Xiviko Xa Vahuweleri Va Mfumo

Ku Pfuna Vanhu Va Tinxaka Hinkwato eNetherlands

ABRAHAMA a a ri wanuna wa ripfumelo leri nga tolovelekangiki. Muapostola Pawulo u ri “loko a vitaniwa,” u yingise Rito ra Xikwembu “kutani a huma, hambileswi a a nga ku tivi lomu a a ya kona.” Endzhaku ko va a rhurhise ndyangu wa yena hinkwawo, Abrahama “u luvele etikweni ra xitshembiso” a tshama kona ku ringana malembe ya dzana lawa a ma n’wi salerile.—Vaheveru 11:8, 9.

Hilaha ku fanaka namuntlha, vo tala va Timbhoni ta Yehovha va amukele ntlhontlho wo rhurhela etikweni rin’wana leswaku va ya pfuna laha ku nga ni xilaveko lexikulu. Van’wana va dyondze ririmi rimbe leswaku va ta nyikela vumbhoni eka valuveri lava luveleke etikweni ra vona. Hilaha swikombiso leswi landzelaka swi kombisaka hakona, moya lowu lowunene wu pfule “nyangwa leyikulu leyi yisaka entirhweni,” eNetherlands, laha vaaki lava ringanaka miliyoni yin’we eka va 15 wa timiliyoni va humaka ematikweni man’wana.—1 Vakorinto 16:9.

◻ Bahram, khale ka muleteri wa ntlangu wa karati lowu vuriwaka Kung Fu a a huma etikweni ra le Vuxa Xikarhi. U tikumele Bibele ni tibuku tin’wana ta Watch Tower. Ku nga si hela n’hweti Bahram u swi vonile leswaku a a kume ntiyiso. Ku sunguriwe dyondzo na yena swin’we ni nsati wa yena, kambe a ku ri ni xiphiqo—mudyondzisi wa vona wa Bibele a a nga ri tivi ririmi ra vona. Va vula leswaku a va vulavula “hi mavoko ni milenge.” Hi ku famba ka nkarhi, Bahram ni nsati wakwe va swi kotile ku kuma vandlha leri a ku vulavuriwa ririmi ra vona, naswona endzhaku ka sweswo va endle nhluvuko hi xihatla. Bahram sweswi i Mbhoni leyi khuvuriweke.

◻ Mpatswa lowu nga maphayona wa Madachi wu ye eka wanuna wa le Indonesia loyi a a yime emahlweni ka xitolo. A a hlamele hi ntsako loko mpatswa lowu wu n’wi vulavurise hi ririmi ra yena. Kutani malunghiselelo ma endliwile ya leswaku a endzeriwa ekaya ka yena. Ku kumeke leswaku u tshame eRussia ku tlula malembe ya 20, laha a veke mutshunguri wa vuvabyi bya vavasati. A a vula leswaku Xikwembu a xi kona, kambe u pfumerile leswaku nkarhi wun’wana ni wun’wana loko a pfuneta eku velekiweni ka n’wana, a a hlamala a ku, “Wa nga vona ndlela leyi miri wa munhu wu hetisekeke ha yona! I singita hakunene!” U pfumerile ku dyondza Bibele naswona hi xihatla u sungule ku pfumela leswaku ku ni Muvumbi la khathalaka hi vanhu. (1 Petro 5:6, 7) Sweswi i makwerhu la khuvuriweke naswona u hlanganyela ni vandlha ra vanhu lava vulavulaka Xiindonesiya le Amsterdam.

◻ Le Rotterdam, ku nga yin’wana ya tindhawu leti nga ni mahlaluko lamakulu emisaveni, ntlawa wa maphayona wu swi kotile ku chumayela vanhu lava vulavulaka tindzimi to hambana-hambana lava yimisaka swikepe siku ni siku. Hikwalaho ka ntirho wa ntlawa lowu wa vachumayeri lava lava hisekaka, vatluti vo hlayanyana, ku katsa ni mukongomisi, murhangeri wa vafambisi va swikepe ni khale ka murindzi va amukele ntiyiso. Sweswi na vona va pfuneta ku hangalasa mahungu lamanene ya Mfumo wa Xikwembu emisaveni hinkwayo.—Matewu 24:14.

Ku fana ni le tindhawini tin’wana laha misaveni, Timbhoni ta Yehovha eNetherlands ti tiyimisele ku hlanganyela eku hangalaseni ka mahungu lamanene lama nga heriki ematikweni hinkwawo, tinyimba hinkwato, tindzimi ni vanhu hinkwavo.—Nhlavutelo 14:6.