‘Hambetani Mi Famba eVun’weni Na Kreste’
“Hikokwalaho, tanihi leswi mi amukeleke Kreste Yesu Hosi, hambetani mi famba evun’weni na yena.”—VAKOLOSA 2:6.
1, 2. (a) Xana Bibele yi byi hlamusela njhani vutomi bya Enoko bya ku tirhela Yehovha hi ku tshembeka? (b) Xana Yehovha u hi pfunise ku yini leswaku hi famba na yena, hilaha Vakolosa 2:6, 7 yi kombisaka hakona?
XANA u tshama u languta xifanyetana loko xi ri karhi xi famba ni tata wa xona? Xifanyetana xi encenyeta xiendlo xin’wana ni xin’wana xa tata wa xona, xikandza xa xona xi vonaka xi tsakile swinene; tata wa xona wa xi pfuna, xikandza xa yena xi vonaka xi tele hi rirhandzu ni ntsako. Hilaha ku fanaka, Yehovha u tirhisa xifaniso xo tano loko a hlamusela vutomi bya ku n’wi tirhela hi ku tshembeka. Hi xikombiso, Rito ra Xikwembu ri vula leswaku Enoko, wanuna wo tshembeka, a a “ṭhama a famba ni Šikwembu [xa ntiyiso].”—Genesa 5:24; 6:9.
2 Hilaha tatana la anakanyelaka a ri pfunaka ha kona jaha ra yena loko ri famba na yena, Yehovha u hi nyike mpfuno lowukulu swinene. U rhumele N’wana wa yena la velekiweke a ri yexe emisaveni. Eka goza rin’wana ni rin’wana leri a ri tekeke laha misaveni, Yesu Kreste u encenyete Tata wa yena wa le tilweni hilaha ku hetisekeke. (Yohane 14:9, 10; Vaheveru 1:3) Kutani ke, leswaku hi ta famba ni Xikwembu, hi fanele hi famba na Yesu. Muapostola Pawulo u tsarile a ku: “Hikokwalaho, tanihi leswi mi amukeleke Kreste Yesu Hosi, hambetani mi famba evun’weni na yena, mi dzima timitsu ni ku akiwa eka yena ni ku tiyisiwa eripfumelweni, hilaha mi dyondzisiweke hakona, mi khapakhapa ripfumelo hi ku nkhensa.”—Vakolosa 2:6, 7.
3. Hi ku ya hi Vakolosa 2:6, 7, ha yini hi nga vulaka leswaku ku famba na Kreste hi vun’we a swi katsi ku khuvuriwa ntsena?
3 Hikwalaho ka leswi swi lavaka ku famba na Kreste hi vun’we, ni ku lwela ku landzela mikondzo ya yena hi ku hetiseka, swichudeni swa Bibele swa timbilu letinene swa khuvuriwa. (Luka 3:21; Vaheveru 10:7-9) Emisaveni hinkwayo, hi 1997 ntsena, vanhu vo tlula 375 000 va teke goza leri ra nkoka—hi avhareji ku nga vanhu vo tlula 1000 siku na siku. Ku andza loku ka nyanyula hakunene! Hambiswiritano, marito ya Pawulo lama tsariweke eka Vakolosa 2:6, 7 ma kombisa leswaku ku famba na Kreste hi vun’we a swi katsi ku khuvuriwa ntsena. Riendli ra Xigriki leri hundzuluxeriweke va ku “hambetani mi famba” ri hlamusela xiendlo lexi yaka emahlweni, lexi endlekaka. Ku tlula kwalaho, Pawulo u vula ni leswaku ku famba na Kreste hi vun’we swi katsa swilo swa mune: ku dzima timitsu eka Kreste, ku akiwa eka yena, ku tiyisiwa eripfumelweni ni ku khapakhapa hi ku nkhensa. A hi kambisiseni xin’wana ni xin’wana xa swiga leswi, hi vona ndlela leyi swi hi pfunaka ha yona leswaku hi hambeta hi famba na Kreste hi vun’we.
Xana U ‘Dzime Timitsu Eka Kreste’?
4. Xana ku ‘dzima timitsu eka Kreste’ swi vula yini?
4 Xo sungula, Pawulo u tsala leswaku hi fanele ‘hi dzima timitsu eka Kreste.’ (Ringanisa Matewu 13:20, 21.) Xana munhu a nga swi kotisa ku yini ku dzima timitsu eka Kreste? Phela, timitsu ta murhi ti tumberile, kambe i ta nkoka eka murhi wolowo—ti wu nyika matimba naswona ti wu endla wu wundleka. Hilaha ku fanaka, xikombiso xa Kreste ni dyondzo yakwe swi rhanga swi hi khumba endzeni, swi tshama emianakanyweni ni le timbilwini ta hina. Loko swi ri kwalaho, swa hi wundla ni ku hi tiyisa. Loko hi swi pfumelela swi lawula mianakanyo ya hina, swiendlo swa hina, ni swiboho swa hina, hi susumeteleka ku nyiketela vutomi bya hina eka Yehovha.—1 Petro 2:21.
5. Xana hi nga ‘hlakulela ku navela’ swakudya swa moya hi ndlela yihi?
5 Yesu a a byi rhandza vutivi byo huma eka Xikwembu. U byi fanise ni swakudya. (Matewu 4:4) Phela, eka Dyondzo yakwe ya le Ntshaveni, u tshahe minkarhi ya 21 eka tibuku to hambana-hambana ta nhungu ta Matsalwa ya Xiheveru. Leswaku hi landzela xikombiso xa yena, hi fanele hi endla hilaha muapostola Petro a khutazaka hakona—“hlakulelani ku navela” swakudya swa moya “kukota tincece leta ha ku velekiwaka.” (1 Petro 2:2) Loko ricece lera ha ku velekiwaka ri navela swakudya, ri swi kombisa kahle sweswo. Loko enkarhini wa sweswi hi nga titwi hi ndlela yoleyo malunghana ni swakudya swa moya, marito ya Petro ma hi khutaza leswaku hi ‘hlakulela’ ku navela koloko. Njhani? Nsinya wa nawu lowu kumekaka eka Pisalema 34:8 wu nga pfuna: “Nantŝani, mi v̌a mi v̌ona leŝaku Yehova i lo’nene.” Loko hi hambeta hi ‘nantswa’ Rito ra Yehovha, ku nga Bibele, kumbexana hi hlaya xiyenge xo karhi eka yona siku na siku, hi ta vona leswaku ra wundla hi tlhelo ra moya naswona i rinene. Hi ku famba ka nkarhi, ku ri navela ka hina ku ta kula.
6. Ha yini swi ri swa nkoka ku anakanyisisa hi leswi hi swi hlayaka?
6 Hambiswiritano, i swa nkoka ku gayela swakudya kahle loko se hi swi dyile. Xisweswo, hi fanele hi anakanyisisa hi leswi hi swi hlayeke. (Pisalema 77:11, 12) Hi xikombiso, loko hi ri karhi hi hlaya buku leyi nge Nghwazi Leyi Tshameke Yi Hanya, ndzima yin’wana ni yin’wana yi nga hi pfuna swinene loko ho yima kutani hi tivutisa: ‘Hi xihi xivumbeko xa vumunhu bya Kreste lexi ndzi xi vonaka eka mhaka leyi, naswona ndzi nga xi tirhisa njhani evuton’wini bya mina n’wini?’ Ku anakanyisisa hi ndlela leyi ku ta hi pfuna leswaku hi tirhisa leswi hi swi dyondzaka. Kutani ke, loko hi langutane ni ku endla xiboho, hi nga ha tivutisa leswi Yesu a a ta va a swi endlile emhakeni ya kona. Loko hi endla swiboho swa hina hi mfanelo, hi kombisa leswaku hakunene hi dzime timitsu eka Kreste.
7. Xana hi fanele hi swi languta njhani swakudya leswi tiyeke swa moya?
7 Nakambe, Pawulo u hi khutaza leswaku hi dya “swakudya leswi tiyeke,” ku nga mintiyiso leyi enteke ya Rito ra Xikwembu. (Vaheveru 5:14) Ku hlaya Bibele hinkwayo ku nga ha va pakani ya hina yo sungula emhakeni leyi. Kutani ku va ni tinhloko-mhaka to karhi to tala ta dyondzo, to tanihi gandzelo ra nkutsulo ra Kreste, mintwanano yo hambana-hambana leyi Yehovha a yi endleke ni vanhu vakwe, kumbe marungula man’wana ya vuprofeta lama nga eBibeleni. Ku ni rungula ro tala leri nga hi pfunaka leswaku hi tswonga ni ku gayela swakudya swo tano swa moya leswi tiyeke. Xana pakani ya ku nghenisa vutivi byebyo hi yihi? A hi ku hi endla hi tibuma, kambe i ku aka rirhandzu ra hina ha Yehovha ni ku va ekusuhi na yena. (1 Vakorinto 8:1; Yakobo 4:8) Loko hi hisekela ku nghenisa vutivi lebyi, hi byi tirhisa eka hina vini, ni ku byi tirhisa leswaku hi pfuna van’wana, hakunene hi ta va hi tekelela Kreste. Leswi swi ta hi pfuna leswaku hi dzima timitsu eka yena hilaha ku faneleke.
Xana Wa ‘Akiwa Eka Kreste’?
8. Xana ku ‘akiwa eka Kreste’ swi vula yini?
8 Loko a nghena eka mhaka leyi landzelaka ya ku famba hi vun’we na Kreste, Pawulo u suka eka xivono xin’wana a ya eka xin’wana hi xihatla—u suka eka ximilana a ya eka muako. Loko hi anakanya hi muako lowu akiwaka, a hi anakanyi hi xisekelo xa yona ntsena kambe na hi muako lowukulu lowu yimaka endhawini leyi a yi nga ri na nchumu, endzhaku ka ku tirha hi matimba. Hilaha ku fanaka, hi fanele hi tirha hi matimba swinene leswaku hi aka timfanelo ni mikhuva leyi fanaka ni ya Kreste. Ku tinyiketela ko tano ka tlangeriwa, hilaha Pawulo a tsaleleke Timotiya hakona: ‘Ku ya emahlweni ka wena a ku vonake eka vanhu hinkwavo.’ (1 Timotiya 4:15; Matewu 5:16) Hi yihi mintirho yin’wana ya Vukreste leyi yi hi akaka?
9. (a) Leswaku hi tekelela Kreste evutirhelini bya hina, hi tihi tipakani leti fikelelekaka leti hi nga ha tivekelaka tona? (b) Hi swi tivisa ku yini leswaku Yehovha u lava leswaku hi tsakela ntirho wa hina wa nsimu?
9 Yesu u hi avele leswaku hi chumayela ni ku dyondzisa mahungu lamanene. (Matewu 24:14; 28:19, 20) U veke xikombiso lexi hetisekeke, a nyikela vumbhoni hi xivindzi na hi ndlela leyi humelelaka. Ina, a hi nge endli hilaha a endleke ha kona. Kambe, muapostola Petro u hi vekela pakani leyi: “Kwetsimisani Kreste tanihi Hosi etimbilwini ta n’wina, nkarhi hinkwawo mi lunghekela ku tihlamulela emahlweni ka mani na mani la lavaka ku tiva hi ta ntshembo lowu mi nga na wona, kambe mi swi endla hi moya wo rhula ni xichavo lexi enteke.” (1 Petro 3:15) Loko u kuma leswaku a hi ‘nkarhi hinkwawo u lunghekeleke ku tihlamulela,’ u nga heli matimba. Tivekele tipakani leti nga ta ku pfuna leswaku u tshinelela mpimanyeto wolowo. Ku lunghiselela ka ha ri emahlweni ku nga ha ku pfuna leswaku u cinca-cinca rungula ra wena kumbe u katsa ni tsalwa rin’we kumbe mambirhi. U nga ha tivekela tipakani to fambisa tibuku leti engetelekeke ta Bibele, ku endla maendzo yo tala yo vuyela, kumbe ku sungula dyondzo ya Bibele. A hi fanelanga hi hisekela ku andzisa nhlayo ntsena—tanihi nhlayo ya tiawara, tibuku leti fambisiweke, kumbe tidyondzo—kambe hi fanele hi hisekela ntikelo wa leswi hi swi endlaka. Ku veka tipakani leti fikelelekaka ni ku lwela ku ti fikelela swi nga hi pfuna leswaku hi tsakela ntirho lowu hi wu endlaka ensin’wini. Sweswo hi leswi Yehovha a swi lavaka—leswaku hi n’wi tirhela “hi ku ṭaka.”—Pisalema 100:2; ringanisa 2 Vakorinto 9:7.
10. Hi yihi mintirho yin’wana ya Vukreste leyi hi faneleke hi yi endla, naswona xana yona yi hi pfuna njhani?
10 Nakambe ku ni mintirho leyi hi yi endlaka evandlheni leyi yi hi akaka eka Kreste. Wa nkoka swinene hi lowu wa ku kombisana rirhandzu, hikuva lowu i mfungho wa Vakreste va ntiyiso. (Yohane 13:34, 35) Loko ha ha dyondza, vo tala va hina a hi rhandza swinene munhu loyi a hi dyondzisaka, hikuva sweswo swo tiendlekela. Kambe, xana sweswi hi ta xi landzelela xitsundzuxo xa Pawulo xa leswaku ‘hi ndlandlamuxa’ hi ringeta ku tolovelana ni van’wana evandlheni? (2 Vakorinto 6:13) Vakulu na vona va swi lava ku rhandziwa ni ku tlangeriwa hi hina. Loko hi tirhisana na vona, hi lava ni ku amukela ndzayo ya Matsalwa eka vona, hi ta endla leswaku ntirho wa vona wo nonon’hwa wu olova. (Vaheveru 13:17) Hi nkarhi lowu fanaka, sweswo swi nga endla leswaku hi akiwa eka Kreste.
11. Hi rihi langutelo lerinene leri hi nga vaka na rona malunghana ni ku khuvuriwa?
11 Nkhuvulo i xiendlakalo lexi nyanyulaka swinene! Hambiswiritano, a hi fanelanga hi langutela leswaku endzhaku ka sweswo vutomi byi ta tshama byi ri lebyi nyanyulaka hi ndlela yoleyo. Nkarhi lowukulu wa ku akiwa ka hina eka Kreste wu katsa ku “famba hilaha ku hlelekeke eka ntila lowu fanaka.” (Vafilipiya 3:16) Sweswo a swi vuli swona leswaku hi fanele hi hanya vutomi lebyi nga tsakisiki, lebyi khomisaka gome. Kahle-kahle swi vula ku famba u ya emahlweni hi ndlela leyi ololokeke—hi marito man’wana, i ku aka mikhuva leyinene ya swilo swa moya ni ku yi landzelela siku na siku, lembe na lembe. Tsundzuka, “loyi a tiyiseleke ku fika emakumu hi yena la nga ta ponisiwa.”—Matewu 24:13.
Xana Wa ‘Tiyisiwa eRipfumelweni’?
12. Xana ku ‘tiyisiwa eripfumelweni’ swi vula yini?
12 Eka xiga xakwe xa vunharhu lexi ha xona a hlamuselaka ku famba ka hina na Kreste hi vun’we, Pawulo u hi khutaza leswaku hi “tiyisiwa eripfumelweni.” Vuhundzuluxeri byin’wana byi hlayekisa xileswi, “tiyisekisiwa malunghana ni ripfumelo,” hikuva rito ra Xigriki leri Pawulo a ri tirhiseke ri nga ha vula “ku tiyisekisa, ku tshembisa, ni ku tiyisa nchumu hi nawu.” Loko hi ri karhi hi kula hi vutivi, hi nyikiwa swivangelo swin’wana swo vona leswaku ripfumelo ra hina eka Yehovha Xikwembu ri tiyisiwe kahle naswona ri simekiwe ximfumo. Leswi swi endla leswaku ku tiya ka hina ku kula. Swi endla leswaku misava ya Sathana yi tikeriwa ku hi hambukisa. Leswi swi hi tsundzuxa hi xikhutazo xa Pawulo xa leswaku hi ‘chivirikela ku wupfa.’ (Vaheveru 6:1) Ku wupfa ni ku tiya swa fambisana.
13, 14. (a) Hi wihi nxungeto lowu Vakreste va lembe-xidzana ro sungula va le Kolosa va langutaneke na wona malunghana ni ku tiya ka vona? (b) I yini lexi nga ha vaka xi vilerise muapostola Pawulo?
13 Ku tiya ka Vakreste va lembe-xidzana ro sungula le Kolosa ku langutane ni minxungeto. Pawulo u tsundzuxile: “Tivoneleni: swi nga ha endleka ku va ni un’wana loyi a nga ta mi phasa hi filosofi ni vuxisi bya hava hi ku ya hi ndhavuko wa vanhu, hi ku ya hi swilo swa masungulo swa misava, ku nga ri hi ku ya hi Kreste.” (Vakolosa 2:8) Pawulo a a nga lavi leswaku Vakolosa, lava va nga ehansi ka ‘mfumo wa n’wana wa Xikwembu loyi xi n’wi rhandzaka,’ va hambukisiwa, va susiwa eka xiyimo xa vona xa moya lexi katekeke. (Vakolosa 1:13) A va ta hambukisiwa hi tindlela tihi? Pawulo u boxe “filosofi,” ku nga ndhawu yi ri yoxe ntsena laha rito leri ri humelelaka kona eBibeleni. Xana a a vulavula hi vativi va filosofi va Magriki, vo tanihi Plato na Socrates? Hambileswi lava a va ri nxungeto eka Vakreste va ntiyiso, emasikwini wolawo, rito “filosofi” a ri ri ni mongo lowu anameke. Hi ntolovelo a ri vula mintlawa yo tala ni swikolo swa tintlharhi—ku katsa ni swa vukhongeri. Hi xikombiso, Vayuda va lembe-xidzana ro sungula vo tanihi Josephus na Philo a va vula leswaku vukhongeri bya vona a byi ri filosofi—kumbexana a va endlela ku byi endla byi tsakeriwa.
14 Tifilosofi tin’wana leti ti nga ha vaka ti vilerise Pawulo, a ti ri ta vukhongeri. Endzhakunyana, eka ndzima leyi fanaka ya papila rakwe ro ya eka Vakolosa, u vulavule ni lava a va dyondzisa a ku, “Mi nga khomi, kumbe ku nantswa, kumbe ku khumba,” hi ndlela yoleyo a kombetela eka swiyenge swa Nawu wa Muxe leswi herisiweke hi ku fa ka Kreste. (Varhoma 10:4) Ku tlhandlekela eka tifilosofi ta vuhedeni, a ku ri ni minkucetelo leyi khumbeke ni ku xungeta vumoya bya vandlha. (Vakolosa 2:20-22) Pawulo u tsundzuxe hi filosofi leyi a yi ri xiphemu xa “swilo swa masungulo swa misava.” Dyondzo yo tano ya mavunwa a yi huma eka vanhu.
15. Hi nga ku papalata njhani ku hambukisiwa hi mianakanyo leyi nga riki ya Matsalwa leyi hi nga ha hlangavetanaka na yona?
15 Ku dyondzisiwa ka mianakanyo ya vanhu leyi nga sekeriwangiki kona eRitweni ra Xikwembu swi nga xungeta ku tiya ka Mukreste. Hina namuntlha hi fanele hi tivonela eka minxungeto ya muxaka lowu. Muapostola Yohane u tsundzuxile a ku: “Varhandziwa, mi nga kholwi marito hinkwawo lama huhuteriweke, kambe kambisisani marito lama huhuteriweke mi vona loko swi ri leswaku ma huma eka Xikwembu.” (1 Yohane 4:1) Kutani ke, loko mudyondzi-kulobye a ku byela leswaku ku hanya hi mimpimanyeto ya Bibele i nchumu lowu hundzeriweke hi nkarhi, kumbe loko muakelani a ringeta ku ku kucetela leswaku u hlongorisa swilo leswi vonakaka, kumbe loko mutirhi-kuloni hi vusukumbele a ringeta ku ku endla leswaku u lwisana ni ripfalo ra wena leri leteriweke hi Bibele, kumbe hambiloko a xopaxopa swihoxo ni ku sola van’wana evandlheni hi ku tirhisa vonelo rakwe, u nga teki hinkwaswo leswi va swi vulaka. Hluta, u susa leswi nga pfumelelaniki ni Rito ra Xikwembu. Loko ho endla tano, hi ta tiya loko hi ri karhi hi famba na Kreste hi vun’we.
“Mi Khapakhapa Ripfumelo Hi Ku Nkhensa”
16. Hi yini ndlela ya vumune ya ku famba na Kreste hi vun’we, naswona hi xihi xivutiso lexi hi nga ha xi vutisaka?
16 Ndlela ya vumune leyi Pawulo a yi boxaka malunghana ni ku famba na Kreste hi vun’we, hi leswaku hi fanele hi “khapakhapa ripfumelo hi ku nkhensa.” (Vakolosa 2:7) Rito “khapakhapa” ri hi tsundzuxa nambu lowu khapakhapaka emagangeni ya wona. Leswi swi vula leswaku eka hina Vakreste, ku nkhensa ka hina ku fanele ku va nchumu lowu tshamaka wu ri kona kumbe ku va mukhuva. Un’wana ni un’wana wa hina a nga ha tivutisa, ‘Xana ndzi munhu la nkhensaka?’
17. (a) Hikwalaho ka yini hi nga ha vulaka leswaku hinkwerhu ka hina hi na swo tala swo va lava nkhensaka, hambi loko swiyimo swi tika? (b) Hi tihi tinyiko leti humaka eka Yehovha leti u ti nkhensaka swinene?
17 Ina, hinkwerhu hi ni xivangelo xo twala xo khapakhapa hi ku nkhensa eka Yehovha siku na siku. Hambiloko swilo swi tika, ku nga ha va ni swilo leswi tolovelekeke leswi phyuphyisaka. Munghana a nga ha ku kombisa ntwela-vusiwana. Murhandziwa a nga ha ku khumba hi ndlela leyi ku tiyisaka. Ku wisa kahle ni vusiku ku nyika matimba. Swakudya swo nandziha swi herisa switlhavi swa ndlala. Risimu ra xinyenyana, ku hleka ka n’wana, xibakabaka xa wasi lexi vangamaka, rimoyana leri phyuphyisaka—leswi ni swin’wana swo tala swi nga ha ta eka hina hi siku rin’we. Swa olova ku honisa tinyiko ta muxaka lowu. Xana hinkwato a ti faneriwi hi marito hi ku khensiwa? Hinkwato ti huma eka Yehovha, Xihlovo xa “nyiko yin’wana ni yin’wana leyinene ni nyiko yin’wana ni yin’wana leyi hetisekeke.” (Yakobo 1:17) Naswona u hi nyike ni tinyiko leti tlulaka leti—hi xikombiso, vutomi hi byoxe. (Pisalema 36:9) Ku tlula kwalaho, u hi nyike lunghelo ro hanya hilaha ku nga heriki. Leswaku a lunghiselela nyiko leyi, Yehovha u kanye mbilu a rhumela N’wana wa yena la velekiweke a ri yexe, loyi a a “ṅwi ṭakisa hi masiku.”—Swivuriso 8:30; Yohane 3:16.
18. Xana hi nga tikombisa hi ri lava nkhensaka eka Yehovha hi ndlela yihi?
18 Hakunene i ya ntiyiso marito ya mupisalema lama nge: “E ku ḍunisa Yehova, i mhaka le’yo saseka.” (Pisalema 92:1) Hilaha ku fanaka, Pawulo u tsundzuxe Vakreste va le Tesalonika a ku: “Mayelana ni hinkwaswo nkhensani.” (1 Vatesalonika 5:18; Vaefesa 5:20; Vakolosa 3:15) Un’wana ni un’wana wa hina a nga ha tiyimisela ku va la nkhensaka swinene. Swikhongelo swa hina a swi fanelanga swi va swa ku kombela ntsena eka Xikwembu malunghana ni swilaveko swa hina. A swi bihanga ku katsa swikombelo eka swikhongelo swa hina. Kambe anakanya u ri ni munghana loyi a vulavulaka na wena ntsena loko a lava xo karhi eka wena! Kutani ke, hikwalaho ka yini u nga khongeli eka Yehovha, u n’wi nkhensa ntsena ni ku n’wi dzunisa? Swikhongelo swa muxaka wolowo swi fanele swi n’wi tsakisa swinene loko a languta misava leyi yi nga hava ku nkhensa a ri matilweni! Mpfuno wun’wana hi leswaku swikhongelo swo tano swi nga ha hi pfuna leswaku hi languta tlhelo lerinene ra vutomi, swi hi tsundzuxa ndlela leyi hi katekeke ha yona.
19. Xana marito ya Pawulo eka Vakolosa 2:6, 7 ma ringanyeta njhani leswaku hinkwerhu hi nga ha ya emahlweni hi antswisa eku fambeni ka hina na Kreste?
19 Xana a swi hlamarisi ku vona leswaku eka ndzimana yin’we ntsena ya Rito ra Xikwembu ku nga kumiwa nkongomiso wa vutlharhi swonghasi? Ndzayo ya Pawulo ya leswaku hi hambeta hi famba na Kreste i nchumu lowu un’wana ni un’wana wa hina a faneleke a wu yingisa. Kutani ke, a hi tiyimiseleni ku ‘dzima timitsu eka Kreste,’ hi “akiwa eka yena,” hi “tiyisiwa eripfumelweni,” ni ku ‘khapakhapa hi ku nkhensa.’ Ndzayo leyi i ya nkoka swinene eka lava va ha ku khuvuriwaka. Kambe yi tirha eka hina hinkwerhu. Anakanya ndlela leyi rimitsu lerikulu ri yaka ri kula ha yona ni ndlela leyi muako lowu akiwaka wu yaka wu ya ehenhla ha yona. Hilaha ku fanaka, ku famba ka hina na Kreste a ku heli. Ku kula ku tshama ku ri kona. Yehovha u ta hi pfuna ni ku hi katekisa, hikuva u lava leswaku hi hambeta hi famba na yena swin’we ni N’wana wa yena la rhandzekaka, hilaha ku nga heriki.
U Nga Hlamula Njhani?
◻ Xana ku famba hi vun’we na Kreste swi katsa yini?
◻ Xana ku ‘dzima timitsu eka Kreste’ swi vula yini?
◻ Xana hi nga ‘akiwa eka Kreste’ hi ndlela yihi?
◻ Ha yini swi ri swa nkoka swinene ku “tiyisiwa eripfumelweni”?
◻ Hi swihi swivangelo leswi hi nga na swona swo ‘khapakhapa hi ku nkhensa’?
[Xifaniso lexi nga eka tluka 10]
Timitsu ta murhi ti nga ha va ti nga vonaki, kambe ti wu nyika swakudya naswona ta wu tiyisa