Vutomi Ni Vutirheli Bya Yesu

Mufana La Nga Ni Demona A Hanyisiwa

LOKO Yesu, Petro, Yokobo na Yohane va nga ri kona, kumbexana va ri eku wiseni eNtshaveni ya Hermon, vadyondzisiwa lavan’wana va hlangavetana ni xirhalanganya. Loko a vuya, Yesu hi ku hatlisa wa swi vona leswaku swin’wana a swi fambi kahle. Ku na ntshungu lowu rhendzeleke vadyondzisiwa vakwe, naswona vatsari va kanetana na vona. Loko va vona Yesu, vanhu va hlamala swinene kutani va tsutsumela ku ya n’wi xeweta. “I ncini lexi mi kanetanaka na vona ha xona xana?” wa vutisa.

Loko a humelela emahlweni ka ntshungu, wanuna u nkhinsama emahlweni ka Yesu ivi a hlamusela: “Mudyondzisi, ndzi tisile n’wana wa mina eka wena; ú ni moya lowu n’wi endlaka mbeveve. Loko wu n’wi khoma, wa n’wi tlatlalata, a tlhutlha xikhuvi, a getsela meno, kutani a oma; ndzi komberile vadyondzisiwa va wena leswaku va wu hlongola, kambe va tsandzekile.”

Vatsari entiyisweni va kandziyisa ku hluleka ka vadyondzisiwa ku hanyisa mufana, kumbexana va sola matshalatshala ya vona. Enkarhini lowu wo nonon’hwa, Yesu wa fika. “Ha! Rixaka leri nga pfumeriki,” ku vula yena, “ndzi ta va na n’wina ku fikela rini? Ndzi ta mi lehisela mbilu ku fikela rini ke?”

Yesu u vonaka a kongomisa tinhlamuselo takwe eka un’wana ni un’wana la nga kona, kambe handle ko kanakana ngopfu-ngopfu ti kongomisiwa eka vatsari, lava a va pfuxa mpfilumpfilu eka vadyondzisiwa vakwe. Nakambe, Yesu u ri hi mufana: “N’wi tiseni haleno!” Kambe loko mufana a ta eka Yesu, demona leri a nga na rona ri n’wi tlumbela ehansi ivi ri n’wi nghenisela ku rhurhumela lokukulu. Mufana u vumbuluka ehansi ivi a tlhutlha xikhuvi enon’wini.

“Xana swi n’wi sungurile rini?” Yesu wa vutisa.

“Ku sukela loko a ha ri ntsongo,” tatana wa hlamula. “Ko tala [demona ri] n’wi wisele endzilweni kumbe ematini ku n’wi lovisa.” Kutani tatana wa kombela: “Kambe loko u swi kota, hi twele vusiwana u hi pfuna.”

Kumbexana hi malembe, tatana a a ri karhi a lava mpfuno. Kutani sweswi, hi ku hluleka ka vadyondzisiwa va Yesu, gome rakwe i rikulu. Loko a amukela xikombelo xa wanuna xo heleriwa hi ntshembo, Yesu hi laha ku khutazaka u ri: “Loko u swi kota? Hinkwaswo swi nga kota ku endleriwa la pfumelaka.”

“Ndza pfumela!” tatana hi ku hatlisa wa huwelela, kambe wa kombela a ku: “Ndzi pfune eku kanakaneni ka mina!”

Loko a vona leswaku ntshungu wu khitikanela eka vona, Yesu u tshinya demona: “Wena moya lowu nga vulavuriki, lowu nga twiki, ndza ku lerisa ndzi ri: ‘Huma ka n’wana loyi, u nga ha tlheli u vuya ka yena ni siku ni rin’we’!” Loko demona ri suka, nakambe ri vangela mufana ku huwelela ivi ri n’wi rhurhumerisa hi matimba. Kutani mufana a etlela ehansi a nga tshukatshuki, lerova vanhu vo tala va kala va ku: “U file!” Kambe Yesu u khoma mufana hi voko ivi a n’wi pfuxa.

Eku sunguleni, loko vadyondzisiwa va rhumiwile ku ya chumayela, a va hlongole mademona. Kutani sweswi, loko va nghena endlwini, va vutisa Yesu etlhelo: “Xana hi tsandzekile ha yini?”

Loko a komba leswaku a ku ri hikwalaho ka ku pfumala ka vona ripfumelo, Yesu wa hlamula: “Moya lowo tano a wu koti ku huma loko ku nga ri hi ku khongela ntsena.” Entiyisweni ku lunghiselela a ku laveka leswaku va hlongola demona ra matimba ngopfu leri katsekaka emhakeni leyi. Ripfumelo leri tiyeke kun’we ni xikhongelo lexi kombelaka leswaku Xikwembu xi nyika matimba a swi laveka.

Kutani Yesu wa engetela: “Ndzi tiyisile ndzi ri ka n’wina: Loko mi ri ni ku pfumela loku ringanaka ni ndzoho ya murhi wa sinapi, mi nga ku ka ntshava leyi: ‘Rhurhela lahaya!’, kutani yi ta rhurha, ku ri hava lexi xi mi tsandzaka.”

Ripfumelo ri nga va ni matimba swonghasi! Swiphiqo ni ku nonon’hwa leswi kavanyetaka nhluvuko entirhweni wa Yehova swi nga ha tikomba swi ri leswi nga hlulekiki naswona swi nga suseki ku fana ni ntshava leyikulu ya xiviri. Kambe, Yesu u komba leswaku loko hi hlakulela ripfumelo etimbilwini ta hina, hi ri cheleta ni ku ri khutazela ku kula, ri ta kula ri va leri vupfeke naswona ri ta swi kota ku susa swiphiqo ni ku nonon’hwa ko tano loku fanaka ni tintshava. Marka 9:14-29; Matewu 17:19, 20; Luka 9:37-43.

◆ I xiyimo xihi lexi Yesu a xi kumaka loko a vuya hi le Ntshaveni ya Hermon?

◆ I xikhutazo xihi lexi Yesu a xi nyikeke tatana?

◆ Ha yini vadyondzisiwa va nga swi kotanga ku hlongola demona?

◆ Yesu u komba leswaku ripfumelo ri nga va ni matimba hi ndlela yini?