Swivutiso Swa Vahlayi

Hikwalaho ka yini Davhida, nandza wo tshembeka wa Yehovha, a pfumelele Mikala nsati wakwe leswaku a va ni xifaniso xa terafimi kumbe xifaniso xa hava, hilaha swi kombisiweke hakona eka 1 Samuwele 19:12, 13?

Xo sungula, a hi kambisiseni rungula ra kona hi ku komisa. Loko nsati wa Davhida a twa leswaku Hosi Sawulo u endle rhengu ro dlaya Davhida, u nambe a teka goza. Bibele yi ri: “Mikala a rhelerisa Davhida hi fasitere leswaku a ta famba, a baleka, a pona. Hiloko Mikala a teka xifaniso xa terafimi [lexi handle ko kanakana a xi ri ni xivumbeko xo fana ni xa munhu] a xi veka esangwini, ni rikoka ra dzovo ra mbuti, a ri veka endhawini ya nhloko yakwe, endzhaku ka sweswo a swi funengeta hi nguvu.” Loko varhumiwa va Sawulo va landza Davhida, Mikala u va byele a ku: “Wa vabya.” Rhengu leri ri nyike Davhida nkarhi wo baleka.—1 Samuwele 19:11-16.

Swilo leswi tshuburiweke swi kombisa leswaku eminkarhini ya khale, swifaniso swa titerafimi a swi nga tirhisiwi eka vukhongeri ntsena kambe ni le ka timhaka ta nawu. Tanihi leswi mapapila yo komba n’wini wa nhundzu ni switiyisekiso swa ndzhaka swi nga ku pfumelelaka namuntlha ku kuma ndzhaka, a swi ri tano ni hi swifaniso swa titerafimi swa khale ka khaleni. Swi le rivaleni leswaku minkarhi yin’wana ku va ni xifaniso xa terafimi a swi pfuna leswaku mukon’wana a va ni mfanelo yo kuma ndzhaka ya tata wa nsati wa yena loko a fa. Leswi swi nga hlamusela xivangelo xa ku va eku sunguleni Rahele a teke swifaniso swa titerafimi swa tata wakwe ni xivangelo xa ku va tata wakwe a hisekele ku swi kuma. Hi nkarhi wolowo, Yakobe nuna wa Rahele a a nga tivi nchumu hi leswi endliweke hi nsati wakwe.—Genesa 31:14-34.

Loko Vaisrayele va hleriwa va va tiko, va kume Milawu ya Khume, laha wa vumbirhi eka yona wu swi yirisaka hi ku kongoma ku tiendlela swifaniso. (Eksoda 20:4, 5) Endzhakunyana, muprofeta Samuwele u kombetele eka nawu lowu loko a vulavula na Hosi Sawulo. U te: “Ku xandzuka ka fana ni xidyoho xa ku hlahluva, ni ku ya emahlweni hi ku tikukumuxa ka fana ni ku tirhisa matimba ya masalamusi ni terafimi.” (1 Samuwele 15:23) Hikwalaho ka xivangelo lexi, swa tikomba leswaku eIsrayele titerafimi a ti nga tirhiseriwi ku kuma ndzhaka. Hambiswiritano, vukholwa-hava lebyi bya khale bya Vayuda byi vonaka byi hambete byi tirhisiwa emindyangwini yin’wana ya Vaisrayele. (Vaavanyisi 17:5, 6; 2 Tihosi 23:24) Ku va Mikala a ri ni xifaniso xa terafimi exikarhi ka nhundzu ya yena swi ringanyeta leswaku mbilu ya yena a yi nga helelanga eka Yehovha. Swi nga endleka leswaku Davhida a a nga tivi nchumu hi xifaniso xa terafimi, kumbe a nga va a xi tshikile hileswi Mikala a a ri n’wana wa Hosi Sawulo.

Langutelo ra Davhida malunghana ni ku tinyiketela loku heleleke eka Yehovha ri kombisiwa hi marito lama nge: “Yehovha i nkulu naswona u fanele a dzunisiwa swinene, u fanele a chaviwa ku tlula swikwembu leswin’wana hinkwaswo. Hikuva hinkwaswo swikwembu swa vanhu i swikwembu leswi nga pfuniki nchumu. Loko ku ri Yehovha, u endle matilo.”—1 Tikronika 16:25, 26.

[Xifaniso lexi nga eka tluka 29]

Eka Milawu ya Khume, wa vumbirhi a wu yirisa ku tiendlela swifaniso swo tanihi terafimi leyi kombisiweke laha

[Xihlovo Xa Kona]

From the book The Holy Land, Vol. II, 1859