Tievhangeli Njhekanjhekisano Lowu Yaka Emahlweni

Xana xiviko xa Tievhangeli lexi vulavulaka hi ku tswariwa ka Yesu Kreste i ntiyiso?

Xana u nyikele Dyondzo ya le Ntshaveni?

Xana Yesu u pfuxiwile hakunene?

Xana hakunene u vurile a ku: “Hi mina ndlela ni ntiyiso ni vutomi”?—Yohane 14:6.

TIMHAKA to fana ni leti ti kaneriwe hi swichudeni swa kwalomu ka 80, eka Seminara ya Yesu, leyi khomiwaka kambirhi hi lembe ku sukela hi 1985. Ntlawa lowu wa swichudeni wu hlamule swivutiso leswi hi ndlela leyi nga tolovelekangiki. Lava hlanganyeleke eka seminara va tsale swiphephana swo hlawula eka xivulwa xin’wana ni xin’wana lexi ku vuriwaka leswaku xi vule hi Yesu eka Tievhangeli. Xiphephana xo tshwuka xi kombisa mavonelo ya leswaku hakunene marito wolawo ma vuriwe hi Yesu. Xiphephana xa pinki xi vula leswaku Yesu a nga ha va a ma vurile marito wolawo. Xiphephana xo kwalala xi kombisa leswaku marito ya kona ma nga ha va ma yelana ni ya Yesu, kambe marito lawa a ma vuriwanga hi yena. Xiphephana xa ntima xi kombisa ku nga pfumelelani hi ku helela ni marito lama tsariweke, xi yima ni leswaku marito lawa ma huma eka ndhavuko wa le ndzhakunyana.

Hi ku tirhisa endlelo leri, lava hlanganyeleke eka Seminara ya Yesu va kanete tinhla hinkwato leti tlakusiweke hi ndlela ya swivutiso leti boxiweke eku sunguleni. Kahle-kahle, swi hoxe xiphephana xa ntima eka 82 wa tiphesente ta marito lama ku vuriwaka leswaku ma vuriwe hi Yesu eka Tievhangeli. Hi ku ya hi swona, i 16 wa tiphesente ntsena ta swiendlakalo leswi vulavulaka hi Yesu eka Tievhangeli ni matsalwa man’wana lama vonakaka ma ri ntiyiso.

Ku soriwa ko tano ka Tievhangeli a hi nchumu lowuntshwa. Ku hlasela Tievhangeli ku humelele hi 1774 loko 1 400 wa matluka lama tsariweke hi voko hi Hermann Reimarus, profesa wa tindzimi ta le Vuxeni le Hamburg, eJarimani, ma humesiwe endzhaku ka ku fa kakwe. Hi nkarhi wolowo Reimarus u kombise ku kanakana lokukulu malunghana ni matimu ya Tievhangeli. Makumu ya yena a ma sekeriwe eku kambisiseni ka tindzimi ni leswi vonakaka swi kanetana ni leswi kumekaka eka swiviko swa mune swa Tievhangeli swa vutomi bya Yesu. Ku sukela kwalaho vaxopaxopi a va tshamela ku kanakana ku tshembeka ka Tievhangeli, hi ndlela yo karhi va endla leswaku vanhu va nga ma tshembi matsalwa lawa.

Swidyondzi sweswo swi pfumelelana hi leswaku xiviko xa Tievhangeli i mintsheketo ya vukhongeri leyi tsariweke hi vanhu vo hambana-hambana. Swivutiso leswi tolovelekeke leswi vutisiwaka hi swidyondzi leswi kanakanaka hi leswi nge: Xana swi nga endleka leswaku ripfumelo ra vona ri vangele vatsari va Tievhangeli ta mune ku sasekisa ntiyiso? Xana timhaka ta tipolitiki ta vanhu va le nkarhini wa Vukreste byo sungula ti va vangele ku cinca kumbe ku engetela swo karhi eka rungula ra Yesu? Hi swihi swiphemu swa Tievhangeli leswi a swi ri kusuhi no pakanisa eswivikweni swa tona ematshan’weni yo endla mintsheketo?

Vanhu lava kuleleke endhawini leyi vanhu va kona va nga pfumeriki leswaku xikwembu xi kona kumbe laha va nga byi rhandziki vukhongeri va kholwa leswaku Bibele—leyi hlanganisaka Tievhangeli—i buku leyi teleke hi mintsheketo. Kasi van’wana va nyangatsiwa hi matimu ya Vujagana ya ku halatiwa ka ngati, ku tshikileriwa, ku avana ni mahanyelo lama kombisaka ku nga xi chavi Xikwembu. Vanhu vo tano a va xi voni xivangelo xo yisa nyingiso eka matsalwa lama tekiwaka ma kwetsima eVujaganini. Va anakanya leswaku mintirho leyi humeseke vukhongeri bya vukanganyisi yi sekeriwe eka mintsheketo.

Xana u ehleketa yini? Xana u fanele u pfumelela mianakanyo ya swidyondzi swo karhi leswi kanakanaka ku tshembeka ka Tievhangeli yi ku vangele ku kanakana loku fanaka emianakanyweni ya wena? Loko u twa swiviko swa ku hehliwa ka vatsari va Tievhangeli leswaku va lo tisungulela ntsheketo, xana u fanele ku swi pfumelela swi tsekatsekisa ntshembo wa wena eka leswi va swi tsaleke? Xana matimu ya ku nga chavi Xikwembu ya Vujagana ma fanele ma ku endla u kanakana ku tshembeka ka Tievhangeli? Ha ku rhamba leswaku u kambisisa yin’wana ya mintiyiso ya kona.

[Xifaniso lexi nga eka tluka 4]

Xana Tievhangeli ti tamele mintsheketo kumbe ntiyiso?

[Xihlovo Xa Kona]

Jesus Walking on the Sea/The Doré Bible Illustrations/Dover Publications

[Laha Xifaniso Xi Humaka Kona eka tluka 3]

Background, pages 3-5 and 8: Courtesy of the Freer Gallery of Art, Smithsonian Institution, Washington, D.C.