Xana U Makholwa Hi Ku Vona?

LOKO munhu a ku, ‘Ndzi makholwa hi ku vona ntsena,’ u va a ri eku thatheleni. Entiyisweni, hinkwerhu ha swi kholwa swilo leswi hi nga kotiki ku swi vona.

Hi xikombiso, swi nga ha endleka leswaku exikolweni u endle nkombiso lowu kombisaka leswaku matimba lama kokaka ma kona. Wu nga endliwa hi ndlela leyi: Chela swinsimbhana ehenhla ka phepha. Kutani u tlhandleka phepha rero ehenhla ka maginete. Loko u tshukuvanyisa phepha rero, u ta vona swinsimbhana swi yima onge ko endleka muhlolo. Loko u endla sweswo, xana wa ma vona hakunene matimba lama kokaka? E-e, kambe leswi ma swi endlaka eka swinsimbhana swi le rivaleni, swi ku nyika vumbhoni lebyi tiyeke bya leswaku matimba lama kokaka ma kona.

Swilo swin’wana leswi hi nga swi voniki a hi kanakani leswaku swi kona. Loko hi vona xifaniso xo saseka kumbe hi bumabumela xifaniso lexi kovotliweke kahle, a hi kanakani leswaku ku ni munhu la nga ni vutshila bya ku dirowa kumbe bya ku vatla. Kutani loko hi hlalele boboma kumbe hi languta ku pela ka dyambu, xana a hi fanelanga hi susumeteleka ku anakanya hi leswaku i ntirho wa Mutshila kumbe wa Muvatli Lonkulu?

Lexi Endlaka Van’wana Va Nga Kholwi

Lexi hlamarisaka, vanhu van’wana va tshike ku pfumela eka Xikwembu hikwalaho ka leswi va dyondzisiweke swona ekerekeni. Leswi swi ve tano hi wanuna wa le Norway, loyi a byeriweke leswaku Xikwembu xi hisa vanhu vo biha etiheleni leti pfurhaka. Wanuna loyi swi n’wi tikerile ku twisisa leswaku i Xikwembu xa njhani lexi xanisaka vanhu hi ndlela leyi, hiloko a hundzuka la nge, Xikwembu a xi kona.

Hambiswiritano, endzhaku wanuna loyi u pfumerile leswaku Mbhoni ya Yehovha yi n’wi pfuna ku kambela Bibele. U hlamarisiwe hi ku dyondza leswaku Bibele a yi dyondzisi leswaku vanhu vo biha va xanisiwa etiheleni ta ndzilo leti pfurhaka. Bibele yi fanisa ku fa ni ku etlela. Esirheni a hi twi ku vava; a hi tivi nchumu nikatsongo. (Eklesiasta 9:5, 10) Wanuna loyi u tlhele a dyondza leswaku vanhu lava Xikwembu xi va avanyiseke hikwalaho ka vubihi bya vona lerova va nge hundzuki, va ta tshama esirheni hilaha ku nga heriki. (Matewu 12:31, 32) Vanhu lavan’wana lava feke va ta pfuxiwa hi nkarhi lowu Xikwembu xi wu vekeke, va ri ni ntshembo wa ku kuma vutomi lebyi nga heriki emisaveni leyi nga Paradeyisi. (Yohane 5:28, 29; 17:3) Nhlamuselo leyi a yi twisiseka. A yi pfumelelana ni marito ya Bibele lama nge “Xikwembu i rirhandzu.” (1 Yohane 4:8) Wanuna loyi la tiyimiseleke u ye emahlweni ni ku dyondza Rito ra Xikwembu kutani hi ku famba ka nkarhi u xi rhandzile Xikwembu xa Bibele.

Van’wana va ala leswaku Muvumbi la nga ni rirhandzu u kona hikwalaho ka ku andza ka maxangu ni ku pfumaleka ka vululami. Va pfumelelana ni wanuna wa le Sweden loyi a nga tshama a kombetela etilweni kutani a vutisa a ku: “Swi tisa ku yini leswaku le tilweni ku va ni Xikwembu xa matimba hinkwawo, lexi hananaka swinene kasi laha misaveni ku tele vuhomboloki ni vubihi swonghasi?” Hikwalaho ka leswi a ku nga ri na loyi a a ta hlamula xivutiso xa yena, na yena u hundzuke la nge Xikwembu a xi kona. Endzhaku u sungule ku dyondza Bibele ni Timbhoni ta Yehovha. U dyondze leswaku Rito ra Xikwembu ri nyika nhlamulo leyi enerisaka eka xivutiso xa khale lexi nge, Ha yini Xikwembu xi pfumelele vubihi leswaku byi va kona?a

Wanuna loyi la tiyimiseleke u dyondze leswaku ku va kona ka vubihi a hi vumbhoni bya leswaku Xikwembu a xi kona. Hi xikombiso: Munhu a nga ha endla mukwana leswaku wu ta tirhisiwa ku tsema nyama. Muxavi a nga ha xava mukwana kutani a wu tirhisela ku dlaya ku nga ri ku tsema nyama. Leswaku mukwana lowu wu tirhisiwe hi ndlela yo biha a swi vuli leswaku a nga kona la wu endleke. Hilaha ku fanaka, mhaka ya leswaku misava a yi tirhiseriwanga xikongomelo xa yona a swi vuli swona leswaku a yi na Muvumbi.

Bibele yi dyondzisa leswaku ntirho wa Xikwembu wu hetisekile. Hi “lexi nga riki na vuhomboloki; xi ni vululami naswona xi hava xisandzu.” (Deteronoma 32:4) Xikwembu xi nyika munhu tinyiko letinene kambe tin’wana ta tinyiko leti ti tirhisiwe hi ndlela yo biha kutani swi vangela ku xaniseka lokukulu. (Yakobo 1:17) Hambiswiritano, Xikwembu xi ta herisa ku xaniseka. Endzhaku ka sweswo, “lavo rhula va ta dya ndzhaka ya misava, . . . va ta tshama eka yona hi masiku.”—Pisalema 37:11, 29.

Wanuna wa le Sweden la boxiweke eku sunguleni, u tlhavekile loko a vona ku xaniseka ka vanhu-kulobye. Kunene, nkhathalelo wa yena wa xiviri hi vanhu van’wana wu tiyisekise vukona bya Xikwembu. Njhani?

Vunyingi bya vanhu loko byi nga pfumeli eka Xikwembu byi hundzukela eka dyondzo ya hundzuluko. Vadyondzisi va hundzuluko va dyondzisa leswaku “ku pona tinhenha”—hi marito man’wana leswaku munhu a kota ku hanya u fanele ku lwa hi matimba, loko swi nga ri tano, u ta fa, swi tano ni le ka swiharhi. Nhenha ya hanya; la tsaneke wa fa. Va vula leswaku hi yona ndlela leyi swilo swi nga xiswona hi ntumbuluko. Kambe loko ku ri leswaku swi tano hi “ntumbuluko” leswaku la tsaneke u faneriwa hi ku fa ivi ku sala la nga nhenha, xana hi ta yi hlamuserisa ku yini mhaka ya leswaku tinhenha tin’wana ta karhateka hi ku xaniseka ka vanhu-kulobye, hilaha swi nga tano hi wanuna loyi wa le Sweden?

Ku Tiva Xikwembu

A hi nge swi koti ku vona Xikwembu hikuva a hi munhu wa nyama. Kambe, Xikwembu xi lava leswaku hi xi tiva. Ndlela yin’wana leyi hi nga tolovelanaka na xona ha yona i ku xiya mintirho ya xona yo hlamarisa—ku nga “swifaniso leswi dirowiweke” ni leswi “kovotliweke” swa ntumbuluko. Eka Varhoma 1:20, Bibele yi ri: “Timfanelo ta xona [Xikwembu] leti nga vonakiki ta voniwa ku sukela loko misava yi tumbuluxiwile ku ya emahlweni, hikuva ti xiyeka hi swilo leswi endliweke, ni hi matimba ya xona lama nga riki na makumu ni Vukwembu bya xona.” Ina, tanihi leswi ku kambisisa xifaniso lexi dirowiweke kumbe lexi kovotliweke swi nga ku pfunaka ku tiva leswaku loyi a xi endleke i munhu wa njhani, ku anakanyisisa hi mintirho yo hlamarisa ya Xikwembu swi nga ku pfuna leswaku u tiva vumunhu bya xona ku antswa.

Ina, a hi nge swi koti ku kuma tinhlamulo ta swivutiso hinkwaswo swa vutomi leswi karhataka, hi ku languta ntumbuluko lowu Xikwembu xi wu vumbeke. Kambe hi nga ti kuma hi ku kambela Rito ra Xikwembu, ku nga Bibele. Vavanuna vambirhi lava ku vulavuriweke ha vona eku sunguleni va pfuniwe hi ku dyondza Bibele hi vonelo lerinene leswaku va fikelela makumu ya leswaku Xikwembu xi kona ni leswaku xa khathala hi swilo leswi hi humelelaka.

[Nhlamuselo ya le hansi]

[Laha Xifaniso Xi Humaka Kona eka tluka 28]

J. Hester and P. Scowen (AZ State Univ.), NASA