Yesu A Endla Mitirho Leyikulu Ekapernawume

Yesu u rhambe vadyondzisiwa va mune—ku nga Petro, Andriya, Yakobo na Yohane leswaku va va vaphasi va vanhu. Kutani hi siku ra Savata hinkwavo a va ya esinagogeni ya le Kapernawume. Yesu a a dyondzisa esinagogeni naswona vanhu a va hlamarisiwa hi ndlela leyi a a dyondzisa hayona. Leswi a swi dyondzisa a swi huma eka Xikwembu naswona a a nga dyondzisi ku fana ni vatsari.

Eka Savata leyi a ku ri ni wanuna la nga ni dimona. Kwalaho esinagogeni, wanuna yoloye u huwelele hi rito leri tlakukeke a ku: “Hi ku dyohele yini, wena Yesu wa le Nazareta? Xana u tele ku ta hi lovisa? Ndzi ku tiva kahle, u Mukwetsimi wa Xikwembu.” Yesu u tshinye dimona leri a ri ri eka wanuna yoloye a ku: “Miyela u huma eka yena!”—Marka 1:24, 25.

Hiloko moya lowu nga basangiki wu tlatlalata wanuna yoloye ehansi wu n’wi rhurhumerisa kutani wu huwelela hi rito leri tlakukeke. Kambe dimona rolero ri hume eka wanuna yoloye “ri nga n’wi vavisanga.” (Luka 4:35) Vanhu lava a va ri ekusuhi na yena esinagogeni va sale va lo gabaa! Kutani va ku: “A hi si tshama hi swi vona leswi. U ni matimba yo hlongola hambi ku ri mimoya leyi nga basangiki, naswona ya n’wi yingisa.” (Marka 1:27) Hikwalaho, mahungu lawa yo tsakisa ma hangalake ni tiko hinkwaro ra Galeliya.

Loko va suka esinagogeni, Yesu ni vadyondzisiwa vakwe va ya ekaya ra Simoni kumbe Petro. Kwalaho mana wa nsati wa Petro u vabya swinene hi ku hisa ka miri. Kutani va kombela Yesu leswaku a n’wi pfuna. Hiloko Yesu a ya eka yena, a n’wi khoma hi voko kutani a n’wi pfuxa a tshama. Hi nkarhi wolowo a va a horisiwile kutani a sungula ku swekela Yesu ni vadyondzisiwa vakwe swakudya.

Loko dyambu se ri lava ku tlomuta, vanhu lava humaka etindhawini hinkwato va te ekaya ra Petro ni vanhu lava vabyaka. Hi ku tsopeta ka tihlo swi vonaka onge vanhu va muti hinkwavo a va hlengeletane ekaya ra Petro. Hikwalahokayini? A va lava ku horisiwa. Hikwalaho, ‘vanhu hinkwavo a va n’wi tisela vanhu lava a va ri ni mavabyi yo hambanahambana. Naswona a a va hanyisa hi ku va tlhandleka mavoko.’ (Luka 4:40) Ku nga khathariseki mavabyi lawa a va ri na wona, Yesu u va horisile hilaha swi profetiweke hakona. (Esaya 53:4) U tlhele a horisa ni lava nga ni madimona. Loko mimoya yo biha yi huma a yi huwelela yi ku: “U N’wana wa Xikwembu.” (Luka 4:41) Kambe Yesu a a ma tshinya naswona a nga ma pfumeleli leswaku ma ya emahlweni ma vulavula. A ma swi tiva leswaku Yesu i Kreste kambe a a nga ma pfumeleli ma endla onge ma gandzela Xikwembu xa ntiyiso.