Ha Yini U Pfumela Eka Yesu Kreste?

“HAMBI ku ri vanhu vo tala lava nga riki Vakreste va pfumela leswaku Yena a a ri mudyondzisi lonkulu ni la tlhariheke. Hakunene a a ri un’wana wa vanhu lava nga ni nkucetelo swinene, lava nga tshama va hanya.” (The World Book Encyclopedia) I mani “Loyi”? I Yesu Kreste, musunguri wa Vukreste.

Hambiswiritano, ku nga khathariseki leswi nsonga-vutivi leyi yi swi vulaka, vanhu va madzana ya timiliyoni eVuxeni ni kun’wana, a va n’wi tivi Yesu Kreste, eka vona wo va vito leri va nga ri tsundzuxiwaka hi tibuku ta xikolo xa le henhla. Hambi ku ri etikerekeni ta Vujagana, ku na vativi va vukhongeri ni vafundhisi lava vulaka leswaku entiyisweni a hi n’wi tivi Yesu kutani va pfuxa ku kanakana eka ntiyiso wa marungula ya mune lama nga kona ya vutomi byakwe (Tievhangheli) lama kumekaka eBibeleni.

Xana vatsari va Tievhangheli va nga va va tisungulele matimu ya vutomi bya Yesu? Nikatsongo! Will Durant, n’wamatimu la tivekaka swinene, endzhaku ka ku hlahluvisisa marungula wolawo ya Tievhangeli, u tsarile a ku: “Leswaku vanhu va nga ri vangani erixakeni rin’we va fanele va tisungulele rungula ra munhu wa matimba ni lonene swonghasi, loyi a tlakukeke swinene, wa mahanyelo lamanene ni loyi a kondleteleke swinene vumakwerhu bya vanhu, a ku ta va hlori leri nga khorwisiki ku tlula rihi na rihi leri tsariweke eka Tievhangeli. Endzhaku ka malembe-xidzana mambirhi ya ku Xopaxopiwa ka Matsalwa, nhlamuselo ya vutomi, mukhuva ni dyondzo ya Kreste swa ha ri erivaleni hi ndlela leyi twisisekaka, naswona swi vumba xifaniso lexi hlamarisaka swinene eka vutomi bya munhu wa le Vupela-dyambu.”

Hambiswiritano, ka ha ri ni vanhu lava nga riki na mhaka na Yesu Kreste hikwalaho ka leswi swi endliweke hi lava va vulaka leswaku i valandzeri va yena. Van’wana eJapani va nga vula va ku, ‘Va lahlele bomo ya athomo eNagasaki. Kasi eNagasaki ku ni Vakreste vo tala ku tlula madoroba yo tala eJapani.’ Kambe, xana u nga sola n’anga loko muvabyi a tsandzeka ku landzela nkongomiso wa yona? Vanhu vo tala lava vulaka leswaku i Vakreste i khale va wu honisile nkongomiso wa Yesu wa ku herisa maxangu ya vanhu. Kambe, Yesu u nyikele murhi wa swiphiqo swa vutomi bya hina bya siku ni siku swin’we ni wa maxangu ya vanhu emisaveni hinkwayo. Hi yona mhaka leyi hi ku rhambaka leswaku u hlaya xihloko lexi landzelaka kutani u tivonela hi wexe leswaku a a ri munhu wa muxaka muni.