Yesu A Horisa Mufana La Nga Ni Dimona

Loko Yesu, Petro, Yakobo na Yohane va rhelela va suka entshaveni, va hlangana ni ntshungu lowukulu. Ku ni leswi nga fambiki kahle. Vatsari va rhendzele vadyondzisiwa naswona va kanetana na vona. Vanhu va hlamarisiwa hi ku vona Yesu naswona va tsutsuma va ya n’wi xeweta. Yesu u va vutisa a ku: “I yini lexi mi holovisaka?”—Marka 9:16.

Wanuna loyi a nga exikarhi ka ntshungu u khinsama hi matsolo emahlweni ka Yesu ivi a hlamusela a ku: “Mudyondzisi, ndzi tise n’wana wa mina eka wena hikuva u ni dimona leri n’wi endlaka mbheveve. Loko ri n’wi nghena ri n’wi lahlela ehansi, a tlhutlha khuvi, a luma ni matino, a heleriwa hi matimba. Ndzi kombele vadyondzisiwa va wena leswaku va ri hlongola kambe va tsandzekile.”—Marka 9:17, 18.

Swi tikomba onge vatsari va sola vadyondzisiwa hileswi va tsandzekeke ku horisa mufana, kumbexana va hlekula ni matshalatshala lawa va ma endleke. Ematshan’weni yo hlamula tatana la pfilunganyekeke, Yesu u vulavula ni ntshungu a ku: “N’wina xitukulwana lexi nga riki na ripfumelo xi tlhela xi homboloka, xana ndzi fanele ndzi mi tiyiselela ku fikela rini? Ndzi ta mi lehisela mbilu ku fikela rini?” Marito lawa ya vukarhi u ma byela vatsari lava a va sola vadyondzisiwa vakwe loko a nga ri kona. Loko a vulavula ni tatana loyi a nga ni gome, Yesu u ri: “N’wi tiseni haleni.”—Matewu 17:17.

Loko mufana a tshinela eka Yesu, dimona leri n’wi khomeke ri n’wi lahlela ehansi naswona ri n’wi endla a kariha ngopfu. Mufana u ya emahlweni a vumbuluka ehansi, a tlhutlha khuvi enon’wini. Yesu a vutisa tata wa rona a ku: “Swi n’wi sungule rini?” Tatana a hlamula a ku: “Ku sukela loko a ha ri ntsongo, mikarhi yin’wana a ri n’wi hoxa endzilweni ni le matini leswaku ri n’wi dlaya.” Wanuna loyi a n’wi kombela a ku: “Kambe loko u swi kota ku hi pfuna, hi twele vusiwana u hi pfuna.”—Marka 9:21, 22.

Tatana a nga ha tivi ta yena hikuva vadyondzisiwa va Yesu va tsandzekile ku n’wi pfuna. Loko Yesu a hlamula xikombelo xa ku karhateka xa wanuna loyi, u n’wi tiyisekisa a ku: “U tiyisile loko u ku, ‘Loko u swi kota’! Hikuva swilo hinkwaswo swa koteka eka loyi a nga ni ripfumelo.” Tatana a huwelela hi ku hatlisa a ku: “Ndzi ni ripfumelo! Ndzi pfune ndzi va ni ripfumelo leri tiyeke!”—Marka 9:23, 24.

Yesu u vona ntshungu wu tsutsumela eka yena. Yesu u tshinya dimona hinkwavo va langutile, a ku: “Wena moya lowu nga basangiki lowu endlaka leswaku n’wana loyi a nga swi koti ku vulavula ni ku twa, ndza ku lerisa leswaku u huma eka yena naswona u nga ha tlheli u nghena eka yena!” Loko ri famba, dimona ri endla leswaku mufana a huwelela a tlhela a tlhutlha khuvi. Kutani mufana a etlela kwalaho a nga tshukatshuki. Loko vanhu vo tala va vona leswi, va ri: “U file!” (Marka 9:25, 26) Hambiswiritano, loko Yesu a khoma mufana hi voko, wa yima naswona a “hola hi wona nkarhi wolowo.” (Matewu 17:18) Hikwalaho ka sweswo, vanhu va hlamarisiwa hi leswi Yesu a swi endlaka.

Eku sunguleni loko Yesu a rhume vadyondzisiwa vakwe ku ya chumayela, va swi kotile ku hlongola madimona. Loko se va ri voxe endlwini, va n’wi vutisa va ku: “Hikwalaho ka yini hi tsandzekile ku wu hlongola?” Yesu u va byela leswaku va tsandzeke hileswi va nga ni ripfumelo leritsongo, hi ku vula a ku: “Muxaka lowu wu nga huma ntsena hi xikhongelo.” (Marka 9:28, 29) A ku laveka ripfumelo leri tiyeke ni xikhongelo leswaku Xikwembu xi va pfuna va hlongola dimona leri nga ni matimba.

Yesu u gimeta hi ku vula a ku: “Ndzi tiyisile ndzi ri eka n’wina, loko mo va ni ripfumelo leri ringanaka ni ndzoho ya sinapi, mi ta swi kota ku byela ntshava leyi mi ku, ‘Suka laha u ya lahaya,’ kutani yi ta suka, naswona ku hava lexi nga ta mi tsandza.” (Matewu 17:20) Mayana ndlela leyi ripfumelo ri nga vaka ni matimba hayona!

Swihinga ni swiphiqo leswi nga sivelaka munhu leswaku a endla nhluvuko entirhweni wa Yehovha, swi nga ha vonaka onge a swi koteki ku swi hlula nileswaku a swi koteki ku swi susa ku fana ni ntshava ya xiviri. Kambe loko hi ri ni ripfumelo, hi nga swi kota ku hlula swihinga sweswo ni swiphiqo leswi fanaka ni ntshava.