Wa Tsundzuka Xana?

Xana u swi tsakerile ku hlaya minkandziyiso ya sweswinyana ya Xihondzo xo Rindza? Ha yini u nga ringeti ku hlamula swivutiso leswi landzelaka?

• Xana a ku ri yini Bibele ya Tindzimi to Tala ya le Complutum naswona ha yini a a yi ri ya nkoka?

A ku ri Bibele leyi tameleke tindzimi to tala leyi hleriweke leswaku yi fambisana yi tlhela yi va ni tikholumo leti nga ni rungula ra xiyimo xa le henhla ra Xiheveru, Xigriki ni Xilatini swin’we ni swiphemu swin’wana hi Xiaramu. Bibele leyi ya tindzimi to tala a yi ri goza lerikulu ro humesa tsalwa leri pakanisaka swinene hi tindzimi to sungula.—4/15, matluka 28-31.

• Xana vanhu va nga xi tsakisa njhani Xikwembu?

Leswi Yehovha a nga munhu wa xiviri la hanyaka, wa swi kota ku anakanya ni ku teka goza naswona u ni mintlhaveko. I “Xikwembu lexi tsakeke” naswona u tlhela a tsakela ku hetisisa swikongomelo swa yena. (1 Timotiya 1:11; Pisalema 104:31) Loko hi tshama hi ri karhi hi tsundzuka ndlela leyi Xikwembu xi titwaka ha yona, hi ta ya hi swi xiya leswi hi nga swi endlaka leswaku hi tsakisa mbilu ya xona.—5/15, matluka 4-7.

• Hikwalaho ka yini Davhida a pfumelele nsati wakwe Mikala leswaku a va ni xifaniso xa terafimi?

Loko Hosi Sawulo a endle kungu ro dlaya Davhida, Mikala u pfune Davhida leswaku a baleka, hi ku veka xifaniso esangwini kumbexana lexi nga ni xivumbeko xo fana ni xa munhu. Swi nga ha endleka a a ve ni xifaniso xa terafimi hikuva mbilu yakwe a yi nga helelanga eka Xikwembu. Kumbexana Davhida a a nga tivi nchumu malunghana na xona kumbe a nga va a xi tshikile hileswi Mikala a a ri n’wana wa Hosi Sawulo. (1 Tikronika 16:25, 26)—6/1, tluka 29.

• Xana milawu leyi Xikwembu xi yi vekeke malunghana ni ngati a yi kokela nyingiso wa hina eka yini?

Hi ku ya hi leswi Xikwembu xi swi vuleke endzhaku ka Ndhambi, eNawini wa Muxe ni le ka nawu lowu kumekaka eka Mintirho 15:28, 29, xi kokele nyingiso eka gandzelo leri katsaka ngati ya Yesu leyi halatiweke. Ngati yoleyo hi yona ntsena leyi nga endlaka leswaku hi rivaleriwa swidyoho ni ku va ni ku rhula ni Xikwembu. (Vakolosa 1:20)—6/15, matluka 14-19.

• I masingita mangani ya Yesu lawa ku vulavuriwaka ha wona eBibeleni?

Tievhangeli ti vulavula hi masingita ya 35 ya Yesu. Kambe nhlayo leyi kongomeke ya masingita ya Yesu ku katsa ni lama nga vikiwangiki a yi boxiwi. (Matewu 14:14)—7/15, tluka 5.