“Ḍunisani Yehova!”
“Le’ŝi hefemulaka hikwaŝo a ŝi ḍunise Yehova.”—PISALEMA 150:6.
1, 2. (a) Xana Vukreste bya ntiyiso byi tirhe hi ndlela leyi humelelaka ku fikela kwihi hi lembe-xidzana ro sungula? (b) Xana vaapostola va nyikele xitsundzuxo xihi ka ha ri emahlweni? (c) Xana vugwinehi byi sungurise ku yini?
YESU u hlele vadyondzisiwa vakwe va vumba vandlha ra Vukreste, leri tirheke hi ndlela leyi humelelaka eka lembe-xidzana ro sungula. Ku nga khathariseki nkaneto lowukulu wa vukhongeri, “evhangeli . . . yi twarisiwile eka swivumbiwa hinkwaswo leswi nge hansi ka tilo.” (Vakolosa 1:23) Kambe endzhaku ka rifu ra vaapostola va Yesu Kreste, hi vutlhari Sathana u sungule vugwinehi.
2 Vaapostola ana a va tsundzuxile hi mhaka leyi. Hi xikombiso, Pawulo u byele vakulu va le Efesa a ku: “Tilanguteleni ke, mi langutela ni ntlhambi hinkwawo lowu Moya lowo Kwetsima wu nga mi veka ku va varhangeri va wona; risani [vandlha ra] Xikwembu, le[ri] xi nga tikumela [ro]na hi rifu ra N’wana wa xona wa xiviri. Hikuva mina ndza swi tiva leswaku, loko ndzi sukile, mi ta ngheneriwa hi timhisi leto leva, leti nga ta ka ti nga tsetseleli ntlhambi; naswona, ndzi tiva leswaku ku ta huma van’wana exikarhi ka n’wina lava nga ta vula mavunwa ku tilavela vadyondzisiwa.” (Mintirho 20:28-30; nakambe vona 2 Petro 2:1-3; 1 Yohane 2:18, 19.) Xisweswo eka lembe-xidzana ra vumune, Vukreste bya vugwinehi byi sungule ku aka vuxaka ni Mfumo wa Rhoma. Endzhaku ka malembe-xidzana yo hlayanyana Mfumo wa Rhoma wo Kwetsima, lowu a wu katsa ni mupapa wa Rhoma, wu fume vanhu vo tala swinene. Hi ku famba ka nkarhi, Ndzhundzhunuko wa Protestente wu xandzukele swiendlo swo biha swa Kereke ya Khatoliki, kambe wu tsandzeke ku kondletela Vukreste bya ntiyiso.
3. (a) Xana mahungu lamanene ma chumayeriwe eka ntumbuluko hinkwawo rini naswona njhani? (b) Hi kwihi ku langutela loku sekeriweke eBibeleni loku xiyiweke hi 1914?
3 Hambiswiritano, loko lembe-xidzana ra vu-19 ri ya eku heleni, ntlawa wo tshembeka wa swichudeni swa Bibele a wu ri karhi wu chumayela wu tlhela wu ‘vula mahungu lamanene eka swivumbiwa hinkwaswo swa le hansi ka tilo.’ Hi ku dyondza ka wona vuprofeta bya Bibele, ntlawa lowu wu boxe 1914 ka ha sele malembe yo tlula 30 wu vula leswaku wolowo a wu ta va nkarhi wa makumu ya ‘minkarhi leyi vekiweke ya vamatiko,’ nguva ya “mikari ya ntlhanu na mimbiri,” kumbe malembe ya 2 520, lowu sunguleke eku lovisiweni ka Yerusalema hi 607 B.C.E. (Luka 21:24; Daniyele 4:16) Hi laha a swi languteriwe ha kona, 1914 wu ve nkarhi wa ku cinca ka xiyimo xa vanhu emisaveni. Ni le tilweni ku endleke swilo swa nkoka swinene ematin’wini. Enkarhini wolowo Hosi ya minkarhi ni minkarhi yi veke Yesu Kreste, Hosi leyi fumaka swin’we na yona, ehenhla ka xiluvelo xa le tilweni, ku ri ku lunghiselela ku susa vubihi hinkwabyo emisaveni leyi ni ku vuyisa Paradeyisi.—Pisalema 2:6, 8, 9; 110:1, 2, 5.
Vonani Hosi Ya Vumesiya!
4. Xana Yesu u hanyele nhlamuselo ya vito rakwe ra Mikayele hi ndlela yihi?
4 Hi 1914 Hosi leyi ya Vumesiya, Yesu, yi sungule ntirho wa yona. EBibeleni u vitaniwa ni hi leswaku i Mikayele, leswi vulaka leswaku “I Mani La Fanaka Ni Xikwembu?,” hikwalaho ka leswi a tiyimiseleke ku lwela vuhosi bya Yehovha. Hi laha swi tsariweke ha kona eka Nhlavutelo 12:7-12, muapostola Yohane u swi hlamusele exivonweni leswi a swi ta endleka: “Ku pfuka nyimpi etilweni, ya Mikaele ni tintsumi ta yena loko va lwa ni dragona; na yona dragona yi lwa yi ri ni tintsumi ta yona. Kambe dragona yi hluriwa, yi nga ha pfumeleriwi ku tshama etilweni, yona ni tintsumi ta yona. Hiloko dragona leyikulu leyi yi cukumetiwa yi ya wela hansi, yona nyoka ya khale leyi vuriwaka Diyavulosi kumbe Sathana, Mukanganyisi wa misava hinkwayo; yi cukumetiwa yi ya wela ehansi emisaveni, tintsumi ta yona na tona ti cukumetiwa kun’we na yona.” Vona ku wa lokukulu swonghasi!
5, 6. (a) Endzhaku ka 1914, i xitiviso xihi lexi nyanyulaka lexi endliweke xi huma etilweni? (b) Xana Matewu 24:3-13 yi hlangana njhani ni leswi?
5 Kutani rito ra mpfumawulo lowukulu etilweni ri ku: “Sweswi, ku hlayiseka ka Xikwembu xa hina ni matimba ya xona, ni mfumo wa xona, ni vuhosi bya Mesiya wa xona, swi fikile, hikuva loyi a hehlaka vamakwerhu, muhehli loyi a va mangalelaka vusiku ni nhlekanhi emahlweni ka Xikwembu xa hina, ú cukumetiwile a ya wela hansi. Vamakwerhu [Vakreste lava tshembekaka] va n’wi hlurile hi ngati ya Xinyimpfana [Kreste Yesu], ni vumbhoni lebyi va byi humeseke, kutani a va tsetselelanga vutomi bya vona ku fikela loko va dlawa.” Leswi swi vula ku kutsuriwa ka vahlayisi va vutshembeki, lava kombiseke ripfumelo egandzelweni ra nkutsulo ra Yesu ra risima.—Swivuriso 10:2; 2 Petro 2:9.
6 Rito lerikulu etilweni ri ye emahlweni ri twarisa: “Hikokwalaho, tsakani n’wina matilo, na n’wina lava akeke eka wona; kambe mi ni khombo, n’wina misava ni lwandle, hikuva Diyavulosi ú xikele ka n’wina; ú karihile ngopfu hi ku tiva leswaku nkarhi wa yena wu komile.” Xisweswo “khombo” leri profeteriweke misava leyi ri tikombise hi tinyimpi ta misava, tindlala, mintungu, ku tsekatseka ka misava ni vuhomboloki lebyi weleke misava eka lembe-xidzana leri. Hi laha Matewu 24:3-13 yi vulaka ha kona, Yesu u vhumbhe leswaku leswi a swi ta va xiphemu xa ‘xikombiso xa ku hela ka mafambiselo ya swilo.’ Hi ku ya hi vuprofeta, ku sukela hi 1914, laha misaveni, vanhu va langutane ni khombo leri nga si tshamaka ri va kona ematin’wini hinkwawo ya munhu.
7. Ha yini Timbhoni ta Yehovha ti chumayela hi xihatla?
7 Eka nguva leyi ya khombo leri vangiwaka hi Sathana, xana vanhu va nga wu kuma ntshembo hi vumundzuku? Ina, hikuva Matewu 12:21 yi vula leswi ha Yesu: “Kutani vamatiko va ta tshemba vito ra yena”! Swiyimo leswi chavisaka exikarhi ka matiko swi hetisisa ‘xikombiso xa ku hela ka mafambiselo ya swilo’ swin’we ni ‘xikombiso xa vukona bya Yesu’ tanihi Hosi ya le tilweni ya Mfumo wa Vumesiya. Malunghana ni Mfumo wolowo, Yesu u ya emahlweni a ku: “Evhangeli leyi ya Mfumo yi ta twarisiwa emisaveni hinkwayo, leswaku yi va vumbhoni eka vanhu va matiko hinkwawo; kutani hi kona makumu ma nga ta fika.” (Matewu 24:14) Xana i vamani vanhu lava namuntlha va chumayelaka hi ntshembo lowukulu wa ku fuma ka Mfumo wa Xikwembu? I Timbhoni ta Yehovha! Hi xihatla lexikulu, va twarisa erivaleni ni hi yindlu na yindlu leswaku Mfumo wa Xikwembu wa ku lulama ni ku rhula wu le kusuhi ni ku sungula ku lawula timhaka ta misava. Xana wa hlanganyela evutirhelini lebyi? Ku hava lunghelo ro tlula rero leri u nga ri kumaka!—2 Timotiya 4:2, 5.
Xana “Makumu” Ma Ta Hi Ndlela Yihi?
8, 9. (a) Xana ku avanyisa ku sungula hi “va yindlu ya Xikwembu” hi ndlela yihi? (b) Xana Vujagana byi thyakise Rito ra Xikwembu hi ndlela yihi?
8 Vanhu va nghene eka nguva yo avanyisa. Eka 1 Petro 4:17 ha byeriwa leswaku ku avanyisa ku sungule hi “va yindlu ya Xikwembu”—ku avanyisa tinhlengeletano ta lava tivulaka Vakreste loku ku vonakeke ku sukela loko ‘masiku ya makumu’ ma sungurile hi ku dlayana hi nkarhi wa Nyimpi yo Sungula ya Misava hi 1914-18. Xana Vujagana byi yime kwihi eku avanyiseni loku? Anakanya hi xiyimo xa tikereke xo seketela tinyimpi ku sukela hi 1914. Xana vafundhisi a va totiwanga hi “ngati ya ŝisiwana le’ŝi nga riki na nanḍu” leswi va swi hlohloteleke leswaku swi ya enyimpini?—Yeremiya 2:34.
9 Hi ku ya hi Matewu 26:52, Yesu u te: “Hinkwavo lava tirhisaka mabanga, va ta dlawa hi mabanga.” Kunene leswi swi humelerile etinyimpini ta lembe-xidzana leri! Vafundhisi va khutaze majaha ku dlaya majaha man’wana, hambi ku ri va vukhongeri bya vona—Makhatoliki ma dlaya Makhatoliki ni Maprotestente ma dlaya Maprotestente. Ku rhandza vutiko ku tlakusiwile ehenhla ka Xikwembu na Kreste. Sweswinyana, ematikweni man’wana ya le Afrika, vuxaka bya swivongo byi tlakusiwile ku tlula misinya ya milawu ya Bibele. Le Rwanda, laha vunyingi bya vaaki va nga Makhatoliki, vanhu va kwalomu ka hafu ya vaaki va dlayiwile eka madzolonga ya swivongo. Mupapa u pfumerile eka phepha-hungu ra Vatican L’Osservatore Romano a ku: “Leswi i ku dlayeteriwa ka rixaka hakunene loku khombo ra kona, nandzu wu nga wa Makhatoliki.”—Ringanisa Esaya 59:2, 3; Mikiya 4:3, 5.
10. Hi kwihi ku avanyisa loku Yehovha a nga ta ku tisa eka vukhongeri bya mavunwa?
10 Xana Hosi ya minkarhi ni minkarhi yi byi languta njhani vukhongeri lebyi khutazaka vanhu leswaku va dlayana kumbe lebyi khondlaka mavoko loko swirho swa mintlhambi ya byona swi dlaya swirho swin’wana? Malunghana ni Babilona Lonkulu, fambiselo ra misava hinkwayo ra vukhongeri bya mavunwa, Nhlavutelo 18:21, 24 yi ri: “Ntsumi ya matimba yi tlakula ribye leri fanaka ni ribye ra ku sila hi ku kula, yi ri hoxa elwandle, yi ku: ‘Hi swo leswi u nga ta endliwa swona, we Babilona, muti lowukulu: u ta wiseriwa ehansi hi nsele, kutani a wu nga ha vi kona nakambe. Eka muti lowu, a ku kumiwa ngati ya vaprofeta, ni ya vahlawuriwa va Xikwembu, ni ya hinkwavo lava nga dlawa laha misaveni.’”
11. Hi swihi swilo leswi nyenyetsaka leswi a swi ri karhi swi humelela eVujaganini?
11 Hi ku hetiseka ka vuprofeta bya Bibele, eVujaganini ku humelela swilo swo chavisa. (Ringanisa Yeremiya 5:30, 31; 23:14.) Ngopfu-ngopfu hikwalaho ka leswi vafundhisi va pfumelelaka xin’wana ni xin’wana, emintlhambini ya vona ku tikhoma loko biha ku tele ngopfu. EUnited States, tiko leri vuriwaka ra Vukreste, kwalomu ka hafu ya vukati hinkwabyo byi hetelela byi dlayiwile. Ku tika ka vana va kondlo-a-ndzi-dyi ni vusodoma swi andze ngopfu exikarhi ka swirho swa kereke. Vaprista va pfinya vana lavatsongo—naswona swi endleka ko tala. Ku vuriwe leswaku timali ta le hubyeni leti fambisanaka ni milandzu leyi ti nga dyela Kereke ya Khatoliki eUnited States tidolara ta magidi ya timiliyoni (R3 600 wa timiliyoni) ku nga si hela malembe ya khume. Vujagana byi honise xitsundzuxo xa muapostola Pawulo lexi kumekaka eka 1 Vakorinto 6:9, 10: “Xana a mi tivi leswaku lavo homboloka va nga ka va nga dyi ndzhaka ya Mfumo wa Xikwembu, xana? Mi nga tshuki mi tikanganyisa: Loko ti ri timbhisa, ni lava gandzelaka swikwembu swa hava, ni vaoswi, ni vavanuna lava endlaka swa tingana ni vavanuna-kulobye, ni vayivi, ni va makwanga, ni swidakwa, ni varhukani, ni vaxisi, va nga ka va nga dyi ndzhaka ya Mfumo wa Xikwembu.”
12. (a) Xana Hosi ya minkarhi ni minkarhi yi ta lwisana na Babilona Lonkulu hi ndlela yihi? (b) Ku hambana ni Vujagana, xana vanhu va Xikwembu va ta yimbelela tinsimu ta “Aleluya” hikwalaho ka xivangelo xihi?
12 Ku nga ri khale, Hosi ya minkarhi ni minkarhi, Yehovha, hi ku tirhisa Ndhuna-nkulu ya yena ya le tilweni, Kreste Yesu, u ta tisa nhlomulo lowukulu. Xo sungula, Vujagana ni swiphemu leswin’wana hinkwaswo swa Babilona Lonkulu swi ta weriwa hi ku avanyisa ka Yehovha. (Nhlavutelo 17:16, 17) Va tikombe va nga faneriwi hi ku pona loku Yehovha a ku lunghiseleleke hi gandzelo ra nkutsulo ra Yesu. Va honise vito ra Xikwembu ro kwetsima. (Ringanisa Ezekiyele 39:7.) Phela vo vungunya loko va yimbelela tinsimu ta “Aleluya” emiakweni ya vona leyikulu ya vukhongeri! Va susa vito ra Yehovha ra risima eka vuhundzuluxeri bya Tibibele ta vona, kambe onge a va yi voni mhaka ya leswaku “Aleluya” swi vula leswaku ‘Dzunisani Jah’—‘Jah’ ku nga nkomiso wa ‘Yehovha.’ Hi laha ku faneleke, Nhlavutelo 19:1-6 yi kombisa tinsimu ta “Aleluya” leti nga ta yimbeleriwa ku nga ri khale eku tlangeriweni ka ku avanyisiwa ka Babilona Lonkulu hi Xikwembu.
13, 14. (a) Hi swihi swiendlakalo swa nkoka leswi landzelaka? (b) Hi byihi vuyelo lebyi tsakisaka bya vanhu lava chavaka Xikwembu?
13 Lexi landzelaka i ‘ku fika’ ka Yesu a tivisa ni ku tlhela a avanyisa matiko ni vanhu. Yena hi yexe u profetile: “Siku N’wana-wa-munhu [Kreste Yesu] a taka hi ku kwetsima ka yena, ni tintsumi hinkwato ti ri na yena, ú ta tshamisa exiluvelweni xa yena [xo avanyisa] xo kwetsima. Kutani vanhu va matiko hinkwawo [emisaveni] va ta hlengeletiwa emahlweni ka yena; ú ta hlawula van’wana a siya van’wana, kukotisa murisi loko a hlawula tinyimpfu exikarhi ka timbuti. U ta yisa tinyimpfu evokweni ra yena ra xinene, timbuti tona eka lera ximatsi. Hi laha Hosi yi nga ta byela lava nge vokweni ra yona ra xinene yi ku: ‘Tanani n’wina lava katekisiweke hi Tata wa mina, amukelani Mfumo lowu nga lunghiseriwa n’wina hi mpfhuka misava yi tumbuluka.’” (Matewu 25:31-34) Ndzimana ya 46 yi hlamusela leswaku ntlawa wa timbuti wu “ta ya eku biweni loku nga heriki, kambe lavo lulama va ta ya evutomini lebyi nga heriki.”
14 Buku ya Bibele ya Nhlavutelo yi hlamusela ndlela leyi “Mufumi wa vafumi ni Hosi ya tihosi,” Hosi ya hina ya le tilweni, Yesu Kreste, yi nga ta gada ha yona yi ya enyimpini ya Armagedoni, yi lovisa mintlawa ya politiki ni ya mabindzu ya mafambiselo ya Sathana. Xisweswo Kreste u ta va a chulule “vukari lebyo chavisa bya Xikwembu lexi nga ni matimba hinkwawo” emfun’weni hinkwawo wa Sathana wa laha misaveni. Loko ‘swilo leswo sungula swi hundza,’ vanhu lava chavaka Xikwembu va ta yisiwa emisaveni leyintshwa leyi vangamaka laha Xikwembu “xi [nga] ta sula mihloti hinkwayo emahlweni ya vona.”—Nhlavutelo 19:11-16; 21:3-5.
Nkarhi Wo Dzunisa Jah
15, 16. (a) Ha yini swi ri swa nkoka leswaku hi yingisa rito ra vuprofeta ra Yehovha? (b) I yini lexi vaprofeta ni vaapostola va kombisaka leswaku hi fanele hi xi endla leswaku hi ponisiwa, naswona xana leswi swi nga vula yini eka vunyingi bya vanhu namuntlha?
15 Siku rero ra ku avanyisa ri tshinele! Hikwalaho, hi fanele ku yingisa rito ra vuprofeta ra Hosi ya minkarhi ni minkarhi. Lava va ha phasiweke etidyondzweni ni le mikhuveni ya vukhongeri bya mavunwa, rito ra le tilweni ri ri: “N’wina vanhu va mina, humani mi n’wi siya, leswaku mi ta kala mi nga ngheni eswidyohweni swa yena, mi ta kala mi nga weriwi hi maxangu ya yena.” Kambe xana vabaleki volavo va fanele va ya kwihi? Ntiyiso i wun’we ntsena, hikwalaho ku ni vukhongeri byin’we ntsena bya ntiyiso. (Nhlavutelo 18:4; Yohane 8:31, 32; 14:6; 17:3) Leswaku hi kuma vutomi lebyi nga heriki swi titshege hi leswaku hi kuma vukhongeri byolebyo ni ku yingisa Xikwembu xa byona. Bibele yi hi tivisa yena eka Pisalema 83:18, leyi nge: “Loyi, vito ra yena ntsena ku nga YEHOVHA, u tlakukile emisaveni hinkwayo.”—King James Version.
16 Hambiswiritano, hi fanele ku endla swin’wana handle ka ku tiva ntsena vito ra Hosi ya minkarhi ni minkarhi. Hi fanele ku dyondza Bibele ni ku dyondza hi timfanelo ni swikongomelo swa yena leswikulu. Kutani hi fanele ku endla ku rhandza ka yona enkarhini lowu, hi laha swi kombisiweke ha kona eka Varhoma 10:9-13. Muapostola Pawulo u tshahe vuprofeta lebyi huhuteriweke ivi a gimeta hi ku: “Un’wana ni un’wana la khongelaka vito ra [Yehovha], ú ta ponisiwa.” (Yuwele 2:32; Sofoniya 3:9) A ponisiwa? Ina, hikuva namuntlha mintshungu leyi kombisaka ripfumelo elunghiselelweni ra nkutsulo ra Yehovha ha Kreste yi ta kutsuriwa eka nhlomulo lowukulu lowu taka, loko ku avanyisiwa misava leyi onhakeke ya Sathana.—Nhlavutelo 7:9, 10, 14.
17. Hi wihi ntshembo lowukulu lowu faneleke wu hi susumetela ku hlanganyela sweswi eku yimbeleleni ka risimu ra Muxe ni ra Xinyimpfana?
17 Xana Xikwembu xi rhandza leswaku lava nga ni ntshembo wa ku pona va endla yini? Xi rhandza leswaku hi hlanganyela sweswi eku yimbeleleni ka risimu ra Muxe ni ra Xinyimpfana, hi dzunisa Hosi ya minkarhi ni minkarhi hi rindzele ku hlula ka yona. Hi endla leswi hi ku byela van’wana hi swikongomelo swa yona leswi vangamaka. Loko hi ya emahlweni hi twisisa Bibele, hi nyiketela vutomi bya hina eHosini ya minkarhi ni minkarhi. Sweswo swi ta endla leswaku hi hanya hi masiku ni masiku ehansi ka lunghiselelo leri Hosi leyi ya matimba yi ri hlamuselaka, hi laha swi nga ha kona eka Esaya 65:17, 18: “Nḍi v̌umba matilo la’mantŝha [Mfumo wa Vumesiya wa Yesu], ni misav̌a le’yintŝha [vandla lerintshwa ra vanhu vo lulama]; timhaka ta khale a ti nga ha ṭunḍukiwi, ti nga ka ti nga ha tlheleri meehleketweni. Kambe hikwalaho ka leŝi nḍi nga ta ŝi v̌umba, ṭakani, mi ṭakisisa hi masiku.”
18, 19. (a) Xana marito ya Davhida eka Pisalema 145 ma fanele ma hi susumetela ku endla yini? (b) I yini lexi hi nga xi langutelaka hi ntshembo evokweni ra Yehovha?
18 Mupisalema Davhida u hlamusela Hosi ya minkarhi ni minkarhi hi marito lawa: “Yehova o nkulukumba, o faneriwa hi ku v̌ongiwa hikwaku; v̌ukulukumba bya yena a byi na ku pimiwa.” (Pisalema 145:3) Vukulukumba bya yena a byi pimeki ku fana ni mpfhuka ni minkarhi ni minkarhi! (Varhoma 11:33) Loko hi ya emahlweni hi amukela vutivi bya Muvumbi wa hina ni bya lunghiselelo rakwe ra nkutsulo leri endliweke ha Kreste Yesu, N’wana wakwe, hi ta tsakela ku dzunisa Hosi ya hina leyi nga riki na ku hela hi laha ku engetelekeke. Hi ta tiyimisela ku endla hi laha Pisalema 145:11-13 yi vulaka ha kona: “V̌a ta v̌ula ku kwetsima ka ku fuma ka wena, v̌a twarisa matimba ya wena. V̌a ta tiv̌isa v̌ana v̌a v̌anhu e mitiro ya wena, ni v̌ukulu bya ku kwetsima ka v̌uhosi bya wena. Ina, ku fuma ka wena i ku fuma ka mikari hikwayo, ni v̌uhosi bya wena byi kona e ku yisa tinšakeni le’ti nga heriki.”
19 Hi nga tiyiseka leswaku Xikwembu xa hina xi ta hetisisa marito lawa: “U funungula šandla ša wena, u šurisa hikwaŝo le’ŝi hanyaka.” Hosi ya minkarhi ni minkarhi yi ta hi kongomisa khwatsi ku kala ku hela masiku lawa ya makumu, hikuva Davhida wa hi tiyisekisa: “Yehova o lonḍov̌ota hikwav̌o la’v̌a ṅwi ranḍaka, kambe wa lov̌isa la’v̌o biha hikwav̌o.”—Pisalema 145:16, 20.
20. Xana u xi amukela njhani xirhambo xa Hosi ya minkarhi ni minkarhi, hi laha xi vekiweke ha kona eka tipisalema ta ntlhanu to hetelela?
20 Yin’wana ni yin’wana ya tipisalema leta ntlhanu to hetelela eBibeleni, yi sungula yi tlhela yi hetelela hi xirhambo lexi nge ‘Aleluya.’ Xisweswo, Pisalema 146 ya hi rhamba yi ku: “Ḍunisani Yehova! Moya wa nga, ḍunisa Yehova! Nḍi ta ḍunisa Yehova loko nḍa ha hanya, nḍi ta yimbelela Šikwembu ša mina loko nḍa ha ri kona.” Xana u ta xi amukela xirhambo xexo? Hakunene u fanele u swi tsakela ku n’wi dzunisa! Onge u nga va exikarhi ka lava hlamuseriwaka eka Pisalema 148:12, 13: “Madžaha ni v̌anhwana, ŝikoša ni v̌ana! A v̌a ḍunise v̌ito ra Yehova! Hikuv̌a v̌ito ra yena hi rona ntsena le’ri tlakukeke; v̌uhosi bya yena byi tlakukile ku tlula misav̌a ni matilo.” Onge hi nga xi amukela hi mbilu hinkwayo xirhambo lexi nge: “Ḍunisani Yehova!” Hi vun’we, a hi dzuniseni Hosi ya minkarhi ni minkarhi!
Hi Yihi Nhlamulo Ya Wena?
◻ Xana vaapostola va Yesu va tsundzuxe hi yini ka ha ri emahlweni?
◻ Ku sukela hi 1914, i swiendlo swihi leswi nga kanakanisiki leswi humeleleke?
◻ Hi kwihi ku avanyisa loku Yehovha a nga kusuhi ni ku ku tisa?
◻ Ha yini lowu wu ri nkarhi wa nkoka swinene wo dzunisa Hosi ya minkarhi ni minkarhi?
[Bokisi leri nga eka tluka 19]
Nguva Leyi Ya Mpfilumpfilu Ya Mhangu
Vo tala va swi xiyile leswaku nguva ya mpfilumpfilu yi sungule eka lembe-xidzana ra vu-20. Hi xikombiso, eka rito ro rhanga ra buku leyi nge Pandaemonium, ya Holobye wa le United States Daniel Patrick Moynihan, leyi humesiweke hi 1993, nhlamuselo ya “mhangu ya 1914” yi ri: “Ku fike nyimpi kutani misava yi cinca—hi ku helela. Namuntlha ku ni matiko ya nhungu ntsena emisaveni lawa a ma ri kona hi 1914, naswona lama hulumendhe ya wona yi nga cinciwangiki hi madzolonga ku sukela enkarhini wolowo. . . . Eka matiko laman’wana lama nga kona ya kwalomu ka 170, man’wana a hi khale ma ri kona lerova a ma si langutana ni mpfilumpfilu lowukulu wa sweswinyana.” Kunene, nguva yo sukela eka 1914 yi weriwe hi timhangu hi ku landzelelana ka tona!
Hi 1993 ku tlhele ku humesiwa buku leyi nge Out of Control—Global Turmoil on the Eve of the Twenty-First Century. Mutsari wa yona i Zbigniew Brzezinski, khale ka murhangeri wa U.S. National Security Council. U tsale a ku: “Ku sungula ka lembe-xidzana ra vumakume-mbirhi ku ndhundhuzeriwe hi vutsari byo tala tanihi masungulo ya xiviri ya Nguva yo Xalamuka. . . . Ku hambana ni leswi a swi languteriwile, lembe-xidzana ra vumakume-mbirhi ri ve lembe-xidzana leri vanhu va halateke ngati ni ra rivengo lerikulu, lembe-xidzana ra nkelunkelu wa tipolitiki ni ku dlayiwa ka vanhu hi nsele. Tihanyi ti andze hi mpimo lowukulu swinene, ku dlayana ku andze hi ndlela leyi tsemaka nhlana. Ku hambana lokukulu exikarhi ka vunene lebyi a byi ta tisiwa hi sayense, ni vuhomboloki bya politiki lebyi veke kona swi tsema nhlana. Ku dlayana a ku si tshama ku andza hi ndlela leyi ematin’wini, a ku si tshama ku mbumburhela vanhu vo tarisa xileswi, a ku si tshama ku dlayeteriwa vanhu hi ku tiyimisela konghasi hi swivangelo leswi nga twisisekiki ku fana ni le nkarhini lowu.” Sweswo i ntiyiso lowu heleleke!
[Xifaniso lexi nga eka tluka 17]
Mikayele u cukumete Sathana ni valandzeri vakwe emisaveni endzhaku ka ku simekiwa ka Mfumo hi 1914