Ku Tiyimisela Ku Tirhela Yehovha!

“U NGE fambi u chumayela!” “U nga rhambi vapfumeri-kuloni va ta laha!” Vavasati vo tala va Vakreste va twa marito lawa ni lama fanaka na wona, ma huma eka vanuna va vona lava va kanetaka. Kambe loko vavanuna lava va ri swirho swa mavuthu ya nyimpi, vasati va vona va langutana ni ntlhontlho lowukulu eripfumelweni ra vona. (Esaya 2:4; Yohane 17:16) Kutani xana va swi kotisa ku yini vavasati lava va Vakreste ku hambeta va tiyile emoyeni ni ku chivirika entirhweni wa Mfumo?

Ku tshembeka ka vona eka Yehovha Xikwembu ku katsa ni ku tiyimisela ka vona swi va pfuna ku tiyisela. Yvonne, nsati wa socha, u ri: “Ndzi ehleketa leswaku a ku ri ku tiyimisela ka mina hi ku helela. A ndzi swi tiva leswaku ku fanele ku ri ni tindlela to tala to hlangavetana ni nkaneto wa nuna wa mina.” Hakunene a ti ri kona.

Wansati un’wana wa Mukreste la tekaneke ni murhangeri wa mavuthu u hlamusela ndlela leyi ku tiyimisela ka yena ku olovisaka ni vutomi bya nuna wa yena ha yona. Wa hlamusela: “U tiva xiyimiso xa mina kahle ku fana ni xa yena, naswona ni masocha ma swi tlangela sweswo.” Hambi swi ri tano, ku ya emahlweni ka yena ni ntirho wa Yehovha a hi nchumu lowu olovaka.

Ku Hlula Xivundza

Vasati va masocha hakanyingi va langutana ni ntlhontlho wo tivisiwa ku sele nkarhinyana malunghana ni ku rhurha, loko va ta famba ni vanuna va vona eka ntirho wa le kule ni le kaya. Kutani loko va ri endhawini leyi va nga yi tolovelangiki, swa olova ku titwa va ri ni xivundza. Kambe a swi fanelanga swi va tano. Lava va tirhelaka Yehovha va le ka xiyimo xo antswa. Xana hi xihi? Hi ku ya hi Petro muapostola wa Vukreste, xiyimo lexi i ‘nhlengeletano ya vamakwerhu va misava hinkwayo.’ Timbhoni ta Yehovha, leti sweswi ti hlayiwaka hi timiliyoni eka matiko ya 231 ti endla swilo tanihi ndyangu wun’we lowukulu wa Vakreste, ku nga ‘vamakwerhu.’ U va kuma hinkwako-nkwako.—1 Petro 2:17.

Susan, loyi a rhurheke eka vona hi xihatla u ye a ya tshama egovelweni ra masocha ya le moyeni laha nuna wa yena a a averiwe ku ya tirha kona. Hambi leswi a ha ku va mupfumeri ni leswi a sindzisiwa hi nuna wa yena loyi a a nga ri mupfumeri leswaku a tshika ku hlanganyela evutirhelini bya Vukreste, wa hlamusela: “Hi xihatla ndzi ye eka tidyondzo ta kwalaho, naswona ndzi tshame ehansi ndzi vulavula ni vamakwerhu va xisati. Ku vula ntiyiso ndzi nga vula leswaku i xinakulobye lexi lexi ndzi endleke leswaku ndzi hambeta ndzi ya emahlweni.”

Minkarhi yin’wana xivundza xi vanga ntshikilelo wa mianakanyo. Kambe mahungu lamanene ma nyika xikhutazo. Glenys makwerhu wa xisati wa le Nghilandhi loyi a fambeke na nuna wakwe loko a ya eku tirheni entsungeni wa malwandle u ri: “Loko ndzi ri entshikilelweni lowukulu wa mianakanyo, hi xitshuketa un’wana loyi ndzi tivaneke na yena malembe lama hundzeke loko ndza ha ri evuthwini u tsarile a ku wa ha ku khuvuriwa tanihi un’wana wa Timbhoni ta Yehovha. Sweswo swi ndzi nyike xikhutazo hi nkarhi lowu faneleke.”

Jane, loyi a fambeke ni nuna wa yena eKenya, u kume leswaku minhlangano ya Vukreste yi tikomba yi ri ya nkoka, hambi leswi a yi fambisiwa hi tindzimi leti a a nga ti twisisi. Wa hlamusela: “A ndzi swi tiva leswaku laha hi laha Yehovha a lavaka ndzi va kona. A ndzi ri ni vamakwerhu naswona a va ri xikhutazo hi tlhelo ra moya. Va ndzi amukerile, naswona ndzi titwe ndzi ri xiphemu xa ndyangu wa vona.”

Jane hi un’wana wa lavo tala lava eka swiyimo swo fana ni leswi va kumeke maxaka ya moya, lawa a a nga swi ehleketi nikatsongo leswaku u na wona!—Marka 10:29, 30.

Yima U Tiya eMahlweni Ka Nkaneto

Yesu u tsundzuxile a ku: “Mi nga anakanyi leswaku ndzi tile ku ta veka ku rhula emisaveni; ndzi tile ku ta veka fumu, ku nga ri ku rhula.” (Matewu 10:34) Xana a a vula yini? Hambi endyangwini, laha ku languteriwaka leswaku ku va ni ku rhula, ku nga ha “hoxiwa fumu swi nga languteriwanga,” ku vula A. T. Robertson eka Word Pictures in the New Testament. Yesu u te: “Vandyangu wa munhu va ta va valala va yena.” (Matewu 10:36) Marito lawa ma tikomba ma ri ya ntiyiso hakunene loko munghana wa vukati a venga ntiyiso!

Loko Diane a sungule ku dyondza Bibele ni Timbhoni ta Yehovha, nuna wa yena, la nga murhangeri wa vuthu ra le moyeni, swi n’wi nyangatsile. Xana vukati bya vona byi khumbeke hi ndlela yihi? Diane wa hlamusela: “A swi fana ni rihlampfu exikarhi ka hina. A hi ri mpatswa lowu tsakeke. Swi lo na swipfuketana se hi hundzuka vanhu lava ngo tshama endlwini yin’we ntsena.” Kutani xana u swi kotise ku yini ku langutana ni xiyimo lexi? “Ku tinyiketela ni ku tiyimisela hi swona a swi laveka, ku katsa ni mpfuno wa Yehovha wa moya wakwe.” Diane u nghenise xikombiso xa le Bibeleni xa muprofeta Daniyele embilwini yakwe.

Loko a ri evuhlongeni eBabilona kutani a nyikiwa swakudya leswi nga amukelekiki eka nandza wa Xikwembu, Daniyele u “[endle] makungu e mbilwini ya yena leŝaku a nga ka a nga tinyamisi hi ŝakudya le’ŝo šawula ŝa hosi.” Ina, Daniyele u endle xiboho lexi humaka eripfalweni. U bohe embilwini ya yena ku ka a nga tithyakisi hi ku dya swakudya sweswo. Vona vurhena lebyi a byi kombiseke endzhaku loko “a kombela e ka nḍuna ya v̌aṭheniwa leŝaku a nga bohiwi e ku tinyamisa”! Xana ku ve ni vuyelo byihi? Yehovha u n’wi katekisile hi ku tiyimisela ka yena.—Daniyele 1:8, 9, 17.

Hi laha ku fanaka namuntlha, wanuna loyi a kanetaka a nga sindzisa leswaku nsati wakwe a tshika ku ya eminhlanganweni ya vandlha. Xana u fanele a endla yini? Jane u tikume a ri eka xiyimo xo fana ni lexi. Wa hlamusela: “A ndzi nga ntlhentlhi loko ndzi ri entshikilelweni. A ndzi swi tiva leswaku ku landzula a swi fanelanga. A ndzi fanele ku kombisa nkoka wa minhlangano eka mina.” Yehovha u katekise ku tiyimisela kakwe tanihi leswi a a hambeta a va kona eminhlaganweni.

Glenys u ri: “Nuna wa mina a a ringeta ku ndzi sivela ku ya etidyondzweni kambe sweswo a swi tekanga nkarhi wo leha. Ndzi hambete ndzi ya. Nkarhi wun’wana loko ndzi vuya ekaya a a ndzi ba, naswona minkarhi yin’wana a a nga ndzi hlamuli.” Kambe u hlangavetane ni xiphiqo lexi, a khongela hi ku phikelela. Nakambe, vakulu vambirhi va le vandlheni a a va khongela na yena minkarhi yo tala, leswi swi n’wi khutaze swinene ku hambeta a ya etidyondzweni.—Yakobo 5:13-15; 1 Petro 2:23.

Varhangeri-nkulu va wanuna entirhweni wa vusocha minkarhi yin’wana va nga n’wi sindzisa leswaku a tshikisa nsati wakwe ku chumayela mahungu lamenene. Diane u swi kume swi n’wi boha leswaku a byela nuna wakwe erivaleni leswaku i yini leswi a swi rhangisaka emahlweni. U te: “A ndzi swi lulamerile ku langutana ni vuyelo bya ku hambeta ka mina ndzi chumayela.” Vona ku tiyimisela loku fanaka ni ka vaapostola! (Mintirho 4:29, 31) Hambi swi ri tano, a a ri ni vuxiya-xiya eku chumayeleni ka yena. U ri: “A ndzi endla swinkhubyana hi nwa kofi kutani ndzi fambisela un’wana na un’wana la nga kona nyiko ya buku leyi nge Ntiyiso.”—Matewu 10:16; 24:14.

Ku Titsongahata Handle Ko Hundzuka

Vavasati va Vakreste va languta eka vumundzuku naswona va titshega hi Yehovha hambi leswi va karhetekaka hi swiphiqo swa vukati. Leswi swi va pfuna ku hlayisa langutelo lerinene. Va sekela vanuna va vona hi laha va kotaka ha kona, handle ko landzula ripfumelo ra vona. Hi ndlela leyi va landzela xitsundzuxo xa Petro lexi huhuteriweke lexi nge: “N’wina, vavasati lava tekiweke: Titsongahateni eka vanuna va n’wina.” (1 Petro 3:1) Eka The Amplified New Testament ndzayo leyi ya muapostola yi ri: “Titsongahateni tanihi malandza eka vona, naswona mi titshega ha vona, mi endla leswi va mi byelaka swona.” Xiya leswaku Jane u yi landzele njhani ndzayo leyi. Wa hlamusela: “Nuna wa mina u ndzi byele leswaku leswi ndzi lavaka ku swi endla swi nga lwisani ni ntirho-vutomi wa yena. Kutani ndzi ringete ku kuma tindlela to n’wi pfuna.”

Hi xikombiso vavasati van’wana va Vakreste va pfumerile ku ya eswinkhubyanini leswi vanuna va vona va rhambiweke eka swona. Kambe va ha tiyimisele ku ka va nga ri landzuli ripfumelo ra vona. Jane u kume nkarhi wo vulavula ni nuna wa yena hi leswi. Hi ku titsongahata u hlamusele leswaku wa swi tsakela ku ya, kambe a nga lavi leswaku ku va kona ka yena ku khomisa nuna wakwe tingana. “A ndzi swi tiva leswaku hinkwavo lava nga kona hi ntolovelo va languteriwe ku yima va teka xiphemu eku tlangeleni ka xiendlakalo xa kunwa byalwa. Ndzi dyondze leswaku loyi a faneleke ku xiximiwa i Yehovha ntsena, kutani ku tlangela xiendlakalo xa ku nwa byalwa a hi ku kombisa xichavo nikatsongo. Nuna wa mina u swi xiyile leswaku xiyimo a xi ta tika, kutani a ku: ‘U nga ti!’ Kutani a ndzi yanga.”

Glenys yena u helekete nuna wa yena eka xinkhubyana xo tano, kambe a a langute varhangeri le mahlweni ka tafula. Loko a va vona va lava ku yima va tlangela xinkhubyana xo nwa byalwa, u suke hi vutlharhi a ya exihambukelweni! Ee, vavasati lava va titsongahatile, kambe a va kalanga va byi landzula vupfumeri bya vona.

‘Ku Kokiwa Handle Ka Rito’

Yvonne u te: “Loko ndzi antswisa vuswikoti bya mina tanihi wansati, nuna wa mina u ta swi vona leswaku ntiyiso wa ndzi cinca.” Kutani u hlaye a tlhela a hlayisisa ndzima leyi nge “Wansati Loyi A Rhandziwaka Swinene,” leyi nga ebukwini leyi nge Vutomi Bya Dyangu.a “Ndzi yise nyingiso lowukulu eka rungula leri nga le hansi ka xihlokwana lexi nge ‘Lava Rilaka, Lava Titshandzaka’! Kambe ndzi kume leswaku loko ndzi endla matshalatshala yo vulavula ni nuna wa mina, timhaka a ti nyanya ku biha.” Hambi swi ri tano, emakumu u humelerile eku pfuneni ka nuna wa yena ku va la tirhelaka Yehovha. Njhani? Hi ku tirhisa nsiya wa nawu lowu andlariweke eka 1 Petro 3:1, lowu nge vavanuna ‘va nga kokiwa handle ka rito.’

Ndlela leyi vavasati va Vakreste va khathalelaka mindyangu ya vona ha yona yi pfuna swinene ku endla leswaku van’wana va tlangela Vukreste. Diane u ri: “Ndzi ringete hi matimba ku endla leswaku ntiyiso wu va lowu kokaka hi laha swi nga kotekaka ha kona. Loko ndzi ye etidyondzweni nuna wa mina a a titwa a lahliwile, kutani ndzi tikarhatele ku dyondzisa vana leswaku va tikhoma kahle loko hi fika ekaya. Nakambe ndzi ringete ku n’wi nyika nyingiso lowu engetelekeke loko hi vuyile.” Hi ku famba ka nkarhi nuna wa yena u ve la cincaka langutela ra yena tanihi leswi a a amukela nyingiso lowukulu wa ndyangu wa yena.

Malandza-kulobye ya Yehovha na wona ma nga pfuna. Jane u hlamusela leswaku nuna wa yena a a tsakela ku va ni varhumiwa va Timbhoni lava a hlanganeke na vona le Kenya. “Va endle xinghana na yena naswona va vulavula na yena hi bolo ya milenge naswona a va ri ni malwandla swinene. Minkarhi yo tala hi rhamberiwe eswakudyeni emakaya ya varhumiwa yo hambana-hambana.” Endzhaku nuna wa yena u hlamuserile a ku: “Ndzi sungule ku xiya ripfumelo ra Jane hi laha ku hambaneke. Vanghana va yena a va ri vanhu vo tlhariha swinene lava kotaka ku vulavula hi timhaka to hambana-hambana.” Hi laha ku fanaka nuna wa Diane u cince langutelo ra yena hi ntiyiso. Loko movha lowu a a famba ha wona wu onhakile, Mbhoni leyitsongo yi te yi ta n’wi pfuna. U te: “Sweswo swi ndzi tsakisile hakunene.”

Kavula, a hi hinkwavo vanghana va vukati lava va kokiwaka va ta entiyisweni. Kutani xana ku nga endliwa yini? Yehovha u nyikela mpfuno ku endlela leswaku lava pfumelaka va tiyisela. (1 Vakorinto 10:13) Xiya xikhutazo xa Glenys xa lava nga le ka swiyimo leswi fanaka ni swa yena: “U nga tshuki u kanakana ni siku ni rin’we leswaku Yehovha hi Yena la sunguleke vukati naswona u lava leswaku mimpatswa yi tshama swin’we. Kutani ku nga khathariseki leswi nuna wa wena a nga swi endlaka, hambi ku ri nkaneto lowu lava u tshamaka na vona va nga wu tisaka eka wena, Yehovha a nga ka a nga pfumeli leswaku u tsekatseka.” Hambi leswi nuna wa yena a nga siki vaka mugandzeri wa Yehovha, langutelo ra nsati wakwe eka yena ni ntiyiso ra antswa.

‘Byala Hi Ku Rila; Tshovela Hi Ntsako’

Hakunene vavasati lava va Vakreste va tiyimiserile ku tirhela Yehovha. Loko u ri eka xiyimo lexi fanaka tiyimisele ku endla leswi fanaka. Tsundzuka xikhutazo lexi nge: “U ta tšhav̌a Yehova, Šikwembu ša wena, u ši tirela, u namarela šona, u v̌a u hlambanya hi v̌ito ra šona.”—Deteronoma 10:20.

Mupisalema u ri: “V̌a famba v̌a ri kari v̌a rila loko v̌a hlwanya mbewu, v̌a v̌uya v̌a yimbelela tinsimu loko v̌a rwala tinyanḍa ta v̌ona.” (Pisalema 126:6) Mbhoni yin’wana yi ri: “U tengatenga mihloti yo tala loko u ringeta ku komba munghana wa wena ntiyiso u miyerile kumbe hi ku vulavula. Kambe emakumu u khana hi ntsako hikuva hambi loko a nga amukeli ntiyiso, Yehovha wa ku katekisa hikwalaho ka matshalatshala lawa u ma endlaka.”

Hinkwavo lava hi ku tshembeka va tirhelaka Yehovha ku nga khathariseki nkaneto ekaya va tlangeriwa swinene. Va fanele ku seketeriwa ni ku rhandziwa. Onge va nga hlayisa xiyimo xa vona lexi nga hundzukiki, va tiyimisela ku tirhela Yehovha!

[Nhlamuselo ya le hansi]

[Xifaniso lexi nga eka tluka 28]

Dyondzo ya xikhongelo yi tiyisa ku tiyimisela ka Mukreste