Va Endle Ku Rhandza Ka Yehovha

Pawulo U Hlula Maxangu

PAWULO u langutane ni xiyimo xo tika. Yena ni vanhu van’wana va 275 va khandziye xikepe lexi langutaneke ni xidzedze xa Yurakuloni—xidzedze xo kariha swinene eMediteraniya. Xidzedze lexi xi karihe ngopfu lerova dyambu a ri vonaki ninhlikanhi, hambi ku ri tinyeleti nivusiku. Swa twisiseka leswaku ha yini vakhandziyi va chava leswaku va ta fa. Kambe, Pawulo u va chavelela hi ku va byela leswi a hlavuteriweke swona hi Xikwembu enorhweni, a ku: “Ku hava moya-xiviri wa n’wina lowu nga ta lahleka, ku ta lahleka xikepe ntsena.”—Mintirho 27:14, 20-22.

Hi siku ra vu-14 ku sukela loko xidzedze lexi xi sungurile, vatluti va xiya swin’wana leswi hlamarisaka—mati ma ente tifatomo ta 20 ntsena.a Va nga si ya ekule, va pima nakambe. Sweswi, mati ma ente tifatomo ta 15. Va le kusuhi ni vugima-musi bya lwandle! Kambe mahungu lawa lamanene ma nga vula khombo lerikulu. Leswi xikepe xi yisiwaka hala ni hala nivusiku ematini lama nga entangiki, xi nga ha hima maribye ivi xi tshoveka. Hi vutlhari, vatluti va wisa tinsoma. Van’wana va vona va lava ku nembeleta xikwekwetsu, va xi khandziya leswaku va ringeta ku huma elwandle.b Kambe Pawulo wa va sivela. U byela ndhuna ya vuthu ni masocha a ku: “Loko vavanuna lava va nga tshami exikepeni, a mi nge poni.” Ndhuna yi yingisa Pawulo, kutani sweswi vakhandziyi hinkwavo va 276 va langutele ku vona vurhonga.—Mintirho 27:27-32.

Ku Tshoveka Ka Xikepe

Mixo lowu tlhandlamaka, vakhandziyi va xikepe va vona nsonga lowu nga ni ribuwa. Hikwalaho ko va ni ntshembo nakambe, vatluti va tsema tinsoma kutani va tlakusela tsanga ra le mahlweni ri langutana na mheho. Xikepe xi sungula ku kongoma eribuweni—handle ko kanakana va huwelela hi ntsako.—Mintirho 27:39, 40.

Hambiswiritano, hi xitshuketa xikepe xi baja endhundhumeni ya sava. Ku tlula kwalaho, magandlati lamakulu ma hima ncila wa xikepe ma wu tshovelela. Vakhandziyi hinkwavo va fanele va xika exikepeni! (Mintirho 27:41) Kambe leswi swi vanga xiphiqo. Vunyingi bya vakhandziyi—ku katsa na Pawulo—i vabohiwa. Hi ku ya hi nawu wa Rhoma, murindzi la tshikaka mubohiwa wakwe a baleka u fanele a xupuriwa hi nxupulo lowu mubohiwa a nga ta xupuriwa ha wona. Hi xikombiso, loko ko baleka mudlayi, murindzi yoloye la nga khathaliki a a fanele a riha hi vutomi byakwe.

Hi ku chava ku humeleriwa hi sweswo, masocha ma endla xiboho xa ku dlaya vabohiwa hinkwavo. Hambiswiritano, ndhuna ya vuthu leyi nga ni vunakulobye na Pawulo ya va sivela. Yi lerisa hinkwavo lava nga swi kotaka leswaku va huma va hlambela va ya fika eribuweni. Lava va nga swi kotiki ku hlambela va fanele va khomelela mapulanga kumbe swilo swin’wana leswi nga exikepeni. Vakhandziyi va xikepe lexi tshovekeke va hlambela va ya eribuweni ha un’we-un’we. Hilaha Pawulo a vuleke hakona, a nga kona ni un’we la feke!—Mintirho 27:42-44.

Singita eMelita

Ntlawa lowu wa vanhu lava karhaleke wu kume vutumbelo exihlaleni lexi vuriwaka Melita. Vaaki va kwalaho i “vanhu lava vulavulaka ririmi rimbe,” hi ku kongoma i “vabarbara” (hi Xigriki, barʹba·ros).c Kambe vanhu va le Melita a va na mona. Ku ri na sweswo, Luka, mufambi-kulobye na Pawulo u vika leswaku va “hi kombe musa lowu nga tolovelekangiki wa vumunhu, hikuva va tshivele ndzilo kutani va hi amukela hinkwerhu va hi pfuna hikwalaho ka mpfula leyi a yi na ni hikwalaho ka xirhami.” Pawulo hi vuyena u hlengelete tihunyi swin’we ni vaaka-tiko va Melita ni ku hlanganyeta ndzilo.—Mintirho 28:1-3, nhlamuselo ya le hansi ya NW.

Hi xitshuketa mhiri yi titsondzela evokweni ra Pawulo! Vaaki va xihlala xexo va ehleketa leswaku Pawulo u fanele a ri mudlayi. Kumbexana va ehleketa leswaku Xikwembu xi xupula vadyohi hi ku vavisa xirho xa miri lexi endleke xidyoho. Kambe waswivo! Pawulo u hlamarise vaaka-tiko va kwalaho hi ku dzudza mhiri leyi yi wela endzilweni. Hilaha rungula ra Luka ra leswi a swi voneke hi mahlo ri vulaka hakona, “a va langutela leswaku [Pawulo] u ta pfimba hi ndzhumbelo kumbe a wa a fela kwalaho.” Kambe vaaki va xihlala va hundzula mianakanyo ya vona, va sungula ku vula leswaku Pawulo u fanele a ri xikwembu.—Mintirho 28:3-6.

Pawulo u hete tin’hweti tinharhu leti landzelaka eMelita, hi nkarhi wolowo a horisa tata wa Publiyo, nkulukumba wa xihlala xexo, loyi a amukeleke Pawulo hi tintswalo, a horisa ni van’wana lava a va ri ni mavabyi. Ku engetela kwalaho, Pawulo u byala mbewu ya ntiyiso, leyi vuyelo bya kona ku nga va mikateko yo tala leyi weleke vaaki lava nga ni tintswalo va Melita.—Mintirho 28:7-11.

Dyondzo Eka Hina

Entirhweni wakwe, Pawulo u langutane ni swiphiqo swo tala. (2 Vakorinto 11:23-27) Eka rungula leri nga laha henhla, a a ri mubohiwa hikwalaho ka mahungu lamanene. Kutani a a fanele a langutana ni miringo leyi nga rindzeriwangiki: xidzedze lexikulu lexi landzeriweke hi ku tshoveka ka xikepe. Eka leswi hinkwaswo, Pawulo a nga tsekatsekanga eku tiyimiseleni kakwe ka ku va muchumayeri la hisekaka wa mahungu lamanene. Hikwalaho ko va ni ntokoto u tsarile a ku: “[E]ka swiyimo hinkwaswo ndzi dyondze xihundla xa ku xurha ni ku va ni ndlala, ku va ni swilo swo tala ni ku pfumala. Eka swilo hinkwaswo ndzi ni ntamu hikwalaho ka loyi a ndzi nyikaka matimba.”—Vafilipiya 4:12, 13.

Swiphiqo swa vutomi swi nga tshuki swi tsanisa ku tiyimisela ka hina ku va vatirheli lava hisekaka va Xikwembu xa ntiyiso! Loko ku tshuka ku pfuka ndzingo lowu hi nga wu rindzelangiki, hi nyiketa Yehovha mindzhwalo ya hina. (Pisalema 55:22) Kutani hi ku lehisa mbilu, hi rindzela ku vona ndlela leyi a endlaka swi koteka ha yona ku tiyiselela ndzingo wolowo. Hi nkarhi wolowo, hi ya emahlweni hi n’wi tirhela hi ku tshembeka, hi tiyiseka leswaku wa hi khathalela. (1 Vakorinto 10:13; 1 Petro 5:7) Hi ku tshama hi tiyile, ku nga khathariseki leswaku ku ta yini, na hina—ku fana na Pawulo—hi nga ma hlula maxangu.

[Tinhlamuselo ta le hansi]