Va Endle Ku Rhandza Ka Yehovha

Ku Rivalela Ku Pfula Ndlela Yo Kuma Ku Pona

VANA va Yakobe va khume lava nga yima emahlweni ka holobye-nkulu wa Egipta a va fuhleke xihundla xo chavisa. Malembe lama hundzeke va xavise Yosefa evuhlongeni, ku nga makwavo hi tatana, va endla rhengu ra ku byela tata wa vona leswaku Yosefa u dyiwe hi xivandzana.—Genesa 37:18-35.

Sweswi, endzhaku ka malembe ya kwalomu ka 20, ndlala leyikulu yi sindzise vavanuna lava va khume ku ta aEgipta va ta xava mavele. Kambe swilo a swi fambanga hi ku olova. Holobye-nkulu, loyi tlhelo a a ri mukongomisi wa swakudya, u va hehle hi ku va tinhlori. U khotse un’wana wa vona kutani a sindzisa lavan’wana hinkwavo leswaku va tlhelela ekaya, va ta ni makwavo lontsongo eka hinkwavo, Benjamini. Loko va endle tano, holobye-nkulu u endle rhengu ra leswaku Benjamini a khotsiwa.—Genesa 42:1–44:12.

Yuda, un’wana wa vana va Yakobe u arile. U te: ‘Loko hi tlhelela ekaya hi nga ri na yena Benjamini, tata wa hina u ta fa.’ Kutani ku endleka xin’wana lexi hambi ku ri Yuda kumbe un’wana wa lava a a famba na vona a va nga xi rindzelanga. Endzhaku ka ku lerisa hinkwavo leswaku va huma endlwini handle ka vana va Yakobe, holobye-nkulu u tlakuse rito a rila. Kutani loko a kote ku tlhela a tikhoma, u te: “Hi mina Yosefa.”—Genesa 44:18–45:3.

Musa Ni Ku Ponisa

Yosefa u vutise vamakwavo hi tatana, a ku: “Tatana wa ha hanya šana?” A ku nga ri na nhlamulo. Hakunene vamakwavo wa Yosefa hi tatana a va nga tivi leswaku va nga ku yini. Xana va fanele va tsaka, kumbe va tshuka? Phela, malembe ya 20 lama hundzeke va xavise munhu loyi evuhlongeni. Yosefa a a ri ni mfanelo ya ku va khotsa, a va tlherisela ekaya va nga ri na swakudya, kumbe—xo biha ni ku tlurisa—a va dlaya! Hikwalaho ka xivangelo lexi twalaka, vamakwavo wa Yosefa hi tatana a “v̌a ṭanḍeka ku ṅwi hlamula, hikuv̌a a v̌a ṭhukisiwa e mahlweni ka yena.”—Genesa 45:3.

Yosefa u hatle a va ntshunxa. U te: “Nḍi ṭhineleleni!” Va yingisile. Kutani a ku: “Hi mina Yosefa, makwenu, loyi mi nga ṅwi šavisa, nḍi ta halenu Egipta. Kambe ŝeŝi mi nga v̌av̌isekeni, mi nga v̌ileli hi leŝi mi nga nḍi šav̌isa nḍi ta halenu, hikuv̌a Šikwembu ši nḍi rumile ku rangela ṅwina, nḍi ta tiv̌a ku mi hanyisa.”—Genesa 45:4, 5.

Yosefa a nga kombisanga tintswalo handle ka xisekelo. Ana se a a vone vumbhoni bya ku hundzuka ka vona. Hi xikombiso, loko Yosefa a hehle vamakwavo hi tatana leswaku i tinhlori, u va twe va vulavula va ri voxe, va ku: “Ha kunene hi dyoherile makweru . . . Hikwalaho khombo leri ri hi humelelaka.” (Genesa 42:21) Nakambe, Yuda u tinyiketele ku va hlonga ematshan’weni ya Benjamini leswaku jaha leri ri ta tlhelela eka tata wa rona.—Genesa 44:33, 34.

Hikwalaho, a swi fanerile leswaku Yosefa a kombisa tintswalo. Hakunene, u swi xiyile leswaku ku endla tano a swi ta endla leswaku ndyangu hinkwawo wa ka vona wu pona. Hikokwalaho, Yosefa u byele vamakwavo hi tatana leswaku va tlhelela eka tata wa vona Yakobe, va ku eka yena: “Ṅwana wa wena Yosefa o te: Šikwembu ši nḍi endle hosi ya Egipta hikwayo; relela u ta halenu ka mina, u nga ṭhuki u hlwela. U ta aka e tikweni ra Gošen, u v̌a kusuhi na mina, wena ni v̌ana v̌a wena, ni v̌ana v̌a v̌ana v̌a wena, ni ŝifuwana ŝa wena, ni ŝifuwo ŝa wena ni hikwaŝo leŝi nga ŝa wena. Ṅdi ta ku wundla kona.”—Genesa 45:9-11.

Yosefa Lonkulu

Yesu Kreste a nga ha vuriwa Yosefa Lonkulu, hikuva ku na ku fana lokukulu exikarhi ka vavanuna lavambirhi. Ku fana na Yosefa, Yesu u xanisiwe hi vamakwavo, vana-kulobye va Abrahama. (Ringanisa Mintirho 2:14, 29, 37.) Kambe vavanuna lava vambirhi va ve ni vuyelo lebyi xiyekaka swinene. Hi ku famba ka nkarhi, xiyimo xa Yosefa xa ku va hlonga xi cincile ivi a va holobye-nkulu, a landzela Faro hi xikhundlha. Hi ku fanana, Yehovha u pfuxe Yesu eku feni kutani a n’wi tlakusela exiyin’weni lexi tlakukeke “evokweni ra xinene ra Xikwembu.”—Mintirho 2:33; Vafilipiya 2:9-11.

Tanihi holobye-nkulu, Yosefa a a kota ku va nyika swakudya hinkwavo lava taka aEgipta ku ta xava mavele. Namuntlha, Yosefa Lonkulu u ni ntlawa wa hlonga ro tshembeka ni ro tlhariha emisaveni, lowu ha wona a phamelaka swakudya swa moya “hi nkarhi lowu faneleke.” (Matewu 24:45-47; Luka 12:42-44) Hakunene, lava va taka eka Yesu “a va nge he twi ndlala kumbe torha nikatsongo . . . hikuva Xinyimpfana, lexi nga exikarhi ka xiluvelo, xi ta va risa, xi va kongomisa eminseledyaneni ya mati ya vutomi.”—Nhlavutelo 7:16, 17.

Dyondzo Eka Hina

Yosefa u veka xikombiso lexinene ngopfu xa tintswalo. Vululami lebyi nga tsekatsekiki a byi ta lava leswaku a xupula lava va n’wi xaviseke evuhlongeni. Ku hambana ni sweswo, mintlhaveko a yi ta va yi n’wi susumetele ku honisa xidyoho xa vona. Yosefa a nga endlanga ni xin’we xa sweswo. Ematshan’weni ya sweswo, u ringe ku hundzuka ka vamakwavo hi tatana. Kutani, loko a vone leswaku ku tisola ka vona a ku ri ka xiviri, u va rivalerile.

Hi nga n’wi tekelela Yosefa. Loko munhu la hi dyoheleke a kombisa ku cinca ka xiviri embilwini, hi fanele ku n’wi rivalela. Ina, a hi fanelanga hi pfumelela mintlhaveko ntsena yi endla leswaku hi nga xi voni xidyoho lexikulu. Hi tlhelo rin’wana, a hi fanelanga hi pfumelela mintlhaveko ya xikhomela yi endla leswaku hi nga rivaleli loko ku ri ni ku hundzuka ka xiviri. Hikwalaho a hi ‘hambeteni hi lehiselana mbilu ni ku rivalelana hi ku ntshunxeka.’ (Vakolosa 3:13) Loko hi endla tano, hi ta va hi tekelela Xikwembu xa hina Yehovha, lexi “riv̌alelaka.”—Pisalema 86:5; Mikiya 7:18, 19.