Mimiri Yo Soleka, Timbilu Letinene

XANA a wu ta titwa njhani loko a wu fanele u vulavula ni vanhu vambe hi Mfumo wa Xikwembu kambe u lehe 76 wa tisentimitara ntsena? Laura a nga ku chumbutela. U ni malembe ya 33 hi vukhale, naswona u lehe 76 wa tisentimitara ntsena. Yena ni ndzisana yakwe María, loyi a nga ni 24 wa malembe hi vukhale naswona a leheke 86 wa tisentimitara, va tshama eQuito, le Ecuador. Inge va hi chumbutela swiphiqo leswi va langutanaka na swona evutirhelini bya vona bya Vukreste.

“Leswaku hi ya fika ensin’wini ya hina leyi hi chumayelaka eka yona ni le minhlanganweni ya Vukreste, hi tswanya hi nenge hafu ya khilomitara leswaku hi ya khandziya bazi. Ku suka laha ri hi xikisaka kona, hi tswanya hi nenge hafu yin’wana ya khilomitara leswaku hi ya khandziya bazi ra vumbirhi. Khombo ra kona, exikarhi ka mpfhuka lowu ku ni ntlhanu wa timbyana leti levaka swinene. Hi ti chava swinene timbyana hikuva ti nga ha languteka ti ri tikulu ku fana ni tihanci. Loko swi lava leswaku hi ti chavisa, hi teka nhonga hi yi fihla kun’wana hi nga si khandziya bazi leswaku hi yi khoma loko hi tlhelela ekaya.

“Leswaku hi khandziya bazi a ku nga ri mhaka ya matlangwana, a swi tika. Hi yima ehenhla ka nhulu ya thyaka laha ku yimaka bazi leswaku hi ta kota ku khandziya hi ku olova. Vachayeri van’wana va yi yimisa hi le nhulwini kasi van’wana a va tikarhati. Exiyin’weni xo tano, loyi a leheke eka hina u pfuna wo koma leswaku a khandziya. Loko hi ya khandziya bazi ra vumbirhi ku laveka hi tsemakanya gondzo lerikulu ra mphesamphesa—ku nga xiphiqo lexikulu hikwalaho ka milenge ya hina yo koma. Hikwalaho ka ku soleka ka hina, nkwama wa tibuku wo tika i xiphiqo. Leswaku hi endla nkwama wu vevuka, hi tirhisa Bibele leyitsongo hi tlhela hi nga rhwali tibuku to tala.

“Ku sukela evutsongwaneni, bya hina a hi hanya bya guwela. Vaakelani va hina va swi tiva leswaku ku vulavula ni vanhu vambe a ku ri nchumu wo chavisa eka hina. Hikokwalaho ka sweswo va hlamala ni ku tsaka loko va hi vona hi gongondza emitini ya vona naswona hi xitalo va hi yingisela. Kambe laha hi nga tiviwiki, hakanyingi vanhu va tivonela vamanghimana ntsena; xisweswo a hi minkarhi hinkwayo va tiyimiselaka ku yingisa rungula ra hina. Hambiswiritano, ku vona rirhandzu ra Yehovha swi hi nyika xivindzi xo hambeta entirhweni lowu wo chumayela. Ku anakanyisisa hi Swivuriso 3:5, 6 na swona swi hi nyika xivindzi.”

Hilaha Laura na María va kombisaka hakona, ku tiyisela ku nga khathariseki swiphiqo swa miri swi nga kwetsimisa Xikwembu. Muapostola Pawulo u khongerile leswaku ku susiwa “mutwa [wa yena] enyameni,” lowu kumbexana a ku ri ku karhateka loku a ri na kona emirini. Kambe Xikwembu xi te: “Musa wa mina lowu nga faneriwiki wu enele ha wena; hikuva matimba ya mina ma endliwa lama hetisekeke eku tsaneni.” Ina, a swi vuli swona leswaku loko hi ta tirhela Xikwembu ku fanele ku rhanga ku susiwa ku tsana ka miri wa hina. Ku tshemba Xikwembu hi ku helela swi nga hi pfuna ku endla leswinene ngopfu eku tsaneni ka hina. Leswi Pawulo a wu tekeke hi ndlela leyi ‘mutwa lowu a wu ri enyameni’ yakwe, u kote ku vula a ku: “Loko ndzi tsanile, hi kona ndzi vaka ni matimba.” (2 Vakorinto 12:7, 9, 10) Endzhaku ka malembe Pawulo u tsarile: “Eka swilo hinkwaswo ndzi ni ntamu hikwalaho ka loyi a ndzi nyikaka matimba.”—Vafilipiya 4:13.

Eminkarhini ya manguva lawa, Xikwembu xi hetisisa mintirho leyikulu hi vavanuna, vavasati ni vana lava tinyiketeleke hi ku helela eka xona. Vo tala va vona va lamarile hi tindlela to karhi. Hambileswi hinkwavo ka vona va nga ni ntshembo wo hanyisiwa ehansi ka Mfumo wa Xikwembu, a va rindzi ku kondza Xikwembu xi va wisisa eka swiphiqo swa vona va nga si ringeta ku endla swo karhi evutirhelini bya xona.

Xana u karhatiwa hi ku tsana ko karhi ka miri? Vana ni xivindzi! Hi ripfumelo ra wena u nga va exikarhi ka lava fanaka na Pawulo, Laura na María. Eka vona ku nga vuriwa marito lama vuriweke malunghana ni vavanuna ni vavasati va ripfumelo va minkarhi ya khale, lama nge: “Va endliwa lava nga ni matimba ku suka exiyin’weni xo tsana.”—Vaheveru 11:34.

[Xifaniso lexi nga eka tluka 8]

María

Laura

[Xifaniso lexi nga eka tluka 9]

María u pfuna Laura ku khandziya bazi

[Swifaniso leswi nga eka tluka 9]

“Hi ti chava swinene timbyana hikuva ti nga ha languteka ti ri tikulu ku fana ni tihanci”

Ehansi: Laura na María xikan’we ni lava va dyondzeke Bibele na vona