Xana Ku Tshembeka Swa Vuyerisa?

“KHAMPANI leyi u yi tirhisaka eka ndzindza-khombo wa swa vutshunguri yi ku hakerisa mali yo tala,” ku vula Karl, muyimeri wa khampani ya ndzindza-khombo.a “Loko wo joyina ya hina, u ta londzovota R120 hi n’hweti, kutani u ta va u dlele u kokela.”

Jens u hlamule a ku: “U nga va u tiyisile. Kambe se ndzi ni malembe ndzi tirhisa khampani leyi. Yi ndzi pfunile swinene enkarhini lowu hundzeke, kutani ndzi lava ku tshembeka eka yona.”

Karl u angule a ku: “Ku tshembeka hi swona. Kambe ku tshembeka ka wena swi ku koxa mali yo tala!”

Karl a a tiyisile. Hakanyingi ku tshembeka eka munhu swi koxa mali. Nakambe swi lava nkarhi wa wena, matimba ya wena ni ku tiboha. Xana ku tshembeka swa vuyerisa?

Vo Tala Va Bumabumela Mfanelo Ya Ku Tshembeka Kambe Vona A Va Tshembekanga

Eka nkambisiso lowu endliweke eJarimani hi Nhlangano wa Allensbach wo Kambisisa Mianakanyo ya Vanhu, 96 wa tiphesente ta lava ku vulavuriweke na vona va vule leswaku ku tshembeka i mfanelo leyinene. Nkambisiso wa vumbirhi wa Allensbach lowu endliweke eka vantshwa va malembe ya 18 ku ya eka 24 wu kombise leswaku vambirhi eka vanharhu a va teka ku tshembeka ku ri mfanelo leyinene.

Hambileswi ku tshembeka ku bumabumeriwaka hi vanhu vo tala, loko swi ta eka ku tshembeka hi koxe swilo swi va leswi hambaneke. Hi xikombiso, ematikweni ma nga ri mangani ya le Yuropa, a ku vi ni ku tshembeka kahle exikarhi ka vatekani kumbe swirho swa ndyangu. Swi tsandza ni vanghana vanene, hakanyingi a va ha kombisani vutshembeki. Naswona ku tshembeka loku khale a ku va kona exikarhi ka muthori ni muthoriwa kumbe n’wamabindzu ni vaxavi hi nga vula leswaku ku nyamalarile. Ha yini?

Minkarhi yin’wana mphesamphesa ya vutomi yi siya vanhu va nga ri na nkarhi ni matimba yo hetisisa vutihlamuleri bya vona bya ku kombisa vutshembeki. Lava va tshameke va hetiwa matimba hi vanghana va vona kumbexana sweswi a va ha tshembi munhu. Van’wana va nga va va hlangana ni vanhu loko ku ri ni mhaka yo karhi ntsena, ivi mundzuku va tiyela emahlweni ni timhaka tin’wana ta vutomi, va nga lavi ku byala moya wa ku tshembana ni vanhu vo tano.

Ku nga khathariseki xivangelo xa kona, vo tala va bumabumela mfanelo ya ku tshembeka kambe vona a va tshembekanga. Hikwalaho, ku tlakuka xivutiso lexi nge: Xana ku tshembeka swa vuyerisa? Loko swi ri tano, hi fanele hi tshembeka eka vamani, naswona njhani? Hi byihi vuyelo bya ku tshembeka?

[Nhlamuselo ya le hansi]

[Marito lama tshahiweke exihlokweni lama nga eka tluka 3]

Vo tala va bumabumela mfanelo ya ku tshembeka kambe vona a va tshembekanga