Swivutiso Swa Vahlayi

Hi ku ya hi Matewu 17:20, vaapostola a va nga swi koti ku hanyisa mufana la xanisekaka ‘hikwalaho ka ripfumelo ra vona leritsongo.’ Hambiswiritano, eka Marka 9:29, ku tsandzeka ka vona ku hlanganisiwa ni xilaveko xo khongela. Ha yini ku nyikeriwa swivangelo swo hambana eka timhaka ta Tievhangheli to hambana?

Kahle-kahle, timhaka letimbirhi ta seketelana, a ti kanetani. Xo sungula, languta Matewu 17:14-20. Wanuna un’wana u vike leswaku n’wana wa yena a ri ni switshetshela ni leswaku vadyondzisiwa va Yesu a va nga swi koti ku hanyisa mufana loyi. Kutani Yesu u hanyise mufana loyi hi ku hlongola dimona leri a ri n’wi xanisa. Vadyondzisiwa va vutisile leswaku ha yini vona va nga swi kotanga ku hlongola dimona. Hi ku ya hi mhaka ya Matewu, Yesu u hlamurile a ku: “Hikwalaho ka ripfumelo ra n’wina leritsongo. Hikuva ndzi tiyisile ndzi ri eka n’wina, Loko mi ri ni ripfumelo leri ringanaka ni ndzoho ya sinapi, mi ta byela ntshava leyi mi ku, ‘Suka laha u ya lahaya,’ kutani yi ta suka, naswona ku hava lexi nga ta mi tsandza.”

Sweswi pfula eka Marka 9:14-29, laha hi kumaka vuxokoxoko lebyi engetelekeke. Hi xikombiso, Marka 9:17 yi nyikela vuxokoxoko bya leswaku emhakeni leyi vuvabyi bya switshetshela a byi vangiwa hi moya wo biha. Swa fanela ku xiya leswaku kun’wana Bibele yi vula leswaku Yesu u hanyise vanhu lava a va ri ni switshetshela ni madimona. (Matewu 4:24) Eka xiyimo lexi xo hlawuleka, vuvabyi lebyi a byi vangiwa hi “moya wa ku tsandzeka ku vulavula ni ku twa,” hileswaku moya wo biha, lowu n’anga Luka a wu tiyisekisaka. (Luka 9:39; Vakolosa 4:14) Xiya xivulwa lexi nga eka Marka 9:18, lexi nge, “Kun’wana ni kun’wana laha wu [dimona] n’wi khomaka kona.” Kutani mufana loyi a a nga hlaseriwi hi dimona leri nkarhi na nkarhi, kambe a ri n’wi hlasela minkarhi yin’wana. Hambiswiritano, vadyondzisiwa a va nga swi koti ku hlongola dimona xisweswo va hanyisa mufana loyi. Loko va vutisile leswaku ha yini, Yesu u te: “Muxaka lowu a wu nge humi loko ku nga ri hi xikhongelo.”

Kambe, ku hlaya mhaka ya Marka hi vukheta swi kombisa leswaku a yi kanetani na leswi tsariweke hi Matewu. Eka Marka 9:19, hi hlaya leswaku Yesu u karhatiwile hi ku pfumala vutshembeki ka rixaka rolero. Naswona eka ndzimana ya 23, ku tsariwe leswaku u byele tata wa mufana a ku: “Swilo hinkwaswo swi nga endleka eka munhu loko munhu wa kona a ri ni ripfumelo.” Kutani Marka na yena u kandziyisa nkoka wa ripfumelo. Mhaka hileswaku eka ndzimana 29, Marka u nyikela vuxokoxoko lebyi engetelekeke. Marka u engetela leswi Yesu a swi vuleke hi xikhongelo, leswi Matewu na Luka va nga swi nghenisangiki.

Kutani hi nga vula yini? Minkarhi yin’wana vaapostola va 12 na vadyondzisiwa va 70 va hlongole mimoya yo biha. (Marka 3:15; 6:13; Luka 10:17) Kambe eka xiyimo lexi vadyondzisiwa a va nga swi koti ku hlongola dimona. Ha yini? Loko hi hlanganisa vuxokoxoko lebyi boxiweke eka timhaka to hambana-hambana, hi fanele hi gimeta hi leswaku a va nga tilunghiselelanga ku endla tano emhakeni leyi. Kumbexana xiphemu xin’wana xa xiphiqo a ku ri muxaka wa dimona leri a ri katseka, tanihi leswi swi vonakaka onge madimona ma na vumunhu byo hambana ni ku tsakela swilo swo hambana ni vuswikoti byo hambana. Eka leri, a ku laveka ngopfu-ngopfu ripfumelo leri tiyeke ni xikhongelo xa mbilu hinkwayo xa mpfuno wa Xikwembu. Ina, Yesu a ri na rona ripfumelo ro tano. Naswona a ri na nseketelo wa Mutwi wa swikhongelo, Tata wa yena. (Pisalema 65:2) Yesu a ri ni matimba yo hanyisa mufana la xanisiwaka hi ku hlongola dimona, kutani u endle tano.