Hosi Leyi A Yi Ri Ni Rifuwo Ni Vutlhari

Xana u ehleketa leswaku rifuwo ri nga ku tisela ntsako? Loko munhu o ku nyika mali yo tala, xana a wu nga ta tsaka? Kumbexana a wu ta tsaka. Kumbexana u nga ehleketa hi tindlela leti u nga yi tirhisaka ha tona.

HAKUNENE, ku ni swilo swo tala leswi faneleke swi xaviwa leswaku swi endla vutomi byi enerisa ni ku tsakisa. Mali yi nga tlhela yi va ‘xisirhelelo’ eka swiphiqo leswi nga languteriwangiki, swo tanihi mavabyi kumbe ku pfumaleka ka mintirho.—Eklesiasta 7:12.

Kambe xana vuxaka bya mali ni ntsako hi byihi? Xana u ehleketa hilaha vo tala va ehleketaka hakona, leswaku ntsako wu tisiwa hi rifuwo? Ku kuma tinhlamulo ta swivutiso leswi swi nga ha nonon’hwa hikuva mali yi nga pimiwa hi ku olova kumbe yi hlayiwa, kasi ntsako a wu endliwi tano. A wu nge wu veki ntsako exikalwini ivi u wu pima.

Nakambe, vanhu van’wana lava fuweke va vonaka va tsakile, kasi van’wana va ni nhlomulo. Swa fana ni hi swisiwana. Hambiswiritano, vanhu vo tala—hambi ku ri lava ana se va fuweke—va tshemba leswaku mali yo tala yi ta va tisela ntsako lowukulu.

Munhu un’wana la tsaleke timhaka to tano a ku ri Hosi Solomoni wa le Israyele wa khale. A a ri un’wana wa vavanuna lava fuweke ngopfu eka lava tshameke va hanya. U nga hlaya hi nhlamuselo ya rifuwo ra yena lerikulu eka ndzima 10 ya buku ya Bibele ya Tihosi to Sungula. Hi xikombiso, xiya leswaku ndzimana 14 yi ri: “Ku tika ka nsuku lo’wu fikeleke Salomon hi lembe riṅwana ni riṅwana, a ti ri titalenta ta 666 ta nsuku.” (Xiitaliki i xerhu.) Ntsengo wolowo wu ringana ni 25 wa tithani ta nsuku. Namuntlha, nsuku wolowo wo tala a wu ta tlula mali yo ringana R900 000 000!

Kambe, Solomoni a a nga lo fuma ntsena; a katekisiwe hi Xikwembu hi vutlhari. Bibele yi ri: “Hosi Salomon yi tlula tihosi hikwato ta misav̌a hi rifuwo ni v̌utlhari. V̌anhu hikwav̌o v̌a misav̌a a v̌a lav̌a ku v̌ona Salomon, e ku yingisa v̌utlhari lebyi Šikwembu ši byi v̌ekeke mbilwini ya yena.” (1 Tihosi 10:23, 24) Na hina hi nga vuyeriwa eka vutlhari bya Solomoni, tanihi leswi matsalwa ya yena ma vumbaka xiphemu xa rhekhodo ya Bibele. A hi voneni leswaku u vule yini malunghana ni vuxaka exikarhi ka rifuwo ni ntsako.

[Laha Xifaniso Xi Humaka Kona eka tluka 3]

Reproduced from Die Heilige Schrift - Übersetzt von Dr. Joseph Franz von Allioli. Druck und Verlag von Eduard Hallberger, Stuttgart