Dyondzo Ya Mavunwa 5: Mariya I Mana Wa Xikwembu

Xana dyondzo leyi ya mavunwa yi huma kwihi?

“Ku gandzeriwa ka mana wa Xikwembu ku sungule ku andza loko . . . vujagana byi sungula ku nghena hi xitalo etikerekeni. . . . Leswi a va pfumela eka swona swin’we ni ripfalo ra vona hi tlhelo ra vukhongeri [ku nga leswi teke ni vujagana eka Vukreste] se i magidi ya malembe swi sunguriwile hi ku tirhisa vugandzeri bya ‘mana lonkulu’ la nga xikwembu-kati swin’we ni ‘nhwana wa le henhla’”—The New Encyclopædia Britannica (1988), Vholumo 16, matluka 326 na 327.

I yini leswi Bibele yi swi dyondzisaka?

“U ta tika embelekweni wa wena, u ta veleka n’wana wa jaha, vito ra yena u ta n’wi thya Yesu. Yena u ta va lonkulu naswona u ta vuriwa N’wana wa La nge Henhla-henhla. . . . Hikwalaho ka sweswo lexi nga ta velekiwa na xona xi ta vuriwa lexo kwetsima, N’wana wa Xikwembu.”—Marito lawa hi lo voyamisa; Luka 1:31-35.

Ndzimana ya Tsalwa rero yi swi veka erivaleni leswaku Mariya a a ri mana wa “N’wana wa Xikwembu,” ku nga ri mana wa Xikwembu. Xana Mariya a a ta swi kota ku tika Loyi hambi ku ri matilo ‘hi woxe ma nga n’wi ringaniki’? (1 Tihosi 8:27) Mariya a a nga ta swi kota sweswo. I dyondzo ya Vunharhu-un’we leyi vangeke ku pfilunganyeka malunghana ni leswi Mariya a nga swona. Ehubyeni ya le Efesa hi 431 C.E. ku vuriwe leswaku, leswi Mariya a vuriwaka Theotokos (ku nga rito ra Xigriki leri vulaka “Mutswari wa Xikwembu”) kumbe “Mana wa Xikwembu,” sweswo swi pfule ndlela ya leswaku a sungula ku gandzeriwa. Doroba ra Efesa, ku nga laha huvo ya kereke a yi khomeriwa kona, se a ku ri malembe yo tala ri nghene hi nhloko eku gandzeleni ka xifaniso xa Artemi xikwembu-kati lexi endlaka leswaku vanhu va kota ku veleka.

Hikwalaho leti a ku ri tindlela to tala to gandzela xifaniso xa Artemi lexi “weke xi huma etilweni,” to fana ni ku gandzela Mariya loku a ku endliwa hi mintlawa. (Mintirho 19:35) Xiendlo xin’wana lexi nghenisiweke hakatsongo-tsongo etidyondzweni ta Vukreste a ku ri ku tirhisiwa ka swifaniso swa Mariya ni swin’wana evugandzerini.

Ringanisa tindzimana leti ta Bibele: Matewu 13:53-56; Marka 3:31-35; Luka 11:27, 28