Ku Pfuna Vanhu Leswaku Va Va Vanghana Va Yehovha

“A nga kona loyi a taka eka Tatana handle ko ta ha mina.”—YOHANE 14:6.

1. I xileriso xihi lexi Yesu a xi nyikeke vadyondzisiwa vakwe loko a pfuxiwe eku feni, naswona ku ve ni vuyelo byihi loko Timbhoni ta Yehovha ti xi landzela?

YESU KRESTE u lerise valandzeri vakwe ku “endla vanhu va matiko hinkwawo va va vadyondzisiwa, [va] va khuvula hi vito ra Tatana ni ra N’wana ni ra moya lowo kwetsima.” (Matewu 28:19) Eka malembe ya khume lama hundzeke, Timbhoni ta Yehovha ti pfune vanhu vo tlula timiliyoni tinharhu leswaku va va vanghana va Xikwembu, hi ku famba ka nkarhi ti va khuvula, va kombisa ku tinyiketela ka vona eka xona, leswaku va endla ku rhandza ka xona. Swa hi tsakisa hakunene ku va pfuna leswaku va va vanghana va Xikwembu!—Yakobo 4:8.

2. Hambileswi ku khuvuriwaka vanhu vo tala lavantshwa, i yini leswi endlekeke?

² Hambiswiritano, ematikweni man’wana laha ku khuvuriweke vadyondzisiwa vo tala lavantshwa, nhlayo ya vahuweleri va Mfumo a yi kulanga hi ndlela leyi fanaka. Kunene, van’wana va vona va file, naswona lava faka lembe na lembe va endla kwalomu ka phesente yin’we. Hambiswiritano, eka malembe ma nga ri mangani lama hundzeke, ku we vanhu vo hlayanyana hi swivangelo swo karhi. Ha yini? Xihloko lexi ni lexi landzelaka swi ta kombisa ndlela leyi vanhu va vaka vanghana va Yehovha ha yona, ni swivangelo swa ku wa ka van’wana.

Xikongomelo Xa Ku Chumayela Ka Hina

3. (a) Ntirho lowu byarhisiweke vadyondzisiwa va Yesu wu fambisana njhani ni wa ntsumi leyi ku vulavuriwaka ha yona eka Nhlavutelo 14:6? (b) Hi yihi ndlela leyi vonakaka yi humelela eku endleni ka leswaku vanhu va tsakela rungula ra Mfumo, kambe ku ni xiphiqo xihi?

³ ‘Enkarhini lowu wa makumu,’ vadyondzisiwa va Yesu va lerisiwe ku hangalasa “vutivi bya ntiyiso” bya “mahungu lamanene lawa ya mfumo.” (Daniyele 12:4; Matewu 24:14) Ntirho wa vona wu fambisana ni wa ntsumi leyi a “yi ri ni mahungu lamanene lama nga heriki leswaku yi ma vula tanihi marungula lama tsakisaka eka lava tshamaka emisaveni, ni le ka matiko hinkwawo ni tinyimba hinkwato ni tindzimi hinkwato ni vanhu hinkwavo.” (Nhlavutelo 14:6) Emisaveni leyi, leyi khomekeke swinene hi swilo swa nyama, hakanyingi ndlela leyi humelelaka swinene yo endla leswaku vanhu va tsakela Mfumo wa Xikwembu ni ku va pfuna leswaku va va vanghana va Yehovha, i ku va byela hi ta ntshembo wo hanya hi masiku emisaveni leyi nga paradeyisi. Hambileswi leswi swi twalaka, lava va tihlanganisaka ni vanhu va Xikwembu leswaku va nghena eParadeyisini ntsena, a va ri namarhelanga kahle gondzo ro khuma leri yisaka evuton’wini.—Matewu 7:13, 14.

4. Hi ku ya hi Yesu ni ntsumi leyi hahaka empfhukeni, hi xihi xikongomelo xa ntirho wa hina wo chumayela?

⁴ Yesu u te: “Leswi swi vula vutomi lebyi nga heriki‚ ku nghenisa ka vona vutivi ha wena, Xikwembu xi ri xin’we xa ntiyiso‚ ni loyi u n’wi rhumeke‚ Yesu Kreste.” (Yohane 17:3) Ntsumi leyi hahaka empfhukeni yi twarisa “mahungu lamanene lama nga heriki,” yi tlhela yi byela lava tshamaka emisaveni yi ku: “Chavani Xikwembu mi xi vangamisa, hikuva nkarhi wa ku avanyisiwa hi xona wu fikile, kutani gandzelani Loyi a endleke tilo ni misava ni lwandle ni minseledyana ya mati.” (Nhlavutelo 14:7) Hikokwalaho, xikongomelo lexikulu xa ku chumayela ka hina mahungu lamanene i ku pfuna vanhu leswaku va va vanghana va Yehovha ha Kreste Yesu.

Vutihlamuleri Bya Hina eNtirhweni Wa Yehovha

5. Hi wahi marito ya Pawulo ni ya Yesu lama kombisaka leswaku hi endla ntirho wa Yehovha, ku nga ri wa hina?

⁵ Loko a tsalela Vakreste-kulobye lava totiweke, muapostola Pawulo u vulavula hi “vutirheli bya ku vuyelelana,” a vula leswaku Xikwembu xi endla leswaku vanhu va vuyelelana na xona exisekelweni xa gandzelo ra nkutsulo ra Yesu Kreste. Pawulo u vula leswaku ‘swi fana niloko Xikwembu xi endla xikombelo ha hina,’ ni leswaku “leswi hi nga vakhomeri va Kreste ha kombela hi ku: ‘Vuyelelanani ni Xikwembu.’” Yoleyo i miehleketo leyi khutazaka swinene! Hambi hi “vayimeri lava khomelaka Kreste” kumbe varhumiwa lava nga ni ntshembo wa ku hanya emisaveni, hi nga tshuki hi rivala leswaku lowu i ntirho wa Yehovha, a hi wa hina. (2 Vakorinto 5:18-20) I Xikwembu hakunene lexi endlaka leswaku vanhu va va vanghana va xona, xi tlhela xi dyondzisa lava taka eka Kreste. Yesu u te: “Ku hava munhu loyi a nga taka eka mina handle ka loko Tatana, loyi a ndzi rhumeke, a n’wi koka; naswona ndzi ta n’wi pfuxa hi siku ro hetelela. Ku tsariwe leswi eka Vaprofeta, ‘Kutani hinkwavo va ta dyondzisiwa hi Yehovha.’ Un’wana ni un’wana loyi a tweke Tatana a tlhela a dyondza u ta eka mina.”—Yohane 6:44, 45.

6. Yehovha u ma tsekatsekisa njhani matiko sweswi, naswona hi nkarhi lowu fanaka, i vamani lava kumaka nsirhelelo ‘endlwini’ yakwe ya vugandzeri?

⁶ Emasikwini lawa ya makumu, xana Yehovha u va endla njhani vanhu leswaku va va vanghana vakwe, kutani a va pfulela “nyangwa ya ripfumelo”? (Mintirho 14:27; 2 Timotiya 3:1) Ndlela ya nkoka i ku va Timbhoni ta yena ti twarisa marungula yakwe ya ku ponisiwa ni ya ku avanyisiwa ka mafambiselo lawa yo biha ya swilo. (Esaya 43:12; 61:1, 2) Ku twarisiwa ka rungula leri emisaveni hinkwayo ku tsekatsekisa matiko—ku nga xikombiso xa ndzoviso wo hetisisa vuavanyisi lowu nga ta landzela ku nga ri khale. Hi nkarhi lowu fanaka, vanhu lava nga va “risima” emahlweni ka Xikwembu va humesiwa emafambiselweni lawa kutani va kuma nsirhelelo ‘endlwini’ ya xona ya vugandzeri bya ntiyiso. Xisweswo Yehovha u hetisisa marito yakwe ya vuprofeta lama tsariweke hi Hagayi lama nge: “Ndzi ta ninginisa matiko hinkwawo, kutani swilo leswi navelekaka swa matiko hinkwawo swi fanele swi nghena; naswona ndzi ta tata yindlu leyi hi ku vangama.”—Hagayi 2:6, 7, nhlamuselo ya le hansi ya NW; Nhlavutelo 7:9, 15.

7. Yehovha u ti pfula njhani timbilu ta vanhu a endla leswaku va va vanghana va yena ni N’wana wakwe?

⁷ Yehovha u pfula timbilu ta vanhu lava va chavaka Xikwembu—“swilo swo hlawuleka swinene eka matiko hinkwawo”—leswaku va “nyikela nyingiso eka swilo leswi vuriwaka” hi Timbhoni ta yena. (Hagayi 2:7, Jewish Publication Society; Mintirho 16:14) Tanihi le ka lembe-xidzana ro sungula, minkarhi yin’wana Yehovha u tirhisa tintsumi takwe leswaku ti kongomisa Timbhoni ta yena eka vanhu va timbilu letinene lava va huweleleke eka yena va kombela ku pfuniwa. (Mintirho 8:26-31) Loko vanhu va dyondza hi malunghiselelo lamanene lawa Xikwembu xi va endleleke wona hi ku tirhisa N’wana wa xona, Yesu Kreste, va va vanghana va Yehovha hikwalaho ka rirhandzu ra yena. (1 Yohane 4:9, 10) Ina, Xikwembu xi endla leswaku vanhu va va vanghana va xona ni va N’wana wa xona hikwalaho ka “tintswalo [ta xona] ta rirhandzu” kumbe “rirhandzu ro tshembeka.”—Yeremiya 31:3, nhlamuselo ya le hansi ya NW.

Yehovha U Endla Vamani Leswaku Va Va Vanghana Vakwe?

8. I vanhu va muxaka muni lava Yehovha a va endlaka vanghana vakwe?

⁸ Yehovha u endla leswaku lava va N’wi lavaka va va vanghana vakwe ni N’wana wa yena. (Mintirho 17:27) Van’wana eka vona i vanhu lava “hlunameke, la’v̌a rilaka hikwalaho ka manyala hikwawo la’ma endliwaka” eVujaganini, kahle-kahle emisaveni hinkwayo. (Ezekiyele 9:4) Va “[khathala] hi xilaveko xa vona xa moya.” (Matewu 5:3) Kunene, i “vanhu lavo rhula [“titsongahataka,” nhlamuselo ya le hansi ya NW] va misava,” lava nga ta tshama hilaha ku nga heriki emisaveni leyi nga paradeyisi.—Sofoniya 2:3, NW.

9. Yehovha u swi vonisa ku yini loko vanhu “va ri ni mboyamelo lowunene eka vutomi lebyi nga heriki,” naswona u endla njhani leswaku va va vanghana vakwe?

⁹ Yehovha u tiva mbilu ya munhu. Hosi Davhida u byele n’wana wakwe Solomoni a ku: “Yehova [u] kamba timbilu hikwato, kutani a tiv̌isisa makungu hikwawo ya ku anakanya. Kungaku loko u [n’wi] lav̌isisa, u ta ṅwi kuma.” (1 Tikronika 28:9) Hi ku ya hi xiyimo xa munhu xa mbilu ni moya wakwe, kumbe langutelo leri n’wi lawulaka, Yehovha u kota ku vona loko munhu wa kona a ta ma amukela malunghiselelo yakwe ya ku rivalela swidyoho ni ntshembo wa ku hanya hi masiku emafambiselweni lamantshwa yo lulama ya Xikwembu. (2 Petro 3:13) Hi ku tirhisa Rito rakwe, leri Timbhoni takwe ti chumayelaka ni ku dyondzisa ha rona, Yehovha u endla leswaku ‘hinkwavo lava nga ni mboyamelo lowunene eka vutomi lebyi nga heriki’ va va vanghana vakwe ni N’wana wa yena, kutani ‘va va vapfumeri.’—Mintirho 13:48.

10. I yini leswi kombaka leswaku ku va Yehovha a endla leswaku van’wana va va vanghana vakwe kambe van’wanyana va nga vi vona a swi vuli leswaku i nchumu lowu a wu kunguhateke ka ha ri emahlweni?

¹⁰ Xana ku va Yehovha a endla leswaku van’wana va va vanghana va yena kambe van’wana va nga vi vanghana va yena swi vula leswaku i nchumu lowu a wu kunguhataka ka ha ri emahlweni? Doo! Ku va Xikwembu xi endla leswaku vanhu va va vanghana va xona swi titshege hi mboyamelo wa vona. Xi va pfumelela ku tirhisa ntshunxeko wa vona wa ku tihlawulela. Namuntlha Yehovha u hlawurisa vaaki va misava swilo leswi a swi hlawuriseke Vaisrayele malembe yo tlula 3 000 lama hundzeke, loko Muxe a te: “Nḍi v̌ekile namuntlha e mahlweni ka wena e v̌utomi ni ŝinene, e rifu ni ku biha; . . . Namuntlha nḍi v̌itana tilo ni misav̌a, ti v̌a timboni ta mina e mahlweni ka ṅwina, leŝaku nḍi v̌ekile mahlweni ka wena e v̌utomi ni rifu, e ku kateka ni ku rukana; hlawula v̌utomi leŝaku u hanya, wena ni v̌atukulu v̌a wena, u ri kari u ranḍa Yehova, Šikwembu ša wena, u yingisa rito ra yena ni ku namarela yena; hikuv̌a hi yena l’a nga ku hanya ka wena, ni ku leha ka masiku ya wena.”—Deteronoma 30:15-20.

11. Vaisrayele a va fanele va hlawula vutomi hi ndlela yihi?

¹¹ Xiya leswaku Vaisrayele a va fanele va hlawula vutomi ‘hi ku rhandza Yehovha, hi ku yingisa rito rakwe ni hi ku namarhela yena.’ Loko ku vuriwa marito wolawo, Vaisrayele a va nga si ri teka Tiko leri Tshembisiweke. A va ri eTimbaleni ta Mowabu, va lunghekela ku pela Nambu wa Yordani va ya nghena eKanana. Hambileswi a swi fanerile leswaku va yisa mianakanyo ya vona eka tiko “le’rikulu, le’ro saseka,” tiko “ra nṭwamba ni v̌ulombe” leri a va ta ri kuma ku nga ri khale, ku hetiseka ka leswi a va swi languterile a ku titshege hi ku rhandza ka vona Yehovha, ku yingisa ka vona rito rakwe ni ku namarhela yena. (Eksoda 3:8) Muxe u veke mhaka leyi erivaleni, a ku: “Loko u ta yingisa swileriso swa Yehovha Xikwembu xa wena, leswi ndzi ku lerisaka swona namuntlha, leswaku u rhandza Yehovha Xikwembu xa wena, u famba etindleleni takwe naswona u hlayisa swileriso swakwe ni milawu yakwe ni swiboho swakwe swa vuavanyisi, kutani u ta ya emahlweni u hanya hakunene, u andza, naswona Yehovha Xikwembu xa wena u ta ku katekisa etikweni leri u yaka u ya ri teka.”—Deteronoma 30:16, NW.

12. Xikombiso xa Vaisrayele xi fanele xi hi dyondzisa yini hi ntirho wa hina wa ku chumayela ni ku dyondzisa?

¹² Xana mhaka leyi a yi fanelanga yi hi dyondzisa swo karhi hi ntirho wa hina wa ku chumayela ni wa ku dyondzisa enkarhini lowu wa makumu? Hi anakanya hi misava leyi taka ya Paradeyisi naswona hi vulavula ha yona evutirhelini bya hina. Kambe hina kun’we ni vadyondzisiwa lava hi va endlaka a hi nge ku voni ku hetiseka ka xitshembiso lexi loko hi tirhela Xikwembu hi swivangelo swa vutianakanyi. Ku fana ni Vaisrayele, hina ni lava hi va dyondzisaka hi fanele hi dyondza ku ‘rhandza Yehovha, hi yingisa rito rakwe ni ku namarhela yena.’ Loko hi endla vutirheli bya hina hi ri karhi hi tsundzuka leswi, kahle-kahle hi ta va hi khomisana ni Xikwembu eku endleni ka leswaku vanhu va va vanghana va xona.

Vatirhi-kulobye Ni Xikwembu

13, 14. (a) Hi ku ya hi 1 Vakorinto 3:5-9, swi endlekisa ku yini leswaku hi va vatirhi-kulobye ni Xikwembu? (b) Ku fanele ku dzunisiwa mani hikwalaho ka ku andza kwihi ni kwihi, naswona ha yini?

¹³ Pawulo u teke ku tirhisana ni Xikwembu a ku fanisa ni ku rima nsimu. U tsarile: “Kutani Apolosi i yini? Ina, Pawulo i yini? I vatirheli lava mi veke vapfumeri ha vona, hilaha Hosi yi nyikeke un’wana ni un’wana wa vona hakona. Mina ndzi byarile, Apolosi a cheleta, kambe Xikwembu hi xona lexi hambeteke xi swi kurisa; loyi a byalaka a hi nchumu, hambi loyi a cheletaka, kambe i Xikwembu lexi xi swi kurisaka. Kutani loyi a byalaka ni loyi a cheletaka i van’we, kambe munhu un’wana ni un’wana u ta kuma hakelo ya yena hi ku ya hi ntirho wa yena. Hikuva hina hi vatirhi-kulobye ni Xikwembu. N’wina mi nsimu ya Xikwembu leyi rimiwaka.”—1 Vakorinto 3:5-9.

¹⁴ Tanihi vatirhi-kulobye ni Xikwembu, hi fanele hi byala “rito ra mfumo” hi ku tshembeka etimbilwini ta vanhu, kutani hi cheleta ku tsakela kwihi ni kwihi loku va ku kombiseke, hi ku endla maendzo yo vuyela ni tidyondzo ta Bibele leti lunghiseleriweke kahle. Loko misava, ku nga mbilu, yi ri yinene, Yehovha u ta endla ntirho wa yena wa ku mirisa mbewu ya ntiyiso wa Bibele yi va ximilana lexi tswalaka mihandzu. (Matewu 13:19, 23) U ta endla leswaku munhu wa kona a va munghana wa yena ni N’wana wa yena. Hikwalaho, ku andza kwihi ni kwihi ka nhlayo ya vahuweleri va Mfumo ku vangiwa hi ntirho lowu Yehovha a wu endlaka etimbilwini ta vanhu, a mirisa mbewu ya ntiyiso ni ku endla leswaku vanhu vo tano va va vanghana vakwe ni N’wana wa yena.

Ntirho Wo Aka Lowu Nga Ta Tshama Wu Ri Kona

15. I xifaniso xihi lexi Pawulo a xi tirhiseke leswaku a kombisa ndlela leyi hi pfunaka van’wana ha yona leswaku va va ni ripfumelo?

¹⁵ Hambileswi ku andza ku hi tsakisaka, hi swi lava hi mbilu hinkwayo ku vona vanhu va hambeta va rhandza Yehovha, va yingisa rito rakwe ni ku namarhela yena. Swa hi vavisa loko hi vona van’wana va hola ni ku wa. Xana swi kona leswi hi nga swi endlaka leswaku hi sivela leswi? Eka xifaniso xin’wana, Pawulo u kombisa ndlela leyi hi nga pfunaka van’wana ha yona leswaku va va ni ripfumelo. Wa tsala: “A ku na munhu loyi a nga vekaka masungulo man’wanyana loko ma nga ri lama vekiweke, ku nga Yesu Kreste. Loko mani na mani a aka ehenhla ka masungulo lawa hi nsuku, silivhere, maribye ya risima, leswi endliweke hi ntsandza, byanyi, mahlanga, ntirho wa un’wana ni un’wana wu ta vonaka, hikuva siku ra kona ri ta wu kombisa, wu ta hlavuteriwa hi ku tirhisa ndzilo; kutani ndzilo wona wu ta swi kombisa leswaku ntirho wa un’wana ni un’wana i wa muxaka muni.”—1 Vakorinto 3:11-13.

16. (a) Swifaniso swimbirhi leswi tirhisiweke hi Pawulo kahle-kahle swi hambana njhani? (b) Swi nga endlekisa ku yini leswaku ntirho wo aka lowu hi wu endleke wu kumeka wu nga enerisi naswona wu ri lowu tshwaka?

¹⁶ Exifanisweni xa Pawulo xa nsimu, ku mila swi titshege hi ku byala hi vukheta, ku cheleta nkarhi na nkarhi ni ku katekisiwa hi Xikwembu. Xifaniso lexin’wana xa muapostola xi kandziyisa vutihlamuleri bya mutirheli la nga Mukreste eka leswi humelelaka hi ntirho wa yena wa ku aka. Xana u ake ehenhla ka masungulo lama tiyeke hi swilo swo tiya? Pawulo wa tsundzuxa: “Un’wana ni un’wana a a tshame a languta ndlela leyi a akaka ha yona.” (1 Vakorinto 3:10) Endzhaku ka loko hi endle leswaku munhu a kombisa ku tsakela hi ku n’wi byela hi ta ntshembo wa ku hanya hi masiku eParadeyisini, xana hi n’wi dyondzisa masungulo ya vutivi bya Matsalwa ntsena, kutani hi kandziyisa ngopfu leswi munhu a faneleke a swi endla leswaku a kuma vutomi lebyi nga heriki? Xana hi dyondzisa vanhu mhaka yin’we ntsena leyi nge: ‘Loko u lava ku hanya hi masiku eParadeyisini, u fanele u dyondza, u ya eminhlanganweni ni ku hlanganyela entirhweni wo chumayela’? Loko swi ri tano, ripfumelo ra munhu wo tano a hi ri aki emasungulweni lama tiyeke, naswona leswi hi swi akaka swi nga hisiwa hi ndzilo wa miringo kumbe swi nga yimi nkarhi wo leha. Ku ringeta ku endla leswaku vanhu va va vanghana va Yehovha hi ku va ni ntshembo wa ku hanya eParadeyisini ntsena, hikwalaho ka malembe lama nga riki mangani lawa va n’wi tirheleke ha wona, swi fana ni ku aka hi “ntsandza, byanyi, mahlanga.”

Ku Va Ni Rirhandzu Eka Xikwembu Ni Le Ka Kreste

17, 18. (a) I yini leswi faneleke swi endliwa leswaku ripfumelo ra munhu ri khomelela? (b) Hi nga n’wi pfuna njhani munhu leswaku a pfumelela Kreste a tshama embilwini yakwe?

¹⁷ Leswaku ripfumelo ri khomelela, u fanele u va ni vuxaka na Yehovha Xikwembu ha Yesu Kreste. Tanihi vanhu lava nga hetisekangiki, hi nga va ni vuxaka byo tano lebyi rhuleke na Xikwembu hi vito ra N’wana wa xona ntsena. (Varhoma 5:10) Tsundzuka leswaku Yesu u te: “A nga kona loyi a taka eka Tatana handle ko ta ha mina.” Ku pfuna van’wana leswaku va va ni ripfumelo, “a ku na munhu loyi a nga vekaka masungulo man’wanyana loko ma nga ri lama vekiweke, ku nga Yesu Kreste.” Xana sweswo swi katsa yini?—Yohane 14:6; 1 Vakorinto 3:11.

¹⁸ Ku endla Kreste masungulo yo aka ehenhla ka wona swi vula ku dyondzisa hi ndlela leyi xichudeni xa Bibele xi nga ta va ni rirhandzu lerikulu eka Yesu hikwalaho ko xi tiva kahle xikhundlha xa Yena tanihi Mukutsuri, Nhloko ya vandlha, Muprista Lonkulu la nga ni rirhandzu kun’we ni Hosi leyi fumaka. (Daniyele 7:13, 14; Matewu 20:28; Vakolosa 1:18-20; Vaheveru 4:14-16) Swi vula ku endla leswaku Yesu a va munhu wa xiviri hakunene eka vona lerova swi fana ni loko a tshama etimbilwini ta vona. Hi fanele hi va khongelela hilaha Pawulo a khongeleleke Vakreste va le Efesa hakona. U tsarile a ku: “Ndzi nkhinsama eka Tatana, . . . leswaku a mi pfumelela . . . leswaku hi ripfumelo ra n’wina Kreste a tshama etimbilwini ta n’wina hi rirhandzu; ku endlela leswaku mi dzima timitsu ni ku simekiwa emasungulweni.”—Vaefesa 3:14-17.

19. Byi fanele byi va byihi vuyelo bya ku endla leswaku timbilu ta swichudeni swa hina swa Bibele ti rhandza Kreste, kambe ku fanele ku dyondzisiwa yini?

¹⁹ Loko hi aka hi mukhuva lowu nga ta endla leswaku timbilu ta swichudeni swa hina ti rhandza Kreste, leswi swi ta endla leswaku ti rhandza na Yehovha Xikwembu. Rirhandzu ra Yesu, ndlela leyi a titwaka ha yona ni ntwela-vusiwana swi ti kombisa kahle timfanelo ta Yehovha. (Matewu 11:28-30; Marka 6:30-34; Yohane 15:13, 14; Vakolosa 1:15; Vaheveru 1:3) Kutani loko vanhu va tiva Yesu ni ku n’wi rhandza, va ta tiva na Yehovha, va tlhela va n’wi rhandza.a (1 Yohane 4:14, 16, 19) Hi fanele hi dyondzisa swichudeni swa Bibele leswaku hinkwaswo leswi Kreste a swi endleleke vanhu a swi huma eka Yehovha, kutani hi fanele hi nkhensa Yena, hi n’wi dzunisa ni ku n’wi gandzela tanihi ‘Xikwembu xa ku ponisiwa ka hina.’—Pisalema 68:19, 20; Esaya 12:2-5; Yohane 3:16; 5:19.

20. (a) Hi nga va pfuna njhani vanhu leswaku va va vanghana va Xikwembu ni N’wana wa xona? (b) Ku ta kambisisiwa yini eka xihloko lexi landzelaka?

²⁰ Tanihi vatirhi-kulobye ni Xikwembu, a hi pfuneni vanhu leswaku va va vanghana va xona ni N’wana wa xona, hi va pfuna ku va ni rirhandzu ni ripfumelo etimbilwini ta vona. Xisweswo Yehovha u ta va munhu wa xiviri eka vona. (Yohane 7:28) Ha Kreste, va ta va ni vuxaka lebyikulu na Xikwembu, naswona va ta xi rhandza ni ku xi namarhela. Ntirho wa vona lowu va wu endlaka hi rirhandzu a va nge wu pimeli nkarhi wo karhi, kambe va ta kombisa ripfumelo ra leswaku switshembiso leswinene swa Yehovha swi ta hetiseka hi nkarhi wa kona. (Swirilo 3:24-26; Vaheveru 11:6) Hambiswiritano, loko hi ri karhi hi pfuna van’wana leswaku va va ni ripfumelo, ntshembo ni rirhandzu, hi fanele hi aka ripfumelo ra hina lerova ri fana ni xikepe xo tiya, lexi kotaka ku langutana ni swidzedze swa matimba. Sweswo swi ta kambisisiwa eka xihloko lexi landzelaka.

[Nhlamuselo ya le hansi]

Mpfuxeto

◻ Hakanyingi hi endlisa ku yini leswaku vanhu va tsakela rungula ra Mfumo, kambe ku ni khombo rihi?

◻ I vanhu va muxaka muni lava Yehovha a va endlaka vanghana vakwe ni N’wana wakwe?

◻ Ku nghena ka Vaisrayele eTikweni leri Tshembisiweke a ku titshege ha yini, naswona hi nga dyondza yini eka swona?

◻ I xiphemu xihi lexi hi nga na xona eku pfuneni ka vanhu leswaku va va vanghana va Yehovha ni N’wana wakwe?

[Xifaniso lexi nga eka tluka 10]

Hambiloko hi tivisa vanhu hi ta ntshembo wa ku hanya hi masiku eParadeyisini, xikongomelo-nkulu xa hina i ku endla leswaku va va vanghana va Yehovha

[Swifaniso leswi nga eka tluka 13]

Maendzo ya hina yo vuyela ma nga humelela swinene loko hi lunghiselela kahle