Xiviko Xa Vahuweleri Va Mfumo

“Rito Ra Xikwembu Ri Ya eMahlweni Swinene”

VANDLHA ra Vukreste ri andze hi ku hatlisa ku sukela eka swirho swa 120 ku ya eka swa 3 000, endzhaku ka loko ra ha ku vumbiwa. (Mintirho 1:15; 2:41) Bibele yi hlamusela leswaku “Rito ra Xikwembu ri ya emahlweni swinene; na yona nhlayo ya vadyondzisiwa yi ya yi andza ngopfu eYerusalema.” (Mintirho 6:7) Endzhaku ka malembenyana, vandlha leri ra ha ku vumbiwaka ri hundzuke nhlengeletano ya matiko-nkulu hinkwawo hi ku va ni Vakreste eAfrika, Asia na Yuropa.

Namuntlha vandlha ra Vukreste hi ku fanana ra andza swinene. Hi xikombiso, eMexico, nhlayo ya vahuweleri va Mfumo yi andze hi 130 000 ku ya ka 443 640 hi malembe ya ntlhanu ntsena! Hi 1995 munhu un’we eka vanhu va 59 eMexico u ve kona eXitsundzuxweni xa rifu ra Kreste loko xi tlangeriwa hi Timbhoni ta Yehovha. Kambe, ntshovelo wa moya etikweni rolero a wu hetiwanga, hi laha swi kombisiwaka ha kona hi ntokoto lowu landzelaka.—Matewu 9:37, 38.

Edorobeni rin’wana etikweni ra Chiapas, a ku ri hava ni un’we la amukeleke dyondzo ya le kaya ya Bibele ni Timbhoni ta Yehovha, hambi ku ri endzhaku ko chumayela mahungu lamanene ku ringana malembe ya 20 endhawini yoleyo. Entiyisweni vanhu vo tala va le dorobeni rolero a va chavisiwe hi wanuna loyi a a dume hi ku va ni madzolonga. A va chava leswi a a ta va endla swona loko o kuma leswaku va dyondza Bibele ni Timbhoni.

Timbhoni timbirhi leti nga ni xivindzi leti rhurheleke endhawini yoleyo ti kunguhate ku hlasela xiphiqo hi ku ya eka wanuna loyi a a soriwa. Loko va fika ekaya ra yena, nsati wa yena u pfule nyangwa a yingiserisisa rungula ra vona. A a swi tsakela swinene leswi Bibele yi swi vulaka mayelana ni ku hanya emisaveni ya paradeyisi. Kambe u vule leswaku nuna wakwe a a ta n’wi tikisela swilo loko o dyondza Bibele. Timbhoni ti n’wi hlamusele leswaku handle ka loko o kambisisa leswi Bibele yi swi vulaka, a nge yi tivi ndlela yo tirhela Xikwembu ni ku tsakela vutomi emisaveni hi laha ku nga heriki. U amukele dyondzo ya Bibele.

Hi laha a swi languteriwe ha kona, nuna wakwe a nga xi tsakelanga xiboho xa yena. U n’wi alele ku tirhisa movha wakwe leswaku a ya hi wona eminhlanganweni ya Vukreste hambi leswi a a pfumeleriwa ku wu tirhisela mintirho yin’wana. Ku nga khathariseki nkaneto wa yena, a a hamba a ya eHolweni ya Mfumo ya Timbhoni ta Yehovha ya le kusuhi, leyi a yi ri ekule hi khume ra tikhilomitara. Hi ku hatlisa van’wana edorobeni va xiye xivindzi xa yena ni ku tiyimisela ka yena. Vanhu va sungula ku yingisela loko Timbhoni ti va endzela emakaya ya vona. Van’wana va sungule ku famba ni wansati loyi eminhlanganweni. Endzhaku ka nkarhinyana, Timbhoni a ti fambisa kwalomu ka 20 wa tidyondzo ta Bibele edorebeni rolero!

Munghana wa wansati loyi na yena u kunguhate ku dyondza Bibele ku nga khathariseki nkaneto wa nuna wakwe. Lexi hlamarisaka, u khutaziwe ku dyondza hi nuna wa wansati lowo sungula. Endzhaku ka loko nuna luya a vulavule ni nuna wa wansati loyi nkaneto wu herile. Kutani endzhaku ka malembe ya 20 mbewu ya ntiyiso wa Bibele eku heteleleni yi byalekile, leswi endleke leswaku vanhu vo tlula 15 va dyondza Bibele naswona va va kona eminhlanganweni ya Vukreste, ku katsa ni vavasati lava vambirhi, lava sweswi va huwelelaka mahungu lamanene.