Wa Tsundzuka Xana?

Xana u swi tsakerile ku hlaya minkandziyiso ya sweswinyana ya Xihondzo xo Rindza? Kutani a hi vone loko u ta swi kota ku hlamula swivutiso leswi landzelaka:

• I yini lexi nga xa nkoka eku tlhantlheni ka timholovo?

Hi fanele hi rhanga hi xiya leswaku hinkwerhu hi ni mboyamelo wa ku anakanya leswi hoxeke ni ku va ni langutelo leri hoxeke. Kutani hi fanele hi tikambisisa kahle, kumbexana ku nga va ku ri hina lava hoxeke ku nga ri loyi un’wana.—8/15, tluka 23.

• Xana ‘minkarhi ya ku vuyeteriwa ka swilo hinkwaswo’ leyi ku vulavuriwaka ha yona eka Mintirho 3:21 yi ta va rini?

Ku vuyeteriwa loku ku ta hi tindlela timbirhi. Yo sungula, i ku vuyeteriwa ka paradeyisi ya moya loku yaka emahlweni sweswi ku sukela hi 1919. Ku vuyeteriwa kun’wana ku ta fika loko misava ya hina yi vuyeteriwa yi va paradeyisi ya xiviri.—9/1, matluka 17, 18.

• Vusokoti a byi na ndhuna, hilaha swi hlamuseriweke hakona eka Swivuriso 6:6-8, kambe byi hi vekela xikombiso lexinene hi ndlela yihi?

Laha vusokoti byi tshamaka kona, ku ni hosi ya xisati, kambe yo va hosi ya xisati ntsena hi leswi yi tshikelaka mandza naswona yi nga mana wa byona hinkwabyo. Vusokoti bya gingiriteka, kutani na hina hi fanele hi endla tano, hi lwela ku endla nhluvuko entirhweni wa hina, ni loko loyi a hi kongomisaka a nga ri kona.—9/15, tluka 26.

• Xana vuprofeta bya Hulida a byi pakanisile, hilaha byi tsariweke hakona eka 2 Tihosi 22:20, leswaku Yosiya u ta fa “hi ku rhula,” tanihi leswi a vavisiweke ngopfu enyimpini lerova a a ta fa?

Ina, u fe hi ku rhula hikuva u fe khombo ra 609-607 B.C.E. ri nga si endleka, loko Vababilona va rhendzele Yerusalema va tlhela va wu lovisa.—9/15, tluka 30.

• Ha yini a swi fanela ku va Solomoni a hlamusela wansati tanihi “mhunti leyi rhandzekaka ni nhongo yo xonga ya le ntshaveni”? (Swivuriso 5:18, 19)

Ntswele ya nhongo yi rhombile yi tlhela yi saseka. Hambiswiritano, ya swi kota ku hanya yi tlhela yi tswalela etindhawini ta maribye, leti ku nga nghenekiki hi ku olova eka tona, laha swakudya swi kalaka.—10/1, matluka 30, 31.

• Henry Grew na George Storrs a ku ri vamani?

Vavanuna lava vambirhi va hanye hi va-1800 naswona a va ri swichudeni swa Bibele leswi hisekaka. Grew u dyondze leswaku Vunharhu-un’we a hi dyondzo ya le Matsalweni, hilaha dyondzo ya ku nga fi ka moya-xiviri ni ya ndzilo wa tihele ti nga humiki eka wona. Storrs u twisise leswaku van’wana va ta kuma vutomi lebyi nga heriki emisaveni. Havumbirhi bya vona va ve kona emahlweni ka Charles Taze Russell, loyi a sunguleke ku kandziyisa magazini lowu hi 1879.—10/15, matluka 26-30.

• Xana Timbhoni ta Yehovha ti ma teka njhani matshungulelo lawa ku tirhisiwaka ngati ya wena n’wini?

Leswi tidyondzo ta tona ti sekeriweke eBibeleni, a ti veki ngati ya tona ivi endzhakunyana ti tlhela ti pomperiwa yona. Mukreste un’wana ni un’wana u tiendlela xiboho malunghana ni ndlela leyi ngati ya yena yi nga ta tirhisiwa ha yona loko a endliwa vuhandzuri, a endliwa minkambisiso ya vutshunguri, kumbe loko a tshunguriwa. U fanele a anakanya hi leswi Bibele yi swi vulaka malunghana ni ngati, ivi a tsundzuka leswaku u tinyiketele hi ku helela eka Xikwembu.—10/15, matluka 30, 31.

• Nkambisiso lowu endliweke eku sunguleni ka lembe leri wu paluxe leswaku hi xihi xilaveko xa nkoka exikarhi ka Timbhoni ta Yehovha emisaveni hinkwayo?

Ku laveka Tiholo ta Mfumo to tlula 11 000 ematikweni lama hluvukaka, laha timali ti pfumalekaka. Minyikelo leyi humaka eka Vakreste va le matikweni yo tala yi tirhisiwa kahle leswaku ku pfunetiwa eku akiweni ka tindhawu leti faneleke to hlanganyela eka tona.—11/1, tluka 30.

• Hi wahi marito man’wana ya ririmi ro sungula lama tirhisiweke eBibeleni lama fambisanaka ni vugandzeri?

Rin’wana i lei·tour·giʹa, leri hundzuluxeriwaka ri va “vutirheli bya mani na mani.” Rin’wanyana i la·treiʹa, leri hundzuluxeriwaka ri va “ntirho wo kwetsima.” (Vaheveru 10:11; Luka 2:36, 37)—11/15, matluka 11, 12.

• I dyondzo yihi ya nkoka leyi hi nga yi dyondzaka emhakeni ya le Bibeleni ya Adamu na Evha?

Ku tilawula kwihi na kwihi handle ka Yehovha Xikwembu i vuphukuphuku lebyikulu.—11/15, matluka 24-7.

• I vumbhoni byihi bya Matsalwa lebyi kombisaka leswaku Xikwembu xi nyika malandza ya xona matimba?

Davhida, Habakuku na muapostola Pawulo va nyikele vumbhoni malunghana ni ntiyiso wa leswaku Yehovha Xikwembu u va nyike matimba. (Pisalema 60:12; Habakuku 3:19; Vafilipiya 4:13) Hikwalaho, hi nga tiyiseka leswaku Xikwembu xa swi rhandza naswona xa swi kota ku hi tiyisa.—12/1, matluka 10, 11.