Vugevenga Lebyi Nga Humelelangiki eAfrika Vupela-dyambu

Hi ku vula ka Eunice Ebuh

“Swigevenga leswi hlomeke swi kunguhate ku hlasela ka swona hi siku leri hi ntolovelo hi khomaka Dyondzo ya Buku ya Vandlha ekaya ra hina. Tigede ta hina ti tshama ti pfulekele vamakwerhu vaxinuna ni vaxisati ni vanhu lava tsakelaka. Onge swigevenga a swi yi tiva mikhuva ya hina ni nkarhi lowu hi hlanganaka hi wona. Entiyisweni a hi swi tiva leswaku va yive movha endhawini yo karhi va ta rindza egedeni ya hina hi siku ra dyondzo ya buku.

“Nkateko wa kona, vhiki leri va teke hi rona a ku ri vhiki ra ku endzeriwa hi mulanguteri wa xifundzha. Ematshan’weni yo hlangana ekaya ra hina, hi hlangane eHolweni ya Mfumo. Loko nhlangano wu herile ku ve ni nhlangano wa vakulu. Hi ntolovelo mina ni vana a hi ta va hi mukile, kambe nuna wa mina la nga nkulu u hi kombele leswaku hi n’wi yimela. U vule leswaku a nge teki nkarhi wo leha. Hiloko hi rindza.

“Endzhaku ka sweswo hi kume leswaku movha a wu lavi ku duma. Mulanguteri wa xifundzha ni nuna wa mina a va nga swi koti ku wu lunghisa. Mulunghisi wa timovha loyi hi nga n’wi vitana u tsandzekile ku wu lunghisa.

“Vana va boheke ku muka hi milenge. Endzhaku ka nkarhi, na mina ndzi mukile. Ndzi fike kwalomu ka awara ya khume. Vana, ku katsa na mina a hi nghenanga hi movha endhawini leyi hi tshamaka eka yona, swi nga leswi a swi ta lava leswaku hi pfula gede leyikulu.

“Loko ndzi nghena ekamareni ra mina ro etlela, ndzi twe ku duvula loku chavisaka ka xibamu. Ndzi hlamarile leswaku ku endleka yini. Ndzi ringete ku bela maphorisa riqingho, kambe riqingho a ri nga tirhi. Ndzi tsutsumele exithezini xa le hansi ndzi lotlela nyangwa wo nghena hi wona wa nsimbi, kutani ndzi hatlisela ku ya lotlela nyangwa wa le xikarhi. Ndzi time timboni. Vana va mina a va tshukile, hiloko ndzi va byela leswaku va rhomba. Hi khongele swin’we leswaku Yehovha a hi sirhelela. Hi nkarhi wolowo, nuna wa mina a a ha ri eHolweni ya Mfumo, a ha lwa ni ku dumisa movha.

“Ndzi langute ehandle hi fasitere kutani ndzi vona wanuna a etlele exitarateni ehandle ka gede. A swi vonaka onge swigevenga swi fambile, hiloko ndzi khandziyisa wanuna la vavisekeke emovheni wa mina ndzi n’wi tsutsumisela exibedlhele. A ku ri ku tiveka ekhombyeni, kambe a ndzi fanele ndzi endla swo karhi. Kambe, khombo ra kona u fe siku leri tlhandlamaka.

“Ku nga khathariseki khombo rero, swilo a swi ta va swi bihe ku tlurisa. Ku endza ka mulanguteri wa xifundzha ku vule leswaku hi nga vi na dyondzo ya buku endlwini ya hina. Ku fa ka movha ku vule leswaku hi nga muki hi ri ndyangu. Nuna wa mina, loyi hakunene swigevenga a swi ta va swi n’wi khomile, a nga fikanga ekaya ku kondza ku va vusiku swinene. Leswi ni swivangelo swin’wana swi endle leswaku hi pfuneka evusikwini byebyo.

“Yehovha i khokholo ra hina ni vutumbelo bya hina. Swi hilaha tsalwa ri vulaka hakona, ri ku: ‘Loko Yehova a nga hanyanyeli muti, v̌alanguteri a v̌a pfuni ntšhumu.’”—Pisalema 127:1.