Ku Tiyimisela Ku Landzela Ndlela Ya Xikwembu Ya Ku Hanya
Mintsombano ya “Ku Hanya Hi Ndlela Ya Xikwembu” a yi ri ni swo tala swo avela lava va lavaka ku tirhela Xikwembu! Mupfhumba un’wana u hlamusele ntsombano lowu tanihi “nkarhi wo hlamarisa wa ku leteriwa, ku khutaziwa ni ku xalamukisiwa.”
MUPFHUMBA un’wana u vule leswaku “a ku ri ni swo tala swo swi tsakela, swo anakanyisisa hi swona ni swa ku swi nghenisa emianakanyweni.” Sweswi a hi kambisiseni nongonoko hi woxe.
Yesu Kreste—Ndlela, Ntiyiso Ni Vutomi
Lexi a ku ri xihloko xa siku ro sungula ra ntsombano. (Yohane 14:6) Nkulumo yo sungula yi hlamusele xikongomelo xa ku hlengeletana ka hina entsombanweni: ku nga ku dyondzisiwa hilaha ku engetelekeke hi ndlela leyinene ya vutomi eka hinkwato leti nga kona, ndlela ya Xikwembu ya ku hanya. Yehovha u dyondzisa vanhu vakwe ndlela leyi va nga fambaka ha yona etindleleni takwe. Leswi u swi endla hi ku tirhisa Bibele, “hlonga ro tshembeka ni ro tlhariha” ni moya lowo kwetsima. (Matewu 24:45-47; Luka 4:1; 2 Timotiya 3:16) I lunghelo ronghasi ku dyondzisiwa hi Hosi ya vuako hinkwabyo!
Hi ku fambisana ni xihloko xa siku leri, nkulumo-nkulu a yi ku “Nkutsulo Wa Kreste—Ndlela Ya Xikwembu Ya Ku Ponisa.” Leswaku hi pfumelelana ni ndlela ya Xikwembu ya ku hanya, i swa nkoka ku xiya leswi Yesu Kreste a swi endlaka exikongomelweni xa Yehovha. Xivulavuri xi te: “Handle ka gandzelo ra nkutsulo ra Yesu Kreste, ku hava munhu ni un’we, loyi a a ta nyikiwa vutomi lebyi nga heriki hi Xikwembu, ku nga khathariseki vupfumeri kumbe mintirho yakwe.” Hiloko xi tshaha Yohane 3:16, leyi nge: “Xikwembu xi rhandze misava swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.” Ku kombisa ripfumelo egandzelweni ra nkutsulo ra Kreste swi lava leswaku hi kuma vutivi lebyi kongomeke bya ntiyiso. Nakambe swi katsa ku nyiketela vutomi bya hina eka Yehovha, hi swi kombisa hi ku khuvuriwa ematini naswona hi hanya hi ku pfumelelana ni xikombiso lexi Yesu Kreste a xi vekeke.—1 Petro 2:21.
Xiyimiso xa nindzhenga xi sungule hi nkulumo leyi nga ni xihloko lexi nge “Ndlela Ya Rirhandzu A Yi Heli.” Nkulumo leyi yi katse ku hlamuseriwa ka ndzimana hi ndzimana ka nhlamuselo ya Pawulo ya rirhandzu, leyi kumekaka eka 1 Vakorinto 13:4-8. Vayingiseri va tsundzuxiwe leswaku rirhandzu ra ku tinyikela i mfungho wa Vukreste, ni leswaku ku rhandza Xikwembu ni muakelani i swikombiso swa nkoka swa vugandzeri lebyi amukeriwaka hi Yehovha.
Ku landzele nxaxamelo wa swiyenge swinharhu, lowu nga ni nhloko-mhaka leyi nge “Vatswari—Dyondzisani Vana Va N’wina Ndlela Ya Xikwembu.” Vatswari va nga pfuna vana va vona leswaku va tirhela Xikwembu hi ku veka xikombiso lexinene eku hlayeni ni le ku dyondzeni ka Rito ra xona. Va nga dyondzisa vana va vona ntiyiso hi dyondzo ya ndyangu ya nkarhi na nkarhi, va yi twananisa ni swilaveko swa ndyangu. Nakambe i swa nkoka ku pfuna vana leswaku va katseka emintirhweni ya vandlha ni ntirho wa nsimu. Hambileswi ku kurisa vana lava chavaka Xikwembu emisaveni leyi yo homboloka swi nga oloviki, ku endla tano swa vuyerisa swinene.
Nxaxamelo lowu wu landzeriwe hi nkulumo leyi nge “Pfumelela Yehovha A Ku Vumbela Ku Endla Ntirho Lowu Fundzhekaka.” Tanihi laha muvumbi a vumbaka xibya xa vumba hakona, xisweswo Xikwembu xi vumba lava va lavaka ku xi tirhela. (Varhoma 9:20, 21) Xi endla tano hi ku nyikela ndzayo eRitweni ra xona ni hi ku tirhisa nhlengeletano ya xona. Yehovha u ta hi pfuna leswaku hi tirhisa vuswikoti bya hina hilaha ku heleleke loko hi tiendla lava kumekaka, hi amukela malunghelo naswona hi swi navela leswaku a kongomisa magoza ya hina.
Ku landzele xiphemu lexi tsakisaka xa nongonoko—“Ku Tirha eNsin’wini Ya Vurhumiwa.” Ku ni vatirheli va Vakreste va 2 390, lava sweswi va tirhaka emisaveni hinkwayo ematikweni ya 148 va ri varhumiwa. Va veka xikombiso lexinene xa vutshembeki ni ku hiseka naswona va ri tlangela swinene lunghelo ra vona ra ku tirha emasin’wini mambe. Eka xiyenge lexi xa nongonoko emintsombanweni ya matiko hinkwawo, varhumiwa va vulavule hi swilo leswi va tikelaka ni leswi va tsakisaka evuton’wini bya vurhumiwa.
Nkulumo yo hetelela esikwini ro sungula a yi ri ni nhloko-mhaka leyi nge “Xana Ku Ni Vutomi Endzhaku Ka Rifu?” Xivutiso lexi xi pfilunganye vanhu hi magidi ya malembe. Vanhu hi ku hambana-hambana ka vona va dodombisane ni nhloko-mhaka leyi. Ku na tinhlamulo to tala leti ku ehleketiwaka leswaku hi tona. Ti hambane ku fana ni mikhuva ni vukhongeri swa vanhu lava va taka na tona. Kambe, vanhu va fanele va dyondza ntiyiso.
Hikwalaho, xivulavuri xi tivise ku humesiwa ka broxara leyintshwa ya mivala-vala, ya matluka ya 32, leyi nge, Ku Humelela Yini Hi Hina Loko Hi Fa? Broxara leyi yi hlamusela laha dyondzo ya ku nga fi ka moya-xiviri yi sunguleke kona naswona yi komba ndlela leyi dyondzo leyi yi hundzukeke ya nkoka ha yona eka vukhongeri hinkwabyo bya misava namuntlha. Hi ndlela leyi nga erivaleni ni leyi enerisaka, yi kambisisa leswi Bibele yi swi vulaka mayelana ni moya-xiviri, ha yini hi fa ni leswi humelelaka hi hina loko hi file. Broxara leyi yi tlhela yi hlamusela ntshembo lowu nga kona malunghana ni lava feke ni lava hanyaka. Xibukwana lexi xi ta va nkateko wonghasi kun’wana ni kun’wana eka lava va lavaka ntiyiso!
Tshamani Mi Ri Karhi Mi Yi Languta Hi Vukheta Ndlela Leyi Mi Fambaka Ha Yona
Mawaku xihloko lexi fanelekaka swonghasi xa siku ra vumbirhi ra ntsombano! (Vaefesa 5:15) Xiyimiso xa nimixo xi nyikele nyingiso entirhweni wa ku chumayela ni ku endla vanhu vadyondzisiwa. Endzhaku ka nhlamuselo ya ndzimana ya siku ni siku, nongonoko wu ye emahlweni hi nkulumo leyi nge “Ku Pfuna Vanhu Leswaku Va Nghena eNdleleni Ya Vutomi.” Leswaku hi endla ntirho lowu wa xihatla, i swa nkoka ku va ni vonelo lerinene, hi swi xiya leswaku ku avelana ntiyiso ni van’wana i lunghelo ni vutihlamuleri. Eka lembe-xidzana ro sungula C.E., vanhu vo tala va ale Rito ra Xikwembu. Hambiswiritano, ku nga khathariseki ku kanetiwa, a ku ri ni “lava a va ri ni mboyamelo lowunene eka vutomi lebyi nga heriki [kutani] va ve vapfumeri.” (Mintirho 13:48, 50; 14:1-5) Xiyimo xa fana ni namuntlha. Hambileswi vo tala va alaka ntiyiso wa Bibele, hi ya emahlweni hi lavisisa lava va nga ta wu amukela kahle.—Matewu 10:11-13.
Nkulumo leyi landzelaka yi vulavule hi mintlhontlho ya ku fikelela van’wana hi rungula ra vutomi. Tanihi leswi sweswi swi tikaka ku kuma vanhu emakaya, hi fanele hi va ni vukheta ni vuxiyaxiya loko hi lava ku fikelela vanhu vo tala hilaha hi nga swi kotaka hakona hi rungula ra Mfumo. Ematikweni yo tala, vahuweleri va mahungu lamanene va va ni vuyelo lebyinene hi ku nyikela vumbhoni hi riqingho ni hi ku chumayela etindhawini ta mabindzu, xisweswo va fikelela lava swi tikaka ku vulavurisana na vona hi tindlela tin’wana.
Nkulumo leyi nge “Ku Dyondzisa Vadyondzisiwa Hinkwaswo Leswi Kreste A Swi Leriseke” yi nyikele nyingiso eka nkoka wa ku va ni vutshila evutirhelini bya hina. Vutshila bya hina bya ku dyondzisa bya kula loko hi ri karhi hi dyondza eka van’wana naswona hi tirhisa dyondzo leyinene leyi hi yi kumaka eminhlanganweni ya vandlha. Loko hi ri karhi hi va ni vutshila eku dyondziseni ka hina, hi kuma ntsako lowu engetelekeke ni ku eneriseka entirhweni wa hina wa ku pfuna vanhu leswaku va dyondza ntiyiso wa Bibele.
Xiyenge xa nimixo xi hetelele hi nkulumo leyi hlamuselaka leswi ku tinyiketela ni nkhuvulo swi vulaka swona. Yin’wana ya tinhla leti nga vuriwa hi xivulavuri a ku ri leswaku loko hi tshemba Xikwembu hilaha ku heleleke naswona hi lwa hi matimba hi endla ku rhandza ka xona, xi ta hi katekisa ni ku hi seketela. Wanuna wa vutlhari u tsarile a ku: ‘U nghenisa Xikwembu emakungwini ya wena hinkwawo, kutani xona xi ta lulamisa tindlela ta wena.’ (Swivuriso 3:6) Nkhuvulo lowu tsakisaka hi woxe, a wu ri mhaka yo hlawuleka ya ntsombano, wu kombisa leswaku vo tala va sungule ku tinyiketela ku hanya hi ndlela ya Xikwembu.
Endzhaku ka nkarhi wa swakudya swa ninhlikanhi, xiyimiso xa nindzhenga xi sungule hi nkulumo leyi nge, “Ku Tirha Hi Ri Ni Xikongomelo Xa Vutomi Lebyi Nga Heriki.” Xikongomelo xa Xikwembu xa ku va vanhu lava yingisaka va xi tirhela hilaha ku nga heriki emisaveni xi ta hetiseka. Hikwalaho, swi fanerile swonghasi ku kongomisa mianakanyo, makungu ni mintshembo ya hina eku tirheleni Yehovha hilaha ku nga heriki! Loko hi lava ku tshama hi anakanya hi “siku ra Yehovha,” i swa nkoka ku tsundzuka leswaku pakani ya hina i ku n’wi tirhela hilaha ku nga heriki. (2 Petro 3:12) Ku va hi nga wu tivi hi ku kongoma nkarhi lowu Yesu a nga ta hetisisa ku tirihisela ka Xikwembu, swi hi pfuna leswaku hi tshama hi xalamukile naswona siku ni siku swi hi nyika minkarhi ya ku kombisa leswaku ku tirhela ka hina Yehovha a ku susumetiwi hi vutianakanyi.
Tinkulumo timbirhi leti nga landzela ti kambisise ndzima ya vumune ya papila ra Pawulo leri a ri tsaleleke Vaefesa. Eka swin’wana leswi kambisisiweke a ku ri nkateko lowu hi nga na wona wa “tinyiko leti nga vanhu,” vavanuna va moya lava fanelekaka, lava va hlawuriweke hi moya wo kwetsima. Vakulu lava va nyikela ndzayo ni nkongomiso leswaku hi pfuneka hi tlhelo ra moya. Papila ra Pawulo leri huhuteriweke ri tlhela ri khutaza Vakreste leswaku va “ambala vumunhu lebyintshwa.” (Vaefesa 4:8, 24) Vumunhu lebyi kombisaka ku chava Xikwembu byi katsa timfanelo to fana ni tintswalo, musa, mianakanyo yo titsongahata, ku rhula, ku va ni mbilu yo leha ni rirhandzu.—Vakolosa 3:12-14.
Ku xiyisisa swinene ndlela leyi hi fambaka hi yona swi katsa ku tihlayisa hi nga ri na xivati xa misava—ku nga nhloko-mhaka ya nkulumo leyi landzeleke. Ku laveka ku ringanisela loko hi hlawula vuhungasi, swinkhubyana ni ku lava swilo leswi vonakaka. Loko hi tirhisa ndzayo leyi kumekaka eka Yakobo 1:27 ya leswaku hi tihlayisa hi nga ri na xivati xa misava, hi ta va vanhu lava baseke emahlweni ka Xikwembu ni ku va ni ripfalo lerinene. Nakambe hi nga hanya vutomi lebyi nga ni xikongomelo kutani hi ta katekisiwa hi ku va ni ku rhula, ku humelela hi tlhelo ra moya ni vanghana lavanene.
Hiloko ku landzela nxaxamelo wa swiyenge swinharhu, lowu a wu ri ni nhloko-mhaka leyi nge “Vantshwa—Landzelani Ndlela Ya Xikwembu.” Hi ku tiva leswaku Xikwembu xa va rhandza ni leswaku xi tlangela matshalatshala ya vona ya ku seketela vugandzeri lebyi tengeke, vantshwa va fanele va letela matimba ya vona ya ku anakanya leswaku va xi tirhela hi vutshembeki. Ndlela yin’wana ya ku kurisa matimba ya ku anakanya i ku hlaya Rito ra Xikwembu siku ni siku ni ku anakanya hi rona. Loko hi endla tano, hi ta kota ku tiva tindlela ta Yehovha. (Pisalema 119:9-11) Matimba ya ku anakanya nakambe ma kurisiwa hi ku amukela ndzayo leyinene leyi humaka eka vatswari, vakulu ni tibuku ta Sosayiti. Hi ku tirhisa matimba ya vona ya ku anakanya hi ndlela leyinene, vantshwa va lwisana ni mboyamelo wa ku hlongorisa swilo leswi vonakaka, mabulo lama nga basangiki ni vuhungasi lebyi hundzeletiweke, lebyi tolovelekeke emisaveni leyi fularheleke Xikwembu. Hi ku landzela ndlela ya Xikwembu ya ku hanya, vanhu lavantshwa ni lavakulu va nga humelela hi ndlela ya xiviri.
Nkulumo ya makumu ya siku a yi ku “Mutumbuluxi—Vumunhu Byakwe Ni Tindlela Takwe.” Endzhaku ko kombisa leswaku vanhu va magidi ya timiliyoni a va n’wi tivi Mutumbuluxi, xivulavuri xi te: “Xikongomelo xa xiviri evuton’wini xi fambisana ni ku tiva Mutumbuluxi, Xikwembu xa hina xa xiviri; ku xixima vumunhu bya xona; ni ku famba hi tindlela ta xona. . . . Emisaveni ya hina ni le ka hina ku ni swilo leswi u nga swi tirhisaka ku pfuna vanhu leswaku va amukela Mutumbuluxi ni ku kuma nhlamuselo malunghana na yena.” Hiloko xivulavuri xi vulavula hi vumbhoni lebyi kombisaka leswaku Mutumbuluxi la nga ni vutlhari ni rirhandzu u kona. Nkulumo yoleyo yi chapute hi ku humesiwa ka buku leyintshwa—Is There a Creator Who Cares About You?
“Ndlela Hi Leyi. Fambani Hi Yona”
Lexi a ku ri xihloko xa siku ra vunharhu ra ntsombano. (Esaya 30:21) Nongonoko wu sungule hi nxanxamelo lowu tsakisaka wa tinkulumo tinharhu, leti yiseke nyingiso eka xivono xa Ezekiyele xa tempele. Xivono lexi xi ni nhlamuselo leyikulu eka vanhu va Xikwembu namuntlha, hikuva xi yelana ni vugandzeri bya ntiyiso enkarhini wa hina. Xilotlelo xo twisisa xivono lexi, hi lexi: Tempele leyikulu ya moya ya Yehovha yi yimela lunghiselelo rakwe ra vugandzeri lebyi tengeke. Loko swivumbeko swa xivono lexi swi ri karhi swi hlamuseriwa, vayingiseri va anakanye hi ntirho wa vona wo seketela valanguteri lava nga ni rirhandzu va ntlawa wa masalela lama totiweke ni lava va nga ta va swirho swa ntlawa wa tihosi.
Endzhakunyana nimixo, a ku ri ni drama ya Bibele yo saseka leyi a yi tlangiwa hi vatlangi lava ambaleke swiambalo swa kona. Drama a yi ri ni nhloko-mhaka leyi nge “Mindyangu—Endlani Ku Hlaya Ka Bibele Ka Siku Ni Siku Ku Va Ndlela Ya N’wina Ya Vutomi!” Yi kombise ripfumelo ni xivindzi xa Vaheveru vanharhu lava va aleke ku nkhinsamela xifaniso xa nsuku lexi Hosi Nebukadnetsara wa Babilona a a xi yimisile. Xikongomelo xa drama leyi a ku ri ku kombisa leswaku Bibele a hi buku ntsena ya matimu ya khale, kambe ndzayo ya yona ya vuyerisa hakunene eka vanhu lavantshwa ni lavakulu namuntlha.
Xiyenge xa nindzhenga a ku ri nkarhi wa nkulumo ya le rivaleni leyi nge “Ndlela Yin’we Ntsena Yo Ya eVuton’wini Lebyi Nga Heriki.” Endzhaku ko hlamusela matimu ya ku wela ka vanhu exidyohweni ni rifu, xivulavuri xi gimete hi marito lama tlhontlhaka mianakanyo: “Nhloko-mhaka ya Bibele ya siku leri ra ntsombano ku ve Esaya ndzima 30, ndzimana 21, leyi nge: ‘Tindlev̌e ta wena ti ta twa rito e nḍaku ka wena, ri ku: Ndlela hi leyi, fambani ha yona, mi nga yi hi ra šinene, kumbe hi ra šimaṭi!’ Xana rito leri hi ri twisa ku yini? Hi ri twa hi ku yingisa Rito ra Xikwembu, Bibele yo Kwetsima, ni hi ku landzela vukongomisi lebyi Muleteri wa hina Lonkulu, Yehovha Xikwembu, a byi nyikelaka ha rona ni hi nhlengeletano yakwe ya Vukreste ya manguva lawa. Kunene, ku endla leswi, hi yona ndlela ntsena leyi yisaka evuton’wini lebyi nga heriki.”
Endzhaku ka nkatsakanyo wa xihloko xa dyondzo ya Xihondzo xo Rindza xa vhiki rero, ku landzele nkulumo ya makumu, leyi nge, “Hambetani Mi Famba Hi Ndlela Ya Yehovha.” Hi ku komisa, yi pfuxete tinhla-nkulu ta nongonoko. Hiloko xivulavuri xi nyikela xiboho lexi kombisaka ku tiyimisela ku ya emahlweni hi hanya hi ndlela ya Xikwembu.
Xiboho lexi xi pfale hi marito lawa ma nyanyulaka: “Ha tiyiseka leswaku ku hanya hi misinya ya milawu ni xitsundzuxo xa Matsalwa, i ndlela leyinene ngopfu ya ku hanya namuntlha naswona i xisekelo lexinene xa vumundzuku, leswaku hi khomelela swinene eka vutomi bya xiviri. Ku tlula sweswo hinkwaswo, hi endla xiboho lexi hi leswi hi rhandzaka Yehovha Xikwembu hi timbilu ta hina hinkwato, mimoya-xiviri ya hina hinkwayo, mianakanyo ya hina hinkwayo ni matimba ya hina hinkwawo!” Hinkwavo lava a va ri kona va tiyisekise ku pfumelelana ka vona hi ku phindha-phindha va ku, ina!
[Bokisi/Xifaniso lexi nga eka tluka 8]
Is There a Creator Who Cares About You?
Buku leyintshwa leyi nga ni xihloko lexi, yi nyika vumbhoni lebyi khorwisaka bya ku va kona ka Mutumbuluxi, Yehovha, naswona yi hlamusela timfanelo takwe. Yi lunghiseleriwe ngopfu-ngopfu vanhu lava dyondzekeke eka swilo swa misava kambe va nga pfumeli eka Xikwembu. Buku leyi ya matluka ya 192 yi ta tlhela yi tiyisa ripfumelo ra vanhu lava ana se va pfumelaka eka Xikwembu, yi va pfuna ku tlangela vumunhu ni tindlela ta xona.
Buku leyi nge Is There a Creator Who Cares About You? (Xana U Kona Mutumbuluxi La Khathalaka Hi Wena?) a yi sindzisi muhlayi leswaku a pfumela eka Xikwembu. Ematshan’weni ya sweswo, yi hlamusela ndlela leyi mintshubulo ya sweswinyana ya sayense ni tidyondzo swi tiyisaka vumbhoni bya ku va kona ka Mutumbuluxi ha yona. Eka tindzima ta yona ku ni leti nge, “I Yini Lexi Nga Endlaka Leswaku Vutomi Bya Wena Byi Va Ni Xikongomelo?” “Vuako Bya Hina Byi Tise Ku Yini?—Mphikamakaneta” ni leyi nge “U Wa Risima Hakunene!” Tindzima tin’wana ti hlamusela ndlela leyi hi nga tiyisekaka ha yona leswaku Bibele yi huhuteriwe hi Xikwembu. Buku leyi leyintshwa yi tlhela yi hlamusela ni mongo wa Bibele, lowu hlavutelaka vumunhu ni tindlela ta Mutumbuluxi. Buku leyi a yi hlamuseli ntsena leswaku ha yini Xikwembu xi pfumelele ku xaniseka konghasi kambe yi tlhela yi hlamusela ndlela leyi xi nga ta ku herisela makumu ha yona.
[Swifaniso leswi nga eka tluka 7]
Vo tala va khuvuriwile
[Swifaniso leswi nga eka tluka 7]
Broxara leyintshwa yi humesiwe hi A. D. Schroeder, xirho xa Huvo leyi Fumaka ya Timbhoni ta Yehovha
[Swifaniso leswi nga eka tluka 8, 9]
Drama leyi nyanyulaka yi khutaze ku hlaya Bibele siku ni siku