Misava Xana I ndhawu Yo Ringiwa Eka Yona?

A HI ku tsakisa ka swona! U pasile. Xichudeni lexi a xi langutane ni xikambelo xo tika xa mavhiki mambirhi eku heteleleni xi kuma xiviko lexi tsakisaka. Sweswi se xi nga ya emahlweni ni ntirho lowu ku nga khale xi wu lava.

Vanhu vo tala va teka vutomi emisaveni hi ndlela leyi fanaka. Va ehleketa leswaku i ndzingo wo sungula lowu hinkwerhu hi faneleke ku hundza eka wona. Lava va “humelelaka” va hundzela kun’wana laha ku antswaka va ri eka xivumbeko xa Vutomi Endzhaku ka Rifu. A swi ta khomisa gome hakunene, loko vutomi bya sweswi—lebyi nga riki nchumu eka vo tala—a byi ri nchumu wo antswa lowu vanhu va nga wu langutelaka. Hambileswi a a hanye kahle naswona a fumile evuton’wini bya yena, Yobo wa le Bibeleni u xiye leswi: “Munhu la velekiweke hi wansati, u hanya nkarhi wo koma naswona u taleriwe hi ku karhateka.”—Yobo 14:1.

New Catholic Encyclopedia loko yi hlamusela ndlela leyi vo tala va ehleketaka ha yona yi ri: “Xikongomelo xa Xikwembu a ku ri leswaku vanhu va vangamisiwa etilweni. . . . Ntsako wa vanhu wu vonaka wu ta va eku wutleriweni ka vona etilweni.” Nkambisiso wa sweswinyana wa le ka Church of Christ le United States wu vule leswaku vanhu va 87 wa tiphesente lava hlamuleke va tshemba leswaku swi nga endleka va ya etilweni loko va fa.

Vanhu vo tala va lava va nga riki Vakreste na vona va tshemba leswaku va ta siya misava va ya endhawini leyi antswaka loko va fa. Hi xikombiso, Mamoslem ma ni ntshembo wo ya eparadeyisini ya le tilweni. Valandzeri va mimpambukwa ya Tiko Ro Tenga ya Vubuddha ya le Chayina ni le Japani va tshemba leswaku loko va tshama va ri karhi va yimbelela “Amitabha,” vito ra Mubudha wa Ku Vonakala Loku Nga Riki Na Makumu, va ta tswariwa nakambe eTikweni leri Tengeke, kumbe eParadeyisini ya le Vupela-dyambu laha va nga ta hanya entsakweni wa xiyimo xa le henhla.

Lexi tsakisaka, Bibele, buku yo kwetsima leyi hundzuluxeriweke swinene yi tlhela yi hangalasiwa swinene emisaveni, a yi vulavuli hi misava yi ri ndhawu leyi hi nga yi siyaka, ndhawu leyi hi hundzelaka eka swiyimo swin’wana hi ku tirhisa yona. Hi xikombiso yi ri: “Lavo lulama va ta dya ndzhaka ya misava, va ta tshama eka yona hi masiku.” (Pisalema 37:29) Nakambe eBibeleni hi kuma marito ya Yesu lama dumeke: “Va katekile lava titsongahataka: hikuva va ta dya ndzhaka ya misava.”—Matewu 5:5, King James Version.

Mavonelo lama tolovelekeke ya leswaku vutshamo bya hina bya laha misaveni i bya xinkarhana, ma vula leswaku rifu i nyangwa lowu yisaka entsakweni wa le ndzhaku ka rifu. Kutani loko swi ri tano, rifu i nkateko hakunene. Xana vanhu hi ntolovelo va languta rifu hi ndlela yoleyo kumbe va ringeta ku lehisa vutomi bya vona? Ntokoto wu kombisa leswaku loko vanhu va hanya kahle naswona va sirhelelekile, a va swi lavi ku fa.

Hambiswiritano, leswi vutomi emisaveni byi teleke hi vubihi ni ku xaniseka, vo tala va ha teka matilo ma ri ndhawu leyi ku nga yona ntsena leyi ku nga kumiwaka ku rhula ka xiviri ni ntsako eka wona. Xana matilo i ndhawu leyi teleke ku rhula ntsena ni leyi nga hava vubihi ni ku nga twanani? Naswona xana Vutomi Endzhaku ka Rifu byi kumeka etilweni ntsena? U ta hlamala loko u twa tinhlamulo ta Bibele. Hi kombela u ya emahlweni u hlaya.