Ku Famba Ni Xikwembu—Hilaha Ku Nga Heriki
“Hi [ta] famba hi v̌ito ra Yehova, Šikwembu ša hina, hi mikari ni mikari.”—MIKIYA 4:5.
1. Ha yini Yehovha a nga vuriwaka “Hosi leyi nga riki na makumu”?
YEHOVHA XIKWEMBU a nga vanga ni masungulo. Hilaha ku faneleke u vuriwa “Nkulukumba wa masiku,” tanihi leswi vukona bya yena byi nga riki ni masungulo. (Daniyele 7:9, 13) Nakambe Yehovha u ta va kona hilaha ku nga heriki. Hi yena ntsena a nga “Hosi leyi nga riki na makumu.” (Nhlavutelo 10:6; 15:3) Naswona eka yena malembe ya gidi “ma fana ni siku ra tolo, loko ri hunḍile, ni [ku rindza ka] vusiku.”—Pisalema 90:4.
2. (a) Hi xihi xikongomelo xa Xikwembu hi vanhu lava yingisaka? (b) Ntshembo ni makungu ya hina swi fanele swi fambisana na yini?
2 Tanihi leswi Munyiki wa vutomi a nga kona hi masiku, u nyike mpatswa wo sungula wa vanhu, Adamu na Evha, ntshembo wa vutomi lebyi nga heriki eParadeyisini. Hambiswiritano, hikwalaho ka ku pfumala ku yingisa, Adamu u lahlekeriwe hi lunghelo ro hanya hilaha ku nga heriki, a hundzisela xidyoho ni rifu eka vana vakwe. (Varhoma 5:12) Hambiswiritano, ku xandzuka ka Adamu a ku xi kavanyetanga xikongomelo xo sungula xa Xikwembu. Ku rhandza ka Yehovha hi leswaku vanhu lava yingisaka va hanya hilaha ku nga heriki, naswona xikongomelo xakwe u ta xi hetisisa hakunene. (Esaya 55:11) Kutani ke, swa fanela swonghasi leswaku ntshembo ni makungu ya hina swi fambisana ni ku tirhela Yehovha hilaha ku nga heriki. Hambileswi hi faneleke hi tshama hi ri karhi hi anakanya swinene hi “siku ra Yehovha,” i swa nkoka ku tsundzuka leswaku pakani ya hina i ku famba na Xikwembu hilaha ku nga heriki.—2 Petro 3:12.
Yehovha U Teka Goza Hi Nkarhi Lowu A Wu Vekeke
3. Hi swi tivisa ku yini leswaku Yehovha u ni “nkarhi lowu vekiweke” wo hetisisa swikongomelo swakwe?
3 Tanihi vanhu lava fambaka na Xikwembu, hi swi tsakela ngopfu ku hetisisa ku rhandza ka yena. Ha swi tiva leswaku Yehovha i Muhlayisi Lonkulu wa Nkarhi, naswona ha tiyiseka leswaku a nga tsandzeki ku hetisisa swikongomelo swakwe hi nkarhi lowu a wu vekeke. Hi xikombiso, “loko nkarhi lowu pimiweke wu hela, Xikwembu xi rhume N’wana wa xona.” (Vagalatiya 4:4) Muapostola Yohane u byeriwe leswaku a ku ri ni “nkarhi lowu vekiweke” wa ku hetiseka ka swilo swa vuprofeta leswi a swi voneke hi swivono. (Nhlavutelo 1:1-3) Ku ni “nkarhi lowu vekiweke wa leswaku vafi va avanyisiwa.” (Nhlavutelo 11:18) Malembe yo tlula 1900 lama hundzeke, muapostola Pawulo u huhuteriwe ku vula leswaku Xikwembu “xi veke siku leri xi nga ni xikongomelo xo avanyisa misava leyi akiweke hi ku lulama.”—Mintirho 17:31.
4. Hi swi tivisa ku yini leswaku Yehovha u tiyimiserile ku herisa mafambiselo lawa yo biha ya swilo?
4 Yehovha u ta herisa mafambiselo lawa yo biha ya swilo, hikuva vito rakwe ra karhi ra rhukaniwa emisaveni ya namuntlha. Vanhu vo homboloka va andzile. (Pisalema 92:7) Va rhukana Xikwembu hi marito ni swiendlo swa vona, naswona swa xi vavisa loko xi vona malandza ya xona ma rhuketeriwa ni ku xanisiwa. (Zakariya 2:8) A swi hlamarisi leswi Yehovha a hlambanyeke leswaku nhlengeletano hinkwayo ya Sathana yi ta herisiwa ku nga ri khale! Xikwembu xi veke nkarhi lowu leswi swi nga ta humelela ha wona, naswona ku hetiseka ka vuprofeta bya Bibele ku swi veka erivaleni leswaku sweswi hi hanya “[e]nkarini wa makumu.” (Daniyele 12:4) Ku nga ri khale xi ta teka goza xi katekisa hinkwavo lava va xi rhandzaka.
5. Lota na Habakuku a va swi languta njhani swiyimo leswi a swi va rhendzerile?
5 Malandza ya Yehovha ya nkarhi lowu hundzeke a ma navela ku vona makumu ya vuhomboloki. Lota loyi a lulameke “a a karhateka swinene hi vanhu lava delelaka nawu, va tipeta eku tikhomeni loko biha.” (2 Petro 2:7) Hikwalaho ka ku vavisiwa hi swiyimo leswi a swi endleka, muprofeta Habakuku u komberile a ku: “Nḍi ta v̌itana ka wena kangani hikwalaho ka ku pfukeriwa matimba, u nga nḍi hanyisi-ke? U nḍi kombisela yini e ku homboloka, kutani u langutela yini e ku šanisa? Ku onhaka ni ku nonoṅhwa ŝi le mahlweni ka mina; ka holov̌iwa, ku v̌a ku pfuka ni ku hambana.”—Habakuku 1:2, 3.
6. Yehovha u te yini loko a hlamula xikhongelo xa Habakuku, naswona hi nga dyondza yini eka leswi?
6 Hi ku komisa, Yehovha u hlamule Habakuku hi marito lawa: “Hlav̌utelo leyo ya ha ṭhamele nkari wa kona, kambe yi ta hatlisa e ku heteleleni, yi nga ka yi nga šisi. Hambi yi nga hlwela, u yi langutela, hikuv̌a yi ta endlakala ŝinene, yi nga ka yi nga hlweri.” (Habakuku 2:3) Xisweswo, Xikwembu xi tivise leswaku xi ta teka goza ‘hi nkarhi wa kona.’ Hambiloko swi tikomba swi hlwela, Yehovha u ta xi hetisisa xikongomelo xakwe—a nge tsandzeki!—2 Petro 3:9.
Ku Tirha Hi Ku Hiseka Loku Nga Tsaniki
7. Hambileswi Yesu a a nga swi tivi hi ku kongoma leswaku siku ra Yehovha ri ta fika rini, u ye emahlweni ni mintirho yakwe hi ndlela yihi?
7 Xana ha boheka ku wu tiva hi ku kongoma nkarhi wa Yehovha wa swiendlakalo leswaku hi famba na Xikwembu hi ku hiseka? E-e, a hi boheki. Xiya swikombiso swi nga ri swingani. Yesu a a khumbeka swinene hi nkarhi lowu ku rhandza ka Xikwembu a ku ta endliwa ha wona emisaveni hilaha ku endliwaka hakona etilweni. Kahle-kahle, Kreste u dyondzise valandzeri vakwe leswaku va khongela va ku: “Tata wa hina la nge matilweni, vito ra wena a ri kwetsimisiwe. Mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona etilweni.” (Matewu 6:9, 10) Hambileswi Yesu a a swi tiva leswaku xikombelo lexi a xi ta hlamuriwa, nkarhi lowu kongomeke wa ku endleka ka swona a a nga wu tivi. Eka vuprofeta byakwe byo hlawuleka lebyi vulavulaka hi makumu ya mafambiselo lawa ya swilo, u te: “Malunghana ni siku ra kona ni nkarhi wa kona a ku na munhu la swi tivaka, hambi ku ri tintsumi ta le matilweni hambi ku ri N’wana, kambe swi tiviwa hi Tatana ntsena.” (Matewu 24:36) Tanihi leswi Yesu Kreste a nga yena phuphu malunghana ni ku hetiseka ka swikongomelo swa Xikwembu, u ta katseka hi ku kongoma eku dlayeni ka valala va Tata wakwe wa le tilweni. Hambiswiritano, loko Yesu a ha ri emisaveni, na yena a a nga wu tivi nkarhi lowu Xikwembu a xi ta teka goza ha wona. Xana sweswo swi hungute ku hiseka ka yena entirhweni wa Yehovha? Nikatsongo! Loko va vona Yesu a basisa tempele hi ku hiseka, “vadyondzisiwa vakwe va tsundzuk[e] leswaku ku tsariwe leswi: ‘Ndzi ta dyiwa hi ku hisekela yindlu ya wena.’” (Yohane 2:17; Pisalema 69:9) Yesu u tshame a khomekile swinene hi ntirho lowu a a rhumiwe ku ta wu endla, naswona u wu endle hi ku hiseka loku nga tsaniki. Naswona a a tiyimisele ku tirhela Xikwembu hilaha ku nga heriki.
8, 9. Loko vadyondzisiwa va vutisa hi ta ku vuyeteriwa ka Mfumo, va byeriwe yini, naswona va angurise ku yini?
8 Leswi a swi ri tano ni hi vadyondzisiwa va Kreste. Yesu u hlangane na vona emahlweninyana ka ku tlhandlukela kakwe etilweni. Rungula ra kona ri ri: “Kuteloko va hlengeletanile, va n’wi vutisa va ku: ‘Hosi, xana u vuyetela mfumo eIsrayele hi nkarhi lowu?’” Ku fana ni N’wini wa vona, a va langutele ku ta ka Mfumo hi mahlongati. Kambe Yesu u hlamule a ku: “A hi swa n’wina ku tiva minkarhi kumbe tinguva leswi Tatana a swi vekeke hi vulawuri byakwe; kambe mi ta amukela matimba loko moya lowo kwetsima wu fika ehenhla ka n’wina, naswona mi ta va timbhoni ta mina eYerusalema swin’we ni le tikweni hinkwaro ra Yudiya ni le Samariya ni ku ya fika exiphen’wini xa le kule swinene xa misava.”—Mintirho 1:6-8.
9 Ku hava lexi kombisaka leswaku vadyondzisiwa va hetiwe matimba hi nhlamulo leyi. Ku ri na sweswo, va tshame va khomekile swinene entirhweni wo chumayela. Hi mavhiki ma nga ri mangani, se a va tate Yerusalema hi dyondzo ya vona. (Mintirho 5:28) Naswona ku nga si hela malembe ya 30, va ndlandlamuxe ntirho wa vona wo chumayela ku fikela laha Pawulo a vuleke leswaku mahungu lamanene ma chumayeriwe “eka ntumbuluko hinkwawo lowu nga ehansi ka tilo.” (Vakolosa 1:23) Hambileswi Mfumo wu nga ‘vuyeteriwangiki eIsrayele,’ hilaha vadyondzisiwa a va swi langutele hakona hi ku hoxisa, naswona hambiloko wu nga tlhomiwanga etilweni hi nkarhi wa ku hanya ka vona, va ye emahlweni va tiyimisela ku tirhela Yehovha hilaha ku nga heriki.
Ku Kambisisa Minsusumeto Ya Hina
10. Ku ka hi nga wu tivi nkarhi lowu Xikwembu xi nga ta lovisa mafambiselo ya Sathana ha wona swi hi pfumelela ku kombisa yini?
10 Malandza ya Yehovha ya manguva lawa na wona ma ku langutele hi mahlongati ku hela ka mafambiselo lawa yo homboloka ya swilo. Hambiswiritano, lexi hi khumbekaka ngopfu hi xona a hi ku ponisiwa ka hina hi nghena emisaveni leyintshwa leyi tshembisiweke hi Xikwembu. Hi lava ku vona vito ra Yehovha ri kwetsimisiwa ni vuhosi byakwe byi lweriwa. Hikwalaho ka leswi, hi nga tsaka leswi Xikwembu xi nga hi byelangiki ‘siku kumbe nkarhi’ lowu vekeriweke ku lovisa mafambiselo ya Sathana. Leswi swi hi pfumelela ku nyikela vumbhoni bya leswaku hi tiyimisele ku famba na Xikwembu hilaha ku nga heriki hikwalaho ka leswi hi xi rhandzaka, ku nga ri hikwalaho ka tipakani ta hina ta nkarhi wo koma, ta vutianakanyi.
11, 12. Ku tshembeka ka Yobo ku tlhontlhiwe hi ndlela yihi, naswona ntlhontlho wolowo wu hi khumba njhani hina?
11 Ku tshama hi tshembekile eka Xikwembu nakambe ku hi pfuna ku kombisa leswaku Diyavulosi a a hoxisile loko a endla xihehlo xa leswaku Yobo la lulameke—kun’we ni vanhu lava fanaka na yena—va tirhela Xikwembu hi vutianakanyi. Loko Yehovha a vule leswaku nandza wakwe Yobo a a ri munhu wo pfumala xisandzu, wo lulama ni loyi a chavaka Xikwembu, Sathana u n’wi hehle hi vunwa byo biha a ku: “Šana Yobo [u] tšhav̌a Šikwembu ntsena? Šana a hi leŝi u ṅwi siv̌elelaka, yena, ni yindlu ya yena, ni ŝilo hikwaŝo ŝa yena-ke? A ku anḍisanga mitiro ya mav̌oko ya yena, ni ku anḍisa mitlhambi ya yena misav̌eni šana? Wa nga ṭhambuluta v̌oko ra wena u khumba hikwaŝo leŝi a nga na ŝona, u ta v̌ona šana a nga ka a nga ku sanḍi mahlweni e riv̌aleni ke?” (Yobo 1:8-11) Tanihi leswi Yobo a tshameke a tshembekile loko a ringiwa, u kombise leswaku xihehlo lexi xo biha a xi ri xa mavunwa.
12 Loko na hina hi tshama hi tshembekile, hi nga kaneta xihehlo xihi ni xihi xa Sathana xa leswaku hi tirhela Xikwembu hileswi hi tivaka leswaku hakelo yi kusuhi. Ku ka hi nga tivi nkarhi lowu kongomeke lowu Xikwembu xi nga ta tirihisela ha wona eka lavo homboloka swi hi nyika nkarhi wo kombisa leswaku Yehovha ha n’wi rhandza hakunene naswona hi lava ku famba etindleleni ta yena hilaha ku nga heriki. Swi kombisa leswaku ha tshembeka eka Xikwembu naswona hi tshemba ndlela ya xona yo tamela timhaka. Ku tlula kwalaho, ku ka hi nga tivi siku ni nkarhi swi hi pfuna leswaku hi tshama hi hitekile ni ku xalamuka emoyeni hi ku xiya leswaku makumu ma nga fika nkarhi wihi ni wihi, ku fana ni khamba nivusiku. (Matewu 24:42-44) Loko hi famba na Yehovha siku na siku, hi tsakisa mbilu yakwe ni ku n’wi nyika nhlamulo yo hlamula Diyavulosi, loyi a n’wi rhukanaka.—Swivuriso 27:11.
Kunguhatela Swa Vutomi Lebyi Nga Heriki!
13. Bibele yi kombisa yini malunghana ni ku kunguhatela vumundzuku?
13 Lava va fambaka na Xikwembu va swi tiva leswaku i vutlhari ku endla makungu lamanene ya vumundzuku. Hi ku xiya swiphiqo ni swihinga swa ku dyuhala, vanhu vo tala va ringeta ku tirhisa vuntshwa ni matimba ya vona hi ndlela leyinene leswaku vutomi bya vona bya le ndzhaku byi ta va lebyi hlayisekeke hi tlhelo ra timali. Kutani ke, ku vuriwa yini hi vumundzuku bya hina bya moya lebyi nga bya nkoka swinene? Swivuriso 21:5 yi ri: “Makungu ya l’a gingiritekaka ma yisa e nḍalweni, kambe [munhu wa magugu u] ta wela e ndlaleni.” Ku kunguhatela swa vutomi lebyi nga heriki swa vuyerisa hakunene. Tanihi leswi hi nga wu tiviki hi ku kongoma nkarhi lowu mafambiselo lawa ma nga ta hela ha wona, hi fanele hi anakanyisisa hi swilaveko swa hina swa nkarhi lowu taka. Kambe a hi veni lava ringaniselaka, hi rhangisa swilaveko swa Xikwembu evuton’wini bya hina. Vanhu lava pfumalaka ripfumelo va nga gimeta hi leswaku ku tinyiketela ku endla ku rhandza ka Xikwembu i swa nkarhinyana. Kambe xana swi tano?
14, 15. (a) I xifaniso xihi lexi Yesu a xi nyikeleke malunghana ni makungu ya vumundzuku? (b) Ha yini mufuwi wa le xifanisweni xa Yesu a a ri ni mianakanyo yo koma?
14 Yesu u nyikele xifaniso lexi pfunaka emhakeni leyi. U te: “Nsimu ya munhu un’wana la fuweke a yi veka ngopfu. Hikwalaho a sungula ku anakanya, a ku, ‘Xana ndzi ta endla yini, leswi ndzi nga ha riki na ndhawu yo hlengeletela ntshovelo wa mina?’ Kutani a ku, ‘Ndzi ta endla leswi: Ndzi ta hirimuxa switlati swa mina ivi ndzi aka leswikulunyana, kutani ndzi ta hlengeletela eka swona ntshovelo wa mina hinkwawo ni swilo swa mina hinkwaswo leswinene; kutani ndzi ta byela moya-xiviri wa mina ndzi ku: “Wena moya-xiviri, u ni swilo swo tala leswinene leswi hlayisiweke malembe yo tala; humula, u dya, u nwa, u tiphina.”’ Kambe Xikwembu xi ku eka yena, ‘Wena loyi a nga anakanyiki, vusiku byolebyi va lava moya-xiviri wa wena eka wena. Kutani, i mani loyi a nga ta kuma swilo leswi u swi hlayiseke?’ Swi tano hi munhu loyi a tihlengeletelaka xuma kambe a nga fuwanga eka Xikwembu.”—Luka 12:16-21.
15 Xana Yesu a a vula leswaku mufuwi loyi a a nga fanelanga a tikarhatele ku va ni swilo leswi vonakaka leswi a swi ta n’wi pfuna enkarhini lowu taka? E-e, hikuva Matsalwa ma hi khutaza leswaku hi tirha hi matimba. (2 Vatesalonika 3:10) Xihoxo xa mufuwi loyi hi leswaku a nga endlanga leswi a a fanele a endla swona leswaku a ta va la “[fuweke] eka Xikwembu.” Hambiloko a kote ku tiphina hi rifuwo rakwe hi malembe yo tala, eku heteleleni a a ta fa. Langutelo rakwe a ri komile, a a nga anakanyi hi swa vutomi lebyi nga heriki.
16. Ha yini hi nga titshegaka hi Yehovha hi ku helela malunghana ni vumundzuku lebyi hlayisekeke?
16 Ku famba na Yehovha hilaha ku nga heriki swa koteka naswona a hi swa nkarhinyana. I ndlela leyinene yo kunguhatela vumundzuku. Hambileswi ku nga vutlhari ku endla makungu lama pfunaka malunghana ni ta xikolo, ntirho ni vutihlamuleri bya ndyangu, minkarhi hinkwayo hi fanele hi tsundzuka leswaku Yehovha a nga ma lahli malandza yakwe lama tshembekaka. Hosi Davhida u yimbelerile a ku: “A nḍi ri lo’ntŝha, kutani nḍi dyuharile, kambe a nḍi v̌onanga l’a lulameke a ṭhikiwa, ni v̌ana v̌a yena v̌a kombele v̌uŝa bya v̌ona.” (Pisalema 37:25) Hilaha ku fanaka, Yesu u nyikele xitiyisekiso xa leswaku Xikwembu xi ta wundla hinkwavo lava rhangisaka Mfumo ni ku famba etindleleni ta Yehovha leti lulameke.—Matewu 6:33.
17. Hi swi tivisa ku yini leswaku makumu ma tshinele?
17 Hambiloko hi tiyimisele ku tirhela Xikwembu hilaha ku nga heriki, siku ra Yehovha a hi ri rivali. Ku hetiseka ka vuprofeta bya Bibele ku swi kombisa kahle leswaku siku rero ri tshinele. Lembe-xidzana leri ri funghiwe hi tinyimpi, mintungu, ku tsekatseka ka misava ni ku kayivela ka swakudya, kun’we ni ku xanisiwa ka Vakreste va ntiyiso ni ku chumayeriwa ka mahungu lamanene ya Mfumo wa Xikwembu emisaveni hinkwayo. Leswi hinkwaswo i mimfungho ya nkarhi wa makumu ya mafambiselo lawa ya swilo lama hombolokeke. (Matewu 24:7-14; Luka 21:11) Misava yi tele hi vanhu lava “tirhandzaka, varhandzi va mali, lava titivaka, lava titlakusaka, vasandzi, lava nga yingisiki vatswari, lava nga nkhensiki, lava nga tshembekiki, lava nga riki na xinakulobye xa ntumbuluko, lava nga laviki ntwanano hambi wu ri wihi, valumbeti, lava nga tikhomiki, lava nga ni tihanyi, lava nga rhandziki vunene, vaxengi, lava omeke tinhloko, lava tikukumuxaka hi ku tinyungubyisa, lava rhandzaka mintsako ku ri ni ku rhandza Xikwembu.” (2 Timotiya 3:1-5) Emasikwini lawa ya makumu lama nga ni mangava, vutomi bya hi nonon’hwela hina malandza ya Yehovha. Hi ri langutele hi mahlo-ngati siku leri Mfumo wa Yehovha wu nga ta kukula vuhomboloki hinkwabyo ha rona! Hi nkarhi lowu fanaka, a hi tiyimiseleni ku famba na Xikwembu hilaha ku nga heriki.
Ku Tirha Hi Xikongomelo Xa Vutomi Lebyi Nga Heriki
18, 19. I yini lexi kombaka leswaku vanhu vo tshembeka va minkarhi ya khale a va tiyimisele ku tirhela Xikwembu hilaha ku nga heriki?
18 Loko hi ri karhi hi famba na Yehovha, a hi tsundzukeni ripfumelo ra Avele, Enoko, Nowa, Abrahama na Sara. Loko a vulavule hi vona, Pawulo u tsarile a ku: “Hinkwavo lava va fele eripfumelweni, hambileswi va nga ku kumangiki ku hetiseka ka switshembiso, kambe va swi vone swi ri ekule swinene hiloko va swi amukela kutani va vula erivaleni leswaku a va ri vafambi ni vatshami va nkarhinyana etikweni.” (Vaheveru 11:13) Vanhu lava vo tshembeka a “va lwela ku fikelela ndhawu yo antswa, hileswaku, leyi nga ya le tilweni.” (Vaheveru 11:16) Hi ripfumelo, a va langutele ndhawu yo antswa ehansi ka vulawuri bya Mfumo wa Xikwembu wa Vumesiya. Hi nga tiyiseka leswaku Xikwembu xi ta va hakela hi vutomi lebyi nga heriki endhawini yoleyo yo antswa—Paradeyisi ya le misaveni leyi nga ehansi ka vulawuri bya Mfumo.—Vaheveru 11:39, 40.
19 Muprofeta Mikiya u kombise ku tiyimisela ka vanhu va Yehovha ka ku gandzela Xikwembu hilaha ku nga heriki. U tsarile a ku: “V̌a-matiko hikwawo v̌a famba uṅwana ni uṅwana hi v̌ito ra šikwembu ša yena, kambe hina, hi famba hi v̌ito ra Yehova, Šikwembu ša hina, hi mikari ni mikari.” (Mikiya 4:5) Mikiya u tirhele Yehovha hi ku tshembeka kukondza a fa. Loko a ta pfuxiwa emisaveni leyintshwa, handle ko kanakana muprofeta yoloye u ta hambeta a famba na Xikwembu hilaha ku nga heriki. Mawaku xikombiso lexinene swonghasi eka hina lava hi hanyaka enkarhini lowu wa makumu!
20. Hina hi fanele hi tiyimisela ku endla yini?
20 Yehovha wa ri tlangela rirhandzu leri hi ri kombisaka hikwalaho ka vito rakwe. (Vaheveru 6:10) Wa swi tiva leswaku a swi hi oloveli ku tshama hi tshembekile eka yena emisaveni leyi yi lawuriwaka hi Diyavulosi. Ina, “misava ya hundza,” kambe “loyi a endlaka ku rhandza ka Xikwembu u tshama hi masiku.” (1 Yohane 2:17; 5:19) Kutani hi mpfuno wa Yehovha, a hi tiyimiseleni ku tiyisela miringo leyi hi langutanaka na yona siku na siku. Onge miehleketo ni ndlela ya hina ya vutomi swi nga kongomisiwa eka mikateko leyinene leyi tshembisiweke hi Tata wa hina wa le tilweni la nga ni rirhandzu. Mikateko leyi yi nga va ya hina loko hi hambeta hi famba na Xikwembu hilaha ku nga heriki.—Yudha 20, 21.
U Nga Hlamurisa Ku Yini Ke?
◻ Hi xihi xikongomelo xa Xikwembu hi vanhu lava yingisaka?
◻ Ha yini Yehovha a nga si teka goza ro herisa misava leyi nga n’wi chaviki?
◻ Ku ka hi nga wu tivi hi ku kongoma nkarhi lowu Xikwembu xi nga ta teka ha wona goza a swi fanelanga swi tsanisa ku hiseka ka hina hi xivangelo xihi?
◻ Hi yihi mimpfuno yin’wana ya ku tiyimisela ku famba na Xikwembu hilaha ku nga heriki?
[Xifaniso lexi nga eka tluka 17]
Ku famba na Xikwembu swi lava leswaku hi xi tirhela hi ku hiseka hilaha vadyondzisiwa vo sungula va Kreste va endleke hakona