Tikereke Ti Tivula Swidyoho

“Mupapa U Nghenisa Kereke eNdzingweni.” “Nkonaniso Ni Ku Lwisana Ni Vuyuda—Kereke Yi Lunghekela Ku Tisola.”a “Ku Tisola Hi Ku Dlayiwa Ka Vayuda Hi Manazi.” “Mamethodist Ma Kombela Ku Rivaleriwa Eka Maindiya Ya Le Far West.”

XANA u tshame u hlaya tinhloko-mhaka to tanihi leti? Swi vonaka onge tikereke ti amukela nandzu wa tona hi xitalo naswona ti kombela ku rivaleriwa hi leswi ti swi endleke hi malembe-xidzana lama hundzeke. Vahaxi va mahungu nkarhi hinkwawo va kandziyisa ku tivona nandzu lokuntshwa ka mupapa.

Loko Mupapa A Kombela Ku Rivaleriwa

Exikarhi ka 1980 na 1996, John Paul wa Vumbirhi ‘u amukele swihoxo swa le matin’wini swa Kereke kumbe u kombele ku rivaleriwa’ kwalomu ka minkarhi ya 94, ku vula muhlamuseri wa mahungu wa Vatican, ku nga Luigi Accattoli ebukwini yakwe leyi nge Quando il papa chiede perdono (Loko Mupapa A Kombela Ndzivalelo). Hi ku ya hi Accattoli, “eKerekeni ya Khatoliki, i mupapa ntsena loyi a nga kombelaka ndzivalelo hi ndlela leyi lulameke.” Leswi u swi endlile, a vulavula hi timhaka leti hisaka swinene ematin’wini ya Khatoliki—Tinyimpi ta Nkutsulo, tinyimpi, ku seketela mimfumo leyi tshikilelaka, ku avana etikerekeni, ku lwisana ni Vuyuda, Minkonaniso, Mamafiya ni xihlawuhlawu. Eka phepha ra swivilelo leri rhumeriweke eka vafundhisi lavakulu hi 1994 (leri tekiwaka hi van’wana tanihi tsalwa ra nkoka swinene ra muchaviseki), John Paul wa Vumbirhi u khutaze “ku tivula swidyoho ka vanhu hinkwavo ni ka gidi ra malembe.” Vabixopo vo hlayanyana va landzele xikombiso xa mupapa. Hi December 1994 phepha-hungu ra le Italy leri nge Il Giornale ri te: “Vabixopo vo tala va le Amerika va humelele eka thelevhixini va kombela ndzivalelo erivaleni.” Ku rivaleriwa yini? Hi ku tekela ehansi xiphiqo xa vaprista lava pfinyaka vana, laha ku hlaseriweke vantshwa vo tala. Hi January 1995 phepha-hungu leri nge La Repubblica ri vike hi “xiendlo lexikulu ematin’wini ya Vukhatoliki bya manguva lawa”—xiphiqo xa ku miyela ka Mupapa Pius wa Vukhume-mbirhi malunghana ni ku dlayiwa ka Vayuda hi Manazi xi kaneriwile. Hi January 1995 phepha-hungu rolero ri vike leswaku huvo ya vabixopo va le Jarimani yi kombele ku rivaleriwa eka “swihoxo swo tala” swa Marhoma Khatoliki lama seketeleke tihanyi ta Manazi. Tikereke to hambana-hambana ta Maprotestente na tona ta tisola.

Ha Yini?

Bibele yi hi khutaza ku kombela ndzivalelo loko hi endle xihoxo, naswona vo tala va dzunisa tikereke loko ti tisola. (Yakobo 5:16) Kambe ha yini tikereke ti endla leswi? Xana swi fanele swi yi khumba njhani ndlela leyi hi ti langutaka ha yona?

[Nhlamuselo ya le hansi]