Va Endle Ku Rhandza Ka Yehovha

Pawulo U Nyikela Vumbhoni Hi Xivindzi eMahlweni Ka Vachaviseki

KU HAMBANA exikarhi ka vavanuna lavambirhi a ku ri erivaleni. Un’wana a a ambale harhi ya vuhosi kasi un’wana a bohiwe hi tinketana. Un’wana a a ri hosi; un’wana, a a ri mukhotsiwa. Endzhaku ka malembe mambirhi a ri ekhotsweni, sweswi muapostola Pawulo u yime emahlweni ka mufumi wa Vayuda, Heroda Agripa wa Vumbirhi. Hosi ni nsati wa yona, Bernike, va te “va ri karhi va heleketiwa hi minkulungwana kutani va nghena endhawini ya vayingiseri swin’we ni tindhuna ta nyimpi ni vavanuna lava tlakukeke emutini.” (Mintirho 25:23) Buku yin’wana yi ri: “Swi nga endleka leswaku a ku ri ni vanhu va madzana yo hlayanyana.”

Mufumi lontshwa la hlawuriweke, Festo, hi yena a hleleke hlengeletano leyi. Mufumi loyi a n’wi tlhandlamaka, Felikisi, a a tsakela ku vona Pawulo a xaniseka ekhotsweni. Kambe Festo a nga tshembi leswaku swihehlo leswi Pawulo a rhwexiweke swona i ntiyiso. Phela, Pawulo a a tiyiseka leswaku a a ri hava nandzu, lerova a kombela ku andlala mhaka yakwe eka Khezari! Mhaka ya Pawulo yi susumetele Hosi Agripa leswaku a lava ku tiva. U te: “Na mina ndzi nga swi rhandza ku twa munhu loyi.” Festo u endle malunghiselelo hi ku hatlisa, kumbexana a ri karhi a tivutisa leswaku hosi yi ta anakanya yini hi mubohiwa loyi wo hlamarisa.—Mintirho 24:27–25:22.

Siku leri landzelaka, Pawulo u tikume a yime emahlweni ka ntshungu lowukulu wa vachaviseki. U byele Agripa a ku: “Ndzi tihlaya la tsakeke leswi ndzi tihlamulelaka emahlweni ka wena namuntlha, ngopfu-ngopfu leswi u yi tivaka khwatsi mikhuva hinkwayo swin’we ni minjhekanjhekisano leyi nga kona exikarhi ka Vayuda. Hikokwalaho ndzi kombela leswaku u ndzi yingisa hi ku lehisa mbilu.”—Mintirho 26:2,3.

Ku Tihlamulela Ka Pawulo Hi Xivindzi

Xo sungula, Pawulo u byele Agripa leswaku u tshame a va muxanisi wa Vakreste. U te: “A ndzi ringeta ku va sindzisa ku landzula vupfumeri bya vona,ndzi kale ndzi va xanisa hambi ehandle ka miti.” Pawulo u ye emahlweni a hlamusela ndlela leyi a voneke xivono ha yona, lexi laha eka xona Yesu loyi a pfuxiweke a n’wi vutiseke a ku: “U ndzi xanisela yini? Ku tshamela ku raha tinsungunu swi nonon’hwisela wena.”a—Mintirho 26:4-14.

Kutani Yesu u rhume Sawulo ku ya nyikela vumbhoni eka vanhu va matiko hinkwawo, u te, “swilo leswi u swi voneke na swilo leswi ndzi nga ta endla leswaku u swi vona malunghana na mina.” Pawulo u boxe leswaku u tikarhatile leswaku a hetisisa xiavelo xa yena. Nakambe u byele Agripa a ku: “Hikwalaho ka swilo leswi Vayuda va ndzi khomile etempeleni kutani va ringeta ku ndzi dlaya.” Loko a endla xikombelo eka Agripa loyi a rhandza Xiyuda, Pawulo u kandziyise leswaku entiyisweni vumbhoni byakwe a byi “vuli swin’wana handle ka swilo leswi Vaprofeta swin’we na Muxe va vuleke leswaku swi ta endleka” malunghana ni rifu ra Mesiya ni ku pfuxiwa ka yena.—Mintirho 26:15-23.

Festo u n’wi kavanyetile. A huwelela a ku: “Ku dyondza ngopfu swa ku pengisa!” Pawulo a angula: “A ndzi pengi, Muchaviseki Festo, kambe ndzi vulavula marito ya ntiyiso na ya mianakanyo yo hluteka.” Kutani Pawulo u te eka Agripa: “Hosi leyi ndzi vulavulaka na yona hi mavulavulelo yo ntshunxeka yi swi tiva kahle swilo leswi; hikuva ndza khorwiseka leswaku ku hava na xin’we xa swilo leswi lexi yi xi kohlaka, hikuva xilo lexi a xi endliwanga exihundleni.”—Mintirho 26:24-26.

Kutani Pawulo u vutise Agripa hi ku kongoma. “Xana wena, Hosi Agripa, wa va kholwa Vaprofeta?” Handle ko kanakana, xivutiso lexi xi endle leswaku Agripa a karhateka. Phela a nga swi lavi ku tisusa xindzhuti, kutani ku pfumelelana na Pawulo a swi ta n’wi kombisa a ri la pfumelelanaka na leswi Festo a swi vulaka ku ‘penga.’ Kumbexana hi ku xiya ku kanakana ka Agripa, Pawulo u tihlamurile. U te: “Ndza swi tiva leswaku wa kholwa.” Agripa u vulavurile, kambe a nga tibohi eka marito ya yena. U byele Pawulo, “hi nkarhi wo koma a wu ta ndzi kucetela leswaku ndzi va Mukreste.”—Mintirho 26:27, 28.

Hi vutlhari Pawulo u tirhise nhlamuselo leyi tumbeleke ya Agripa ku endla yinhla leyi kongomeke. A ku: “Ndzi nga navela eka Xikwembu ku nga khathariseki leswaku hi nkarhi wo koma kumbe hi nkarhi wo leha leswaku ku nga vi wena ntsena kambe na hinkwavo lava va ndzi twaka namuntlha va kotisa mina, handle ka timpecana leti.”—Mintirho 26:29.

Agripa na Festo a va kumanga nchumu eka Pawulo lexi faneriwaka hi rifu kumbe ku pfaleriwa ekhotsweni. Hambiswiritano, xikombelo xakwe xa ku yisa mhaka ya yena eka Khezari a xi nga ta ariwa. Hi yona mhaka leyi Agripa a byeleke Festo a ku: “Munhu loyi a a ta va a ntshunxiwile loko a a nga endlanga xikombelo eka Khezari.”—Mintirho 26:30-32.

Leswi Hi Swi Dyondzaka

Endlelo ra Pawulo ra ku nyikela vumbhoni emahlweni ka vachaviseki ri hi siyela xikombiso lexi xiyekaka. Pawulo u tirhise vutlhari eku vulavuleni na Hosi Agripa. A swi kanakanisi leswaku a lemuke ku tikhoma ko biha ka Agripa na Bernike. Vatekane va ri maxaka, kahle-kahle Bernike a ri makwavo wa Agripa. Kambe sweswi, Pawulo a nga dyondzisi hi mahanyelo. Ematshan’wini ya sweswo, u kandziyise tinhla leti yena na Agripa a va pfumelelana eka tona. Ku tlula kwalaho, hambi leswi Pawulo a leteriwa hi mudyondzeki wa Mufarisi Gamaliyele, u pfumerile leswaku Agripa a ri mutivi wa mikhuva ya Vayuda. (Mintirho 22:3) Ku nga khathariseki mahanyelo yo biha ya Agripa, Pawulo u vulavule na yena hi xichavo tanihi munhu loyi a nga mulawuri.—Varhoma 13:7.

Loko hi nyikela vumbhoni hi xivindzi malunghana na vupfumeri bya hina, xikongomelo xa hina a hi ku paluxa kumbe ku sola mahanyelo lama thyakeke ya lava hi yingisaka. Ematshan’wini ya sweswo, leswaku swi va olovela ku amukela ntiyiso, hi fanele hi kandziyisa mimpfuno ya mahungu lamanene na mintshembo leyi hi nga na yona. Loko hi vulavula na lava kuleke kumbe valawuri, hi fanele hi xiya swikhundla swa vona. (Levhitika 19:32) Hi ndlela leyi, hi ta va hi fana na Pawulo loko a te: “Ndzi ve swilo hinkwaswo eka vanhu va mixaka hinkwayo, leswaku ndzi ponisa van’wana hi tindlela hinkwato.”—1 Vakorinto 9:22.

[Nhlamuselo ya le hansi]