Swivutiso Swa Vahlayi

Xana swi lulamile ku vula leswaku tintswalo ta Yehovha ti vevukisa vululami bya yena?

Hambileswi xiga lexi xi tirhisiweke, i swinene ku xi papalata hikuva xi twala xi vula leswaku tintswalo ta Yehovha ti olovisa vululami bya yena kumbe ku byi sivela, onge hi loko tintswalo ta yena ti antswa ku tlula vululami bya ku tiyisa voko. Leswi a hi ntiyiso.

Rito ra Xiheveru leri hundzuluxeriweke ri va “vululami” eka Vuhundzuluxeri Bya Misava Leyintshwa nakambe ri nga vula “vuavanyisi.” Vululami byi fambisana swinene ni ku lulama. Kambe hakanyingi vululami byi yelana ni timhaka ta nawu. Ku lulama hakanyingi a ku yelani ni timhaka ta nawu. I ntiyiso leswaku vululami bya Yehovha byi nga katsa ku xupula lava onheke, kambe byi nga tlhela byi katsa ku ponisa vanhu lava fanelekaka. (Genesa 18:20-32; Esaya 56:1; Malakiya 4:2) Hikwalaho, vululami bya Yehovha a byi fanelanga byi voniwa byi ri bya nsele kumbe lebyi lavaka ku vevukisiwa.

Rito ra Xiheveru leri vulaka “tintswalo” ri nga vula ku avanyisa hi ku tikhoma. Ri nga tlhela ri vula ku hisekela ku kombisa ntwela-vusiwana, ku ntshunxa vanhu emaxangwini ya vona.—Deteronoma 10:18; Luka 10:29-37.

Yehovha i Xikwembu xa vululami ni tintswalo. (Eksoda 34:6, 7; Deteronoma 32:4; Pisalema 145:9) Vululami bya yena ni tintswalo ta yena swi hetisekile naswona swa fambisana. (Pisalema 116:5; Hosiya 2:19) Timfanelo leti ta tatisana. Hikwalaho, loko hi vula leswaku tintswalo ta Yehovha ti vevukisa vululami bya yena, swi vula leswaku hi nga tlhela hi vula leswaku vululami bya yena byi vevukisa tintswalo ta yena.

Esaya u profetile: “Yehovha u ta tshama a langutele ku mi komba tintswalo, kutani u ta suka a yima a mi komba tintswalo. Hikuva Yehovha i Xikwembu xa vuavanyisi [“vululami,” The New English Bible].” (Esaya 30:18) Laha Esaya u kombisa leswaku vululami bya Yehovha byi khutaza swiendlo swa tintswalo, ematshan’weni ya leswaku tintswalo ta yena ti vevukisa vululami bya yena kumbe ku byi sivela. Yehovha u kombisa tintswalo hikuva u lulamile naswona u ni rirhandzu.

Kunene, mutsari wa Bibele Yakobo u te: “Tintswalo ta khana eku avanyisiweni.” (Yakobo 2:13b) Hambiswiritano, emhakeni leyi Yakobo a a nga vulavuli hi Yehovha kambe hi Vakreste lava kombisaka tintswalo eka vanhu vo kota swisiwana. (Yakobo 1:27; 2:1-9) Loko vanhu vo tano va tintswalo va avanyisiwa, Yehovha u xiya swiendlo swa vona kutani hi tintswalo a va rivalela exisekelweni xa gandzelo ra N’wana wa yena. Xisweswo, tintswalo ta vona ti hlula ku avanyisiwa kwihi ni kwihi ka nsele loku va nga avanyisiwaka ha kona.—Swivuriso 14:21; Matewu 5:7; 6:12; 7:2.

Hikokwalaho, a swi lulamanga ku vula leswaku vuavanyisi bya Yehovha byi vevukisiwa hi tintswalo ta yena, hi vonelo ra leswaku vululami bya yena byi lava ku vevukisiwa hi tintswalo. Eka Yehovha timfanelo leti timbirhi ta ringana. Ta tatisana, tanihi leswi ti fambisanaka ni timfanelo tin’wana ta Yehovha, to kota rirhandzu ni vutlhari.