Hambeta U Famba Endleleni Ya Yehovha

“Ṭhemba Yehova, u hlayisa ndlela ya yena, o ta ku kurisa leŝaku u fuma misav̌a.”—PISALEMA 37:34.

1, 2. Ku famba endleleni ya Yehovha a swi katsa yini eka Hosi Davhida, naswona swi vula yini eka hina namuntlha?

“NḌI kombise ndlela leyi nḍi fanelaka ku famba ha yona! Hikuv̌a nḍi [tlhandlukisela] moya wa mina e ka wena.” (Pisalema 143:8) Vakreste namuntlha va ma phindha hi mbilu hinkwayo marito wolawo ya Hosi Davhida. Va swi lava hi mbilu hinkwayo ku tsakisa Yehovha ni ku famba endleleni ya yena. Xana leswi swi katsa yini? Eka Davhida, a swi vula ku hlayisa nawu wa Xikwembu. A swi katsa ku tshemba Yehovha ematshan’weni yo endla ntwanano ni matiko man’wana. Ina, naswona a swi vula ku tirhela Yehovha hi ku tshembeka, ku nga ri ku tirhela swikwembu swa matiko lawa a ma n’wi rhendzerile. Eka Vakreste, ku famba endleleni ya Yehovha swi katsa ni swin’wana.

² Hi xikombiso, ku famba endleleni ya Yehovha namuntlha swi vula ku kombisa ripfumelo eka gandzelo ra nkutsulo ra Yesu Kreste, u n’wi teka tanihi “ndlela ni ntiyiso ni vutomi.” (Yohane 3:16; 14:6; Vaheveru 5:9) Nakambe swi vula ku hetisisa “nawu wa Kreste,” leswi katsaka ku kombisana rirhandzu, ngopfu-ngopfu eka vamakwavo va Yesu lava totiweke. (Vagalatiya 6:2; Matewu 25:34-40) Lava va fambaka endleleni ya Yehovha va rhandza misinya ya milawu ni swileriso swakwe. (Pisalema 119:97; Swivuriso 4:5, 6) Lunghelo leri va nga na rona ra ku hlanganyela entirhweni wa Vukreste va ri teka ri ri ra risima. (Vakolosa 4:17; 2 Timotiya 4:5) Xikhongelo i nchumu lowu va wu endlaka nkarhi na nkarhi evuton’wini bya vona. (Varhoma 12:12) Naswona va ‘hambeta va xiyisisa swinene leswaku mukhuva lowu va fambaka ha wona a wu fani ni wa vanhu lava nga tlharihangiki, kambe ni wa lava tlhariheke.’ (Vaefesa 5:15) Entiyisweni a va fularheli rifuwo ra moya leswaku va ta kuma swilo swa nkarhinyana leswi vonakaka kumbe va tsakisa nyama hi ndlela yo biha. (Matewu 6:19, 20; 1 Yohane 2:15-17) Ku tlula kwalaho, ku tshembeka eka Yehovha ni ku titshega ha yena swa laveka. (2 Vakorinto 1:9; 10:5; Vaefesa 4:24) Ha yini? Hikuva xiyimo xa hina xi fana swinene ni xa tiko ra khale ra Israyele wa khale.

Xilaveko Xa Ku Tshemba Ni Ku Tshembeka

3. Ha yini ku tshembeka, ripfumelo ni ntshembo swi ta hi pfuna ku hambeta hi famba endleleni ya Yehovha?

³ Israyele a ri ri tiko leritsongo leri rhendzeriweke hi matiko ya mona lawa a ma tinyiketele eminkhubyeni ya manyala evugandzerini bya wona bya swikwembu swa hava. (1 Tikronika 16:26) Ko va tiko ra Israyele ntsena leri a ri tirhela Xikwembu xin’we xa ntiyiso lexi nga voniwiki, Yehovha, naswona a xi lava leswaku mahanyelo ya vona ma tshama ma ri lamanene. (Deteronoma 6:4) Hilaha ku fanaka namuntlha, i vanhu va timiliyoni ti nga ri tingani ntsena lava gandzelaka Yehovha, naswona va hanya emisaveni ya vanhu va kwalomu ka tsevu wa magidi ya timiliyoni lava mahanyelo ni langutelo ra vona hi vukhongeri swi hambanaka swinene ni swa vona. Loko hi ri van’wana va timiliyoni teto ti nga ri tingani, hi fanele hi tivonela leswaku hi nga kuceteriwi hi ndlela yo biha. Njhani? Ku tshembeka eka Yehovha Xikwembu, ku va ni ripfumelo eka yena, ni ku tshemba hi mbilu hinkwayo leswaku u ta hetisisa switshembiso swakwe, swi ta hi pfuna. (Vaheveru 11:6) Leswi swi ta hi sivela ku tshemba swilo leswi tshembiwaka hi misava.—Swivuriso 20:22; 1 Timotiya 6:17.

4. Ha yini matiko ma ri “emunyameni hi mianakanyo”?

⁴ Muapostola Pawulo u kombise ndlela leyi Vakreste va faneleke va hambana ha yona ni misava, loko a tsala a ku: “Hikokwalaho, leswi ndza swi vula ni ku nyikela vumbhoni eka swona eHosini, leswaku mi nga ha fambi hilaha matiko ma fambaka hakona hi mianakanyo ya wona leyi nga pfuniki, kasi ma ha ri emunyameni hi mianakanyo, ni ku hambana ni vutomi lebyi nga bya Xikwembu, hikwalaho ka ku pfumala vutivi loku ma nga na kona, hikwalaho ka ku tlanyala ka timbilu ta wona.” (Vaefesa 4:17, 18) Yesu i “ku vonakala ka ntiyiso.” (Yohane 1:9) Hinkwavo lava lwisanaka na yena kumbe va vula leswaku va ni ripfumelo eka yena kasi a va wu yingisi “nawu wa Kreste,” va le ‘munyameni hi mianakanyo.’ Ematshan’weni yo famba endleleni ya Yehovha, va “hamban[e] ni vutomi lebyi nga bya Xikwembu.” Hambi va anakanya leswaku va tlharihile hi mukhuva wihi kumbe wihi hi ndlela ya misava, ‘a va na byona’ vutivi lebyi nga byona ntsena byi yisaka evuton’wini, bya ku tiva Yehovha Xikwembu na Yesu Kreste.—Yohane 17:3; 1 Vakorinto 3:19.

5. Hambileswi ku vonakala ka ntiyiso ku voningaka emisaveni, ha yini timbilu ta vanhu vo tala ti nonon’hwa?

⁵ Kambe, ku vonakala ka ntiyiso ka voninga emisaveni! (Pisalema 43:3; Vafilipiya 2:15) “Vutlhari bya ntiyiso byi hambeta byi huwelela hi matimba exitarateni.” (Swivuriso 1:20, NW) N’wexemu Timbhoni ta Yehovha ti hete tiawara to tlula gidi ra timiliyoni ti byela vaakelani va tona hi ta Yehovha Xikwembu na Yesu Kreste. Vanhu va madzana ya magidi va amukele rungula ra tona. Kambe, xana hi fanele hi hlamala leswi van’wana vo tala va nga ri amukelangiki? E-e. Pawulo u vulavule hi “ku tlanyala ka timbilu ta [vona].” Van’wana va ni timbilu to nonon’hwa hikwalaho ka vutianakanyi kumbe ku rhandza mali. Van’wana va yengiwa hi vukhongeri bya mavunwa kumbe langutelo ra misava leri vanhu vo tala va nga na rona namuntlha. Van’wana va fularhele Xikwembu hikwalaho ka maxangu lawa va ma voneke evuton’wini bya vona. Van’wana a va swi lavi ku hanya hi ndlela leyinene ya Yehovha. (Yohane 3:20) Xana mbilu ya munhu la fambaka endleleni ya Yehovha yi nga sungula ku tlanyala hi swivangelo leswi fanaka?

6, 7. Hambileswi Vaisrayele a va ri vagandzeri va Yehovha Xikwembu, xana va hambuke etimhakeni tihi, naswona ha yini?

⁶ Leswi swi humelerile etikweni ra khale ra Israyele, hilaha Pawulo a kombiseke hakona. U tsarile a ku: “Swilo leswi swi ve swikombiso eka hina, leswaku hi nga vi vanhu lava navelaka swilo swo biha, tanihi leswi vona va swi naveleke. Naswona hi nga vi vagandzeri va swifaniso swa hava, kukotisa leswi van’wana va vona va endleke swona; hilaha ku tsariweke hakona: ‘Vanhu va tshame ehansi va dya ni ku nwa, kutani va suka va yima va titsakisa.’ Naswona hi nga hanyi hi vumbhisa, tanihi leswi van’wana va vona va endleke vumbhisa, kutani ku wa makumembirhi-nharhu wa magidi ya vona hi siku rin’we.”—1 Vakorinto 10:6-8.

⁷ Xo sungula, Pawulo u vulavula hi nkarhi lowu Vaisrayele va nga gandzela rhole ra nsuku ehansi ka Ntshava ya Sinayi. (Eksoda 32:5, 6) Sweswo a swi lwisana hi ku kongoma ni xileriso xa Xikwembu lexi a ku lo hundza mavhiki ma nga ri mangani ntsena va pfumerile leswaku va ta xi yingisa. (Eksoda 20:4-6; 24:3) Endzhaku, Pawulo u vulavula hi nkarhi lowu Vaisrayele va nkhinsameleke Bali va ri ni vana va xisati va Mowabu. (Tinhlayo 25:1-9) Vugandzeri bya rhole a byi fambisana ni ku tienerisa ku tlula mpimo, ‘ku titsakisa.’a Vugandzeri bya Bali a byi fambisana ni ku tikhoma ko biha swinene hi tlhelo ra rimbewu. (Nhlavutelo 2:14) Ha yini Vaisrayele va endle swidyoho leswi? Hikuva va tshike timbilu ta vona ti ‘navela swilo swo biha’—ku nga ha va ku gandzela swikwembu swa hava kumbe mikhuva ya manyala leyi a yi fambisana na swona.

8. Hi nga dyondza yini eka leswi humeleleke Vaisrayele?

⁸ Pawulo u kombise leswaku hi fanele hi dyondza eka swiendlakalo leswi. Hi fanele hi dyondza yini? Swi le rivaleni leswaku Mukreste a nge ri nkhinsameli rhole ra nsuku kumbe xikwembu xa khale xa Vamowabu. Kambe ku vuriwa yini hi ku tikhoma ko biha ni ku tienerisa ku tlula mpimo? Leswi swi tolovelekile namuntlha, naswona loko hi tshika timbilu ta hina ti va ni ku navela koloko, ku ta hi hambanisa na Yehovha. Vuyelo bya kona byi ta fana ni loko hi gandzele swikwembu swa hava—hi fularhela Xikwembu. (Ringanisa Vakolosa 3:5; Vafilipiya 3:19.) Ina, Pawulo u gimeta rungula rakwe ra swiendlakalo sweswo hi ku khutaza vapfumeri-kulobye a ku: “Balekelani ku gandzela swifaniso swa hava.”—1 Vakorinto 10:14.

Lexi Hi Pfunaka Ku Famba eNdleleni Ya Xikwembu

9. (a) I mpfuno wihi lowu hi wu kumaka, lowu hi pfunaka ku hambeta hi famba endleleni ya Yehovha? (b) Hi yihi ndlela yin’wana leyi hi twaka ‘rito endzhaku ka hina’ ha yona?

⁹ Loko hi tiyimiserile ku hambeta hi famba endleleni ya Yehovha, mpfuno wu kona. Esaya u profetile a ku: “Tindlev̌e ta wena ti ta twa rito e nḍaku ka wena, ri ku: Ndlela hi leyi, fambani ha yona, mi nga yi hi ra šinene, kumbe hi ri šimaṭi!” (Esaya 30:21) Xana ‘tindleve ta hina’ ti ri twa njhani ‘rito rero endzhaku ka hina’? Kahle-kahle a nga kona namuntlha loyi a twaka rito ra xiviri ro huma eka Xikwembu kumbe a kuma rungula leri humaka eka xona. “Rito” leri twiwaka ri ta eka hina hinkwerhu hi ndlela yin’we. Xo sungula ni xa nkoka, ri ta hi Matsalwa lama huhuteriweke, Bibele, leyi nga ni mianakanyo ya Xikwembu ni matimu ya ndlela leyi xi khomeke vanhu va xona ha yona. Tanihi leswi siku na siku hi twaka marito ya vuxisi lama humaka eswihlobyeni leswi “[hambaneke] ni vutomi lebyi nga bya Xikwembu,” leswaku hi va ni rihanyo lerinene emoyeni, hi fanele hi hlaya Bibele ni ku anakanyisisa ha yona nkarhi na nkarhi. Leswi swi ta hi pfuna ku papalata ‘swilo swa hava’ ni ku “faneleka hi ku helela, [hi] hlomisiwa hi ku helela eka ntirho wun’wana ni wun’wana lowunene.” (Mintirho 14:14, 15; 2 Timotiya 3:16, 17) Swi ta hi tiyisa, swi hi pfuna ‘ku endla leswaku ndlela ya hina yi va leyi humelelaka.’ (Yoxuwa 1:7, 8) Hikwalaho, Rito ra Yehovha ra hi khutaza ri ku: “Ŝeŝi, v̌ana v̌a nga, nḍi yingiseni, ku katekile la’v̌a yaka hi tindlela ta mina! Yingisani dyonḍo, mi ta tlhariha, mi nga yi tšukumeti.”—Swivuriso 8:32, 33.

10. Hi yihi ndlela ya vumbirhi leyi hi ri twaka ha yona ‘rito endzhaku ka hina’?

¹⁰ ‘Rito leri nga endzhaku ka hina’ nakambe ri ta hi “hlonga ro tshembeka ni ro tlhariha,” leri phamelaka “swakudya . . . hi nkarhi lowu faneleke.” (Matewu 24:45-47) Ndlela yin’wana leyi swakudya leswi swi phameriwaka ha yona i ku tirhisa tibuku leti kandziyisiweke leti sekeriweke eBibeleni, naswona emalembeni ya sweswinyana, swakudya leswi swi phameriwe hi xitalo. Hi xikombiso, hi ku tirhisa magazini wa Xihondzo xo Rindza, ndlela leyi a hi twisisa vuprofeta byo karhi ha yona yi lulamisiwile. Eka magazini lowu, hi khutaziwe ku phikelela entirhweni wo chumayela ni wa ku endla vadyondzisiwa hambi loko vanhu vo tala va nga tsakeli, hi pfuniwile leswaku hi papalata miringo naswona hi khutaziwe ku hlakulela timfanelo letinene ta Vukreste. Ha swi tlangela swonghasi swakudya swo tano leswi fikaka hi nkarhi lowu faneleke!

11. Hlamusela ndlela ya vunharhu leyi hi nga twaka ha yona ‘rito endzhaku ka hina.’

¹¹ Hlonga ro tshembeka ni ro tlhariha nakambe ri hi phamela swakudya hi minhlangano ya hina ya nkarhi na nkarhi. Yona yi katsa minhlangano ya vandlha, tinhlengeletano ta xifundzha leti khomiwaka kambirhi hi lembe ni mintsombano leyikulu ya lembe na lembe. Hi wihi Mukreste la tshembekaka loyi a nga yi tlangeliki minhlangano yo tano? Yi hi pfuna swinene hi ku hi tiyisa loko hi famba endleleni ya Yehovha. Tanihi leswi vo tala va bohekaka ku heta nkarhi wo leha entirhweni kumbe exikolweni va ri ni vanhu lava nga riki vapfumeri-kulobye, ku tihlanganisa ni Vakreste nkarhi na nkarhi swi ponisa vutomi hi ku kongoma. Minhlangano yi hi nyika nkarhi lowunene wo “khutazana erirhandzwini ni le mintirhweni leyinene.” (Vaheveru 10:24) Ha va rhandza vamakwerhu, naswona ha swi rhandza ku va swin’we na vona.—Pisalema 133:1.

12. I ku tiyimisela kwihi loku Timbhoni ta Yehovha ti nga na kona, naswona ti ku kombise njhani ku nga ri khale?

¹² Hi ku tiyisiwa hi swakudya swo tano swa moya, vanhu va kwalomu ka timiliyoni ta tsevu namuntlha va famba endleleni ya Yehovha, naswona van’wana va timiliyoni va dyondza Bibele leswaku va kumisisa leswaku va nga fambisa ku yini endleleni leyi. Xana swi va heta matimba kumbe ku va tsanisa leswi va nga vatsongo hi nhlayo loko va ringanisiwa ni magidi ya timiliyoni ta vaaki va misava? Doo! Va tiyimisele ku hambeta va yingisa ‘rito leri nga endzhaku ka vona,’ va endla ku rhandza ka Yehovha hi ku tshembeka. Tanihi xikombiso xa le rivaleni xa ku tiyimisela loku, eka Mintsombano ya Miganga ni ya Matiko ya “Ku Hanya Hi Ndlela Ya Xikwembu” hi 1998/99, lava a va ri kona va amukele xiboho lexi kombisaka ku tiyimisela ka vona loku humaka embilwini. Hi leri rungula ra xiboho xexo.

Xiboho

13, 14. Hi rihi langutelo ra xiviri leri Timbhoni ta Yehovha ti nga na rona hi xiyimo xa misava?

¹³ “Hina Timbhoni ta Yehovha leti hlanganeke eNtsombanweni wa ‘Ku Hanya Hi Ndlela Ya Xikwembu,’ hi pfumela hi mbilu hinkwayo leswaku ndlela ya Xikwembu i ndlela yo hanya leyi nga yinene eka hinkwato. Hambiswiritano, ha swi lemuka leswaku vanhu vo tala namuntlha a va titwi hi ndlela yoleyo. Vanhu va ringete tidyondzo to hambana-hambana, tifilosofi ni mianakanyo ya vukhongeri leswaku va kumisisa ndlela leyinene ya ku hanya. Nkambisiso wo tshembeka wa matimu ya vanhu ni swiyimo swa misava namuntlha wu seketela ntiyiso wa marito ya Xikwembu lama tsariweke eka Yeremiya 10:23 leyi nge: ‘Munhu l’a fambaka a nga ka a nga lulamisi renḍo ra yena.’

¹⁴ “Siku na siku hi vona vumbhoni lebyi engetelekeke lebyi tiyisaka ntiyiso wa marito wolawo. Vanhu vo tala va honisa ndlela ya Xikwembu ya ku hanya. Vanhu va lwela ku kuma swilo leswi vonakaka swi lulamile ematihlweni ya vona. Vuyelo bya kona byi ve ni khombo—ku hohloka ka vutomi bya ndyangu, leswi siyeke vana va nga ri na vukongomisi; ku lwela ku kuma swilo swo tala leswi vonakaka, laha makumu ya kona ku nga vuhava ni ku hela matimba; vugevenga ni madzolonga ya nsele, leswi hlaselaka vanhu vo tala swinene; mivango ya tinxaka ni tinyimpi, leswi dlayaka vunyingi lebyi tsemaka nhlana; ku tikhoma ko biha loku nga lawulekiki, loku nyanyisaka ntungu wa mavabyi lama tluletiwaka hi vuxaka bya rimbewu. Leswi ko va swiphiqo swi nga ri swingani eka swo tala leswi rharhanganeke leswi kavanyetaka matshalatshala yo kuma ntsako, ku rhula ni nsirhelelo.

15, 16. I ku tiyimisela kwihi loku phofuriweke hi xiboho malunghana ni ndlela ya Xikwembu ya ku hanya?

¹⁵ “Hikwalaho ka maxangu ya vanhu lama hlomulaka mbilu nileswi ‘nyimpi ya siku lerikulu ra Xikwembu xa Matimba Hinkwawo’ leyi vuriwaka Armagedoni yi tshineleke (Nhlavutelo 16:14, 16), hina Timbhoni ta Yehovha hi endla xiboho lexi:

¹⁶ “Xo sungula: Hi titeka hi ri vanhu va Yehovha Xikwembu, tanihi leswi un’wana ni un’wana wa hina a tinyiketeleke hi ku helela eka yena, naswona hi ta tshama hi ri ni ripfumelo leri nga tsekatsekiki eka lunghiselelo ra Yehovha ra nkutsulo hi ku tirhisa N’wana wakwe, Yesu Kreste. Hi tiyimisele ku famba endleleni ya Xikwembu ya ku hanya, hi tirha tanihi Timbhoni ta xona ni ku tiveka ehansi ka vuhosi bya xona lebyi kombisiwaka hi vulawuri bya Yesu Kreste.

17, 18. I xiyimo xihi lexi Timbhoni ta Yehovha ti nga ta hambeta ti xi hlayisa malunghana ni milawu ya mahanyelo ni ku va Vakreste lava nga vamakwavo?

¹⁷ “Xa vumbirhi: Hi ta hambeta hi namarhela misinya ya milawu leyi tlakukeke ya mahanyelo ni ya moya leyi kumekaka eBibeleni. Hi tiyimisele ku papalata ku famba hilaha matiko ma fambaka hakona hi mianakanyo ya wona leyi nga pfuniki nchumu. (Vaefesa 4:17-19) Hi tiyimisele ku tshama hi tengile emahlweni ka Yehovha naswona hi nga ri na xivati xa misava leyi.—Yakobo 1:27.

¹⁸ “Xa vunharhu: Hi ta xi namarhela swinene xiyimo xa hina xa Matsalwa tanihi Vakreste lava nga vamakwerhu emisaveni hinkwayo. Hi ta hlayisa vukala-tlhelo bya Vukreste exikarhi ka matiko, hi nga pfumeli ku hluriwa hi rivengo kumbe ku avana ka tinxaka ni matiko.

19, 20. (a) Vatswari lava nga Vakreste va ta endla yini? (b) Vakreste hinkwavo va ntiyiso va ta hambeta va tikombisa njhani leswaku i vadyondzisiwa va Kreste?

¹⁹ “Xa vumune: Hina lava hi nga vatswari hi ta dyondzisa vana va hina ndlela ya Xikwembu. Hi ta veka xikombiso xa mahanyelo ya Vakreste, lama katsaka ku hlaya Bibele nkarhi hinkwawo, dyondzo ya ndyangu ni ku hlanganyela hi moya-xiviri hinkwawo evandlheni ra Vukreste ni le ntirhweni wa nsimu.

²⁰ “Xa vuntlhanu: Hinkwerhu ka hina hi ta lwela ku hlakulela timfanelo ta Xikwembu leti xi hi vekelaka tona tanihi Muvumbi wa hina, naswona hi ta tikarhatela ku tekelela vumunhu bya xona ni tindlela ta xona, hilaha Yesu a endleke hakona. (Vaefesa 5:1) Hi tiyimisele ku fambisa timhaka ta hina hinkwato hi rirhandzu, xisweswo hi tikombisa hi ri vadyondzisiwa va Kreste.—Yohane 13:35.

21-23. Timbhoni ta Yehovha ti ta hambeta ti endla yini, naswona i yini lexi ti tiyisekaka ha xona?

²¹ “Xa vutsevu: Hi nge tshiki ku hambeta hi chumayela mahungu lamanene ya Mfumo wa Xikwembu, hi endla vadyondzisiwa, naswona hi ta va dyondzisa ndlela ya Xikwembu ya ku hanya ni ku va khutaza ku kuma vuleteri lebyi engetelekeke eminhlanganweni ya vandlha.—Matewu 24:14; 28:19, 20; Vaheveru 10:24, 25.

²² “Xa vunkombo: Un’wana ni un’wana wa hina kun’we ni nhlengeletano ya hina ya vukhongeri, hi ta hambeta hi rhangisa ku rhandza ka Xikwembu evuton’wini bya hina. Hi ku tirhisa Rito ra xona, Bibele leswaku ri hi kongomisa, hi nge hambukeli exineneni kumbe eximatsini, xisweswo hi tiyisekisa leswaku ndlela ya Xikwembu yi tlakukile swinene ku tlula tindlela ta misava. Hi tiyimisele ku landzelela ndlela ya Xikwembu ya ku hanya—hilaha ku tiyeke ni hi ku tshembeka, sweswi ni hi masiku!

²³ “Hi endla xiboho lexi hikuva hi xi tshemba hi ku helela xitshembiso xa Yehovha xa rirhandzu xa leswaku loyi a endlaka ku rhandza ka Xikwembu u hanya hilaha ku nga heriki. Hi endla xiboho lexi hikuva ha tiyiseka leswaku ku hanya hi misinya ya milawu ni xitsundzuxo xa Matsalwa i ndlela leyinene ngopfu ya ku hanya namuntlha naswona i xisekelo lexinene xa vumundzuku, leswaku hi khomelela swinene eka vutomi bya xiviri. (1 Timotiya 6:19; 2 Timotiya 4:7b, 8) Ku tlula sweswo hinkwaswo, hi endla xiboho lexi hileswi hi rhandzaka Yehovha Xikwembu hi timbilu ta hina hinkwato, ni mimoya-xiviri ya hina hinkwayo, ni mianakanyo ya hina hinkwayo ni matimba ya hina hinkwawo!

24, 25. N’wangulo wu ve wihi eka xiboho lexi nyikeriweke, naswona lava va fambaka endleleni ya Yehovha va tiyimisele ku endla yini?

²⁴ “Hinkwenu n’wina lava mi nga kona eka ntsombano lowu lava mi yimaka ni xiboho lexi, hi kombela mi ku INA!”

²⁵ Madzana ya tiholo ni switediyamu emisaveni hinkwayo swi sale swi pfuma loko hinkwavo lava a va ri kona va hlamula hi marito lama tlakukeke va ku “INA!” Timbhoni ta Yehovha a ti kanakani leswaku ti ta hambeta ti famba endleleni ya Yehovha. Ti tshemba Yehovha hi ku helela naswona ta pfumela leswaku u ta swi hetisisa switshembiso swa yena. Ti tshama ti tshembekile eka yena, hambi ku endleka yini. Naswona ti tiyimisele ku endla leswi rhandziwaka hi yena.

‘Xikwembu I Xa Hina’

26. Hi xihi xiyimo lexi tsakisaka xa lava va fambaka endleleni ya Yehovha?

²⁶ Timbhoni ta Yehovha ti tsundzuka xikhutazo xa mupisalema lexi nge: “Ṭhemba Yehova, u hlayisa ndlela ya yena, o ta ku kurisa leŝaku u fuma misav̌a.” (Pisalema 37:34) A ti ma rivali marito ya Pawulo lama khutazaka: “Loko Xikwembu xi ri xa hina, i mani loyi a nga ta lwa na hina ke? Lexi hambi ku ri N’wana wa xona xi nga n’wi tsetselelangiki, kambe xi n’wi nyiketeke hikwalaho ka hina hinkwerhu, nakambe xana a xi nge hi nyiki hi musa swilo leswin’wana hinkwaswo hikwalaho ka yena?” (Varhoma 8:31, 32) Ina, loko hi hambeta hi famba endleleni ya Yehovha, u ta hi nyika “swilo hinkwaswo hilaha ku fuweke leswaku hi tiphina.” (1 Timotiya 6:17) A ku na ndhawu yin’wana yo antswa ku tlula leyi hi nga eka yona—ku famba endleleni ya Yehovha, swin’we ni vamakwerhu lava rhandzekaka. Leswi Yehovha a nga na hina, a hi tiyimiseleni ku tshama kwalaho, hi tiyisela ku fikela emakumu, hi tiyiseka swinene leswaku hi nkarhi wakwe lowu faneleke, hi ta vona a hetisisa xihi ni xihi lexi a xi tshembiseke, lexi a xi nga si hetiseka.—Tito 1:2.

[Nhlamuselo ya le hansi]

Wa Tsundzuka Xana?

◻ I yini leswi lavekaka leswaku Mukreste a famba endleleni ya Yehovha?

◻ Ha yini hi fanele hi lwela ku tshemba Yehovha ni ku tshembeka eka yena?

◻ Hi wihi mpfuno lowu hi wu kumaka loko hi famba endleleni ya Yehovha?

◻ Nyika tinhla-nkulu to karhi ta xiboho lexi amukeriweke eMintsombanweni ya “Ku Hanya Hi Ndlela Ya Xikwembu.”

[Swifaniso leswi nga eka tluka 18]

Xiboho xa nkoka xi amukeriwile eMintsombanweni ya Miganga ni ya Matiko Hinkwawo ya “Ku Hanya Hi Ndlela Ya Xikwembu”