U Pfunetile Eku Hangalaseni Ka Ku Vonakala “Ku Yisa eMakun’wini Ya Misava”
MUAPOSTOLA PAWULO u tirhisiwe ku hangalasa ku vonakala ka moya “ku yisa emakun’wini ya misava.” Hikwalaho, vo tala “lava a va ri ni mboyamelo lowunene eka vutomi lebyi nga heriki va ve vapfumeri.”—Mintirho 13:47, 48; Esaya 49:6.
Ku navela lokukulu ka ku hangalasa ku vonakala ka moya ku tlhele ku vonakala eka matshalatshala ya Vukreste ya vutomi bya ku tinyiketela ni ku phikelela ka William Lloyd Barry, xirho xa Huvo leyi Fumaka ya Timbhoni ta Yehovha. Makwerhu Barry u fe hi July 2, 1999, loko a ri karhi a nyikela nkulumo entsombanweni wa muganga le Hawaii.
Lloyd Barry u velekiwe eNew Zealand hi December 20, 1916. Mana wa yena ni tata wa yena a va yi tsakela swinene mintiyiso ya Bibele leyi a yi kumeka etibukwini ta C. T. Russell, leti a ti hangalasiwa hi Watch Tower Bible and Tract Society. Hikwalaho, Makwerhu Barry u kulele endyangwini lowu tinyiketeleke eVukresteni.
Hambileswi Makwerhu Barry a a tsakela mintlangu ni dyondzo, naswona a ri ni digri ya sayense, u hlayise langutelo ra yena ra ku hisekela timhaka ta moya. Xisweswo, hi January 1, 1939, u nghenele vutirheli bya nkarhi hinkwawo, a va xirho xa ndyangu wa Bethele ehofisini ya Sosayiti le Australia. Endzhaku ka loko hulumendhe yi yirise Sosayiti hi 1941, Makwerhu Barry u tshame a khomekile entirhweni wa le hofisini, minkarhi yin’wana a averiwa ku tsala marungula ya ku khutaza vapfumeri-kulobye. U tlhele a va xikombiso lexinene eku rhangeleni entirhweni wa le rivaleni.
Hi February 1942, Makwerhu Barry u tekane ni nandza un’wana la nga entirhweni wa nkarhi hinkwawo. Nsati wa yena la rhandzekaka, Melba, u tirhe na yena hi ku tshembeka malembe hinkwawo etindhawini to tala ta misava. Va teke goza lerikulu ro ya tirha ensin’wini ya le matikweni mambe hi ku nghena entlaweni wa vu-11 wa Xikolo xa Bibele xa Gilead xa Watchtower le United States. Xiavelo xa vona a xi ri laha van’wana a va ta ku teka ku ri ‘emakun’wini ya misava’—Japani. Endzhaku ko fika kwalaho hi November 1949, va sungule ku tirha tanihi varhumiwa edorobeni ra hlaluko ra Kobe. Enkarhini wolowo, a ko va vanhu va 12 ntsena lava a va chumayela mahungu lamanene eJapani. Makwerhu Barry u dyondze ririmi ni mikhuva ya kaya ra yena lerintshwa naswona u ma rhandze swinene Majapani, lawa a ma pfuneke malembe ya 25 lama landzeleke. Ku rhandza ka yena “lava a va ri ni mboyamelo lowunene eka vutomi lebyi nga heriki” ku vonake eka vamakwerhu va Vakreste lava a va andza eJapani, va n’wi pfuna leswaku a humelela eku languteleni ka rhavi hi makume ya malembe.
Exikarhi ka 1975, loko ku ri ni Timbhoni ta kwalomu ka 30 000 eJapani, va ka Barry va rhurhiseriwe eBrooklyn, le New York. Tanihi Mukreste la totiweke hi moya, Makwerhu Barry u rhambiwe leswaku a ta tirha tanihi xirho xa Huvo leyi Fumaka ya Timbhoni ta Yehovha. (Varhoma 8:16, 17) Ntokoto wa yena wo tsala wu tikombe wu pfuna swinene eka xiavelo xa yena lexintshwa eNdzawulweni ya Vutsari. Naswona ntokoto wa yena lowukulu malunghana ni mafambiselo ya rhavi ni nhlengeletano ya misava hinkwayo wu pfune swinene loko a va xirho xa Komiti yo Kandziyisa ya Huvo leyi Fumaka.
Loko malembe ma ri karhi ma famba, Makwerhu Barry u hambete a rhandza ndhawu ya le Vuxeni ni vanhu va kona. Swichudeni swa le Xikolweni xa Gilead swin’we ni swirho swa ndyangu wa Bethele a swi tiyiseka leswaku tinkulumo ta yena ni tinhlamulo ta yena swi ta kandziyisa timhaka leti khutazaka ta mayelana ni vo tala lava tirheke entirhweni wa vurhumiwa. Ntirho wo chumayela hi Mfumo ‘emakun’wini ya misava’ wu kombisiwe kahle hakunene loko Makwerhu Barry a rungula mintokoto ya yena hi ku hiseka. Yin’wana ya yona yi boxiwe eka mhaka ya yena n’wini leyi humesiweke eka Xihondzo xo Rindza xa September 15, 1960.
Ha tiyiseka leswaku tanihi leswi Makwerhu Barry a nga ‘mudyandzhaka swin’we na Kreste,’ ku tsakela ka yena lava nga ni “mboyamelo lowunene eka vutomi lebyi nga heriki” ku ta tshama ku ri kona. Ina, u ta tsundzukiwa swinene hi vanhu hinkwavo lava a va n’wi tiva ni ku n’wi rhandza tanihi wanuna la hisekelaka swilo swa moya, la tinyiketeleke hi ku helela eka Yehovha naswona a a rhandza vanhu va Xikwembu. Kambe, ha tsaka leswi Makwehu Barry a tiyiseleke hi ku tshembeka ku ya fikela emakumu ka pfhumba ra yena ra laha misaveni.—Nhlavutelo 2:10.
[Xifaniso lexi nga eka tluka 16]
Lloyd Barry na John Barr loko ku humesiwa “Insight on the Scriptures” hi 1988
[Xifaniso lexi nga eka tluka 16]
Mathwasana ya ntlawa wa vu-11 wa Gilead, ma hlangana eJapani endzhaku ka malembe ya 40