Swivutiso Swa Vahlayi

Xana Yehovha u endle ntwanano na Abrahama eUra kumbe eHarani?

Xiviko xo sungula xa ntwanano wa Yehovha na Abrahama xi kumeka eka Genesa 12:1-3, leyi nge: “Yehovha a ku eka Abrama: ‘Huma etikweni ra rikwenu ni le maxakeni ya wena ni le ndlwini ya tata wa wena, u ya etikweni leri ndzi nga ta ku komba rona; ndzi ta endla tiko lerikulu ha wena . . . Kunene mindyangu hinkwayo ya misava yi ta tikatekisa ha wena.’”a Yehovha a nga ha va a endle ntwanano na Abrahama endzhakunyana ka loko a ri eUra naswona a tlhela a wu tiyisekisa loko se Abrahama a ri eHarani.

Eka lembe-xidzana ro sungula, Stefano u vulavule hi xileriso xa Yehovha xa leswaku Abrahama a a fanele a rhurhela eKanana. Loko a vulavula na Sanedri, u te: “Xikwembu xa ku vangama xi humelele eka tata wa hina Abrahama loko a ri eMesopotamiya, a nga si tshama eHarani, kutani xi ku eka yena, ‘Huma etikweni ra wena ni le maxakeni ya wena u ta etikweni leri ndzi nga ta ku komba rona.’” (Mintirho 7:2, 3) Abrahama hi ntumbuluko a a huma eUra, hilaha Stefano a kombiseke hakona, laha hi kona a xi tweke ro sungula xileriso xa leswaku a ya eKanana. (Genesa 15:7; Nehemiya 9:7) Stefano a nga wu boxanga ntwanano wa Xikwembu na Abrahama, kambe eka Genesa 12:1-3, ntwanano wolowo a wu katsa ni xileriso xo ya eKanana. Kutani swa twisiseka ku tshemba leswaku Yehovha u endle ntwanano na Abrahama eUra.

Hambiswiritano, loko u ri hlaya hi vukheta rungula ra Genesa u ta kuma leswaku Yehovha u tlhele a endla ntwanano na Abrahama eHarani, hilaha a tlheleke a wu phindha ni ku wu hlamusela hi vuenti ko talanyana eKanana. (Genesa 15:5; 17:1-5; 18:18; 22:16-18) Hi ku ya hi Genesa 11:31, 32, Tera, tata wa Abrahama, u suke eUra a ya eKanana, a famba na Abrahama, Sara na Lota. Va ye eHarani kutani va tshama kona ku fikela loko Tera a fa. Abrahama u tshame eHarani ku fikela loko a kume rifuwo ro tala leri ringaneke. (Genesa 12:5) Naswona Nakori, makwavo wa Abrahama na yena u rhurhele kwalaho hi nkarhi wun’wana.

Endzhaku ko vika hi ta rifu ra Tera, Bibele yi vula marito lawa Yehovha a ma byeleke Abrahama kutani yi ya emahlweni yi ku: “Hiloko Abrama a famba hilaha Yehovha a n’wi byeleke hakona.” (Genesa 12:4) Hikwalaho, Genesa 11:31–12:4 ya hi tiyisekisa swinene leswaku Yehovha u vule marito lama tsariweke eka Genesa 12:1-3 endzhaku ka rifu ra Tera. Loko sweswo swi ri tano, Abrahama u rhurhe eHarani a ya etikweni leri hlawuriweke hi Yehovha hikwalaho ka xileriso lexi a ha ku xi twa, swin’we ni lexi a xi tweke emalembeni lama hundzeke eUra.

Hi ku ya hi Genesa 12:1, Yehovha u lerise Abrahama a ku: “Huma etikweni ra rikwenu ni le maxakeni ya wena ni le ndlwini ya tata wa wena.” ‘Tiko’ ra Abrahama ri tshame ri va Ura, naswona ‘yindlu’ ya tata wa yena a yi ri kwalaho. Hambiswiritano, tata wa Abrahama u rhurhise vandyangu wa yena va ya eHarani, naswona Abrahama u sungule ku vitana ndhawu yoleyo tiko ra yena. Loko se a ri ni malembe yo tala a ri eKanana, u rhume nandza wakwe ‘etikweni ra rikwavo ni le maxakeni ya yena’ leswaku a ya tekela Isaka nsati, hiloko nandza yoloye a ya “emutini wa Nakori” (ku nga ha va Harani kumbe kun’wana ekusuhi na kona). (Genesa 24:4, 10) Kwalaho nandza u kume Raveka exikarhi ka maxaka ya Abrahama, vatukulu va Nakori.—Genesa 22:20-24; 24:15, 24, 29; 27:42, 43.

Loko a vulavurisana na Sanedri, Stefano u vule leswi hi Abrahama: “Endzhaku ka ku fa ka tata wakwe, Xikwembu xi endle leswaku a cinca vutshamo byakwe a ta etikweni leri mi tshamaka eka rona sweswi.” (Mintirho 7:4) Leswi swi kombisa leswaku Yehovha u vulavule na Abrahama eHarani. Swa twisiseka ku tshemba leswaku enkarhini wolowo Yehovha u phindhe ntwanano wa yena na Abrahama hilaha swi vikiweke hakona eka Genesa 12:1-3, tanihi leswi ntwanano lowu wu sunguleke ku tirha loko Abrahama a rhurhela eKanana. Xisweswo, ku kambisisa mintiyiso hinkwayo swi endla munhu a gimeta hileswaku Yehovha a nga ha va a endle ntwanano wa yena na Abrahama eUra kutani a tlhela a wu tiyisa eHarani.

[Nhlamuselo ya le hansi]