Tilunghiselele Gidi Ra Malembe Leri Nga Ra Nkoka!

KU Fuma ka Kreste ka Gidi ra Malembe ku ta tisela vanhu mikateko ya ntsandza-vahlayi. Ehansi ka nkongomiso wa rirhandzu wa Yesu, vanhu va ta kutsuriwa exiyin’weni lexi nga tsakisiki va va lava hetisekeke hi ndlela yo hlamarisa. Anakanya hi leswi sweswo swi nga vulaka swona eka wena. Rihanyo leri tsakisaka! Anakanya u pfuka mixo wun’wana ni wun’wana u titwa u antswa ku tlula siku leri hundzeke. Timiliyoni ta vavanuna, vavasati ni vana ti langutele ku hanya enkarhini wolowo lowu tsakisaka. Va swi langutele hi mahlo-ngati, va swi khongelela. Ku dyondza ka vona Bibele ku va khorwisile leswaku mikateko leyi yi nga va ya vona leswaku va tiphina hi yona.

Hambiswiritano, loko Yesu Kreste a nga si sungula Ku Fuma ka yena ka Gidi ra Malembe, u fanele a herisa vanhu hinkwavo lava lwisanaka ni ku fuma ka yena emisaveni. Leswi u ta swi endla enyimpini leyi vuriwaka Armagedoni eBibeleni. (Nhlavutelo 16:16) Vakreste va xiviri lava nga emisaveni a va nge lwi enyimpini yoleyo. I nyimpi ya Xikwembu. Naswona a yi nge lweriwi endhawini yin’we. Bibele yi vula leswaku yi ta fikelela ni le tindhawini ta le kule swinene ta misava. Lava lwisanaka ni ku fuma ka Kreste va ta dlayiwa. A nga kona la nga ta baleka!—Yeremiya 25:33.

Kutani Yesu u ta yisa nyingiso wa yena eka Sathana Diyavulosi ni madimona ya yena. Anakanya xivono xa kona, hilaha mutsari wa buku ya Nhlavutelo a xi voneke hakona: “Ndzi vona ntsumi [Yesu Kreste] yi xika hi le tilweni yi ri ni xilotlelo xa khele ro enta ni nketana leyikulu evokweni ra yona. Kavaloko yi khoma dragona, nyoka ya khale, ku nga Diyavulosi na Sathana, yi n’wi boha ku ringana malembe ya gidi.” (Nhlavutelo 20:1, 2) Endzhaku, Sathana ni madimona ya yena va ta loviseriwa makumu.—Matewu 25:41.

“Ntshungu lowukulu, lowu [ku nga riki] na munhu la kotaka ku wu hlaya,” wu ta pona Armagedoni. (Nhlavutelo 7:9) Kreste u ta kongomisa vanhu lava leswaku va vuyeriwa hilaha ku teleke “eminseledyaneni ya mati ya vutomi,” kukota murisi la kongomisaka tinyimpfu ta yena ematini lama ponisaka vutomi. (Nhlavutelo 7:17) Leswi Sathana ni madimona ya yena va nga ta ka va nga ha va siveli ku endla nhluvuko hi tlhelo ra moya, vaponi lava va Armagedoni hakatsongo-tsongo va ta pfuniwa leswaku va hlula mimboyamelo ya vona ya vudyoho kukondza va va lava hetisekeke!

Ehansi ka vulawuri bya rirhandzu bya Kreste, swiyimo swo tshama eka swona swi ta ya swi antswa hakatsongo-tsongo. Yehovha Xikwembu, hi ku tirhisa Yesu Kreste, u ta herisa hinkwaswo leswi vangelaka switlhavi ni nhlomulo. U “ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona.” (Nhlavutelo 21:4) Muprofeta Esaya u hetisisa xifaniso lexi hi ku: “Hi laha mahlo ya v̌o-fe-mahlo ma nga ta hanyanya, ni tindlev̌e le’ti siv̌ekeke ti nga ta pfuleka; ŝilema ŝi ta tlula kukota tinhlangu, kutani ririmi ra mbev̌ev̌e ri ta yimbelela hi ku ṭaka.” (Esaya 35:5, 6) Ni vafi, “lavakulu ni lavatsongo,” va ta tlhelela evuton’wini va ri ni ntshembo wa ku nga ha fi!—Nhlavutelo 20:12.

Ni sweswi, “ntshungu lowukulu” lowu nga ta pona Armagedoni wu karhi wa hlengeletiwa. Wu tilunghiselela Ku Fuma ka Kreste ka Gidi ra Malembe. Hambiloko wu nga swi tivi leswaku mfumo wolowo wu ta sungula rini ku fuma, wa tiyiseka leswaku hi nkarhi lowu faneleke wa Xikwembu, wu ta sungula. Na wena u nga va exikarhi ka vona, kambe u fanele u tilunghiselela—ku nga ri hi ku xavisa nhundzu ya wena ivi u ya endhawini yo karhi, kambe hi ku nghenisa vutivi lebyi kongomeke bya Yehovha Xikwembu ni swikongomelo swa yena, hi ku dyondza Bibele. Timbhoni ta Yehovha ti ta tsakela ku ku komba ndlela leyi ku dyondza Bibele ku nga ku vuyerisaka ha yona, wena ni ndyangu wa wena, handle ko hakela mali kumbe ku tiboha hi ndlela yo karhi. Vakandziyisi va magazini lowu va ta tsakela ku ku nyika rungula leri engetelekeke.

[Bokisi leri nga eka tluka 7]

Gidi Ra Malembe—Xana I Ra Xiviri Kumbe I Ro Fanekisela?

Tanihi leswi xiphemu lexikulu xa buku ya Bibele ya Nhlavutelo xi nga tsariwa hi ririmi ro fanekisela, ku tlakuka xivutiso. Ku vuriwa yini hi Ku Fuma ka Kreste ka Gidi ra Malembe loku boxiwaka eka Nhlavutelo? Xana i nkarhi wa xiviri kumbe i wo fanekisela?

Ku ni swikombiso swo tala leswi kombisaka leswaku ku vuriwa gidi ra malembe hi xiviri. Anakanya: Muapostola Pawulo u vulavula hi Ku Fuma ka Kreste ka Gidi ra Malembe tanihi siku, leri vanhu va nga ta avanyisiwa ha rona. (Mintirho 17:31; Nhlavutelo 20:4) Muapostola Petro u tsale leswaku siku rin’we (24 wa tiawara) eka Yehovha ri fana ni malembe ya gidi. (2 Petro 3:8) Sweswo a swi ta vula leswaku “siku” leri ra ku avanyisa ri lehe malembe ya gidi hi xiviri. Ku engetela kwalaho, eka Nhlavutelo 20:3, 5-7, marito lama nge “malembe ya gidi” ma boxiwa ka mune. Leswi swi vonaka swi kombisa nkarhi wa mpimo wo karhi.