Xikombelo Xa Leswaku Ku Vekiwa “Vakwetsimi” Va Manguva Lawa

“Xana wa wu tsundzuka nkarhi lowu ha wona a hi nga swi lavi ku twa vanhu va vulavula hi tinghwazi to karhi? Kambe Maamerika ya 4,2 wa timiliyoni lama hlaleleke xilahlo xa Manana Teresa hi Sept. 13, a ma vonaka ma nga ri na wona moya wolowo. Ku sukela loko a file hi Sept. 5, vanhu a va ri karhi va rhumela swikombelo eka Vatican, swa leswaku a endliwa mukwetsimi ximfumo. Vanhu vo tala va tiyiseka leswaku xikombelo lexi xi ta amukeriwa.”—Sun-sentinel, United States, October 3, 1997.

VANHU vo tala va teka ntirho wo pfuna vanhu, lowu endliweke hi Manana Teresa, murhumiwa la nga Mukhatoliki, wu ri xikombiso xa leswi ku va mukwetsimi swi vulaka swona. Vanhu va ndhuma va kona eka vukhongeri byin’wana. Kambe, swi vonaka onge a va kona lava va xiximiwaka swinene ku fana ni lava va endliwaka vakwetsimi hi Kereke ya Rhoma Khatoliki.

Mupapa John Paul II u veke vanhu vo tlula 450 leswaku va va vakwetsimi hi nkarhi lowu a veke mupapa ha wona, ku nga nhlayo leyi yi tlulaka nhlayo ya vanhu hinkwavo lava endliweke vakwetsimi hi vapapa lavan’wana va lembe-xidzana ra vu-20, va hlanganile.a Ha yini “vakwetsimi” va ha tekeriwa ehenhla swinene, hambileswi vunyingi bya vona va nga dumangiki exikarhi ka Makhatoliki-kulobye?

Lawrence Cunningham, mufundhisi wa le Yunivhesiti ya Notre Dame, u ri: “Mhaka ya leswaku ku nga va ni munhu la kwetsimaka, yi va tsakisa swinene vanhu. Ku va kona ka vakwetsimi i xikombiso xa leswaku va nga va kona vanhu lava nga endlaka mintirho yo hlamarisa namuntlha.” Ku tlhandlekela kwalaho, ku vuriwa leswaku “vakwetsimi” va ni lunghelo ro vulavurisana ni Xikwembu, leswi swi va endla va swi kota ku yimela vanhu lava hanyaka eka xona. Loko ku kumiwa swilo swa mufi la nga “mukwetsimi” kumbe marhambu yakwe, swilo leswi swa gandzeriwa hi ntshembo wa leswaku swi ni matimba yo karhi.

Xibukwana xa Catechism xa nhlangano wa le Trent, lexi kandziyisiweke hi lembe-xidzana ra vu-16, leswaku ku tiyisekisiwa tidyondzo ta Khatoliki, xi te: “Ha tiyiseka leswaku ku xixima vakwetsimi ‘lava feleke eHosini,’ ku kombela leswaku va hi yimela ni ku gandzela swilo leswi a swi ri swa vona ku katsa ni nkuma kumbe marhambu ya vona, a swi xi nyamisi Xikwembu, ku ri na sweswo swi xi endla xi kwetsima ngopfu, naswona leswi swi tiyisa ntshembo wa Mukreste naswona swa n’wi khutaza leswaku a tekelela timfanelo letinene ta vakwetsimi lava.” (The Catechism of the Council of Trent, 1905) Ina, Vakreste va ntiyiso va swi lava ku hanya vutomi lebyi xiximekaka, va vulavula ni Xikwembu hi ndlela leyi faneleke ni ku kuma mpfuno wa xona. (Yakobo 4:7, 8) Hikwalaho ke, hi ku ya hi Rito ra Xikwembu, i vamani lava fanelekelaka ku va vakwetsimi va xiviri? Naswona hi wihi ntirho lowu va wu endlaka?

[Nhlamuselo ya le hansi]