Xiviko Xa Vahuweleri Va Mfumo

“Endhawini Ya Ku Xavisela Siku Rin’wana Ni Rin’wana”

MUAPOSTOLA PAWULO u tirhise nkarhi wun’wana ni wun’wana ku hangalasa rungula ra Mfumo. Leswaku a lavisisa lava fanelekaka, u hlamulane “esinagogeni ni Vayuda . . . ni lava a va tshuka va va kona endhawini ya ku xavisela siku rin’wana ni rin’wana.”—Mintirho 17:17.

Ku hiseka ko tano ku ve mfungho wa vagandzeri va ntiyiso va Yehovha ku sukela hi lembe-xidzana ro sungula C.E. (Matewu 28:19, 20) Namuntlha, Timbhoni ta Yehovha hilaha ku fanaka ti tirhisa maendlelo yo hambana-hambana loko hi ku hiseka ti ri karhi ti pfuna vanhu va timbilu to tshembeka leswaku va kuma vutivi lebyi kongomeke bya ntiyiso. (1 Timotiya 2:3, 4) Ntokoto lowu landzelaka wa le Australia wa swi kombisa leswi.

Masiku ya ntlhanu vhiki rin’wana ni rin’wana, Sid na Harold va cincana eku languteleni ka ndhawu leyi ku kombisiweke tibuku ta Bibele exitichini xa xitimela eSydney. Va avelane mahungu lamanene ya Mfumo wa Xikwembu hi ndlela leyi kwalomu ka malembe ya ntlhanu. Sid, loyi a nga ni malembe ya 95 hi vukhale, u ri: “Loko ndzi ri ni malembe ya 87, a ndzi nga ha swi koti ku chayela movha. Sweswo swi ndzi hete matimba hikuva a ndzi tiphina hi ntirho wa ku nyikela vumbhoni erivaleni. Siku rin’wana loko ndzi ri kusuhi ni ndhawu ya vavalangi leyi dumeke leyi vitaniwaka Echo Point eKatoomba, ndzi vone mumpfampfarhuti a xavisa swifaniso swa ndhawu yo saseka. Ndzi langutisise swifaniso ivi ndzi anakanya ndzi ku, ‘Ndzi ni swifaniso swo antswa enkwameni wa mina wa tibuku ku tlula leswi—naswona a swi durhi!’ Kutani ndzi anakanye ku endla vukombiselo ndzi byi veka endhawini leyi nga ni vavalangi vo tala, ivi ndzi fambisela vanhu lava hundzaka tibuku ta Bibele leti nga ni swifaniso swo saseka leti hangalasiwaka hi Timbhoni ta Yehovha.

“Malembe ya mune lama hundzeke, ndzi rhurhisele vukombiselo lebyi eSydney, ivi Harold a ndzi joyina. Ha cincana eku khathaleleni ka vukombiselo lebyi kutani hi tirha ni mavandlha ya ka hina.” Harold, loyi a nga na malembe ya 83 sweswi, u ri: “Ku sukela hi Musumbhunuku ku ya fika hi Ravuntlhanu a hi vanhu vangani lava nga kona ekaya. Kutani ku avelana rungula ra Mfumo hi ndlela leyi ku hi yisa laha vanhu va nga kona. Hi ntolovelo hi kuma vuyelo lebyinene. Ku fambisa ka hina tibuku ka hlamarisa etikweni leri.”

Sid u ri: “Hambileswi hi tshameke etindhawini ta mune kumbe ntlhanu to hambana-hambana hi malembe yo tala, vanhu va hatla va hi tiva. Vanhu van’wana va ta eka hina va lava tibuku. Van’wana va ni swivutiso leswi va lavaka swi hlamuriwa. Kasi van’wana vo lava ku vulavula timinete ti nga ri tingani ntsena. Lowu hi wona ntsena nkarhi lowu ndzi vaka ni maendzo yo vuyela loko vanhu va ta eka mina,” a ri karhi a hlekela ehansi.

Harold wa engeta a ku: “Vanhu vo tala va yi tsakela Bibele hakunene. Hi n’hweti yin’we vanhu va mune va sungule ku dyondza Bibele ni Timbhoni hikwalaho ka tibuku leti va ti kumeke eka hina na hikwalaho ka swivutiso leswi hi koteke ku swi hlamula hi Bibele. Mintokoto yo fana ni yoleyo ya hi khutaza swinene.”

Ku fana na Sid na Harold—na ku fana na muapostola Pawulo—Timbhoni ta Yehovha kun’wana ni kun’wana ti tirhisa tindlela hinkwato leti kotekaka ku hangalasa rungula ra tona ra nkoka. Xisweswo, “mahungu lamanene” ma ya emahlweni ma chumayeriwa “emisaveni hinkwayo leyi akiweke.”—Matewu 24:14.