Ku Hlayisa Vutomi eNkarhini Wa Ndlala

1. I xiendlo xihi xa vutlhari lexi Yosefa a xi tekeke enkarhini wa malembe ya ndzalo, naswona hi vuyelo byihi?

HI KU anghwetla endzhaku ko hlawuriwa tanihi mulanguteri wa swakudya, Yosefa u rhendzelekile etikweni ra Egipta. A a hlele timhaka kahle hi nkarhi lowu malembe ya ndzalo ya sunguleke ha wona. Kutani misava yi humese ntshovelo wa yona hi vunyingi! Yosefa u ye emahlweni a hlengeleta swakudya emasin’wini ya muti wun’wana ni wun’wana, a swi hlayisa emutini. U ye emahlweni “a hlengeleta koro, i ngi i sav̌a ra lwandle hi ku tala ngopfu-ngopfu, v̌a ko va ṭhika ku hlaya, hikuv̌a a ŝi ṭanḍa v̌ahlayi.”—Genesa 41:46-49.

2. Hi le ka gandzelo rihi ra munhu hi xiyexe laha vanhu a va ta kota ku kuma swakudya?

² Malembe ya nkombo ya ndzalo ya herile, ivi ndlala yi sungula hi laha Yehova a vhumbeke ha kona—ndlala leyi a yi nga ri aEgipta ntsena kambe “misav̌a hikwayo.” Loko vanhu lava sikaka aEgipta va sungule ku rilela swakudya eka Faro, Faro u te eka vona: “Yanani ka Yosefa, mi endla leŝi a nga ta mi byela ŝona.” Yosefa u xavisele Vaegipta koro ku kondza mali ya vona yi hela. Kutani u amukele swifuwo swa vona loko va hakela. Eku heteleleni, vanhu va tile eka Yosefa, va ku: “Wa nga hi šav̌a ŝeŝi, hina ni masimu ya hina hi ŝakudya; hina ni masimu ya hina, hi ta v̌a makhumbi ya Faro.” Kutani Yosefa a xavela Faro tiko hinkwaro ra Vaegipta.—Genesa 41:53-57; 47:13-20.

Lunghiselelo Ra Ku Phamela Swa Moya

3. I xitirho xihi Yesu a xi vhumbeke xo lunghiselela swakudya hi nkarhi lowu faneleke?

³ Tanihi leswi koro leyi hangalasiweke hi Yosefa yi vuleke vutomi eka Vaegipta, kutani swakudya swa ntiyiso swa moya i swa nkoka leswaku swi tiyisa Vakriste lava vaka makhumbi ya Yehova hi ku tinyiketa ka vona eka Yena hi ku tirhisa Yosefa Lonkulu, Yesu Kriste. Enkarhini wa vutirheli byakwe bya laha misaveni, Yesu u vhumbe leswaku valandzeri vakwe lava totiweke a va ta byarha vutihlamuleri byo ava swakudya leswi. U vutisile: “Xana nandza lowo tshembeka, lowa vutlhari, i mani xana? Xana a hi yena loyi n’wini wa yena a nga ta n’wi veka ku va mulanguteri wa malandza man’wana la mutini, leswaku ma nyikiwa swakudya hi nkarhi wa kona xana? Ku katekile nandza loyi, ku nga ta ku loko n’wini wa yena a fika, a nga ta n’wi kuma a endlisa sweswo.”—Matewu 24:45, 46.

4. Xana swakudya leswi endliweke hi ntlawa wa “nandza” namuntlha swi yelana hi ndlela yihi ni leswi hlengeletiweke esikwini ra Yosefa?

⁴ Masalela lama tshembekaka ya ‘ntlawa lowu wa nandza’ lowa vutlhari namuntlha ya tikarhata hi tindlela hinkwato ta Matsalwa ku vona leswaku Timbhoni leti tinyiketeke ta Yehova, kun’we ni vanhu lava tsakelaka lava humaka emisaveni, va kuma swakudya swa moya leswi hanyisaka. Ntshembo lowu wu xiyiwe tanihi ntirho wo hlawuleka naswona wu endliwa tanihi ntirho wo hlawuleka eka Yehova. Ku tlula kwalaho, “nandza” u vumbe mabandlha ivi a ya nyika tibuku ta Bibele hi nhlayo yo tano lerova ya va ni “mbewu” leyi ringaneke ya Mfumo yo yi hangalasa evanhwini eka masimu ya vona lawa va ya averiweke. Leswi swi yelana ni siku ra Yosefa, loko a hlengelete vanhu emutini ivi a va nyika koro hayi ya swakudya ntsena kambe ni yo byala hi langutelo ra ntshovelo endzhakunyana.—Genesa 47:21-25; Marka 4:14, 20; Matewu 28:19, 20.

5. (a) I mianakanyo yihi yo hlawuleka leyi “nandza” a yi yisaka eka swilaveko swa yindlu enkarhini wa timhangu? (b) Xana “nḍalo” ya malunghiselelo ya moya hi 1986 yi fanisa ku yini ni swakudya le ndzhaku enkarhini wa Yosefa?

⁵ Hambi loko ntirho wo chumayela wa le rivaleni wu yirisiwile naswona Timbhoni ta Yehova ti xanisiwa, ‘nandza lowo tshembeka’ u languta ku phamela loku ka swakudya swa moya tanihi ntshembo wo hlawuleka. (Mintirho 5:29, 41, 42; 14:19-22) Loko timhangu ti humelela, to tanihi mabubutsa, tindhambi ni ku tsekatseka ka misava, “nandza” u vona leswaku swilaveko swa nyama ni swa moya swa yindlu ya Xikwembu swa nyikeriwa. Hambi ku ri lava va nga etikampeni ta nxaniso va fikeleriwile nkarhi na nkarhi hi rito leri gandlisiweke. Mindzilakana ya matiko a yi pfumeleriwi ku yimisa ku khuluka ka swakudya swa moya swi ya eka lava va swi lavaka. Ku tshama swi ri karhi swi hangalasiwa swi lava xivindzi, ripfumelo eka Yehova, naswona hakanyingi swi lava vutlhari lebyikulu. Emisaveni hinkwayo hi 1986 ntsena, “nandza” u humese ku khapakhapa ka Tibibele ta 43 958 303 na tibuku ta xifunengeto xo tsindziyela, kun’we na timagazini ta 550 216 455—hakunene “i ngi i sav̌a ra lwandle hi ku tala ngopfu-ngopfu.”

Ku Tirihisela, Ku Xupula Kumbe Musa?

6, 7. (a) Xana ndlala yi endle leswaku vamakwavo va khume va nkhinsama emahlweni ka Yosefa hi ndlela yihi? (b) I tindlela tihi leti Yosefa se a a ri endzingweni ha tona?

⁶ Eku heteleleni ndlala yi fikile etikweni ra Kanana. Yakobo u rhume vamakwavo va Yosefa hi tatana va khume aEgipta ku ya xava koro. Kambe a nga n’wi rhumanga Benjamini, makwavo wa Yosefa xidzi, hi ku chava, hi laha a vuleke ha kona, leswaku “kumbe šana a nga humelela hi khombo.” Tanihi leswi Yosefa a a ri muxavisi a ri swakwe, vamakwavo vakwe va tile eka yena ivi va nkhinsama emahlweni ka yena. Hambi leswi va nga n’wi tivangiki makwavo wa vona, Yosefa u va tivile.—Genesa 42:1-7.

⁷ Manuku Yosefa u tsundzuke milorho yakwe yo sungula malunghana na vona. Kambe xana a a ta endla yini? U fanele ku tirihisela ke? Enkarhini wa vona wa xilaveko lexikulu, xana u fanele ku rivala nxaniso lowu a wu kumeke emavokweni ya vona? Ku vuriwa yini hi nhlomulo wa tata wakwe lowu tsemaka nhlana? Leswi swi fanele ku rivariwa ke? Vamakwavo vakwe manuku va titwe njhani hi ta xihoxo lexikulu lexi va xi endleke? Yosefa, na yena, a a ri endzingweni eka mhaka leyi. Xana swiendlo swa yena a swi ta yelana ni langutelo leri Yosefa Lonkulu, Yesu Kriste, a a ta ri kombisa endzhaku, hi laha swi hlamuseriweke ha kona eka 1 Petro 2:22, 23: “A nga dyohanga nchumu; vunwa a byi kumiwanga enon’wini wa yena. Loko a rhuketeriwa, a nga tlheriselanga hi ku rhuketela; loko va n’wi twisa ku vava, a nga vulanga leswaku u ta tirihisela, kambe u swi tshikile emavokweni ya loyi a avanyisaka hi ku lulama.”

8. Yosefa a a ta kongomisiwa hi yini, leswi kombaka yini malunghana na Yesu ni vadyondzisiwa Vakwe?

⁸ Tanihi leswi Yosefa a a vona voko ra Yehova eku hetisekeni ka swiendlakalo, a a ta va ni vukheta byo hlayisa milawu na swileriso swa Xikwembu. Hi ndlela leyi fanaka, Yesu nkarhi na nkarhi a a hisekela ‘ku endla ku rhandza ka Tata wakwe’ tanihi leswi a nyikeke vutomi lebyi nga heriki eka ‘un’wana ni un’wana la pfumelaka eka yena.’ (Yohane 6:37-40) Tanihi “vayimeri va Kriste,” vadyondzisiwa vakwe lava totiweke nakambe va hetisisa ntshembo wa vona lowo hlawuleka hi ku “tivisa vanhu timhaka hinkwato ta vutomi lebyintshwa lebyi.”—2 Vakorinto 5:20; Mintirho 5:20.

9, 10. (a) I ndlela yihi leyi Yosefa manuku a yi tekeke, naswona ha yini? (b) Yosefa u kombe ntwelo-vusiwana lowu fanaka ni lowu Yesu a a ta wu komba hi ndlela yihi?

⁹ Yosefa a nga titivisanga eka vamakwavo va yena kwalaho. Ku ri na sweswo, u vulavule na vona hi ku va khahla hi mutoloki, a ku: “Mi v̌akamberi!” Tanihi leswi a va boxe ndzisana ya vona, Yosefa u lave leswaku va komba ntiyiso wa vona hi ku yi tisa aEgipta. Yosefa u va twile loko hi ku tisola va byelana leswaku vuyelo lebyi bya swiendlakalo ku fanele ku ri hakelo hikwalaho ka leswi va n’wi xaviseke, Yosefa, evukhumbini. Loko a va fularhela, Yosefa u ririle. Hambi swi ri tano, u endle leswaku Simiyoni a bohiwa tanihi mukhomeri ku kondza va vuya na Benjamini.—Genesa 42:9-24.

¹⁰ Yosefa a a nga tirihiseli hi xiendlo xo biha lexi va n’wi endleke xona. U lave ku vona loko ku hundzuka ka vona ku ri ka xiviri, loku humaka evuentweni bya timbilu ta vona, leswaku va ta kombiwa tintswalo. (Malakia 3:7; Yakobo 4:8) Hi langutelo ra ntwelo-vusiwana, leri yelanaka ni leri Yesu a a ta ri kombisa, Yosefa a nga tatanga masaka ya vona hi koro ntsena kambe u va tlherisele ni mali ya vona, enon’wini wa saka ra un’wana ni un’wana. Tlhandla-kambirhi, u va nyike timbuva ta rendzo ra vona.—Genesa 42:25-35; ringanisa Matewu 11:28-30.

11. (a) Hi ku famba ka nkarhi, Yakobo u susumeteleke ku endla yini, naswona hikwalaho ka yini eku heteleleni a pfumerile? (b) Varhoma 8:32 na 1 Yohane 4:10 hi laha ku fanaka ti hi tiyisekisa hi rirhandzu ra Xikwembu hi ndlela yihi?

¹¹ Hi ku famba ka nkarhi, va hetile swakudya leswi va swi xaveke aEgipta. Yakobo u kombele vana lava kaye va majaha ku tlhelela ivi va xava swin’wana. Ro sungula, a nga lavangi ku twa nchumu hi Benjamini, a ku: “Mi nga ka mi nga fambi na ṅwana nga, hikuv̌a hosi ya kwe yi file, yena o sele a ri ŝakwe; loko a humelela hi khombo e ndleleni yoleyo mi fambaka ha yona, mi ta šikisa hi šiv̌iti e misisi ya mina le’yo basa e šiv̌andleni ša v̌afi.” Hambi swi ri tano, endzhaku ka ku sindzisa lokukulu ni ku tinyikela ka Yuda ku va ni vutihlamuleri bya Benjamini, Yakobo a pfumela hi ku kanakana leswaku va famba ni wandzisanyana.—Genesa 42:36–43:14.

12, 13. (a) Xana Yosefa u wu endlise ku yini ndzingo wo paluxa langutelo ra timbilu ta vamakwavo? (b) Xana vuyelo byi nyike Yosefa xisekelo xo komba tintswalo hi ndlela yihi?

¹² Kute loko Yosefa a vona leswaku Benjamini u tile ni vamakwavo, u va rhambele endlwini yakwe, laha a endleke nkhuvo kona. Benjamini a n’wi phamela mpandzwa lowu hlayiweke ka ntlhanu ku tlula mpandzwa wihi na wihi wa lavan’wana. Kutani Yosefa a ringa vamakwavo vakwe ro hetelela. Nakambe, u tlherisele mali ya vona hinkwayo esakeni ra un’wana ni un’wana, kambe xinwelo xakwe xo hlawuleka xa silvere a xi hoxiwe enon’wini wa saka ra Benjamini. Endzhaku ka ku suka ka vona, Yosefa u rhume mulanguteri wa yindlu ya yena ku ya va lumbeta vukhamba kutani a hanguluxa xidzuvulo xakwe emasakeni ya vona. Loko xi kumiwile esakeni ra Benjamini, vamakwavo va handzurile tinguvu ta vona. Va tlheriseriwe endzhaku ku ya tihlamulela eka Yosefa. Yuda u endle xikombelo xa ntwelo-vusiwana xa tintswalo, a kombela ku va khumbi ematshan’wini ya Benjamini leswaku jaha ri tlhelela eka tata wa rona.—Genesa 43:15–44:34.

¹³ Loko a tiyisekile hi ku hundzuka ka timbilu ta vamakwavo vakwe, Yosefa u tsandzekile ku lawula mintlhaveko yakwe. Endzhaku ka loko a byele hinkwavo ku suka emahlweni ka yena, Yosefa u te: “Hi mina Yosefa, makwenu, loyi mi nga ṅwi šav̌isa, nḍi ta halenu Egipta. Kambe ŝeŝi mi nga v̌av̌isekeni, mi nga v̌ileli hi leŝi mi nga nḍi šav̌isa nḍi ta halenu, hikuv̌a Šikwembu ši nḍi rumile ku rangela ṅwina, nḍi ta tiv̌a ku mi hanyisa. . . . Ku mi ponisa misav̌eni, ni ku mi hanyisa hi ku pona lo’kukulu.” Ivi a ku eka vamakwavo vakwe: “Hatlisani, mi ya ka tatana, mi ta ku ka yena: . . . Relela u ta halenu ka mina, u nga ṭhuki u hlwela. U ta aka e tikweni ra Gošen, . . . nḍi . . . ta ku wundla kona (hikuv̌a malembe ya ntlhanu ya ndlala ma ha ta), hi leŝaku u nga ti ṭhuka u hungutiwa wena, ni yindlu ya wena, ni lav̌a u nga na v̌ona hikwav̌o.”—Genesa 45:4-15.

14. I timhaka tihi leti tsakisaka leti yisiweke eka Yakobo?

¹⁴ Loko Faro a twile mahungu hi ta vamakwavo va Yosefa, u byele Yosefa ku teka magolonyi etikweni ra Egipta lama nga ta tisa tata wakwe ni ndyangu wa yena hinkwawo aEgipta hikuva leswi antswaka swa tiko a ku ta va swa vona. Hi ku twa hinkwaswo leswi humeleleke, Yakobo u hlakarherile emoyeni ivi a huwelela a ku: “Ŝi ringene! Yosefa ṅwana nga, wa ha hanya; nḍi ta ya nḍi ya ṅwi v̌ona nḍi nga si fa.”—Genesa 45:16-28.

Swakudya Swa Moya Swi Tele

15. Hi le ka mani laha sweswi hi langutelaka swakudya swa moya kona, naswona hi nga tiyisekisiwa hi ndlela yihi hi ndzalo?

¹⁵ Xana leswi hinkwaswo swi vula yini eka hina namuntlha? Ku tshama hi phaphamele xilaveko xa hina xa moya, hi languta eka Munhu Lonkulu swinene ku tlula Faro lonene wa le nkarhini wa Yosefa. I Hosi Leyikulu Yehova leyi yi nyikelaka swakudya ni vukongomisi emasikwini lawa ya munyama wa misava leyi nga ni ndlala ya ntiyiso wa Bibele. Hi tikarhatile etimhakeni ta Mfumo wa yena, kavula, hi tisa vukhume bya hina exitlatini xakwe. I malwandla muni yonghasi lawa a hi pfuleleke “mafester ya tilo” ha wona, a hi chululela eku kateka “hi mpimo lo’wu tlurisaka”!—Malakia 3:10.

16. (a) Hi kwihi ntsena laha “swakudya” swo hlayisa vutomi swi kumekaka kona namuntlha? (b) Xana ku byariwa ka “koro” hikwalaho ka vanhu lava sikaka ku andzisiwe hi ndlela yihi?

¹⁶ Evokweni ra xinene ra Yehova ku na Mulawuri wakwe wa Swakudya, loyi sweswi a nga Hosi leyi vekiweke exiluvelweni, Yesu la kwetsimisiweke. (Mintirho 2:34-36) Hi laha vanhu va bohekeke ku tixavisa tanihi makhumbi leswaku va hambeta va hanya, kutani hinkwavo lava namuntlha va lavaka ku hambeta va hanya va fanele ku ta eka Yesu, va va valandzeri vakwe lava tinyiketeke eka Xikwembu. (Luka 9:23, 24) Tanihi leswi Yakobo a kongomiseke vana vakwe ku ya eka Yosefa leswaku va kuma swakudya, kutani Yehova u kongomisa vanhu lava hundzukelaka eka N’wana wa yena la rhandzekaka, Yesu Kriste. (Yohane 6:44, 48-51) Yesu u hlengeleta valandzeri va yena emabandlheni lama fanaka ni muti—lama tiyeke yo tlula 52 000 emisaveni hinkwayo namuntlha—laha va phameriwaka swakudya swo tala swa moya ni ku averiwa “koro” yo tala, tanihi “mbewu” yo byala emasin’wini. (Genesa 47:23, 24; Matewu 13:4-9, 18-23) Timbhoni leti ta Yehova i vatirhi vo tirhandzela! Vo tala va vona va nghenela ntirho wa vuphayona bya nkarhi hinkwawo hi ku tirhandzela, ni nhlohlorhi ya vona ya 595 896 leyi hlanganyeleke entirhweni lowunene hi n’hweti yin’we n’waxemu. Sweswo swi endla avhareji ya maphayona lama tlulaka 11 eka bandlha rin’wana ni rin’wana!

17. I mhaka yihi yin’wana ya vuprofeta yi nga ni ku fana eku hlanganeni ka vamakwavo va khume hi tatana na Yosefa?

¹⁷ Swa xiyeka leswaku vamakwavo hinkwavo va khume va Yosefa, lava sweswi va hundzukeke eka malangutelo na swiendlo swo sungula, a va hlanganisiwe na yena aEgipta, leswi kun’we na Sodoma, swi fanekiselaka misava leyi Yesu a vamberiweke eka yona. (Nhlavutelo 11:8) Leswi swi hi tsundzuxa Zakaria 8:20-23, leyi chaputaka hi nhlamuselo ya “v̌av̌anuna v̌a khume” lava nge, “Hi ta ya na ṅwina,” hi leswaku, ni vanhu lava totiweke va Yehova, lava masalela ya ha tirhaka tanihi vona laha misaveni.

18. Ku rhandziwa ngopfu loku kombiweke Benjamini ku fanekisela yini eminkarhini ya manguva lawa?

¹⁸ Hambi swi ri tano, ku vuriwa yini hi makwavo wa Yosefa xidzi, Benjamini, loyi ku velekiwa kakwe ko nonon’hwa ku koxeke vutomi bya nsati wa Yakobo la rhandzekaka Rahele? Benjamini a a rhandziwa ngopfu hi Yosefa, loyi handle ko kanakana a veke ni vuxaka bya le kusuhi ni n’wana loyi wa mana wa yena n’wini. Leswi handle ko kanakana swi vangela ku amukela ka Benjamini mpandzwa lowu hlayiweke ka ntlhanu loko vamakwavo hinkwavo va 12 va hlanganisiwa nakambe ro sungula enkhumbyeni endlwini ya Yosefa. Xana Benjamini a nga fanekiseli masalela lama totiweke ya Timbhoni namuntlha kahle, lawa yo tala ya wona ya ponaka ya hlengeleteriweke etlhelweni ra Hosi ku sukela hi 1919? Ntlawa lowu wa “Benjamini” hakunene wu amukele mpandzwa wo hlawuleka lowu humaka eka Yehova, tanihi leswi ‘moya wa yena wu yimaka ni mimoya ya vona.’ (Varhoma 8:16) Lava, na vona, va kamberiwile malunghana ni vutshembeki bya vona kasi “tinyimpfu” ta Hosi ti va tirherile.—Matewu 25:34-40.

19. I ku fana kwihi loku faneleke ku xiyiwa exikarhi ka ku rhurhela ka mindyangu ya Israyele eGošen ni ku hlengeletana ka vanhu va Xikwembu namuntlha?

¹⁹ Swa tsakisa leswi, loko Faro a lunghiselele ku rhurhisa Yakobo ni mindyangu yakwe va ya aEgipta, “mimoya” hinkwayo ya xinuna leyi tshameke kwalaho a yi ri 70, ku nga nyandziso wa 7 na 10. (Genesa 46:26, 27) Tinhlayo leti timbirhi ti tirhisiwile hi ndlela ya nkoka eka Matsalwa hinkwawo, “7” hakanyingi yi komba swa le tilweni naswona “10” ku helela ka swa laha misaveni. (Nhlavutelo 1:4, 12, 16; 2:10; 17:12) Leswi swi yelana ni xiyimo namuntlha, laha hi nga ha rindzelaka leswaku Yehova u ta hi hlengeletela un’wana ni un’wana wo hetelela wa ndyangu wa yena wa Timbhoni “emutini” wa yena, paradeyisi ya moya leyi hi yi tsakelaka sweswi. (Ringanisa Vaefesa 1:10.) “Hosi yi tiva lava nga va yona,” naswona hambi ku ri sweswi ya va tshamisisa “e tikweni le’ri tlurisaka hi ku saseka,” hi laha Gošen a yi ri ha kona eku fumeni ka Faro.—Genesa 47:5, 6; 2 Timotiya 2:19.

20. Ku nga khathariseki ndlala ya moya namuntlha, hikwalaho ka yini hi fanele ku tsaka?

²⁰ Esikwini ra Yosefa, malembe ya ndlala ya landzele malembe ya ndzalo. Namuntlha, ya humelela hi nkarhi wun’we. Ku hambana ni ndlala ya moya leyi nga etikweni leri nga ehandle ka tintswalo ta Yehova, ku ni ndzalo ya swakudya swa moya exivandleni xa Yehova xa vugandzeri. (Esaya 25:6-9; Nhlavutelo 7:16, 17) Ee, hambi leswi ku nga ni ndlala ya marito ya Yehova eVujaganini, hi laha Amosi a vhumbeke ha kona, rito ra Yehova ri huma e Yerusalema wa le tilweni. Sweswo swa hi tsakisa swonghasi!—Amos 8:11; Esaya 2:2, 3; 65:17, 18.

21. (a) I lunghelo rihi lerikulu leri hi ri tsakelaka namuntlha? (b) Hi fanele ku tlangela yini, naswona hi nga kombisa ku tlangela ka hina hi ndlela yihi?

²¹ Namuntlha, ehansi ka vukongomisi bya Yosefa Lonkulu, Yesu Kriste, hi na lunghelo lerikulu ro hlengeleteriwa emabandlheni lama fanaka ni muti. Kwalaho hi nga xurha hi ndzalo ya rifuwo ra swakudya swa moya ni ku tlhela hi byala timbewu ta ntiyiso ni ku hangalasa mahungu lamanene ya leswaku swakudya swa moya swa kumeka. Leswi hi swi endlela ku pfuna hinkwavo lava amukelaka marito ni malunghiselelo lama endliweke hi rirhandzu ya Yehova, Mufumi Lonkulu. I ku nkhensa muni konghasi loku hi nga vaka na kona eka Xikwembu xa hina hikwalaho ka nyiko ya N’wana wa xona, Yosefa Lonkulu, la tirhaka tanihi Mulawuri wa vutlhari wa swakudya swa moya! Hi yena la rhumiweke hi Yehova tanihi Muhlayisi wa vutomi enkarhini lowu wa ndlala ya moya. Onge un’wana ni un’wana wa hina a nga kombisa ku chivirika eku endleni ka ntirho wo hlawuleka a landzela xikombiso xakwe naswona ehansi ka vurhangeri byakwe!

Xana U Vona Ku Yelana?

◻ Yosefa u fanisele Yesu tanihi Mulawuri wa Swakudya hi ndlela yihi?

◻ I yini eka drama ya Yosefa lexi yelanaka ni ku va makhumbi ya Xikwembu hi ku tinyiketela?

◻ I mfanelo yihi ya tintswalo leyi kombisiweke hi Yosefa na hi Yesu tanihi xikombiso eka hina namuntlha?

◻ Tanihi le nkarhini wa Yosefa, i lunghiselelo rihi lerinene ra ku hangalasiwa ka swakudya ri nga kona namuntlha?

◻ Xana ku xiyisisa ka hina ka drama ku fanele ku hi susumetela ku endla yini?

[Swifaniso leswi nga eka tluka 16, 17]

Emisaveni leyi taleke hi ndlala ya moya, Yosefa Lonkulu u lunghiselela ndzalo ya hinkwavo lava taka eka yena hi ripfumelo

Hi laha vamakwavo va khume hi tatana va kombiseke ku titsongahata eka Yosefa, ntshungu lowukulu sweswi wu tltsongahatela Kriste

Ku fana ni mimoya ya 70 ya ndyangu wa Yakobo, nhlayo leyi heleleke ya “tinyimpfu” ta Yehova yi fika “emutini” lowunene—paradeyisi ya moya leyi hi yi tsakelaka sweswi

[Xifaniso lexi nga eka tluka 18]

Ntlawa wa Benjamini wa manguva lawa wu rhandziwile swinene hi Kriste, wu amukela ndzalo ya “swakudya hi nkarhi wa kona”