Hina Hi Vanhu Lava Nga Ni Ripfumelo

Ku Aka Ripfumelo Hi Dyondzo Ya Bibele Le Indiya

TIKO ra Indiya ri ni swilo swo hambana-hambana loko swi ta eka swa ntivo-misava ni vukhongeri, swo tanihi Tintshava ta Himalaya en’walungwini leti funengetiweke hi gamboko, ni timbuwa leti nga ni nkahelo edzongeni wa Lwandle ra Indiya. Ri ni vaaki lava tlulaka gidi ra timiliyoni, laha 83 wa tiphesete ku nga Mahindu, 11 wa tiphesente i Mamoslem kasi tiphesente letin’wana hi lava tivulaka Vakreste, Masikh, Mabudha ni Majain. Hinkwavo va tsakela ntshunxeko wa vukhongeri. “Vukhongeri i nchumu wa risima eka vanhu va le Indiya,” ku vula buku leyi nge, The World Book Encyclopedia.

Kambe lava hanyaka hi ku landza ripfumelo ra vona ra Vukreste, i Timbhoni ta Yehovha, leti tlulaka 21 200 eIndiya. Ku fana ni vanghana va tona va moya eswiphen’wini swin’wana swa misava, Timbhoni ta le Indiya ti swi teka ku ri lunghelo ku pfuna vaakelani va tona leswaku va aka ripfumelo leri tiyeke eRitweni ra Xikwembu, ku nga Bibele yo Kwetsima. (2 Timotiya 3:16, 17) Xiya ndlela leyi ndyangu wun’wana wa le Chennai, edzongeni wa Indiya wu kumeke ntiyiso wa Bibele ha yona.

Wu nga si hlangana ni Timbhoni ta Yehovha, ndyangu lowu a wu nghene wu ku swaa, eka mikhuva ya mintlawa ya Khatoliki yo endla mahlori, ku vona swivono, ku vulavula hi tindzimi ni ku horisa vavabyi. A wu ri ni ndhuma ekerekeni ni le ka vaaki va tiko, lerova vanhu va vitana swirho swin’wana swa ndyangu lowu leswaku i “swami,” leswi vulaka “hosi.” Kutani siku rin’wana Mbhoni yi endzele ndyangu lowu, yi wu komba eBibeleni leswaku Yesu i N’wana wa Xikwembu, a hi Xikwembu xa Matimba Hinkwawo, ku nga leswi hi ntolovelo ku vuriwaka swona. Mbhoni yi tlhele yi wu komba leswaku vito ra Xikwembu i Yehovha ni leswaku xikongomelo xa Yehovha i ku endla misava yi va paradeyisi yo xonga.—Pisalema 83:18; Luka 23:43; Yohane 3:16.

Hikwalaho ka leswi a swi xixima Rito ra Xikwembu ni ku tsakela leswi swi swi tweke, swirho swa ndyangu lowu swi pfumele ku va ni dyondzo ya Bibele ya nkarhi ni nkarhi ni Timbhoni ta Yehovha. Leswi swi endle leswaku vanghana va swona lava swi nghenaka na vona kereke va swi hlekula. Hambiswiritano, ndyangu lowu wu yime hi rero, wu ya emahlweni ni dyondzo ya wona ya Bibele. Loko vutivi bya wona byi ri karhi byi engeteleka ni ripfumelo ra wona ri tiya, wu tshike mikhuva ya vukhongeri bya wona bya mavunwa. Namuntlha, swirho swinharhu swa ndyangu lowu, i Timbhoni leti hisekaka ni leti khuvuriweke, naswona mana wa ndyangu u pfa a teka vuphayona bya nkarhinyana loko a swi kota.

Ku Va Ni Ripfumelo Ro Hlula Vulema

Sunder Lal, jaha leri tshamaka emugangeni wa Punjab, a ri fanele ku va ni ripfumelo ni xivindzi lexikulu leswaku ri kota ku byela van’wana hi mahungu lamanene ya Mfumo wa Xikwembu. (Matewu 24:14) Xo sungula ri fularhele swikwembu swo tala swa ndyangu wa ka vona ni swa muganga, ri ya gandzela Xikwembu xa ntiyiso, Yehovha. Kasi xin’wana, Sunder Lal a nga ri na milenge.

Ku fikela hi 1992, Sunder Lal a a hanya vutomi lebyi tolovelekeke. A a ri mupfuneti wa dokodela, kutani a tihlanganisa ni va ka vona evugandzerini bya swikwembu swo tala hi ku kongomisiwaka hi mufundhisi loyi va tihlawuleleke yena. Kutani hi vusiku byin’wana, u wile loko a tsemakanya xiporo xa xitimela. Hiloko xitimela xi tala henhla ka yena kutani xi n’wi tsema milenge hi le tsheveni. Hambileswi a poneke, vutomi bya yena a byi nga ha ta nyawula. Swa twisiseka leswi Sunder Lal a tshikilelekile swinene emianakanyweni naswona a kunguhate ni ku tisunga. Ndyangu wa ka vona a wu n’wi seketela, kambe a nga ha ri na ntshembo hi vumundzuku bya yena.

Kutani Mbhoni ya Yehovha yi endzele Sunder Lal kutani yi n’wi komba eBibeleni leswaku Xikwembu xi tshembise ku endla misava yi va paradeyisi leyi tsakisaka ni ku nyika rihanyo ro hetiseka eka hinkwavo lava va xi rhandzaka ni lava xi chavaka. Sunder Lal u amukele dyondzo ya Bibele, kutani a dyondza lembe hinkwaro hi ku hiseka. U rhambiwe ku ya eminhlanganweni ya Vukreste, hiloko siku rin’wana a heleketiwa hi munghana wakwe hi xikanyakanya. Hambileswi riendzo a ri tika, u vuyeriwe ngopfu. Leswi a swi dyondzeke eka Bibele yakwe swi dzime timitsu, tanihi leswi a kumeke van’wana lava hakunene va tshembaka switshembiso swa Rito ra Xikwembu ni ku hanya hi ku pfumelelana ni tidyondzo ta Bibele.

Sunder Lal u sungule ku byela vaakelani vakwe mahungu lamanene, naswona hi 1995 u khuvuriwile. Eku sunguleni a a ya evutirhelini bya yindlu ni yindlu hi ku kasa emugangeni wa ka vona, ku nga ndlela leyi a a famba ha yona. Kambe sweswi u ni nyiko leyi a yi kumeke eka vamakwavo va moya—ku nga xithuthuthu xa mavhilwa manharhu lexi “chovhiwaka” hi mavoko. Xithuthuthu xa mavhilwa manharhu xi pfunile, hikuva sweswi wa swi kota ku tifambela naswona u kota ku famba mpfhuka wa tikhilomitara ta 12 a ya eminhlanganweni ya vandlha. Minkarhi yin’wana u tifambela a ri yexe hambiloko ku na mpfula leyikulu; minkarhi yin’wana mahiselo ya ndhawu yoleyo ma tlula 43° C.

Handle ka ku ya eminhlanganweni, Sunder Lal u fambisa tidyondzo ta Bibele to tala, a pfuna van’wana lava navelaka ku va ni ripfumelo leri tiyeke eka Xikwembu xa ntiyiso, Yehovha. Kahle-kahle, swichudeni swakwe swa nkombo, leswi a a dyondza na swona sweswi se swi khuvuriwile, kasi ku khuvuriwe ni van’wana vanharhu lava a vulavuleke na vona kambe va dyondzeriwe Bibele hi Timbhoni-kulobye.

Ku ya hi Bibele, “ripfumelo a hi ra vanhu hinkwavo.” (2 Vatesalonika 3:2) Kambe eka lava nga ni “mboyamelo lowunene eka vutomi lebyi nga heriki,” dyondzo ya nkarhi hinkwawo ya Rito ra Xikwembu yi nga ta aka ripfumelo leri tiyeke. (Mintirho 13:48) Dyondzo yo tano yi endla mahlo ya vangama hi ntshembo lowu hlamarisaka wa vumundzuku—ku nga nchumu lowu vanhu lava engetelekaka va le Indiya va nga ni ripfumelo eka wona.

[Mepe lowu nga eka tluka 30]

(Leswaku u vona rungula leri hleriweke hi ku helela, vona nkandziyiso wa kona)

AFGHANISTAN

PAKISTAN

NEPAL

BHUTAN

CHAYINA

BANGLADESH

MYANMAR

LAOS

THAILAND

VIETNAM

CAMBODIA

SRI LANKA

INDIYA

[Xihlovo Xa Kona]

Mountain High Maps® Copyright © 1997 Digital Wisdom, Inc.