Xiviko Xa Vahuweleri Va Mfumo

“Mi Tiva Swo Tala Ngopfu Hi Bibele”

LOKO Yesu wa malembe ya 12 hi vukhale, a vulavule hi xivindzi ni varhangeri va vukhongeri eYerusalema, “hinkwavo lava a va n’wi yingisile a va hlamala va nga heti hikwalaho ka ku twisisa kakwe ni tinhlamulo takwe.” (Luka 2:47) Hilaha ku fanaka ni namuntlha, vantshwa vo tala lava nga malandza ya Yehovha va kanya mbilu va vulavula ni vadyondzisi va vona ni vadyondzi-kulobye hi Xikwembu ni hi Bibele, naswona hi xitalo va kuma vuyelo lebyi tsakisaka.

Tiffany wa malembe ya 14, a ri entlaweni lowu a wu bula hi vuprofeta bya Bibele bya mavhiki ya 70 ya malembe, lebyi kumekaka eka Daniyele 9:24-27. Mudyondzisi u lo tivulavulela katsongo hi tindzimana leti, kutani a tshika mhaka leyi empfhukeni.

Eku sunguleni, Tiffany a a kanakana ku tlakusa voko ra yena. U ri: “Kambe, swi ndzi karhate ngopfu leswi tindzimana leti ti nga hlamuseriwangiki kahle. Ndzi tikume ndzi yimise voko.” Mudyondzisi a a hlamarile ku vona leswaku entiyisweni ku na un’wana la nga ni xo xi vula eka nhloko-mhaka leyi, tanihi leswi swichudeni swo tala a swi nga yi twisisi mhaka leyi.

Loko a nyikiwe nkarhi wo hlamusela vuprofeta lebyi, Tiffany u yimile ivi a vulavula handle ko tilumaluma. Loko a heta a ku lo whii, etlilasini. Tiffany a a chuhilenyana. Kutani tlilasi yi sungula ku ba mavoko nkarhi wo leha.

Mudyondzisi u nkhense a vuyelela a ku: “Inkomu Tiffany, ha tlangela swinene.” U pfumerile leswaku a a swi tiva leswaku ku fanele ku ri ni nhlamuselo leyi engetelekeke ya matsalwa lawa, kambe Tiffany a ri munhu wo sungula ku n’wi hlamusela wona hi ndlela leyi twisisekaka. Endzhaku ka dyondzo u vutise Tiffany leswaku swi tise ku yini leswaku a va ni vutivi byonghasi bya Bibele.

Hiloko a ku: “Hi leswaku ndzi Mbhoni ya Yehovha. Vatswari va mina va ndzi hlamusele vuprofeta lebyi ko tala kukondza ndzi byi twisisa.”

Ni vadyondzi-kulobye a va hlamarisiwe hi ku tiva ka yena Bibele. Xichudeni xin’wana xi byele Tiffany xi ku: “Sweswi se ndza swi tiva leswaku hikwalaho ka yini n’wina Timbhoni ta Yehovha mi famba hi yindlu ni yindlu; hi leswaku mi tiva swo tala ngopfu hi Bibele.” Van’wana va tshembise leswaku va nga ka va nga ha n’wi vungunyi hi ripfumelo ra yena.

Loko Tiffany a tivisa vatswari va yena hi mhaka leyi, va ringanyete leswaku a nyika mudyondzisi wa yena buku leyi nge Vutivi Lebyi Yisaka eVuton’wini Lebyi Nga Heriki. Loko a endle tano, naswona a kombe mudyondzisi wa yena xiyenge lexi hlamuselaka vuprofeta bya Daniyele, a nga kanakananga ku teka buku leyi, naswona u tlhele a n’wi nkhensa.

Kunene, loko vantshwa lava nga Vakreste va va ni xivindzi xo vulavula hi leswi vatswari va vona va va dyondziseke swona malunghana ni Xikwembu ni Bibele, va tisa ku dzuneka ni ku xichavo eka Yehovha ni ku kuma mikateko.—Matewu 21:15, 16.