Hi Nga Tshuki Hi Tlhelela Endzhaku Eku Lovisiweni!
“Hina a hi muxaka wa vanhu lava tlhelelaka endzhaku eku lovisiweni.”—VAHEVERU 10:39.
1. I swiyimo swihi leswi endleke leswaku muapostola Petro a hluriwa hi nchavo?
VAAPOSTOLA va fanele va sale va hlamele loko Hosi ya vona leyi va yi rhandzaka, Yesu, yi va byela leswaku a va ta hangalaka hinkwavo va yi siya. Xana sweswo a swi ta endlekisa ku yini—kasi lowu a wu ri nkarhi lowu a va yi lava swinene? Petro u hlambanyile a ku: “Hambiloko lavan’wana hinkwavo va nga khunguvanyeka, kambe mina a ndzi nge khunguvanyeki.” Kahle-kahle, Petro a a ri wanuna wa xivindzi ni vurhena. Kambe loko Yesu a xengiwile ivi a khomiwa, vaapostola—ku katsa na Petro—va hlanule swirhendze, va ku bamfee! Endzhaku, loko Yesu a ri karhi a konanisiwa endlwini ya Muprista Lonkulu Kayafasi, Petro a a ri karhi a nyunganyungeka exivaveni, a nga lavi no huma. Loko vusiku byo titimela byi sungula ku hlongoriwa hi ku vonakala, handle ko kanakana Petro u sungule ku lemuka leswaku vutomi bya Yesu ni bya mani na mani loyi a a famba-famba na yena a byo va etintihweni. Loko van’wana lava a va ri etlhelo ka yena va lemuka leswaku Petro hi un’wana wa vanghana lavakulu va Yesu, a a nga ha tikoti hi ku chava. U ale kanharhu loku, a vula leswaku yena a nga hlangani helo na Yesu. Petro u vule leswaku ni ku n’wi tiva a nga n’wi tivi!—Marka 14:27-31, 66-72.
2. (a) Ha yini ku chava loku Petro a veke na kona hi vusiku lebyi Yesu a khomiweke ha byona ku nga n’wi endlanga ‘muxaka wa munhu la tlhelelaka endzhaku’? (b) Hi fanele hi tiyimisela ku endla yini?
2 A ku ri ro sungula Petro a kombisa ku tsana ko tano evuton’wini byakwe, naswona u fanele a tisole vutomi byakwe hinkwabyo hikwalaho ka swona. Kambe, xana leswi Petro a swi endleke evusikwini byebyo swi n’wi hundzule toya? Xana swi n’wi endle “muxaka wa vanhu” lava muapostola Pawulo a vulavuleke ha vona endzhaku loko a tsala a ku: “Kutani hina a hi muxaka wa vanhu lava tlhelelaka endzhaku eku lovisiweni”? (Vaheveru 10:39) Handle ko kanakana, vo tala va hina ha pfumela leswaku marito lawa ya Pawulo a ma tirhi eka Petro. Ha yini? Hikuva Petro u ve ni vutoya swa xinkarhana, kambe yena a a ri munhu wa xivindzi ni ripfumelo lerikulu. Hilaha ku fanaka, vo tala va hina hi tshame hi endla swilo leswi loko sweswi hi swi anakanya swi hi khomisaka tingana, nkarhi lowu hi khomiweke hi ku chava hi nga swi langutelanga, ivi hi nga swi koti ku yimela ntiyiso hi xivindzi hilaha hi lavaka hakona. (Ringanisa Varhoma 7:21-23.) Hi nga tiyiseka leswaku ku tsana ko tano ka nkarhinyana a ku hi endli muxaka wa vanhu lava tlhelelaka endzhaku eku lovisiweni. Kambe hi fanele hi wa hi pfuka leswaku hi nga vi vanhu va muxaka wolowo. Ha yini? Naswona hi nga swi papalatisa ku yini ku va vanhu va muxaka wo tano?
Leswi Ku Tlhelela eNdzhaku Eku Lovisiweni Swi Vulaka Swona
3. Xana muprofeta Eliya na Yonasi va hluriwe njhani hi ku chava?
3 Loko Pawulo a tsala hi “muxaka wa vanhu lava tlhelelaka endzhaku,” a a nga vulavuli hi lava va nga kombisaka moya wa vutoya swa xinkarhana. Handle ko kanakana, Pawulo a a yi tiva mhaka ya Petro ni tin’wana to yelana na yona. Eliya, muprofeta wa vurhena, loyi a a vulavula a nga jikajiki, u tshame a hluriwa hi moya wa ku chava ivi a tsema a ri vona, leswaku a ponisa vutomi byakwe, tanihi leswi Nkosikazi Yezabele wo homboloka a a lava ku n’wi dlaya. (1 Tihosi 19:1-4) Muprofeta Yonasi u khomiwe hi ku chava lokukulu. Yehovha u n’wi lerise ku ya emutini wa Ninivha lowu a wu dume hi madzolonga ni vuhomboloki. Xikan’we-kan’we Yonasi u khandziye xikepe a kongoma eTaraxixi—ku nga mpfhuka wa 3 500 wa tikhilomitara etlhelo leri hambaneke ni laha a rhumiweke kona! (Yonasi 1:1-3) Kambe vaprofeta lava vo tshembeka kun’we na muapostola Petro, a swi nge faneli ku va hlamusela va ri muxaka wa vanhu lava tlheleleke endzhaku. Ha yini?
4, 5. (a) Mongo wu hi pfuna njhani ku kumisisa leswi Pawulo a a vula swona loko a vulavula hi ‘ku lovisiwa’ eka Vaheveru 10:39? (b) Pawulo a a vula yini loko a ku: “Hina a hi muxaka wa vanhu lava tlhelelaka endzhaku eku lovisiweni”?
4 Xiya xiga lexi heleleke lexi Pawulo a xi tirhiseke: “Kutani hina a hi muxaka wa vanhu lava tlhelelaka endzhaku eku lovisiweni.” Xana a vula yini loko a ku “eku lovisiweni”? Rito ra Xigriki leri a ri tirhiseke minkarhi yin’wana ri vula ku loviseriwa makumu. Nhlamuselo leyi yi twanana ni mongo wa mhaka. Pawulo a a ha ku nyika xilemukiso a ku: “Loko hi hanya hi xidyoho hi vomu endzhaku ka loko hi amukele vutivi lebyi kongomeke bya ntiyiso, a ka ha salanga xitlhavelo xa swidyoho, kambe ku ni ku langutela kun’wana loku chavisaka ka vuavanyisi naswona ku ni mavondzo lama pfurhaka lama nga ta lovisa lava kanetaka.”—Vaheveru 10:26, 27.
5 Kutani loko Pawulo a byela vapfumeri-kulobye a ku, “Hina a hi muxaka wa vanhu lava tlhelelaka endzhaku eku lovisiweni,” a a vula leswaku yena ni Vakreste lava tshembekaka lava hlayaka matsalwa yakwe a va tiyimisele ku phikelela va nga fularheli Yehovha ni ku tshika ku n’wi tirhela. Loko va n’wi fularhela a va ta loviseriwa makumu. Yudasi Iskariyota u tlhelele endzhaku endzovisweni wolowo, ku fana ni valala van’wana va ntiyiso lava va lwisaneke hi vomu ni moya wa Yehovha. (Yohane 17:12; 2 Vatesalonika 2:3) Vanhu vo tano hi van’wana va “matoya” lawa loviseriwaka makumu etiveni ra ndzilo ro fanekisela. (Nhlavutelo 21:8) E-e, a hi swi lavi nikatsongo ku va vanhu va muxaka wolowo!
6. Sathana Diyavulosi u lava leswaku hi teka ndlela yihi?
6 Sathana Diyavulosi u lava leswaku hi tlhelela endzhaku eku lovisiweni. Tanihi leswi a nga mathwarivona wa “swiendlo swa vukanganyisi,” wa swi tiva leswaku xiendlo xo tano lexi onhaka xi sungula hakatsongotsongo. (Vaefesa 6:11, nhlamuselo ya le hansi ya NW) Loko a nga swi koti ku fikelela xikongomelo xakwe hi nxaniso lowu kongomeke, u luka mano yo hlakata ripfumelo ra Vakreste va ntiyiso hi marhengu lama tumbeleke swinene. U tsakela leswaku Timbhoni ta Yehovha leti nga ni vurhena ni leti hisekaka ti wa mapa. A hi voneni leswaku hi wahi marhengu lawa a ma tirhiseke eka Vakreste va Vaheveru lava Pawulo a a tsalela vona.
Ndlela Leyi Vakreste Va Tshikileriweke Ha Yona Leswaku Va Tlhelela eNdzhaku
7. (a) Hi wahi matimu ya vandlha ra le Yerusalema? (b) Hi swihi swiyimo swa moya leswi vahlayi van’wana va matsalwa ya Pawulo a va ri eka swona?
7 Vumbhoni byi komba leswaku Pawulo u tsale papila rakwe leri yaka eka Vaheveru kwalomu ka 61 C.E. Vandlha ra le Yerusalema a ri vone maxangu lamakulu. Endzhaku ka ku fa ka Yesu, ku sungule nxaniso wa mangava, lowu vangeleke Vakreste vo tala ku baleka emutini lowu. Hambiswiritano, ku fike nkarhi wa ku rhula, lowu pfumeleleke nhlayo ya Vakreste leswaku yi andza. (Mintirho 8:4; 9:31) Hi ku famba ka nkarhi, va xanisiwe hi tindlela tin’wana ni ku langutana ni swiphiqo swo karhi. Swi tikomba onge loko Pawulo a tsalela Vaheveru papila, vandlha ra vona a ri rhurile hi ndlela yo karhi. Hambiswiritano, a ku ri ni mintshikilelo yin’wana. Se a ku hundze malembe ya kwalomu ka makume-nharhu Yesu a profete ta ku lovisiwa ka Yerusalema. Swi tikomba onge a ku ri ni lava a va anakanya leswaku makumu ma hlwela ngopfu, naswona swi nga endleka ma nga fiki hi nkarhi wa vona. Van’wana, ngopfu-ngopfu lava a va ha ku va vapfumeri, a va nga si langutana ni nxaniso lowukulu, kutani a va nga ri na vutivi ngopfu hi ta xilaveko xa ku tiyisela loko va xanisiwa. (Vaheveru 12:4) Handle ko kanakana, Sathana u lwele ku tirhisa swiyimo sweswo. Xana hi swihi “swiendlo swa vukanganyisi” leswi a swi tirhiseke?
8. Vayuda vo tala a va ri ni langutelo rihi hi vandlha ra Vukreste leri a ra ha ku simekiwa?
8 Vayuda va le Yerusalema ni le Yudiya a va ri vonela ebodlheleni vandlha ra Vukreste leri a ra ha ku simekiwa. Hi ku ya hi leswi swi tameriweke hi papila ra Pawulo, hi kuma vuthala bya mindzhukano leyi varhangeri va vukhongeri bya Vayuda lava tikukumuxaka kun’we ni valandzeri va vona va rhukaneke Vakreste ha yona. Swi tikomba va vule swin’wana swo fana ni leswi: ‘Hina hi ni tempele leyikulu eYerusalema, leyi nga ni madzana ya malembe yi ri kona! Hi ni muprista la tlakukeke swinene la tirhaka eka yona, kun’we ni vaprista lava nga ehansi ka yena. Magandzelo ma nyikeriwa siku na siku. Hi ni Nawu lowu tintsumi ti wu nyikeke Muxe, lowu simekiweke eNtshaveni ya Sinayi, ku ri karhi ku endleka masingita lamakulu. Mpambukwa lowu wuntshwa, Vakreste lava, lava va gwineheke eVuyudeni, a wu na swona swilo leswi!’ Xana marito lawa yo hlekula ma humelerile? Handle ko kanakana, Vakreste van’wana va Vaheveru a va nga dyi byi rhelela hikwalaho ka minhlaselo leyi. Papila ra Pawulo ri fike hi nkarhi wa kahle, ri va phula emaxangwini ya vona.
Mhaka Leyi Ha Yona A Va Nga Fanelanga Va Tlhelela eNdzhaku Eku Lovisiweni
9. (a) Hi yihi mhaka leyi kandziyisiwaka ngopfu epapileni leri yaka eka Vaheveru? (b) Vakreste a va tirha njhani etempeleni yo antswa ku tlula ya le Yerusalema?
9 A hi kambisiseni swivangelo swimbirhi leswi Pawulo a swi nyikeke vamakwavo eYudiya leswaku va nga tshuki va tlhelela endzhaku eku lovisiweni. Xivangelo xo sungula—ku hlawuleka ka ndlela ya Vukreste ya ku gandzela—hi xona xi kandziyisiwaka ngopfu epapileni leri yaka eka Vaheveru. Epapileni rakwe hinkwaro, Pawulo u kandziyisa mhaka leyi. Tempele ya le Yerusalema a yo va xifaniso ntsena xa nchumu lowukulu swinene, tempele ya moya ya Yehovha, muako “lowu nga endliwangiki hi mavoko.” (Vaheveru 9:11) Vakreste volavo va ve ni lunghelo ra ku tirha eka lunghiselelo rero ra moya ra vugandzeri lebyi tengeke. A va tirha ehansi ka ntwanano wo antswa, ntwanano lowuntshwa lowu tshembisiweke khale, lowu Muhlanganisi wa wona, Yesu Kreste, a tlakukeke swinene ku tlula Muxe.—Yeremiya 31:31-34.
10, 11. (a) Ha yini rixaka leri Yesu a a huma eka rona ri nga n’wi sivelanga ku fanelekela ku va Muprista Lonkulu etempeleni ya moya? (b) Yesu a a ri Muprista Lonkulu ku tlula loyi a a tirha etempeleni ya le Yerusalema hi tindlela tihi?
10 Nakambe Vakreste volavo a va ri na Muprista Lonkulu wa xiyimo xa le henhla swinene, ku nga Yesu Kreste. Kunene, a a nga ri wa nyimba ya Aroni. Ku ri na sweswo, a a ri Muprista Lonkulu “hi ku ya hi mukhuva wa Melkisedeke.” (Pisalema 110:4) Melkisedeke, loyi xivongo xakwe a xi nga tiviwi, a a ri hosi tlhelo muprista lonkulu wa muti wa khale wa Salema. Kutani hi ku ya hi vuprofeta, a a n’wi fanekisela kahle Yesu, loyi vuprista byakwe a byi nga titsheganga hi rixaka ra vanhu lava nga hetisekangiki, kambe a byi titshege hi nchumu wa nkoka swinene—xihlambanyo xa Yehovha Xikwembu hi byakwe. Ku fana na Melkisedeke, Yesu a hi Muprista Lonkulu ntsena, kambe u tlhela a va Hosi leyi nga ta ka yi nga fi.—Vaheveru 7:11-21.
11 Ku tlula kwalaho, ku hambana ni muprista lonkulu wa le tempeleni ya le Yerusalema, Yesu a a nga boheki ku endla magandzelo lembe na lembe. Gandzelo rakwe a ku ri vutomi byakwe lebyi hetisekeke, lebyi a byi nyikeleke kan’we, kambe byi tirha minkarhi hinkwayo. (Vaheveru 7:27) Magandzelo wolawo hinkwawo lawa a ma nyikeriwa etempeleni a ma ri mindzhuti ntsena, a ma fanekisela leswi Yesu a nyikeleke swona. Gandzelo rakwe leri hetisekeke ri ve xisekelo xa ku rivaleriwa ka ntiyiso ka swidyoho swa vanhu hinkwavo lava kombiseke ripfumelo. Swin’wana leswi tiyisaka marhambu i marito ya Pawulo lama kombaka leswaku Muprista loyi Lonkulu hi yena Yesu loyi Vakreste va le Yerusalema a va tiva yena. A a titsongahata, a ri ni tintswalo, naswona a a ri loyi a “hi tshandzisa[ka] eku tsaneni ka hina.” (Vaheveru 4:15; 13:8) Vakreste volavo lava totiweke a va ri ni ntshembo wa ku va vaprista lava nga ehansi ka Kreste! Xana a swi ta endlekisa ku yini leswaku va anakanya hi ku tlhelela endzhaku eka swilo swa Vuyuda lebyi onhakeke, “swo tsana ni swa vusiwana”?—Vagalatiya 4:9.
12, 13. (a) Pawulo u nyikele xivangelo xihi xa vumbirhi malunghana ni ku nga tlheleli endzhaku? (b) Ha yini Vakreste va Vaheveru a va ta khutaziwa hi matimu ya vona ya ku tiyisela, leswaku va nga tlheleli endzhaku eku lovisiweni?
12 Handle ka sweswo, Pawulo u nyike Vaheveru xivangelo xa vumbirhi xa leswaku va nga tshuki va tlhelela endzhaku eku lovisiweni—ku nga matimu ya vona ya ku tiyisela. U tsarile a ku: “Tshamani mi ri karhi mi tsundzuka masiku yo sungula lawa, loko se mi voningeriwile, mi tiyiseleke mphikizano lowukulu ehansi ka ku xaniseka.” Pawulo u va tsundzuxe leswaku va “vekiwe erivaleni tanihi le ndlwini ya mintlango” va sandziwa ni ku xanisiwa. Van’wana va pfaleriwe emakhotsweni; van’wana va tshandzise lava a va ri ekhotsweni, va va seketela. Ina, va kombise ripfumelo lerinene ni ku phikelela. (Vaheveru 10:32-34) Kambe, ha yini Pawulo a va kombele leswaku va ‘tshama va ri karhi va tsundzuka’ maxangu yo tano lawa va langutaneke na wona? Xana sweswo a swi nga ta va heta matimba ke?
13 Ku ri na sweswo, ku “tsundzuka masiku yo sungula” a swi ta tsundzuxa Vaheveru hi ndlela leyi Yehovha a va tiyiseke ha yona loko va ri emiringweni. Hikwalaho ka mpfuno wakwe, ana se a va bakanye minhlaselo yo tala ya Sathana. Pawulo u tsarile a ku: “Xikwembu a xi pfumali ku lulama lerova xi nga rivala ntirho wa n’wina ni rirhandzu leri mi ri kombiseke hikwalaho ka vito ra xona.” (Vaheveru 6:10) Ina, Yehovha u yi tsundzukile mintirho ya vona hinkwayo yo tshembeka, u yi hlayisile emianakanyweni yakwe. Leswi swi hi tsundzuxa xikhutazo xa Yesu xa ku tihlayisela xuma etilweni. A ri kona khamba leri nga yivaka xuma xa kona; nsumba kumbe nkurhe a swi nge xi dyi. (Matewu 6:19-21) Kahle-kahle, xuma lexi xi nga lova ntsena loko Mukreste a tlhelela endzhaku eku lovisiweni. Sweswo a swi ta vula ku tlanga hi xuma xihi ni xihi lexi a xi hlayiseke etilweni. Pawulo u nyike Vakreste va Vaheveru xivangelo lexi twalaka xa leswaku va nga tshuki va landzela ndlela yo tano! Ha yini va tlange hi malembe hinkwawo lawa va endleke ntirho wa vona hi ku tshembeka ha wona? A swi ta va swi lulamile ni ku antswa swinene loko va hambeta va tiyisela.
Mhaka Leyi Ha Yona Hi Nga Fanelangiki Ku Tlhelela eNdzhaku Eku Lovisiweni
14. Hi yihi mintlhontlho leyi hi langutaneke na yona leyi fanaka ni leyi Vakreste va lembe-xidzana ro sungula va langutaneke na yona?
14 Vakreste va ntiyiso namuntlha va ni swivangelo swo tano leswi twalaka swa ku nga tlheleli endzhaku. Xo sungula, a hi tsundzukeni leswaku i nkateko lowukulu ku va Yehovha a hi nyike muxaka lowu tengeke wa vugandzeri. Ku fana ni Vakreste va lembe-xidzana ro sungula, hi hanya enkarhini lowu swirho swa vukhongeri lebyi dumeke swi hi hlekulaka, swi tinyungubyisa hi miako ya swona ya manyunyu ya vukhongeri ni vukhale bya mindhavuko ya swona. Hambiswiritano, Yehovha wa hi tiyisekisa leswaku wa wu amukela muxaka wa hina wa vugandzeri. Kahle-kahle, namuntlha hi katekisiwe hi ndlela leyi ni Vakreste va lembe-xidzana ro sungula va nga katekisiwangiki ha yona. U nga ha tivutisa u ku, ‘Njhani?’ Phela, vona va hanye enkarhini lowu tempele ya moya yi sunguleke ku tirha ha wona. Kreste u ve Muprista wa yona Lonkulu loko a khuvuriwa hi 29 C.E. Van’wana va vona va vone N’wana wa Xikwembu loyi a a endla masingita. Ni le ndzhaku ka ku fa kakwe, ku ve ni masingita lama engetelekeke. Kambe hilaha ku profetiweke hakona, tinyiko to tano ti vuye ti hela.—1 Vakorinto 13:8.
15. Vakreste va ntiyiso namuntlha va hanya enkarhini wa ku hetiseka ka vuprofeta byihi, naswona sweswo swi vula yini eka hina?
15 Hambiswiritano, hi hanya enkarhini wa ku hetiseka lokukulu ka vuprofeta lebyi engetelekeke mayelana ni tempele, bya Ezekiyele tindzima 40-48.a Hi xikombiso, hi vone ku pfuxetiwa ka lunghiselelo ra Xikwembu ra vugandzeri lebyi tengeke. Etempeleni yoleyo ya moya ku susiwe mixaka hinkwayo ya swilo leswi nyameke swa vukhongeri kun’we ni vugandzeri bya swikwembu swa hava. (Ezekiyele 43:9; Malakiya 3:1-5) Ehleketa hi ndlela leyi hi pfunekeke ha yona hi ku basisiwa loku ka tempele.
16. Hi wihi mboyamelo lowu hetaka matimba lowu Vakreste va lembe-xidzana ro sungula va langutaneke na wona?
16 Eka lembe-xidzana ro sungula, vumundzuku a byi nga tshembisi eka vandlha ra Vukreste leri hlelekeke. Yesu a a profete leswaku a swi ta fana ni nsimu leya ha ku byariwaka koroni ivi endzhaku yi haxiwa mfava, leswi a swi ta endla leswaku koroni yi nga hambaniseki kahle ni mfava. (Matewu 13:24-30) Kutani swi ve tano. Eku heleni ka lembe-xidzana ro sungula, loko muapostola Yohane la dyuhaleke a ri xirhalanganya xo hetelela xo lwisana ni vuhomboloki, vugwinehi ana se a byi tinyike matimba. (2 Vatesalonika 2:6; 1 Yohane 2:18) Endzhakunyana ka ku fa ka vaapostola, ku tangunuke ntlawa wo hlawuleka wa vafundhisi, wu tshikilela ntlhambi ni ku ambala tinguvu to hlawuleka. Vugwinehi byi hangalake ku fana ni ntungu. Sweswo a swi heta matimba eka Vakreste lava tshembekaka! Va vone fambiselo lera ha ku simekiwaka ra vugandzeri lebyi tengeke ri phimpheriwa hi fambiselo ro biha. Leswi swi endleke ku nga si hela ni dzana ra malembe Kreste a simeke vandlha.
17. Xana vandlha ra Vukreste ra manguva lawa ri khomelele nkarhi wo leha hi ndlela yihi ku tlula ra lembe-xidzana ro sungula?
17 Sweswi xiya mhaka leyi hambaneke. Namuntlha vugandzeri lebyi tengeke ana se byi khomelele nkarhi wo leha ku tlula lowu byi tekeke wona eku sunguleni, lowu heleke loko ku fa vaapostola. Ku sukela loko ku humesiwa nkandziyiso wo sungula wa magazini lowu hi 1879, Yehovha u hi katekisile hi vugandzeri lebyi tengeke swinene. Yehovha na Kreste Yesu va nghene etempeleni ya moya hi 1918 hi xikongomelo xo yi basisa. (Malakiya 3:1-5) Ku sukela hi 1919, ndlela ya ku gandzela Yehovha Xikwembu yi antswisiwile hakatsongo-tsongo. Matwisiselo ya hina ya vuprofeta ni misinya ya milawu ya Bibele ma ve lama antswaka swinene. (Swivuriso 4:18) Xana ku fanele ku dzunisiwa mani ke? A ku fanelanga ku dzunisiwa vanhu lava ni ku hetiseka va nga hetisekangiki. I Yehovha ntsena, kun’we ni N’wana wa yena loyi a nga Nhloko ya vandlha, loyi a nga sirhelelaka vanhu va Yena leswaku va nga nyamisiwi eminkarhini leyi yo homboloka. Kutani hi nga tshuki hi rivala ku nkhensa Yehovha hileswi a hi pfumeleleke ku hlanganyela evugandzerini lebyi tengeke namuntlha. Naswona a hi tiyimiseleni hi mbilu hinkwayo leswaku hi nga tshuki hi tlhelela endzhaku eku lovisiweni!
18. Hi xihi xivangelo lexi hi nga na xona xa ku nga tlheleli endzhaku eku lovisiweni?
18 Ku fana ni Vakreste va Vaheveru, hi ni xivangelo xa vumbirhi xo papalata ndlela ya vutoya, ya ku tlhelela endzhaku—ku nga matimu ya hina ya ku tiyisela. Hambi hi nga si va ni malembe yo tala hi ri karhi hi tirhela Yehovha, kumbe hi ri ni makume ya malembe hi ri karhi hi n’wi tirhela hi ku tshembeka, hi siye matimu yo karhi ya mintirho ya Vukreste. Vo tala va hina va vone maxangu, ku nga ha va hi ku pfaleriwa ekhotsweni, ku yirisiwa, ku khomiwa hi ndlela ya tihanyi kumbe ku lahlekeriwa hi swa vona. Van’wana vo tala va kanetiwile hi swirho swa ndyangu, va rhukaniwa, va hlekuriwa ni ku nyenyiwa. Hinkwerhu ka hina hi tiyiserile, hi hambeta hi tirhela Yehovha hi ku tshembeka hambi hi langutane ni mintlhontlho ni miringo ya vutomi. Hi ku endla tano, hi siye matimu ya ku phikelela lawa Yehovha a nga ta ka a nga ma rivali, tanihi leswi a nga muhlayisi wa xuma etilweni. Kunene, lowu a hi nkarhi wa ku tlhelela endzhaku emanyaleni lawa hi ma siyeke ya mafambiselo lawa ya khale! Xana i vutlhari ku tshika ntirho wa hina hinkwawo lowunene wu hundzuka wa hava? Sweswo a hi vutlhari ngopfu-ngopfu namuntlha, hikuva ku sele “nkarhinyana” ntsena leswaku ku fika makumu.—Vaheveru 10:37.
19. Ku ta vulavuriwa hi yini eka xihloko xa hina lexi landzelaka?
19 Ina, a hi tiyimiseleni ku ka hi nga vi “muxaka wa vanhu lava tlhelelaka endzhaku eku lovisiweni”! Ku ri na sweswo, a hi veni “muxaka lowu nga ni ripfumelo.” (Vaheveru 10:39) Hi nga tiyiseka njhani loko hi ri vanhu vo tano, naswona hi nga va pfuna njhani Vakreste-kulorhi leswaku va endla tano? Xihloko xa hina lexi landzelaka xi ta hlamusela mhaka leyi.
[Nhlamuselo ya le hansi]
Wa Tsundzuka Xana?
◻ Swi vula yini ku tlhelela endzhaku eku lovisiweni?
◻ Hi yihi mintshikilelo leyi Vakreste va Vaheveru lava Pawulo a va tsaleleke papila a va langutane na yona?
◻ Hi swihi swivangelo swa ku nga tlheleli endzhaku eku lovisiweni leswi Pawulo a swi nyikeke Vaheveru?
◻ Hi swihi swivangelo leswi hi nga na swona swa ku tiyimisela ku ka hi nga tlheleli endzhaku eku lovisiweni?
[Swifaniso leswi nga eka tluka 15]
Ku hluriwa ka Petro hi moya wa ku chava a ku n’wi endlanga a fana ni “muxaka wa vanhu lava tlhelelaka endzhaku eku lovisiweni”