Xiviko Xa Vahuweleri Va Mfumo

Hakelo Ya Vutshembeki

A KU RI eItaly laha, malembe ya 15 lama hundzeke, Mrs. B——, a ri na malembe ya 15 hi vukhale enkarhini wolowo, a sunguleke ku tiva ntiyiso. Hambi swi ri tano, a nga endlanga nhluvuko, kutani u tekane ni loyi a nga riki mupfumeri. Hambi swi ri tano, timbewu ta ntiyiso ti tshame embilwini yakwe, kutani kwalomu ka lembe leri hundzeke u amukele dyondzo ya Bibele ni un’wana wa Timbhoni ta Yehova ivi a sungula ku va kona eminhlanganweni. Nuna wakwe a a kaneta swinene naswona u xungete ku n’wi hlongola ekaya. A a n’wi ba swinene lerova a lava ku tshunguriwa. Madyambu man’wana u nghene eHolweni ya Mfumo hi nkarhi wa nhlangano, a hima makwerhu wa xinuna, a faya nghilazi enyangweni, ivi a huwelela hi ku hlundzuka.

Loko a tlhelela ekaya, u kume leswaku nuna wakwe u n’wi lotlelele ehandle ka yindlu. Handle ko lahlekeriwa hi xivindzi xakwe, u yile exiticini xa (maphorisa) xa carabinieri ku va tivisa leswi swi humeleleke ivi a ya etlela ekaya ka hahani wakwe. Endzhaku ka masiku mambirhi nuna wa yena u n’wi pfumelele ku vuya ekaya.

Nuna loyi u tiveka swinene edorobeni leri. U sungule ku hehla Timbhoni ta Yehova erivaleni, a vula leswaku ti onhe ndyangu wa yena. Eka tsima leri ro lwisana ni Timbhoni, u seketeriwe hi vafundhisi. Muprista a a ri na maphepha yo namaketa lama tsariweke marito lama landzelaka: “TIMBHONI TA YEHOVA: Mi nga kavanyeti ku rhula ka ndyangu lowu. INKOMU!” U endle leswaku maphepha lawa ya namarhetiwa etimbatini emutini. Un’wana ni un’wana a a vulavula hi Timbhoni ta Yehova naswona a va ti poyila ni ku ti sandza. Ku nga khathariseki leswi, vamakwerhu va ve na xivindzi naswona va ye emahlweni evutirhelini bya vona hi ku hiseka lokukulu ku tlula eku sunguleni. Mindyangu yo tala a yi ma lavanga maphepha yo namarhetiwa emavantini ya yona. Ku vikiwile leswaku vafana van’wana, lava rhumiweke hi muprista, va nyikiwile tirhandi ta 100 to ya wa namarheta emavantini.

Hi nkarhi lowu Mr. B—— u tivisile nsati wakwe leswaku u fanele ku suka ekaya, tanihi leswi ana se a tekeke magoza ya ku hambana hi nawu. Kambe swilo a swi sungula ku cinca edorobeni leri. Xitici xa xiya-ni-moya xa kwalaho xi nyikele nongonoko, naswona muviki u hlamusele mhaka tanihi “xiendlo xa mboyamelo wo biha, xa mikhuva leyi yisaka ehansi.” Enkarhini wa nongonoko, vamakwerhu va hlamusele leswaku mindyangu yo tala a yi ri na maphepha lama yi ma nyikiweke. Leswi swi tiyisiwe hi mhaka ya leswaku a swi fambisiwa ni navusiku hambi ni le ka mavanti yan’wana ya Timbhoni ta Yehova ni mindyangu leyi a yi amukela mapfhumba ya vona. Muviki wa xiya-ni-moya u dzunise Timbhoni ta Yehova ivi a vula leswaku i vanhu va “ku rhula lokukulu, naswona va ni musa lowukulu.”

Eku heteleleni, nkarhi wu fikile leswaku mpatswa wu humelela emahlweni ka muavanyisi ku sungula ku hambana ka nawu loku nuna wa kona a a ku komberile. Muavanyisi u dzunise Mrs. B—— hi ku navela kakwe ka ku nga lavi ku hambana, naswona loko a yimele leswaku mhaka yi tengiwa, u n’wi nyike vuhlayisi bya vana. A va ta hambeta va tshama ekaya ka vona, naswona nuna wa yena a a fanele ku n’wi nyika 2 500 wa tirhandi n’hweti na n’hweti. Wanuna u arile a ku: “Yindlu i nhundzu ya mana wa mina, kutani nsati wa mina a nga ka a nga tshami kona.” Muavanyisi u hlamurile: “U lava ku va wanuna ni makhonya. Nsati wa wena nkarhi na nkarhi u fanele ku ina, naswona loko o kala a ku e-e. Kutani u pfilunganya doroba hinkwaro. Loko nsati wa wena a a nga tshembeki eka wena, a ndzi ta swi twisisa, kambe mhaka ya leswi a landzaka ripfumelo rin’we ematshan’wini ya rin’wana a hi mhaka ya wena.”

Mrs. B—— sweswi u tirhela Yehova hi ntsako. (Matewu 5:10) Vanhu va le dorobeni rolero va hundzule malangutelo ya vona, kutani mabulo lama hlamarisaka ya Bibele ya endliwa. Va pfumela leswaku a hi Timbhoni ta Yehova leti kavanyetaka ku rhula ka mindyangu. Loko ka ha ri na maphepha yo namarhetiwa emavantini, a ya ha vuli nchumu.