“Tinyiko Leti Nga Vanhu” Ti Khathalela Tinyimpfu Ta Yehovha
“Loko a tlhandlukela ehenhla u teke makhumbi; u nyike tinyiko leti nga vanhu.”—VAEFESA 4:8.
1. Xana makwerhu un’wana wa xisati loyi a nga Mukreste u te yini malunghana ni vakulu va le vandlheni ra ka vona?
“INKOMU leswi mi hi khathalelaka hi ndlela leyinene swonghasi. Ku n’wayitela ka n’wina, rirhandzu ra n’wina ni nkhathalo wa n’wina i swa xiviri. Mi tshama mi lunghekele ku hi yingisa ni ku hi hlayela marito lama hi khutazaka eBibeleni. Lexi ndzi xi khongelelaka hileswaku ndzi nga tshuki ndzi mi tekela ehansi.” Sweswo swi tsariwe hi makwerhu un’wana wa xisati loyi a nga Mukreste, a tsalela vakulu va le vandlheni ra ka vona. Swi le rivaleni leswaku rirhandzu leri kombisiwaka hi varisi lava nga Vakreste lava khathalelaka ri khumbe mbilu yakwe.—1 Petro 5:2, 3.
2, 3. (a) Hi ku ya hi Esaya 32:2, vakulu lava nga ni ntwela-vusiwana va ti khathalela njhani tinyimpfu ta Yehovha? (b) Nkulu a nga tekiwa a ri nyiko loko swi te yini?
2 Vakulu va vekiwe hi Yehovha leswaku va khathalela tinyimpfu takwe. (Luka 12:32; Yohane 10:16) Tinyimpfu ta Yehovha i ta risima eka yena—kahle-kahle i ta risima swonghasi lerova u ti xavile hi ngati yo kwetsima ya Yesu. Kutani a swi hlamarisi leswi Yehovha a tsakaka loko vakulu va kombisa rirhandzu eka ntlhambi wakwe. (Mintirho 20:28, 29) Xiya nhlamuselo ya vuprofeta malunghana ni vakulu lava, kumbe “tihosana”: “Uṅwana ni uṅwana wa v̌ona o ta kotisa šisirelelo loko moya wu hunga, kukota šitšhav̌elo loko šidzedze ši fika, kukota šinambyana ša mati e tikweni ra dyanḍa, ni nḍuti wa ribye le’ri tlakukeke tikweni le’ri omeke.” (Esaya 32:1, 2) Ina, va fanele va sirhelela, va phyuphyisa ni ku chavelela tinyimpfu ta yena. Hikwalaho, vakulu lava risaka ntlhambi hi ntwela-vusiwana va ringeta ku endla leswi Xikwembu xi swi languteleke eka vona.
3 EBibeleni, vakulu volavo va vuriwa “tinyiko leti nga vanhu.” (Vaefesa 4:8) Nyiko i nchumu lowu nyikeriwaka ku enerisa xilaveko xa munhu loyi a nyikiwaka yona kumbe ku n’wi tsakisa. Nkulu a nga tekiwa a ri nyiko loko a tirhisa vuswikoti byakwe ku nyikela mpfuno lowu lavekaka entlhambini ni ku endla leswaku wu va lowu tsakeke. Xana a nga swi endlisa ku yini leswi? Nhlamulo leyi kumekaka emaritweni ya Pawulo eka Vaefesa 4:7-16, yi kombisa nkhathalelo wa rirhandzu lowu Yehovha a nga na wona eka tinyimpfu takwe.
“Tinyiko Leti Nga Vanhu”—Xana Ti Huma Kwihi?
4. Malunghana ni ku hetiseka ka Pisalema 68:18, Yehovha u “tlhandlukele ehenhla” hi ndlela yihi, naswona i vamani ‘vanhu lava veke tinyiko’?
4 Loko Pawulo a tirhisa xiga lexi nge “tinyiko leti nga vanhu,” a a tshaha marito ya Hosi Davhida, loyi a vuleke leswi landzelaka hi Yehovha: “U tlhandlukele ehenhla; u teke makhumbi; u teke vanhu va va tinyiko.” (Pisalema 68:18, NW) Loko Vaisrayele se va ri ni malembe va ri eTikweni leri Tshembisiweke, Yehovha u “tlhandlukele” eNtshaveni ya Siyoni hi ndlela yo fanekisela, a endla Yerusalema wu va ntsindza wa mfumo wa Israyele, hosi ya kona ku va Davhida. Kambe i vamani ‘vanhu lava veke tinyiko’? I vanhu lava yisiweke evukhumbini loko ku hluriwa tiko rero. Man’wana ya makhumbi lawa endzhaku ma averiwe ku pfuna Valevhi entirhweni wa le tabernakeleni.—Ezra 8:20.
5. (a) Pawulo u swi kombisa njhani leswaku Pisalema 68:18 yi hetiseka evandlheni ra Vukreste? (b) Yesu u ‘tlhandlukele ehenhla’ hi ndlela yihi?
5 Epapileni rakwe leri yaka eka Vaefesa, Pawulo u kombisa leswaku marito ya mupisalema ma hetiseka hi mpimo lowukulu evandlheni ra Vukreste. Loko a hlamusela Pisalema 68:18 hi ndlela yin’wana, Pawulo wa tsala: “Kutani un’wana ni un’wana wa hina u nyikiwe musa lowu nga faneriwiki hi ku ya hi ndlela leyi Kreste a pimeke ha yona nyiko ya mahala. Hikwalaho u ri: ‘Loko a tlhandlukela ehenhla u teke makhumbi; u nyike tinyiko leti nga vanhu.’” (Vaefesa 4:7, 8) Laha Pawulo u tirhisa pisalema leyi eka Yesu tanihi muyimeri wa Xikwembu. Yesu u ‘hlule misava’ hi mahanyelo yakwe yo tshembeka. (Yohane 16:33) U tlhele a hlula rifu na Sathana hileswi Xikwembu xi n’wi pfuxeke eka lava feke. (Mintirho 2:24; Vaheveru 2:14) Hi 33 C.E., Yesu la pfuxiweke u tlhandlukele “ehenhla-henhla ka matilo hinkwawo”—a va la tlakukeke ku tlula swivumbiwa leswin’wana hinkwaswo swa le tilweni. (Vaefesa 4:9, 10; Vafilipiya 2:9-11) Tanihi muhluri, Yesu u teke “makhumbi” eka nala. Njhani?
6. Ku sukela hi Pentekosta ya 33 C.E., Yesu la tlhandlukeke u sungule njhani ku hlasela yindlu ya Sathana, naswona u endle yini hi “makhumbi”?
6 Loko a ri emisaveni, Yesu u kombise leswaku u ni matimba ku tlula Sathana hi ku kutsula lava endliweke mahlonga hi madimona. A swi fana ni loko Yesu a nghene endlwini ya Sathana, a n’wi boha, kutani a teka nhundzu yakwe. (Matewu 12:22-29) Anakanya leswaku loko Yesu a pfuxiwile kutani a nyikiwa “vulawuri hinkwabyo etilweni ni le misaveni” a a ta teka swilo swo tanihi kwihi! (Matewu 28:18) Ku sukela hi Pentekosta ya 33 C.E., Yesu la tlhandlukeke, a va muyimeri wa Xikwembu, u sungule ku hlasela yindlu ya Sathana hi ku ‘teka makhumbi’—vanhu lava a ku ri khale va ri evuhlongeni bya xidyoho ni rifu ni ku lawuriwa hi Sathana. “Makhumbi” lawa ma tinyiketele ku va “mahlonga ya Kreste, [ma] endla ku rhandza ka Xikwembu hi moya-xiviri hinkwawo.” (Vaefesa 6:6) Hi nga vula leswaku Yesu u ma ntshunxile ehansi ka vulawuri bya Sathana, kutani a ma yisa evandlheni ma va “tinyiko leti nga vanhu,” hi vukongomisi bya Yehovha. Anakanya hi ku wa mapa loku Sathana a faneleke a ve na kona loko va ntshunxiwa a lo va nhwii, hi mahlo!
7. (a) “Tinyiko leti nga vanhu” ti ni ntirho wihi evandlheni? b) I lunghelo rihi leri Yehovha a ri nyikeke wanuna un’wana ni un’wana loyi a nga nkulu?
7 Xana ti kona ‘tinyiko to tano leti nga vanhu’ emavandlheni namuntlha? Ina, ti kona! Vona i vakulu lava tirhaka hi matimba tanihi ‘vavuri va evhangeli, varisi ni vadyondzisi’ emavandlheni yo tlula 87 000 ya vanhu va Xikwembu emisaveni hinkwayo. (Vaefesa 4:11) Lexi Sathana a xi lavaka hileswaku va khoma ntlhambi hi ndlela yo biha. Kambe loko Xikwembu xi va veka evandlheni hi ku tirhisa Kreste a xi nga va vekeli swona sweswo. Ku ri na sweswo, Yehovha u veke vavanuna lava leswaku va khathalela vandlha, naswona va ni vutihlamuleri eka yena malunghana ni tinyimpfu leti a ti vekeke emavokweni ya vona. (Vaheveru 13:17) Loko u ri nkulu, Yehovha u ku nyike lunghelo ro hlawuleka ro tikombisa leswaku u nyiko kumbe nkateko hakunene eka vamakwenu. U nga endla tano hi ku hetisisa vutihlamuleri bya mune bya nkoka.
Loko Ku Ri Ni Xilaveko Xa “Ku Ololoxa”
8. Hi tihi tindlela leti hinkwerhu hi lavaka ku ololoxiwa ha tona minkarhi yin’wana?
8 Xo sungula, “tinyiko leti nga vanhu” ti vekiwe “hi xikongomelo xa ku ololoxa vakwetsimi,” ku vula Pawulo. (Vaefesa 4:12) Riviti ra Xigriki leri hundzuluxeriweke ri va “ku ololoxa” ri vula “ku wu lulamisa kahle” nchumu wo karhi. Tanihi vanhu lava nga hetisekangiki, hinkwerhu hi ni xilaveko xa ku ololoxiwa nkarhi na nkarhi—ku nga “ku lulamisiwa kahle” ka miehleketo, mavonelo kumbe mahanyelo ya hina, swi fambisana ni miehleketo ya Xikwembu ni ku rhandza ka xona. Hi rirhandzu, Yehovha u veke “tinyiko leti nga vanhu” leswaku ti hi pfuna ku endla mindzulamiso leyi lavekaka. Xana ti swi endlisa ku yini leswi?
9. Nkulu a nga pfuna njhani ku ololoxa nyimpfu leyi endleke xidyoho?
9 Minkarhi yin’wana, nkulu a nga fanela ku pfuna nyimpfu leyi dyoheke, kumbexana leyi ‘tekeke goza leri hoxeke yi nga si swi lemuka.’ Xana nkulu a nga pfunisa ku yini? Vagalatiya 6:1 yi ri: “[Ringeta] ku ololoxa munhu wo tano hi moya wo rhula.” Hikwalaho, loko nkulu a nyikela ndzayo, a nge holoveli munhu la endleke xidyoho, a n’wi karihela. Ndzayo yi fanele yi khutaza, ku nga ri ku “tshukisa” loyi a nyikiwaka yona. (2 Vakorinto 10:9; ringanisa Yobo 33:7.) Munhu wa kona a nga ha va se a khomiwe hi tingana, kutani murisi la nga ni rirhandzu u papalata ku heta munhu wo tano matimba. Loko ndzayo, hambi ku ri ku tshinya hi matimba, yi susumetiwa ni ku nyikeriwa hi rirhandzu, hakanyingi yi endla leswaku loyi a endleke xidyoho a lulamisa miehleketo kumbe mahanyelo yakwe, kutani yi n’wi ololoxa.—2 Timotiya 4:2.
10. Ku ololoxa van’wana swi katsa na yini?
10 Loko Yehovha a veka “tinyiko leti nga vanhu” leswaku ti hi ololoxa, a a lava leswaku vakulu va va lava phyuphyisaka hi tlhelo ra moya naswona va fanelekela ku tekeleriwa hi vanhu vakwe. (1 Vakorinto 16:17, 18; Vafilipiya 3:17) Ku ololoxa vanhu van’wana, a swi vuli ku lulamisa lava va dyohaka ntsena, kambe swi vula ni ku pfuna lava tshembekaka leswaku va namarhela ndlela leyi lulameke.a Namuntlha, tanihi leswi ku nga ni swiphiqo swo tala swonghasi leswi talaka ku heta matimba, vo tala va lava xikhutazo xa ku tiyisela. Van’wana va nga ha lava ku pfuniwa hi musa swinene leswaku va twananisa miehleketo ya vona ni ya Xikwembu. Hi xikombiso, Vakreste van’wana lava tshembekaka va titwa va nga faneleki kumbe va nga pfuni nchumu. ‘Mimoya-xiviri yo tano leyi karhatekeke’ yi nga vona onge Yehovha a nge pfuki a yi rhandzile naswona hinkwaswo leswi yi nga tikarhataka yi swi endlela Xikwembu a swi nge amukeleki eka xona. (1 Vatesalonika 5:14) Kambe mianakanyo leyi yi hambanile ni ndlela leyi Xikwembu xi titwaka ha yona hakunene hi vagandzeri va xona.
11. Vakulu va nga endla yini leswaku va pfuna lava titwaka va nga pfuni nchumu?
11 Vakulu, xana mi nga endla yini leswaku mi pfuna vanhu vo tano? Bulani na vona hi vumbhoni bya Matsalwa bya leswaku Yehovha u khathalela nandza un’wana ni un’wana wa yena, naswona va tiyisekiseni leswaku tindzimana leti ta Bibele ti tirha eka vona hi ku kongoma. (Luka 12:6, 7, 24) Va pfuneni ku vona leswaku Yehovha u va ‘kokile’ leswaku va n’wi tirhela, kutani u fanele a va vona va ri va nkoka. (Yohane 6:44) Va tiyisekiseni leswaku a hi vona ntsena—ni malandza man’wana yo tala ya Yehovha lama tshembekaka a ma titwa tano. Muprofeta Eliya u tshama a khomiwa hi gome lerikulu lerova a navela ni ku fa. (1 Tihosi 19:1-4) Vakreste van’wana lava totiweke eka lembe-xidzana ro sungula a va titwa va ‘soriwa’ hi timbilu ta vona. (1 Yohane 3:20) Swa chavelela ku tiva leswaku vanhu lava tshembekaka va le minkarhini ya ku tsariwa ka Bibele a va ri ni “mintlhaveko yo fana ni ya hina.” (Yakobo 5:17) Nakambe mi nga hlangana ni lava heleke matimba mi kambisisa na vona swihloko leswi khutazaka eka Xihondzo xo Rindza ni Xalamuka! Ku tikarhata ka n’wina hi rirhandzu mi pfuna vanhu vo tano leswaku na vona va titeka va ri vanhu ku ta xiyiwa hi Xikwembu lexi xi mi vekeke leswaku mi va “tinyiko leti nga vanhu.”—Vaheveru 6:10.
Ku “Aka” Ntlhambi
12. I yini lexi kombisiwaka hi xiga lexi nge ku “aka miri wa Kreste,” naswona hi xihi xilotlelo xa ku aka ntlhambi?
12 Xa vumbirhi, “tinyiko leti nga vanhu” ti vekiwe hi xikongomelo xa ku “aka miri wa Kreste.” (Vaefesa 4:12) Laha Pawulo u tirhisa xiga-ririmi. Ku “aka” ku hi tsundzuxa ku yimisa muako, kasi “miri wa Kreste” i vanhu—swirho swa vandlha ra Vakreste lava totiweke. (1 Vakorinto 12:27; Vaefesa 5:23, 29, 30) Vakulu va fanele va pfuna vamakwavo leswaku va tiya swinene emoyeni. Xikongomelo xa vona i ‘ku aka, hayi ku hirimuxa’ ntlhambi. (2 Vakorinto 10:8) Xilotlelo xa ku aka ntlhambi i rirhandzu, hikuva “rirhandzu ra aka.”—1 Vakorinto 8:1.
13. Swi vula yini ku va ni ntwela-vusiwana, naswona ha yini swi ri swa nkoka leswaku vakulu va va ni ntwela-vusiwana?
13 Xin’wana lexi fambisanaka ni rirhandzu lexi pfunaka vakulu leswaku va aka ntlhambi i ntwela-vusiwana. Ku va ni ntwela-vusiwana swi vula ku twela van’wana—ku fambisana ni miehleketo kun’we ni mintlhaveko ya vona, ku xiya ku tsana ka vona. (1 Petro 3:8) Ha yini swi ri swa nkoka leswaku vakulu va va ni ntwela-vusiwana? Xivangelo lexikulu hileswaku Yehovha—loyi a vekaka “tinyiko leti nga vanhu”—i Xikwembu lexi nga ni ntwela-vusiwana. Loko malandza ya xona ma xaniseka kumbe ma twa ku vava, xa ma twela. (Eksoda 3:7; Esaya 63:9) Xa ku xiya ku tsana ka wona. (Pisalema 103:14) Kutani ke, xana vakulu va nga wu kombisa njhani ntwela-vusiwana?
14. Vakulu va nga wu kombisa hi tindlela tihi ntwela-vusiwana eka van’wana?
14 Loko munhu loyi a heleke matimba a ta eka vona, va yingisa, va twisisa ndlela leyi a titwaka ha yona. Va ringeta ku twisisa ndhavuko, vumunhu ni swiyimo swa vamakwavo. Kutani, loko vakulu va nyikela mpfuno wa Matsalwa lowu akaka, tinyimpfu ti ta wu amukela hi ku hatlisa, hileswi wu humaka eka varisi lava ti twisisaka ni ku ti khathalela hakunene. (Swivuriso 16:23) Nakambe ntwela-vusiwana wu susumetela vakulu ku xiya ku tsana ka van’wana ni mintlhaveko leyi nga vangiwaka hi ku tsana koloko. Hi xikombiso, Vakreste van’wana lava hatlisaka ku biwa hi ripfalo va nga titwa va ri ni nandzu loko va tsandzeka ku endla leswi engetelekeke entirhweni wa Xikwembu, kumbexana hikwalaho ka ku dyuhala kumbe ku vabya. Hi tlhelo rin’wana, van’wana va nga fanela ku khutaziwa leswaku va antswisa evutirhelini bya vona. (Vaheveru 5:12; 6:1) Ntwela-vusiwana wu ta susumetela vakulu ku kuma ‘marito lama tsakisaka’ lama akaka van’wana. (Eklesiasta 12:10) Loko tinyimpfu ta Yehovha ti akiwa ni ku khutaziwa, rirhandzu ra tona eka Xikwembu ri ta ti susumetela ku endla hinkwaswo leswi ti nga swi kotaka entirhweni wa xona!
Vavanuna Lava Kondletelaka Vun’we
15. Xiga lexi nge “vun’we eka ripfumelo” xi vula yini?
15 Xa vunharhu, “tinyiko leti nga vanhu” ti vekiwe hi xikongomelo xa leswaku “hinkwerhu hi fikelela vun’we eka ripfumelo ni le ka vutivi lebyi kongomeke bya N’wana wa Xikwembu.” (Vaefesa 4:13) Xiga lexi nge “vun’we eka ripfumelo” a xi vuli ku va ni vun’we eka leswi hi swi pfumelaka ntsena, kambe ni vun’we bya hina tanihi vapfumeri. Kutani ke, lexi i xivangelo xin’wana xa ku va Xikwembu xi hi nyike “tinyiko leti nga vanhu”—ku kondletela vun’we exikarhi ka vanhu va xona. Xana va swi endlisa ku yini leswi?
16. Ha yini swi ri swa nkoka leswaku vakulu va hlakulela vun’we exikarhi ka vona?
16 Xo sungula, va fanele ku hlakulela vun’we exikarhi ka vona. Loko varisi va avanile, tinyimpfu ti nga honisiwa. Nkarhi wa nkoka lowu a wu fanele wu tirhiseriwa ku risa ntlhambi wu nga dyiwa hi minhlangano yo leha ni ku kanetana hi timhaka leti nga nyawuriki. (1 Timotiya 2:8) Swi nga endleka vakulu va nga twanani etimhakeni tin’wana leti ku vulavuriwaka ha tona, hikuva i vanhu lava nga ni vumunhu lebyi kumbexana byi hambanaka swinene. Vun’we a byi va siveli ku va ni mavonelo lama hambaneke kumbe ku phofula mavonelo ya vona hi ndlela leyinene loko va vulavula hi timhaka leti lavaka mavonelo yo hambana-hambana. Vakulu va hlayisa vun’we bya vona hi ku yingisana hi xichavo, va nga hlamuli hi magugu va nga si twa mhaka. Naswona, ntsendze loko ku nga ri na nsinya wa nawu wa Bibele lowu tluriwaka, un’wana ni un’wana u fanele a va ni moya wa ku pfumelelana ni van’wana ni ku seketela xiboho xa huvo ya vakulu. Moya wa ku pfumelelana wu kombisa leswaku va kongomisiwa hi “vutlhari lebyi humaka ehenhla,” lebyi nga “ni ku rhula, ku anakanyela.”—Yakobo 3:17, 18.
17. Vakulu va nga pfunisa ku yini leswaku ku tshama ku ri ni vun’we evandlheni?
17 Nakambe vakulu va xalamukela ku kondletela vun’we evandlheni. Loko mikhuva leyi tisaka ku avana—yo tanihi rihlevo leri vavisaka, mboyamelo wo anakanyela van’wana swo biha kumbe moya wa ku pfuxa timholovo—yi kavanyeta ku rhula evandlheni, va hatlisa va nyikela ndzayo leyi pfunaka. (Vafilipiya 2:2, 3) Hi xikombiso, vakulu va nga xiya vanhu lava sola-solaka ngopfu kumbe lava toloveleke ku nghenelela etimhakeni ta van’wana, kutani va hundzuka varhandzi va timhaka ta vanhu. (1 Timotiya 5:13; 1 Petro 4:15) Vakulu va ta ringeta ku pfuna vanhu vo tano ku xiya leswaku mukhuva lowu wu hambana ni leswi Xikwembu xi hi dyondziseke swona ni leswaku un’wana ni un’wana u fanele a “rhwala mpingu wakwe.” (Vagalatiya 6:5, 7; 1 Vatesalonika 4:9-12) Hi ku tirhisa Matsalwa, va ta hlamusela leswaku swilo swo tala Yehovha u swi siyela ripfalo ra hina, kutani ku nga vi na loyi a avanyisaka van’wana etimhakeni to tano. (Matewu 7:1, 2; Yakobo 4:10-12) Leswaku hi tirha swin’we hi vun’we, ku fanele ku va ni moya wa ku tshembana ni ku xiximana evandlheni. Hi ku nyikela ndzayo ya Matsalwa loko swi fanerile, “tinyiko leti nga vanhu” ti hi pfuna ku hlayisa ku rhula ni vun’we bya hina.—Varhoma 14:19.
Ku Sirhelela Ntlhambi
18, 19. (a) “Tinyiko leti nga vanhu” ti hi sirhelela eka vamani? (b) Hi rihi khombo rin’wana leri tinyimpfu ti faneleke ti sirheleriwa eka rona, naswona vakulu va teka goza rihi leswaku va sirhelela tinyimpfu?
18 Xa vumune, Yehovha u veke “tinyiko leti nga vanhu” ku hi sirhelela leswaku hi nga yengiwi “hi mheho yin’wana ni yin’wana ya ku dyondzisa hi mano ya vanhu, hi vukanganyisi eku kunguhateni ka xidyoho.” (Vaefesa 4:14) Rito ro sungula leri vulaka “mano” ku vuriwa leswaku ri vula “ku kanganyisa loko ku tlangiwa madayisi,” kumbe “vutshila bya ku tlanga madayisi.” Xana sweswo a swi hi tsundzuxi ndlela leyi vagwinehi va tirhisaka mano ha yona? Hi ririmi ra vukanganyisi, va tirhisa Matsalwa hi xikongomelo xo hambukisa Vakreste va ntiyiso eripfumelweni ra vona. Vakulu va fanele ku tshama va xalamukele ‘timhisi to tano leti tshikilelaka’!—Mintirho 20:29, 30.
19 Tinyimpfu ta Yehovha ti fanele ti sirheleriwa ni le makhombyeni man’wana. Murisi wa khale, Davhida, u sirhelele ntlhambi wa tata wakwe hi xivindzi eka swivandzana. (1 Samuwele 17:34-36) Ni namuntlha, ku nga va ni minkarhi leyi varisi lava khathalaka va Vakreste va faneleke va kombisa xivindzi leswaku va sirhelela ntlhambi eka mani na mani loyi a nga xanisaka kumbe ku tshikilela tinyimpfu ta Yehovha, ngopfu-ngopfu leti nga hlaseriwaka hi ku olova. Vakulu a va nge hlweli ku susa lava dyohaka hi vomu evandlheni, lava va tirhisaka mano, vukanganyisi ni marhengu yo karhi hi vomu leswaku va ya emahlweni ni swiendlo swo homboloka.b—1 Vakorinto 5:9-13; ringanisa Pisalema 101:7.
20. Hikwalaho ka yini hi nga titwaka hi hlayisekile hikwalaho ka nkhathalelo wa “tinyiko leti nga vanhu”?
20 Ha nkhensa swonghasi hikwalaho ka “tinyiko leti nga vanhu”! Hikwalaho ka nkhathalelo wa tona wa rirhandzu, hi titwa hi hlayisekile, hikuva ti hi ololoxa hi musa lowukulu, ti hi aka hi rirhandzu, ti hatlisa ku kondletela vun’we bya hina, naswona ti hi sirhelela hi xivindzi. Kambe, xana “tinyiko leti nga vanhu” ti fanele ti wu languta njhani ntirho wa tona evandlheni? Naswona hina hi nga swi kombisa njhani leswaku ha ti tlangela? Swivutiso leswi swi ta hlamuriwa eka xihloko lexi landzelaka.
[Tinhlamuselo ta le hansi]
a Eka vuhundzuluxeri bya Septuagint ya Xigriki, riendli leri fanaka leri hundzuluxeriweke ri va “ololoxa” ri tirhisiwe ni le ka Pisalema 17[16]:5, laha Davhida la tshembekaka a khongeleleke leswaku mikondzo yakwe yi kandziya emitileni ya Yehovha.
b Hi xikombiso, vona “Swivutiso Swa Vahlayi” eka nkandziyiso wa Xihondzo xo Rindza (xa Xinghezi) xa November 15, 1979, matluka 31-2, ni xihloko lexi nge “A Hi Nyenyeni Leswo Homboloka” enkandziyisweni wa January 1, 1997, matluka 26-9.
Wa Tsundzuka Xana?
◻ I vamani “tinyiko leti nga vanhu,” naswona ha yini Xikwembu xi va vekile evandlheni hi ku tirhisa Kreste?
◻ Vakulu va byi hetisisa njhani vutihlamuleri bya vona byo ololoxa ntlhambi?
◻ Vakulu va nga endla yini leswaku va aka vapfumeri-kulobye?
◻ Vakulu va nga byi hlayisa njhani vun’we bya vandlha?
[Xifaniso lexi nga eka tluka 10]
Ntwela-vusiwana wu pfuna vakulu leswaku va khutaza lava heleke matimba
[Xifaniso lexi nga eka tluka 10]
Vun’we exikarhi ka vakulu byi endla leswaku ku va ni vun’we evandlheni