Wa Tsundzuka Xana?

Xana u swi tsakerile ku hlaya minkandziyiso ya sweswinyana ya Xihondzo xo Rindza? A hi vone loko u nga hlamula swivutiso leswi landzelaka:

• Xana swi ta koteka ku pfuxa n’wana loyi a feke a nga si velekiwa?

Vutomi byi sungula loko wansati a tika. Yehovha a nga pfuxa vana ku nga khathariseki leswaku a va ri ni mavhiki kumbe tin’hweti ti nga ri tingani va ri embelekweni hikuva “swilo hinkwaswo swa koteka eka Xikwembu.” (Mar. 10:27) Kambe Bibele a yi vuli hi ku kongoma loko xi ta va pfuxa vana lava feleke embelekweni.—4/15, matluka 12, 13.

• Hi nga dyondza yini loko hi xiyisisa vusokoti, timbila, tinjiya ni swipululu?

Swivumbiwa leswi swa mune swi kombisa vutlhari lebyi swi nga na byona hi ntumbuluko. Hikwalaho, swi endla leswaku vanhu va twarisa vutlhari bya Xikwembu. (Swiv. 30:24-28)—4/15, matluka 16-19.

• Hi xihi xiendlakalo xa nkoka eka Timbhoni ta Yehovha lexi endlekeke hi 1909 malembe ya 100 lama hundzeke?

Hi 1909 swirho swa le ntsindza wa Watch Tower Bible and Tract Society, ku nga nhlangano wa le nawini lowu tirhisiwaka hi Timbhoni ta Yehovha ku kandziyisa, swi rhurhile ePittsburgh, le Pennsylvania swi ya eBrooklyn, le New York, laha swa ha tirhelaka kona ninamuntlha.—5/1, matluka 22-24.

• Ha yini Bibele yi khutaza vanhu leswaku va pfa va miyela?

Yi kombisa leswaku ku miyela ku nga va xikombiso xa xichavo, ku nga hi pfuna ku anakanyisisa naswona i vumbhoni bya ku va ni vutlhari ni ku twisisa. (Ps. 37:7; 63:6; Swiv. 11:12)—5/15, matluka 3-5.

• Hi wihi ntirho lowu fanaka lowu John Wycliffe, William Tyndale, Robert Morrison na Adoniram Judson va wu endleke?

Hinkwavo ka vona a va rhandza Rito ra Xikwembu naswona va ri hundzuluxele hi tindzimi leti vanhu lava nga dyondzekangiki ngopfu va nga kotaka ku ti hlaya. Wycliffe na Tyndale va ri hundzuluxele ri ya eka Xinghezi, Morrison u ri hundzuluxele ri ya eka Xichayina kasi Judson u ri hundzuluxele ri ya eka Xiburma (etikweni leri sweswi ri vitaniwaka Myanmar).—6/1, matluka 8-11.

• I tihosi tingani ta le Yuda leti hisekeleke yindlu ya Xikwembu hi ndlela leyi hlamarisaka?

Emfun’weni wa Yuda wa le dzongeni ku fume tihosi ta 19, leti mune wa tona ti kombiseke ku hiseka koloko, ku nga Asa, Yehoxafati, Hezekiya na Yosiya.—6/15, matluka 7-11.

• Xana Vakreste hinkwavo lava totiweke lava ha riki emisaveni va katseka eku phameleni ka swakudya swa moya?

Doo! Hinkwavo lava totiweke hi moya wa Xikwembu va vumba ntlawa wa hlonga ro tshembeka ni ro tlhariha, kambe lava vumbaka Huvo leyi Fumaka hi vona va langutelaka ku phameriwa ka swakudya swa moya.—6/15, matluka 22-24.

• Ha yini masocha ya Varhoma ma navele nguvu ya Yesu ya le ndzeni?

Masocha lawa a ma ri kona loko Yesu a dlayiwa a ma avelananga ha yona nguvu yakwe. Hi ntolovelo, loko ku rhungiwa nguvu yo tano a ku hlanganisiwa malapi mambirhi, kambe nguvu ya Yesu a yi nga ri na ndzhungo, leswi a swi yi endla yi va ya nkoka swinene.—7/1, tluka 22.

• Ha yini ku nga vuriwaka leswaku rirhandzu hi rona a ri hambanisa ndlela leyi Yesu a a va khoma ha yona vanhu ni leyi vafundhisi a va va khoma ha yona?

Ematshan’weni yo rhandza swisiwana, vafundhisi volavo a va swi nyenya. Ku tlula kwalaho, a va nga xi rhandzi Xikwembu. Yesu a a rhandza Tata wakwe naswona a a va twela vusiwana vanhu. (Mat. 9:36) A a va rhandza, a va twela vusiwana a tlhela a va komba musa.—7/15, tluka 15.

• Ha yini vatekani swi nga ha va tikelaka ku tirhisa mali, naswona i yini leswi nga va pfunaka?

Hakanyingi ku holova hi mhaka ya mali swi vangiwa hi ku nga tshembani kumbe ku chava, naswona vatekani swi nga ha endleka va nga kurisiwanga hi ndlela leyi fanaka. Swilo swa mune leswi nga pfunaka mimpatswa hi leswi: Dyondzani ku vulavurisana kahle hi timhaka leti khumbaka mali, pfumelelanani hi ndlela leyi mi nga ta yi tirhisa ha yona mali ya n’wina, tsalani ehansi swilo leswi mi nga ta swi endla hi mali ya n’wina naswona hlelani leswaku i mani la nga ta xava ni ku hakelela swilo swo karhi.—8/1, matluka 10-12.