Swivutiso Swa Vahlayi

Loko Mukreste a twa marito, xana sweswo swi vula leswaku u hlaseriwa hi madimona?

A swi tano. Hambileswi ku vuriwaka leswaku madimona ma tikombisa hi ndlela yoleyo, vanhu vo tala lava twaka marito kumbe va titwa hi ndlela yo karhi leyi nga tolovelekangiki, loko ku ri karhi ku endliwa ndzavisiso ku kumeka leswaku va vabya.

Hambi ku ri eka lembe-xidzana ro sungula, a swi ri erivaleni leswaku swiendlo swa vanhu lava hlaseriwaka hi madimona ni lava vabyaka minkarhi yin’wana swa fana. Eka Matewu 17:14-18, hi hlaya hi ta mufana la tshunguriweke hi Yesu. Hambileswi mufana loyi a a karhatiwa swinene hi switshetshela, kahle-kahle a a hlaseriwa hi madimona. Hambiswiritano, siku rin’wana loko ku tisiwe vanhu vo tala lava vabyaka leswaku Yesu a ta va tshungula, exikarhi ka vona a ku ri ni “lava nga ni madimona ni va switshetshela.” (Matewu 4:24) Swi nga endleka leswaku vanhu van’wana lava a va ri ni switshetshela a va nga ri na madimona. A vo vabya.

Ku vuriwa leswaku van’wana lava nga ni vuvabyi bya mianakanyo (schizophrenia), ku nga vuvabyi lebyi hakanyingi byi tshungulekaka, va twa marito kumbe va titwa hi ndlela yin’wana leyi nga tolovelekangiki.a Mavabyi man’wana na wona ma nga endla munhu a vabya emianakanyweni lerova van’wana hi xihoxo va ehleketa leswaku u ni madimona. Hambileswi munhu la vulaka leswaku u twa marito kumbe u titwa hi ndlela yo karhi leyi nga tolovelekangiki, a nga fanelangiki a honisa leswaku swi nga endleka a karhatiwa hi madimona, u fanele a khutaziwa leswaku a ya kamberiwa hi madokodela ku vona leswaku u karhatiwa hi yini.

[Nhlamuselo ya le hansi]