Swivutiso Swa Vahlayi

Xana Timbhoni ta Yehovha ti wu languta njhani nhlawulo?

Ku ni misinya ya milawu leyi nga erivaleni leyi hlamuseriweke eBibeleni leyi endlaka malandza ya Xikwembu ma kota ku va ni langutelo leri faneleke malunghana ni mhaka leyi. Hambiswiritano, ku vonaka ku nga ri na nsinya wa nawu lowu lwisanaka ni ku hlawula. Hi xikombiso, a ku na xivangelo lexi nga sivelaka huvo ya vakongomisi leswaku va endla nhlawulo leswaku va fikelela swiboho leswi khumbaka nhlangano wa vona. Mavandlha ya Timbhoni ta Yehovha hakanyingi ma endla swiboho malunghana ni minkarhi ya minhlangano ni ku tirhisiwa ka timali ta vandlha hi ku tirhisa nhlawulo wa ku yimisa mavoko.

Kambe, ku vuriwa yini hi ku hlawula eka minhlawulo ya tipolitiki? Ina, ematikweni man’wana ya xidemokrati, vanhu va kwalomu ka 50 wa tiphesente a va yi eka nhlawulo hi siku leri ku hlawuriwaka ha rona. Timbhoni ta Yehovha a ti ngheneleli etimfanelweni ta van’wana ta ku hlawula; naswona a ti endli tsima ro lwisana ni minhlawulo ya tipolitiki. Ti xixima ni ku tirhisana ni valawuri lava hlawuriweke hilaha ku fanelaka eka minhlawulo yoleyo. (Varhoma 13:1-7) Leswaku yi ta n’wi hlawula kumbe a yi nge n’wi hlawuli loyi a yimelaka ku hlawuriwa, Mbhoni ya Yehovha yin’wana ni yin’wana yi tiendlela xiboho lexi sekeriweke eripfalweni leri leteriweke hi Bibele ni le ku twisiseni ka vutihlamuleri bya yona eka Xikwembu ni le ka Mfumo. (Matewu 22:21; 1 Petro 3:16) Leswaku ti endla xiboho lexi xa munhu hi xiyexe, Timbhoni ti xiya timhaka to hlayanyana.

Xo sungula, Yesu Kreste u byele valandzeri va yena a ku: “[A hi] xiphemu xa misava, tanihi leswi na mina ndzi nga riki xiphemu xa misava.” (Yohane 17:14) Timbhoni ta Yehovha ti wu tekela enhlokweni swinene nsinya lowu wa nawu. Leswi ‘va nga riki xiphemu xa misava,’ a va teki tlhelo etimhakeni ta tipolitiki ta misava.—Yohane 18:36.

Xa vumbirhi, muapostola Pawulo u tivule “muyimeri” la yimelaka Kreste eka vanhu va le sikwini ra yena. (Vaefesa 6:20; 2 Vakorinto 5:20) Timbhoni ta Yehovha ti pfumela leswaku Kreste Yesu sweswi i Hosi leyi vekiweke exiluvelweni ya Mfumo wa Xikwembu wa le tilweni, naswona, tona, ku fana ni vayimeri, ti fanele ti twarisa leswi eka vamatiko. (Matewu 24:14; Nhlavutelo 11:15) Vayimeri va languteriwe ku nga teki tlhelo ni ku nga ngheneleli etimhakeni ta matiko lawa va rhumiweke eka wona. Tanihi vavulavuleri va Mfumo wa Xikwembu wa le tilweni, Timbhoni ta Yehovha ti titwa ti boheka hi ndlela leyi fanaka leswaku ti nga ngheneleli etipolitikini ta matiko lawa ti tshamaka eka wona.

Mhaka ya vunharhu leyi nga kambisisiwaka i ya leswaku lava va nghenelaka nhlawulo va nga ha tihlamulela malunghana ni swiendlo swa munhu loyi va n’wi hlawuleke. (Ringanisa 1 Timotiya 5:22, The New English Bible.) Vakreste va fanele va swi kambisisa kahle loko va lava ku rhwala vutihlamuleri byolebyo.

Xa vumune, Timbhoni ta Yehovha ti teka vun’we bya tona bya Vukreste byi ri bya ntikelo swinene. (Vakolosa 3:14) Loko vukhongeri byi nghenelela eka tipolitiki, hakanyingi ku va ni ku avana exikarhi ka swirho swa byona. Hi ku tekelela Yesu Kreste, Timbhoni ta Yehovha ti papalata ku nghenelela eka tipolitiki xisweswo ti hlayisa vun’we bya tona bya Vukreste.—Matewu 12:25; Yohane 6:15; 18:36, 37.

Xa vuntlhanu ni xo hetelela, ku va Timbhoni ta Yehovha ti nga ngheneleli eka tipolitiki swi ti nyika ntshunxeko wo vulavula leswaku ti kota ku byela vanhu va mintlawa hinkwayo ya tipolitiki rungula ra nkoka ra Mfumo.—Vaheveru 10:35.

Hikwalaho ka misinya ya milawu ya Matsalwa leyi boxiweke laha henhla, ematikweni yo tala Timbhoni ta Yehovha ti tiendlela xiboho xa munhu hi xiyexe xa ku nga hlawuli eka minhlawulo ya tipolitiki, naswona ntshunxeko wa tona wo endla xiboho xolexo wu seketeriwa hi nawu wa tiko. Kambe, ku vuriwa yini loko nawu wu lava leswaku vaaki va ya hlawula? Emhakeni yo tano, Mbhoni yin’wana ni yin’wana yi ni vutihlamuleri byo endla xiboho xa vukheta, lexi sekeriweke eBibeleni malunghana ni ku langutana ni xiyimo lexi. Loko un’wana a boha ku ya laha ku hlawuleriwaka kona, i xiboho xa yena. Leswi a swi endlaka laha ku hlawuleriwaka kona i mhaka ya yena ni Muvumbi wa yena.

Nkandziyiso wa Xihondzo xo Rindza (xa Xinghezi) wa November 15, 1950, eka matluka 445 na 446, wu te: “Laha Khezari a sindzisaka vaaki leswaku va ya hlawula . . . [Timbhoni] ti nga ya laha ku hlawuleriwaka kona. Laha hi kona laha va faneleke va fungha emaphepheni ya nhlawulo kumbe va tsala leswi va swi hlawulaka. Vanhu lava hlawulaka va endla leswi va swi lavaka hi maphepha ya vona ya nhlawulo. Kutani tanihi leswi Xikwembu xi nga ta va xi swi vona, hi laha timbhoni ta xona ti faneleke ti endla hi ku pfumelelana ni swileriso swa xona ni hi ku landza ripfumelo ra tona. A hi vutihlamuleri bya hina ku va byela leswi va faneleke va swi endla hi maphepha yo hlawula.”

Ku vuriwa yini hi loko nuna la nga riki mupfumeri a sindzisa nsati wa yena la nga Mukreste leswaku a ya hlawula? U le hansi ka nuna wa yena, tanihi leswi Vakreste va nga ehansi ka vulawuri lebyi tlakukeke. (Vaefesa 5:22; 1 Petro 2:13-17) Loko a yingisa nuna wa yena ivi a ya endhawini yo hlawulela eka yona, i xiboho xa yena xolexo. A nga kona loyi a faneleke a n’wi sola.—Ringanisa Varhoma 14:4.

Ku vuriwa yini hi tiko leri nawu wu nga sindzisiki ku hlawula kambe lava va nga yiki endhawini yo hlawulela eka yona va karhatiwa—kumbe va vavisiwa? Kumbe ku vuriwa yini hi loko vanhu va ta tsoniwa swo karhi loko va nga yi endhawini leyi ku hlawuleriwaka eka yona, hambiloko nawu wu nga va sindzisi ku hlawula? Eka swiyimo leswi ni le ka swin’wana leswi fanaka, Mukreste u fanele a tiendlela xiboho. “Un’wana ni un’wana u ta rhwala mpingu wakwe.”—Vagalatiya 6:5.

Ku nga ha va ku ri ni vanhu lava khunguvanyekaka loko va xiya leswaku hi nkarhi wa nhlawulo wa le tikweni ra ka vona, Timbhoni ta Yehovha tin’wana ta ya endhawini yo hlawulela eka yona kasi tin’wana a ti yi. Va nga ha ku, ‘Timbhoni ta Yehovha a ti fambi hi ndlela yin’we.’ Kambe, vanhu va fanele va swi xiya leswaku etimhakeni leti lavaka ripfalo ra munhu to fana ni leyi, Mukreste ha un’we u fanele a tiendlela xiboho xa yena emahlweni ka Yehovha Xikwembu.—Varhoma 14:12.

Ku nga khathariseki swiboho swa munhu hi xiyexe leswi Timbhoni ta Yehovha ti swi endlaka ehansi ka swiyimo swo hambana-hambana, ti tsundzuka ku hlayisa vukala-tlhelo bya tona bya Vukreste ni ku vulavula hi ku ntshunxeka. Eka swilo hinkwaswo, ti titshega hi Yehovha Xikwembu leswaku a ti tiyisa, a ti nyika vutlhari ni ku ti pfuna ku papalata ku landzula ripfumelo ra tona hi ndlela yihi na yihi. Xisweswo ta tiyiseka hi marito ya mupisalema lama nge: “Hi wena ribye ra mina ni khokholo ra mina; hikwalaho ka v̌ito ra wena, u ta nḍi komba ndlela, u nḍi fambisa.”—Pisalema 31:3.