Lava Va Lwaka Ni Xikwembu A Va Nge Hluli!
“Va ta lwa na wena, kambe a va nge ku hluli.”—YEREMIYA 1:19.
1. Xana Yeremiya u rhumiwe ku endla yini, naswona ntirho wa yena wu ye emahlweni ku fikela rini?
YEHOVHA u rhume jaha Yeremiya leswaku ri va muprofeta eka matiko. (Yeremiya 1:5) Leswi swi humelele enkarhini wa ku fuma ka Hosi Yosiya lonene wa le Yuda. Vutirheli bya Yeremiya bya ku profeta byi ye emahlweni ku ya fika enkarhini wo nonon’hwa loko Babilona wu nga si hlula Yerusalema ni vanhu va Xikwembu va nga si yisiwa evukhumbini.—Yeremiya 1:1-3.
2. Xana Yehovha u n’wi tiyise njhani Yeremiya, naswona ku lwisana ni muprofeta yoloye a swi vula yini?
2 Marungula yo avanyisa lawa Yeremiya a a ta ma twarisa a ma ta endla leswaku a kanetiwa. Hikwalaho, Xikwembu xi n’wi tiyisile leswaku a kota ku langutana ni leswi a swa ha ta. (Yeremiya 1:8-10) Hi xikombiso, moya wa muprofeta wu tiyisiwe hi marito lawa: “Va ta lwa na wena, kambe a va nge ku hluli, hikuva ‘mina ndzi na wena,’ ku vula Yehovha, ‘leswaku ndzi ku kutsula.’” (Yeremiya 1:19) Ku lwa na Yeremiya a swi ta vula ku lwa ni Xikwembu. Namuntlha, Yehovha u ni ntlawa wa malandza lowu kotisaka muprofeta, lowu ntirho wa wona wu fanaka ni lowuya wa Yeremiya. Ku fana na yena, ma twarisa rito ra Xikwembu ra vuprofeta hi xivindzi. Naswona rungula leri ri khumba vanhu ni matiko hinkwawo, hi ndlela leyinene kumbe yo biha, hi ku ya hi ndlela leyi va ri amukelaka ha yona. Ku fana ni le nkarhini wa Yeremiya, ku ni lava va lwisanaka ni Xikwembu hi ku kaneta malandza ya xona ni mintirho ya wona leyi ma yi averiweke hi Xikwembu.
Ku Hlaseriwa Ka Malandza Ya Yehovha
3. Ha yini malandza ya Yehovha ma hlaseriwile?
3 Ku sukela eku sunguleni ka lembe-xidzana ra vu-20, vanhu va Yehovha a va ri karhi va hlaseriwa. Ematikweni yo tala, vanhu lava nga ni mona va ringete ku sivela—ina, va herisa—ku huweleriwa ka mahungu lamanene ya Mfumo wa Xikwembu. A va ri karhi va kuceteriwa hi Nala wa hina lonkulu, ku nga Diyavulosi, loyi a “famba-famba[ka] ku fana ni nghala leyi vombaka, yi lava wa ku n’wi dya.” (1 Petro 5:8) Loko “nkarhi lowu vekiweke wa matiko” wu herile hi 1914, Xikwembu xi veke N’wana wa xona a va Hosi leyintshwa ya misava, xi n’wi nyika xileriso lexi nge: “Famba u ya hlula exikarhi ka valala va wena.” (Luka 21:24; Pisalema 110:2) Hi ku tirhisa matimba yakwe, Kreste u hlongole Sathana etilweni kutani a n’wi lahlela emisaveni. Diyavulosi u karihele Vakreste lava totiweke swin’we ni vanakulobye va vona, hi ku tiva leswaku nkarhi wakwe wu komile. (Nhlavutelo 12:9, 17) Xana byi ve byihi vuyelo bya ku hlasela loku phikelelaka ka vakaneti lava, lava va lwaka ni Xikwembu?
4. I miringo yihi leyi vanhu va Yehovha va langutaneke na yona hi nkarhi wa Nyimpi yo Sungula ya Misava, kambe ku humelele yini hi 1919 na hi 1922?
4 Malandza lama totiweke ya Yehovha ma langutane ni miringo yo tala leyi ringaka ripfumelo hi nkarhi wa Nyimpi yo Sungula ya Misava. Ma hlekuriwile ni ku lumbetiwa, ma hlongorisiwa hi mintshungu ya vapfukeri ni ku biwa. Hilaha Yesu a profeteke hakona, a va “vengiwa hi matiko hinkwawo.” (Matewu 24:9) Enkarhini wa nyimpi yo chavisa, valala va Mfumo wa Xikwembu va tirhise rhengu leri tirhisiweke eka Yesu Kreste. Va hembele vanhu va Yehovha va vula leswaku va pfuxa madzolonga, valala lava va hlasele exivindzini xa nhlengeletano leyi vonakaka ya Xikwembu. Hi May 1918, ku humesiwe matsalwa ya mpfumelelo wa vulawuri yo khoma muungameri wa Sosayiti ya Watch Tower, J. F. Rutherford, ni nkombo wa vanakulobye va yena lavakulu. Vavanuna lava va nhungu va gweviwe malembe yo tala ngopfu kutani va yisiwa ekhotsweni ra mfumo eAtlanta, Georgia, le U.S.A. Endzhaku ka tin’hweti ta kaye va ntshunxiwile. Hi May 1919 huvo ya xifundzha ya swikombelo yi vule leswaku vahehliwa lava, a a va gweviwe hi ku ya hi nghohe, hikwalaho, xigwevo xi cinciwile. Mhaka yi tlhele yi tengiwa, kambe endzhaku hulumendhe yi yimise ku tengiwa ka nandzu lowu, kutani Makwerhu Rutherford ni vanakulobye va yena va ntshunxiwile hi ku helela. Va tlhele va sungula mintirho ya vona, naswona mintsombano leyi khomiweke le Cedar Point, Ohio, hi 1919 na hi 1922 yi khutaze vayingiseri leswaku va tinyiketela swinene entirhweni wo chumayela hi ta Mfumo.
5. Xana Timbhoni ta Yehovha ti langutane na yini hi nkarhi wa Manazi ya le Jarimani?
5 Hi va-1930 ku pfuke vulawuri bya tihanyi, naswona Jarimani, Italiya na Japani ma endla ntwanano wo simeka mimfumo leyi Hlanganeke. Eku sunguleni ka malembe wolawo ya khume, vanhu va Xikwembu va sungule ku xanisiwa hi nsele, ngopfu-ngopfu eJarimani ra Vunazi. Va yirisiwile. Makaya ya vona a ma ngundzuvanyiwa, vini va wona a va khomiwa. Magidi ma pfaleriwe etikampeni ta nxaniso hikwalaho ka leswi ma aleke ku tshika ripfumelo ra wona. Ku lwa ni Xikwembu ni vanhu va xona a ku endleriwa ku herisa Timbhoni ta Yehovha hi vulawuri byo tshikilela.a Loko Timbhoni ti ye etihubyeni ta le Jarimani ti ya lwela timfanelo ta tona, Ndzawulo ya Vululami ya Mfumo yi lunghiselele nhlamuselo yo leha yo tiyisekisa leswaku a ti nga ta humelela. Yi te: “Tihuvo a ti fanelanga ti tsandzeka hikwalaho ka ku landza nawu; kambe ti fanele ti lava ni ku kuma tindlela ku nga khathariseki ku nonon’hweriwa loku nga kona, leswaku ti hetisisa mintirho ya tona.” Sweswo a swi vula leswaku vululami a byi nga ta nyikiwa ndleve. Manazi a ma be ehansi hi nenge ma vula leswaku ntirho wa Timbhoni ta Yehovha a wu hombolokile kumbe wu bihile, naswona a wu ‘kavanyeta Vumbiwa byo aka Rixaka.’
6. Hi wahi matshalatshala lama endliweke leswaku ku herisiwa ntirho wa hina hi nkarhi wa Nyimpi ya Vumbirhi ya Misava ni le ndzhaku ka yona?
6 Eka Nyimpi ya Vumbirhi ya Misava, vanhu va Xikwembu va yirisiwile eAustralia, eCanada ni le matikweni man’wana lama nga ehansi ka Matiko lama Khomisaneke ya Britain—eAfrika, eAsiya ni le swihlaleni swa Kharibiya ni swa Pacific. Le United States, valala lava nga ni nkucetelo wo biha ni vanhu lava byeriweke mavunwa va vange “khombo hi xileriso xa nawu.” (Pisalema 94:20) Kambe timhaka ta ku losa mujeko ni milawu yo vekiwa hi vanhu leyi sivelaka ku chumayela hi yindlu ni yindlu swi tengiwile etihubyeni, naswona swiboho leswinene swa huvo eUnited States swi endle khokholo ro seketela ntshunxeko wa vugandzeri. Hi mpfuno wa Yehovha, matshalatshala ya valala a ma humelelanga. Loko nyimpi yi hela eYuropa, ku yirisiwa ku herisiwile. Magidi ya Timbhoni lawa a ma khomiwile etikampeni ta nxaniso ma ntshunxiwile, kambe nyimpi a yi nga si hela. Endzhakunyana ka Nyimpi ya Vumbirhi ya Misava, ku tlhekeke Nyimpi ya Vusukumbele. Matiko ya le Yuropa Vuxa ma lo ya ma nyanya ku tshikilela vanhu va Yehovha. Ku tekiwe goza ra ximfumo ro kavanyeta ni ku herisa ntirho wa hina wo nyikela vumbhoni, ku yimisa ku hangalasiwa ka tibuku ta Bibele ni ku yirisa tinhlengeletano ta hina ta le rivaleni. Vo tala va khotsiwile kumbe va yisiwa etikampeni ta vuhlonga.
Ku Ya eMahlweni Ni Ntirho Wo Chumayela!
7. Xana Timbhoni ta Yehovha ti langutane na yini ePoland, Russia ni le matikweni man’wana emalembeni ya sweswinyana?
7 Loko ku hundze makume ya malembe, ntirho wo chumayela hi Mfumo wu pfulekile. Poland, hambileswi a ya ha ri ehansi ka vulawuri bya Vukhomunisi, yi pfumerile leswaku ku khomiwa mintsombano ya siku rin’we hi 1982. Hi 1985 ku khomiwe mintsombano ya matiko hinkwawo kwalaho. Hi 1989 ku ve ni mintsombano leyikulu ya matiko hinkwawo, naswona a ku ri ni magidi lawa a ma huma eRussia ni le Ukraine. Hi rona lembe rolero, Timbhoni ta Yehovha ti nyikiwe mpfumelelo wa ximfumo eHungary ni le Poland. Hi xixikana xa 1989, Khumbi ra Berlin ri wile. Endzhaku ka tin’hweti ti nga ri tingani, hi amukeriwe ximfumo eJarimani Vuxa, naswona endzhakunyana ka sweswo ku khomiwe ntsombano wa matiko hinkwawo eBerlin. Naswona eku sunguleni ka khume ra malembe yo hetelela ya lembe-xidzana ra vu-20, ku endliwe matshalatshala yo tihlanganisa ni vamakwerhu va le Russia. Ku yiwe eka vatirhela-mfumo van’wana va le Moscow, naswona hi 1991, Timbhoni ta Yehovha ti amukeriwe ximfumo. Ku sukela enkarhini wolowo ntirho wu ye wu kula swinene eRussia ni le matikweni lawa a ma ri xiphemu xa khale ka Soviet Union.
8. Loko Nyimpi ya Vumbirhi ya Misava yi ri ni 45 wa malembe yi herile, vanhu va Yehovha va humeleriwe hi yini?
8 Loko nxaniso wu ya wu hunguteka etindhawini tin’wana, kun’wanyana wu tinyike matimba. Loko nyimpi ya vumbirhi ya misava yi ri ni 45 wa malembe yi herile, matiko yo tala ma arile ku nyika Timbhoni ta Yehovha mpfumelelo wa ximfumo. Ku engetela kwalaho, hi yirisiwile swin’we ni mintirho ya hina ematikweni ya 23 ya laha Afrika, ya 9 eAsiya, ya 8 eYuropa, ya 3 eLatin Amerika na ya 4 eswihlaleni swo karhi swa matiko.
9. Xana malandza ya Yehovha ma langutane na yini eMalawi?
9 Timbhoni ta Yehovha ta le Malawi ti langutane ni nxaniso lowu tsemaka nhlana ku sukela hi 1967. Hikwalaho ka vukala-tlhelo bya vona tanihi Vakreste va ntiyiso, vamakwerhu va kwalaho va ale ku xava makhadi ya vandla ra politiki. (Yohane 17:16) Endzhaku ka nhlangano wa Malawi Congress Party hi 1972, tihanyi ti sungule hi vuntshwa. Vamakwerhu va hlongoriwile emakaya ya vona, va tlhela va tsoniwa mintirho. Magidi ma balekile etikweni rero leswaku ma nga dlayiwi. Kambe xana lava a va lwa ni Xikwembu ni vanhu va xona va hlurile? Nikatsongo! Loko swiyimo swi hundzukile, ku vikiwe nhlohlorhi ya vahuweleri va Mfumo va 43 767 eMalawi hi 1999, naswona vanhu vo tlula 120 000 va ve kona emintsombanweni ya muganga ya kwalaho. Ku akiwe hofisi ya rhavi leyintshwa entsindza wa kwalaho.
Va Lava Ndlela Ya Vukanganyisi
10. Ku fana ni le mhakeni ya Daniyele, xana vakaneti va vanhu va Xikwembu va le nkarhini wa hina va endle yini?
10 Vagwinehi, vafundhisi ni van’wana a va swi koti ku langutana ni rungula ra hina leri humaka eRitweni ra Xikwembu. Hi ku kuceteriwa hi vukhongeri bya Vujagana, vakaneti va lava ndlela leyi vuriwaka ya le nawini yo endla leswaku ku lwisana ka vona na hina ku languteka ku ri kunene. Hi wahi marhengu lawa va ma tirhisaka nkarhi wun’wana? Xana lava va bohaka xikungu va endle yini loko va hlasela Daniyele? Eka Daniyele 6:4, 5, ha hlaya: “Valawuri ni valanguteri a va ya emahlweni va lava ku kuma vukanganyisi byo karhi ku lwa na Daniyele malunghana ni mfumo; kambe ku hava vukanganyisi kumbe ku onhaka loku va ku kumeke, tanihi leswi a a tshembekile, naswona ku hava ku honisa kumbe nchumu lowu onhakeke nikatsongo lowu kumekeke eka yena. Hikwalaho vavanuna lava va tiyeke emirini a va ku: ‘Eka Daniyele loyi a hi nge byi kumi vukanganyisi nikatsongo, handle ka loko ho byi kuma enawini wa Xikwembu xa yena ku lwa na yena.’” Ni namuntlha, vakaneti va lava ndlela ya vukanganyisi. Va tlatlarhuka hi “mimpambukwa leyi nga ni khombo” naswona va vula leswaku Timbhoni ta Yehovha i wun’wana wa yona. Hi ku tirhisa marito yo hehla, yo gega ni mavunwa, va sola vugandzeri bya hina ni ku namarhela ka hina misinya ya milawu ya Xikwembu.
11. Hi swihi swihehlo swa mavunwa leswi endliweke hi vanhu van’wana lava kanetaka Timbhoni ta Yehovha?
11 Ematikweni man’wana, mintlawa ya vukhongeri ni ya politiki a yi swi lavi ku pfumela leswaku hi ni “muxaka wa vugandzeri lebyi baseke ni lebyi nga nyamangiki hi ku ya hi langutelo ra Xikwembu [xa] hina.” (Yakobo 1:27) Hambileswi mintirho ya hina ya Vukreste yi endliwaka ematikweni ya 234, vakaneti va vula leswaku hina a hi va “vukhongeri lebyi tiviwaka.” Emahlweninyana ka ku khomiwa ka ntsombano wa matiko hinkwawo hi 1998, phepha-hungu ra le Atena ri tshahe mufundhisi wa Orthodox ya Magriki loyi a vuleke leswaku “[Timbhoni ta Yehovha] a hi ‘vukhongeri lebyi tiviwaka,’” hambileswi Huvo ya Timfanelo ta Vanhu ya le Yuropa yi humeseke nawu lowu hambaneke ni sweswo. Endzhaku ka masiku ma nga ri mangani, phepha-hungu rin’wana edorobeni rero ri tshahe muvulavuleri wa kereke loyi a nga te: “[Timbhoni ta Yehovha] ti nga ka ti nga vi ‘vandlha ra Vukreste,’ tanihi leswi ti nga riki na nchumu lexi fambisanaka ni ripfumelo ra Vakreste leri sekeriweke eka Yesu Kreste hi byakwe.” Sweswo swa hlamarisa, hikuva ku hava ntlawa wun’wana wa vukhongeri lowu kandziyisaka ngopfu mhaka ya ku tekelela Yesu handle ka Timbhoni ta Yehovha!
12. Loko hi ri karhi hi lwa nyimpi ya hina ya moya, xana hi fanele hi endla yini?
12 Hi tikarhatela ku simeka mahungu lamanene hi tindlela ta nawu. (Vafilipiya 1:7) Ku tlula kwalaho, hi nga ka hi nga landzuli kumbe ku tsan’wa ku namarhela ka hina mimpimanyeto ya Xikwembu ya ku lulama. (Tito 2:10, 12) Ku fana na Yeremiya, hi ‘tikhama masenge kutani hi vulavula hinkwaswo leswi Yehovha a hi lerisaka swona,’ hi nga pfumeli ku chavisiwa hi lava lwaka ni Xikwembu. (Yeremiya 1:17, 18) Rito ra Yehovha ro Kwetsima ri hi kombise ndlela leyi hi faneleke hi yi teka. A hi fanelanga hi titshega hi “voko ra nyama” leri nga tiyangiki kumbe hi lava “ku tumbela endzhutini wa Egipta,” ku nga, misava leyi. (2 Tikronika 32:8; Esaya 30:3; 31:1-3) Loko hi ri karhi hi lwa nyimpi ya hina ya moya, hi fanele hi hambeta hi tshemba Yehovha hi mbilu ya hina hinkwayo, hi pfumela leswaku a kongomisa tindlela ta hina, naswona hi nga titshegi hi ku twisisa ka hina. (Swivuriso 3:5-7) Loko hi nga seketeriwi hi Yehovha niloko a nga hi rindzi, ntirho wa hina hinkwawo wu ta va wa “hava.”—Pisalema 127:1.
U Xanisiwile Kambe A Nga Landzulanga
13. Ha yini ku nga vuriwaka leswaku nhlaselo wa Sathana eka Yesu wu tsandzekile?
13 Xikombiso lexikulu eka ku tinyiketela loku nga hundzukiki eka Yehovha i Yesu, loyi a a hehliwa hi vunwa bya leswaku u vanga dzolonga ni leswaku u pfilunganya fambiselo leri nga kona. Endzhaku ko kambisisa mhaka ya Yesu, Pilato a a swi lava ku n’wi ntshunxa. Kambe ntshungu wolowo, wu ri karhi wu kuceteriwa hi varhangeri va vukhongeri, a wu huwelela wu lava leswaku Yesu a beleriwa, hambileswi a a nga ri na nandzu. Ematshan’weni ya yena, va kombele leswaku ku ntshunxiwa Barabasi—wanuna loyi a khotsiwile hikwalaho ko pfukela mfumo ni ku dlaya hi vomu! Pilato u tlhele a ringeta ku vulavula ni vakaneti lava nga anakanyeliki, kambe eku heteleleni u pfumelelane ni leswi laviwaka hi vanhu lava. (Luka 23:2, 5, 14, 18-25) Hambileswi Yesu a feleke emhandzini, nhlaselo wolowo wo homboloka wa Sathana eka N’wana wa Xikwembu la nga riki na nandzu wu tsandzekile hilaha ku heleleke, hikuva Yehovha u pfuxe Yesu kutani a n’wi tlakusela evokweni Rakwe ra xinene. Naswona hi siku ra Pentekosta ya 33 C.E., hi ku tirhisa Yesu la vangamisiweke, moya lowo kwetsima wu chuluriwile, ku simekiwa vandlha ra Vukreste—‘ntumbuluko lowuntshwa.’—2 Vakorinto 5:17; Mintirho 2:1-4.
14. Xana ku humelele yini loko ntlawa wa vukhongeri bya Vayuda wu lwisane ni valandzeri va Yesu?
14 Endzhakunyana ka sweswo ntlawa wa vukhongeri wu xungete vaapostola, kambe valandzeri volavo va Kreste a va tshikanga ku vulavula hi swilo leswi va swi voneke ni ku swi twa. Vadyondzisiwa va Yesu va khongerile va ku: “Yehovha, xiyisisa minxungeto ya vona, u pfumelela mahlonga ya wena leswaku ma hambeta ma vula rito ra wena hi vurhena lebyi heleleke.” (Mintirho 4:29) Yehovha u angule xikombelo xa vona hi ku va tata hi moya lowo kwetsima ni ku va tiyisa leswaku va ya emahlweni ni ku chumayela ka vona handle ko chava. Ku nga ri khale vaapostola va tlhele va byeriwa leswaku va tshika ku chumayela, kambe Petro ni vaapostola lavan’wana va hlamule va ku: “Hi fanele ku yingisa Xikwembu tanihi mufumi ku tlula vanhu.” (Mintirho 5:29) Minxungeto, ku khomiwa ni ku bukuteriwa a swi va sivelanga ku ndlandlamuxa ntirho wa vona wa Mfumo.
15. Xana Gamaliyele a a ri mani, naswona i xitsundzuxo xihi lexi a xi nyikeke vanhu va vukhongeri lava a va kaneta valandzeri va Yesu?
15 Xana vafumi lava va vukhongeri va swi tekise ku yini? ‘Va tlhaveke swinene naswona va lava ku dlaya vaapostola.’ Hambiswiritano, mudyondzisi wa Nawu la vuriwaka Gamaliyele, la nga Mufarisi, a a ri kona kwalaho naswona a a xiximiwa hi vanhu hinkwavo. U humese vaapostola eholweni ya Sanedri nkarhinyana, kutani a tsundzuxa vakaneti volavo va vukhongeri a ku: “Vavanuna va Israyele, xiyisisani leswi mi kunguhataka ku swi endla malunghana ni vavanuna lava. . . . Ndzi ri eka n’wina, Mi nga tikarhati hi vanhu lava, kambe va tshikeni; (hikuva, loko kungu leri kumbe ntirho lowu wu huma evanhwini, wu ta hluleka; kambe loko wu huma eka Xikwembu, a mi nge swi koti ku va hlula;) loko swi nga ri tano, kahle-kahle mi nga ha kumeka mi lwa ni Xikwembu.”—Mintirho 5:33-39.
A Ku Na Tlhari Leri Endleriweke Ku Hi Hlasela Leri Nga Ta Humelela
16. Hi marito ya wena, xana u nga xi hlamusela njhani xitiyisekiso lexi Yehovha a xi nyikaka vanhu va yena?
16 Xitsundzuxo xa Gamaliyele a xi twala, naswona ha swi tlangela loko van’wana va vulavula khwatsi hi hina. Naswona ha pfumela leswaku ntshunxeko wa vugandzeri wu kumiwile hikwalaho ka swiboho swa le hubyeni, hi vaavanyisi lava nga yiki hi nghohe. Ina, ku namarhela ka hina Rito ra Xikwembu swi hlundzukisa vafundhisi va Vujagana ni varhangeri van’wana va Babilona Lonkulu, mfumo wa misava wa vukhongeri bya mavunwa. (Nhlavutelo 18:1-3) Hambileswi vona ni lava kuceteriwaka hi vona va lwisanaka na hina, hi na xitiyisekiso lexi: “‘Tlhari rihi ni rihi leri nga ta endleriwa ku ku hlasela a ri nge humeleli, ni ririmi rihi ni rihi leri nga ta kanetana na wena ehubyeni u ta ri gweva. Leyi i ndzhaka ya malandza ya Yehovha, naswona ku lulama ka wona ku huma eka mina,’ ku vula Yehovha.”—Esaya 54:17.
17. Hambileswi vakaneti va lwisanaka na hina, ha yini hi ri ni xivindzi?
17 Valala va hina va lwisana na hina handle ka xivangelo, kambe a hi heli matimba. (Pisalema 109:1-3) A hi nge pfuki hi pfumelele lava va vengaka rungula ra hina leri humaka eBibeleni ku va va hi chavisa leswaku hi landzula ripfumelo ra hina. Hambileswi hi swi vonaka leswaku nyimpi ya hina ya moya yi ta hisa ngopfu, ha byi tiva vuyelo bya kona. Ku fana na Yeremiya, hi ta vona ku hetiseka ka marito ya vuprofeta lama nge: “Va ta lwa na wena, kambe a va nge ku hluli, hikuva ‘mina ndzi na wena,’ ku vula Yehovha, ‘leswaku ndzi ku kutsula.’” (Yeremiya 1:19) Ina, ha swi tiva leswaku lava va lwaka ni Xikwembu a va nge hluli!
[Nhlamuselo ya le hansi]
a Vona xihloko lexi nge “Ku Tshembeka Ni Xivindzi eHansi Ka Ntshikilelo Wa Manazi,” eka matluka 24-8.
A Wu Ta Hlamurisa Ku Yini?
• Ha yini malandza ya Yehovha ma hlaseriwa?
• Xana vakaneti va lwisane ni vanhu va Yehovha hi tindlela tihi?
• Ha yini hi nga tiyisekaka leswaku vanhu lava lwaka ni Xikwembu a va nge hluli?
[Xifaniso lexi nga eka tluka 17]
Yeremiya u tiyisekisiwile leswaku Yehovha u ta va na yena
[Xifaniso lexi nga eka tluka 18]
Vanhu lava poneke ekampeni ya nxaniso
[Xifaniso lexi nga eka tluka 18]
Ntshungu wa vapfukeri lowu lwisanaka ni Timbhoni ta Yehovha
[Xifaniso lexi nga eka tluka 18]
J. F. Rutherford ni vanakulobye va yena
[Xifaniso lexi nga eka tluka 21]
Emhakeni ya Yesu, lava va lweke ni Xikwembu a va hlulanga