiri leyi hlambiweke hi mati lama baseke.” (Vaheveru 10:22) Hi nga swi kombisa njhani leswaku hi ni “[xitiyisekiso] lexi heleleke xa ripfumelo”? Pawulo u khutaze Vakreste va Vaheveru a ku: “A hi khomeni swi tiya exitivisweni xa le rivaleni xa ntshembo wa hina [wa le tilweni] handle ko tsekatseka, hikuva la tshembiseke wa tshembeka. Naswona a hi khathalelaneni leswaku hi khutazana erirhandzwini ni le mintirhweni leyinene, hi nga fularheli ku hlengeletana ka hina, hilaha ku nga ntolovelo wa van’wana, kambe hi khutazana, naswona hi endla tano hilaha ku engetelekeke ngopfu tanihi leswi mi vonaka siku ri tshinela.” (Vaheveru 10:23-25) Loko ripfumelo ra hina ri hanya, na hina a hi nge “fularheli ku hlengeletana ka hina.” Hi ta tsakela ku khutaza vamakwerhu ni ku khutaziwa hi vona leswaku hi va ni rirhandzu ni ku endla mintirho leyinene ni ku tiyisiwa eka ntirho wa nkoka wa ku twarisa ntshembo wa hina erivaleni, hambi i wa ku hanya emisaveni kumbe etilweni.—Yohane 13:35.

“Ntwanano Lowu Nga Heriki”

13, 14. Ntwanano lowuntshwa hi lowu nga heriki hi tindlela tihi?

¹³ Xana ku humelela yini loko lowo hetelela wa lava 144 000 a fikelela ntshembo wakwe wa ku hanya etilweni? Xana ntwanano lowuntshwa a wu nge he tirhi? Hi nkarhi wolowo, ku ta va ku nga ha ri na xirho lexi saleke xa Israyele wa Xikwembu emisaveni. Vahlanganyeri hinkwavo va ntwanano lowu va ta va va ri na Yesu “emfun’weni wa Tata [wakwe].” (Matewu 26:29) Kambe ha ma tsundzuka marito ya Pawulo lama nga epapileni rakwe leri yaka eka Vaheveru lama nge: “Xikwembu xa ku rhula [xi pfuxe] murisi lonkulu wa tinyimpfu eka lava feke hi ngati ya ntwanano lowu nga heriki.” (Vaheveru 13:20; Esaya 55:3) Xana ntwanano lowuntshwa hi lowu nga heriki hi ndlela yihi?

¹⁴ Xo sungula, ku hambana ni ntwanano wa Nawu, ntwanano lowuntshwa a wu nge siviwi nikan’we. Xa vumbirhi, vuyelo bya wona hi lebyi nga heriki, ku fana ni vuhosi bya Yesu. (Ringanisa Luka 1:33 na 1 Vakorinto 15:27, 28.) Mfumo wa le tilweni wu ni xivandla lexi nga heriki eka swikongomelo swa Yehovha. (Nhlavutelo 22:5) Naswona xa vunharhu, tinyimpfu tin’wana ti ta hambeta ti pfuneka eka lunghiselelo ra ntwanano lowuntshwa. Hi nkarhi wa Mfumo wa Kreste wa Gidi ra Malembe, vanhu lava tshembekaka va ta hambeta va “endlela [Yehovha] ntirho wo kwetsima nhlikanhi ni vusiku etempeleni ya [yena],” hilaha va endlaka hakona sweswi. Yehovha a nge swi pfuxi swidyoho swa vona swa nkarhi lowu hundzeke leswi a va rivaleleke swona exisekelweni xa “ngati ya ntwanano” ya Yesu. Va ta hambeta va va ni xiyimo lexi lulameke tanihi vanakulobye va Yehovha, naswona nawu wa yena wu ta va wa ha tsariwile etimbilwini ta vona.

15. Hlamusela vuxaka lebyi Yehovha a nga ta va na byona emisaveni leyintshwa ni vagandzeri va yena va laha misaveni.

¹⁵ Xana hi nkarhi wolowo Yehovha u ta swi kota ku vula leswi landzelaka hi malandza lawa ya vanhu va nyama: ‘Ndzi Xikwembu xa vona, vona i vanhu va mina’? Ina. “Xi ta tshama na vona, naswona vona va ta va vanhu va xona. Kutani Xikwembu hi xiviri xi ta va na vona.” (Nhlavutelo 21:3) Va ta va “mixaxa ya vakwetsimi,” vayimeri va laha misaveni va “muti lowu rhandzekaka,” mutekiwa wa le tilweni wa Yesu Kreste. (Nhlavutelo 14:1; 20:9; 21:2) Leswi hinkwaswo swi ta koteka hikwalaho ka ripfumelo ra vona eka “ngati ya ntwanano” ya Yesu leyi halatiweke, ni hikwalaho ka ku titsongahata ka vona eka tihosi ta le tilweni tlhelo vaprista, lava loko va ha ri emisaveni a va ri Israyele wa Xikwembu.—Nhlavutelo 5:10.

16. (a) Ku nga va yini leswi rindzeleke lava nga ta pfuxeriwa emisaveni? (b) I mikateko yihi leyi nga ta ta eku heleni ka gidi ra malembe?

¹⁶ Ku vuriwa yini hi vafi lava pfuxiwaka emisaveni? (Yohane 5:28, 29) Na vona va ta rhambiwa leswaku va ‘katekisiwa’ ha Yesu, Mbewu ya Abrahama. (Genesa 22:18) Na vona va ta fanela ku rhandza vito ra Yehovha, va n’wi tirhela, va nyikela magandzelo lama amukelekaka, ni ku endla ntirho wo kwetsima endlwini yakwe ya xikhongelo. Lava endlaka tano va ta nghena eku wiseni ka Xikwembu. (Esaya 56:6, 7) Loko ku hela gidi ra malembe, hinkwavo lava tshembekaka va ta va va endliwe lava hetisekeke hikwalaho ka vutirheli bya Yesu Kreste ni vaprista-kulobye va 144 000. Va ta va lava lulameke, va nga ha vuriwi lava lulameke ntsena tanihi vanakulobye va Xikwembu. Va ta ‘hanya,’ va ntshunxeka hi ku helela eka xidyoho ni rifu leri va ri kumeke eka Adamu tanihi ndzhaka. (Nhlavutelo 20:5; 22:2) Wolowo ku ta va nkateko lowukulu swonghasi! Hi langutelo ra hina namuntlha, swi tikomba onge ntirho wa vuprista wa Yesu ni lava 144 000 wu ta va wu herile hi nkarhi wolowo. Mikateko ya Siku lerikulu ro Phahlelana Mariyeta yi ta va yi tirhisiwe hi ku helela. Nakambe, Yesu u ta “nyiketa mfumo eka Xikwembu tlhelo Tata wa yena.” (1 Vakorinto 15:24) Vanhu va ta ringiwa ro hetelela, kutani Sathana ni madimona yakwe va ta loviseriwa makumu.—Nhlavutelo 20:7, 10.

17. Hikwalaho ka ntsako lowu hi rindzeleke, un’wana ni un’wana wa hina u fanele a tiyimisela ku endla yini?

¹⁷ Kutani “ntwanano lowu nga heriki” wu ta tirha yini eka nguva leyi nyanyulaka leyi nga ta sungula hi nkarhi wolowo? Sweswo a hi swi tivi. Leswi Yehovha a swi paluxeke ku ta fikela sweswi swi ringene. Swi hi siya hi ri eku hlamaleni. Ehleketa—vutomi lebyi nga heriki byi va xiphemu xa “matilo lamantshwa ni misava leyintshwa”! (2 Petro 3:13) Ku nga vi ni lexi tsanisaka ku navela ka hina ku kuma ndzhaka ya xitshembiso xexo. Ku yima hi tiyile swi nga va leswi nga oloviki. Pawulo u te: “Ku laveka leswaku mi tiyisela, leswaku, loko mi endle ku rhandza ka Xikwembu, mi ta amukela ku hetiseka ka xitshembiso.” (Vaheveru 10:36) Kambe tsundzuka leswaku xiphiqo xihi ni xihi lexi hi faneleke hi xi hlula, nkaneto wihi ni wihi lowu hi faneleke hi wu hlula, a hi nchumu loko wu ringanisiwa ni ntsako lowu hi rindzeleke. (2 Vakorinto 4:17) Hikwalaho, ku nga vi ni un’we eka hina loyi a nga “muxaka wa vanhu lava tlhelelaka endzhaku eku lovisiweni.” Ku ri na sweswo, onge hi nga tikomba hi ri “muxaka lowu nga ni ripfumelo eku londzovotiweni ka moya-xiviri wu hanya.” (Vaheveru 10:39) Onge hinkwerhu hi nga n’wi tshemba hi ku helela Yehovha, Xikwembu xa mintwanano, leswaku un’wana ni un’wana wa hina a katekisiwa hilaha ku nga heriki.

[Nhlamuselo ya le hansi]

Xana U Swi Twisisile Ke?

◻ Handle ka Vakreste lava totiweke, i vamani lava katekisiwaka hi Mbewu ya Abrahama?

◻ Malunghana ni ku katekisiwa hi ntwanano lowuntshwa, tinyimpfu tin’wana ti fana njhani ni vaproselita lava a va ri ehansi ka ntwanano wa khale?

◻ Tinyimpfu tin’wana ti katekisiwa njhani hi lunghiselelo ra Siku lerikulu ro Phahlelana Mariyeta?

◻ Ha yini Pawulo a vule leswaku ntwanano lowuntshwa i “ntwanano lowu nga heriki”?

[Bokisi leri nga eka tluka 21]

Ntirho Wo Kwetsima eTempeleni

Ntshungu lowukulu wu gandzela swin’we na Vakreste lava totiweke exivaveni xa laha misaveni xa tempele leyikulu ya moya ya Yehovha. (Nhlavutelo 7:14, 15; 11:2) A ku na xivangelo xo gimeta hileswaku va le Xivaveni xin’wana xa Vamatiko. Loko Yesu a ha ri emisaveni, a ku ri ni Xivava xa Vamatiko etempeleni. Hambiswiritano, eka tipulani ta tempele ya Solomoni ni ya Ezekiyele leti a ti huhuteriwe hi Xikwembu, a ku nga ri na lunghiselelo ra Xivava xa Vamatiko. Etempeleni ya Solomoni, a ku ri ni xivava xa le handle laha Vaisrayele ni vaproselita, vavanuna ni va vavasati, a va gandzela swin’we. Lexi i xifanekiselo xa vuprofeta xa xivava xa laha misaveni xa tempele ya moya, laha Yohane a voneke ntshungu lowukulu wu ri karhi wu endla ntirho wo kwetsima kona.

Hambiswiritano, i vaprista ni Valevhi ntsena lava a va kota ku nghena exivaveni xa le ndzeni, laha altari leyikulu a yi ri kona; i vaprista ntsena lava a va nghena eVukwetsimelweni; naswona i muprista lonkulu ntsena loyi a a nghena eVukwetsimisisweni. Xivava xa le ndzeni ni Vukwetsimelo swi twisisiwa swi ri leswi fanekiselaka xiyimo xo hlawuleka xa moya xa Vakreste lava totiweke emisaveni. Naswona Vukwetsimisiso byi fanekisela tilo hi roxe, laha Vakreste lava totiweke va kumaka vutomi bya ku nga fi kona, kun’we ni Muprista wa vona Lonkulu wa le tilweni.—Vaheveru 10:19, 20.

[Xifaniso lexi nga eka tluka 23]

Hikwalaho ka ntsako lowu hi rindzeleke, a hi veni ni “ripfumelo eku londzovotiweni ka moya-xiviri wu hanya”